الطموح و العمل والمثابرة والالتزام وقليل من المشاغبة تكون الحياة ناجحة

Tuesday, March 14, 2006

ندى

دخلت ندى مكتب المحامى وهى اللى عمرها ما راحت مكان بدون اهلها لكن اول مرة تتخذ هذا القرار انها تبدى حياتها فى قرار جرئ نفس هالقرار يمكن ان تتخذه بنت
ندى تتمتع بنعومة غير طبيعية وادب جم لكن الحياة كانت ضدها وهى بنت عمرها 24 سنة مرت فى أسوأ ما يمكن تمر فيه بنت بعمرها او فى جيلها
تزوجت ندى من شخص وهى كانت بنت 19 سنة والله عطاها ولد ترس حياتها عليها لكن اهى بنت وتبى تعيش حياتها الزوجية بسعادة وهالشى يتطلب امور كثيرة لكن المفاجأة كانت انها من بدايات زواجها لاحظت ان زوجها فى شى غريب بأن يتأخر ولما يرجع البيت على طول يحط راسه وينام كان فى شى غلط لكن البنت ما كانت شايفة هالامور فى حياتها لكن استوعبت بعد سنتين زواج ان زوجها يشرب ويسهر الليل كله ويرجع بالليل يحط راسه وينام واهيا صارت مثل ما يقولون على الرف
البنت بدت تحس بجفاف وبرود فى حياتها بشكل قام يؤثر على نفسيتها وكل ما كلمت امها قالتلها انتى تتدلعين
وماكو شى وما قدرت تقول حق اهلها ان زوجها يشرب لكن الامور كانت تتطور من اسوأ لى اسوأ والحلول كل ما لها وتقل لى ما يوم وقفت وقالت حق ابوها و امها خلاص حرام عليكم شوفونى شلون صرت ذبلت انتهيت صار ويهى جنى وحدة عمرها اربعين سنة وانا تونى بعز شبابى واخيرا اختاروا الاهل بعد محاولات مع الزوج بالاصلاح لكن دون فائدة وكان الزوج يبطل شهر ويرجع اسوأ من ما كان لكن كان الحل النهائى الطلاق
رجعت ندى حق حياتها وبدأت تشوف الدنيا وتضحك وبدأت تهتم فى ولدها لكن دخل حياتها شخص من غير مقدمات لقت اللى كانت فاقدته بكل حياتها واهو الامان حست ان فى شخص يبى يمد ايده لها بدون مقابل لكن هالشخص كان يصادف مشاكل عديدة وصارحها بعدم مقدرة بالزواج منها واقتنعت وظلت معاها وكانت تطلب ان تجمعهم لقاءات فى اماكن عامة ويقعدون بالساعات ضحك وغشمرة وكانت ندى تحس ان اليوم اللى تشوف فيه عبدالعزيز واهو اسم الشخص اللى دخل حياتها يوم عيد
بدأت حياة ندى تتغير وفجأة يتلها اختها الكبيرة وقالت لها ندى انتى الحين وحدة مطلقة وتدرين ان نصيبج وفرصج بالزواج الثانى قليلة وخصوصا ان عندج ولد فى واحد خاطبج واهو يصير ولد خالة زوجى وخوش ولد وطيب وحبوب وراهى وصدقينى البنات يتمنونى وكانت ندى شايفته مرة او مرتين وتذكرته ان صج مبين عليه خوش ولد لكن عبدالعزيز اللى بحياتها بس فكرت فى مصلحتها وقالت خل انهى علاقة مؤقتة واستقر
تزوجت ندى من فهد ومن اول ليلة كانت الصدمة كانت ليلة باردة مو نفس اول ليلة زواج الزوج ما لمسها
قالت يمكن تعبان ثانى يوم نفس الشى ولمدة اربع شهور على هالحالة لكن اهيا من ثالث يوم سألته انا مضايقتك بشى او انك تحسفت انك تزوجتنى ما رد عليها
والاخ كل نهاية اسبوع ياخذ الجنطة ويقولها انا رايح البر او الشاليه وترجع الحياة الباردة وتعيش فى قلق لكن ما كان يميز ندى وجود قوة داخليه فيها بالرغم من انوثتها الطاغيه انها تبى تعرف شنو اللى قاعد يصير
واكتشفت ان زوجها الثانى ما هو الا عبارة عن شخص من الجنس الثالث وانصعقت البنت كانت تحس انها متوهمة لكن اللبس الضيج والحجى المايع والمكياج اللى يختفى والعطور النسائية اللى تنقص كلها دلائل
حست ندى بضعف وانكسار المرأة فى مجتمع غبى يحكم على الانسانة المطلقة بالرضوخ حق مطالب اى شخص يطلب الزواج منها رغبة بس بالستر اللى اشباه الذكور من الرجال ما عرفوا شنو قيمة ومعنى الستر
قررت انها تروح حق المحامى وتطلب بنفسها الطلاق للمرة الثانية وانهاء معانتها حتى لو كان راح يطلق عليها لقب مطلقة للمرة الثانية
وسلمولى على اللى يهوهو ولا يتحرك يسوى شى

