الطموح و العمل والمثابرة والالتزام وقليل من المشاغبة تكون الحياة ناجحة

Saturday, April 08, 2006

الحريم


حريم 1

يوم الخميس اللىطاف كنت اتمشى مع الربع فى احد المجمعات وبما ان طلعتنا طلعة عزوبية واهيا ما تفرق بالنسبة لى لان الوضع واحد اللى اسويه مع ربعى اسويه مع مرتى امشى واعلق
لفت نظرى شاب جدا شكله محترم غترة وعقال وسماحة فى الوجه وكانت يمه بنت ابليس ؟ نعم بنت ابليس هذا اللقب اللى اقدر اطلقه عليها واهوا بعد ما شفتها معها اقول هالشخص ماكو شخصية ليش؟
البنت كانت متحجبة ولا بسة هدوم ومو لابسه بتقولون شلون السيدة المحترمة لابسة ملابس ضيقة لدرجة ان لو تعطس تنشق هدومها من فوق لى تحت كل تفاصيل جسمها عرفنها من الرقبة مرورا بالمنطقى الوسطى لى غاية الرجل المشكلة ان كنت رايح اصلى والاخت تتمخطر جدامنا مع زوجها المصون واللون البرتقالى الفاقع وتمشى ولا يهمها نظرات الناس ؟ نظرات الناس شنو بعد والله انا عبيط ؟ اذا ما خافت من ربها وطلعت بهالصورة القبيحة وانا والله اول ما شفتها ادعى واقول الله لا يبلينا باهلنا ما ادرى شنو هالقدرة على عدم احترام الحجاب
والقدرة على عدم احترام الزوج والتمشى بهالصورة
والرجل بهالمواقف يتحمل الحمل الاكبر فاللى يسمح ان اهله يبلسون لبس غير محتشم ومفصل الجسم هذا انسان ديوث والله يعينه على نفسه وعسى الله لا يبلينا
لما البنت تكون بروحها طالعة ممكن نحط العذر حق الريال ان ما شافها او طالعة مبدلة فى بيت صديقتها لكن بهالشكل المزرى الله يستر على بناتنا وبنات الناس لان الوضع وصل مرحلة ما يصير يسكت عليها

حريم 2

انتخابات المجلس البلدى التكميلية فى الدائرة الخامسة الرميثية اثبتت على وجود نقص بالحريم وعقدة الغيرة فيهم من بعض جنان بوشهرى مهندسة متخصصة محتشمة وفوق هذا تشتغل بالبلدية اللى صوتوا لها من الذكور اكثر من الحريم ليش؟ مع ان اصوات الحريم اكثر من اصوات الريايل ما ادرى متى هالعقلية تنتهى ويصير التقييم على اساس الشخصية والمؤهلات العلمية بدلا من انجاح شخص التصويت له يتم على اساس قبلى وطائفى شخصيا ما اعرف المهندسة جنان بوشهرى ولكن تابعت لها برنامجين حواريين بالاضافة الى مقالات بالصحف المحلية والاشادة فيها كانت كبيرة من كل الناس ولكن اقول حق الحريم اللى ما صوتوا لها مالت عليكم محترين لانها احسن منكم جان صرتوا مثلها وشديتوا حيلكم بدال جاى الضحى والقعدة والحش مالت

حريم 3
ما حدث فى مباراة القادسية وكاظمة ودخول بنات مزلطين واكثر من مزلطين شبه عاريات ما هو الا غزو انثوى فى مقر ذكورى واللى صارلهم يتحملونه وزين يسون فيهم علشان يكنون عبرة لمن يعتبر انا مو ضد ان البنت تدش الملعب لكن احترمى انج تدخلين وتكونين داشة جدام ناس من كل فئات المجتمع وهم اقول مالت وكان ودى احط الصورة بس ما حبيت اعور عيونكم باشياء تلوع الجبد

وسلمولى على اللى يهوهو ولا يتحرك يسوى شى

16 comments:

lawyer said...

اول شي حمدلله على سلامتي
وني راجعه من السفر

حريم1
اي والله انا بعد وايد استنكر هالظاهره شالي حادها تتحجب يوم ان عندج هالديوث ما ظنيت يفرق وياه حجاب او لألأ

حريم 2

مدري عنهم

حريم 3
عمى بعين عدوهم حتى عمى
والله هذولا مال قصاااااااااب في نايف شوي عليهم
وقحااااااااااااااات

@z3nF said...

للاسف مفهومهم الان عن الحجاب هو غطاء الشعر فقط و اخفائه عن عيون الرجال
لا ادري هل الشعر في نظرهم فاتن و مثير للرجل ؟؟؟

احياناً الوم المشايخ في عدم ايضاح المعنى الحقيقي لاية الحجاب
او التساهل في الافتاء الى الدرجه التى نراها اليوم في الدول الاخرى و سوف نراها غداً عندنا لا محاله

هنا اذا مشى الرجل بجانب اخته او زوجته و هي تلبس عباءه ضيقه بفتحه على الصدر و يجاهدن حتى تظهر المرتفعات و مكياج للعيون ثقيل جداً لو انها ذاهبه لحفل لم تضع نصف التى تضع للسوق نطالعهم و نقول الله يخلف بس
ما يعرف بنواياها

الله يهدي الجميع

chatterbox said...

حريم 1:
عاد حلوة والا جيكرة؟؟ يعني لو حلوة نقول مغترة بجمالها بس لو جيكرة شنقول بعد الله لا يبلانا انشالله اعوذ بالله منهم

حريم 2:
مدام انك قلت مالت فانا بقول مالت علي!! اي صج مالت علي لان بطاقتي على منطقة رميثية بس انا ولاعمري سكنت هناك لاسباب مو مجال شرحها اهني المهم
ولاني دايخة ومخي مايستوعب ولايربط الاشياء مع بعض فانا ما تذكرت ان بطاقتي على رميثية الا لما خلصت الانتخابات وبالاحرى انا ما تذكرت لأ زوجي ذكرني وما كان يبي يقولي قبل لان ضد حقوق المرأة :(
وعجبي!!!.؟

حريم 3:
مع احترامي لك بس هذول مو حريم من النوع اللي نعرفه هذول كائنات بشرية مثل البكتيريا والطحالب لازم تتخلص منها قبل لا تتنتشر

واسفة عالقرقة بس نكي اسم على مسمى
سوري

الحجيه said...

السلام عليكم جميعا
أخ مشاري اشكر دعوتك لي بالمشاركة ولك كل التقدير والاحترام
(1) حريم:
ياخوي المشكلة هي اساس البيئه التي تربا فيها الانسان الاسرة هي الي تزرع القيم والاخلاق والدين حتى يثمر ثمر طيب من الاخلاق والتصرفات , ف مظهر الانسان يدل على اصل البذره طيبه او خبيثه
* * *

هِـيَ الأَخْـلاقُ تَنْبُـتُ كَالنَّبَـاتِ

إِذَا سُـقِيَـتْ بِمَـاءِ المَكْـرُمَـاتِ

فَكَيْـفَ تَظُـنُّ بِـالأَبْنَـاءِ خَيْـراً

إِذَا نَشَـأُوا بِحُضْـنِ السَّـافِـلاتِ

* * *

(2) حريم :
يوم انتخابات البلدي كنت اسمع اذاعة البي بي سي مقابله مجموعه من الناخبات بس لفت نظري جواب واحده لما سئلها المذيع تنتخبين على اساس قبلي ولا غيره الجواب كان