By Mishari 2006

8 comments:

Яeema said...

very SAD story!
el7emdella 3ala kelshay

emtalega emtalega , wala hal bah'thala wel amraaath estaghfar allah .


enta min ween etyeeb hal storyes!

NaDiA AnZa7a said...

قصة اضيق الخلق .. ساعات الوحدة تكون على قدر كبير من الجمال بس حظها قليل

لازم تتطلق .. الطلاق مو نهاية العالم

وان يتفرقا يغني الله كل من سعته

بس كانت المفروض تتحذر من خطوة الزواج مرة ثانية كان المفروض تسأل وتسأل وتسأل لان التجربة الثانية اصعب من الاولى
لان اذا تطلقت مرة ثانية بحطون اللوم عليها حتى لو كان الزوج الثاني اهو العلة
مشكور على هالقصة اللي صرنا انشوفها في كل بيت مو بس ندى

nOOna said...

مسكينه هالندى وين ماتطقها عويه القصه حزينة احداثها تضيق الخلق بس هذي الاشياء او بالاحرى الطلاق مرتين مو معناته نهاية العالم بالعكس هالتجربة تزيد الوحدة خبره وقوه والحكمة في اتحاذ امر مثل الزواج اذا فكرت انها تتزوج للمرة الثالثةما اقول الا الله يصبر قلبها ويخللها ولدها
وسلامتكم

lawyer said...

انا عن نفسي عرفت بنت وياي في العمل انخطبت حق ولد عمها سنه كامله و ملجه سنه كامله ما شافته ابدا فيها لان عاداتهم و تقاليدهم ما تسمح ... وبعد سنه كامله تزوجت و شهرين ما دخل عليها
الي ادها و الامر ان انا الي عرفتها ان زوجها اهو جاي لانها ماكانت تفهم المسجات الولد خريج امريكا كل مسجاته في الموبالي في لهجه امريكيه بحته واهي مرا يتني تبجي مو فاهمه شي و اهي نوعها من تشوف مسج في موبايل زوجها ترسله لنفسها و تحتفظ فيه كدليل
وبعدها بعد ما عرفنا ان زوجها \ مو جنس ثالث و لكن لوطي
بما ان اهو ولد عمها
فابوها قالها مستحيل اذبح اخوي و اقوله ان ولدك جذي
راح اخذ الولد ووداه المحكمه و تطلقو بسكات
و البنت الحين انحرفت انحراف كلي
نتيجه ان اهملت و طعنت في انوثتها
رده فعلها خرعتني لدرجه اني احس انها مو نفس البنت الي تعرفت عليها
غيرت شغلها شكلها لبسها
محور حياتها صار الجنس و اشلون انها تصطاد رجل كفريسه و بعدين اشولون تتمتع و اهي ترفسه بعد كل مرا تمارس وياه الجنس !!!

NaDiA AnZa7a said...

لوير :
ماقول الا اللهم لا تبلينا
والحمدالله على نعمة الايمان
كل انسان يا فطوم له رد فعل على مصايبه اللي الله يبليه فيها
ممكن الانحراف وممكن التدين
وعسالله يجعلنا من الصابرين المحتسبين

غريب said...

وايد عجبني اسلوبك الله اوفقك
مع تحياتي

Anonymous said...

best regards, nice info »

Anonymous said...

Enjoyed a lot! internet software lipitor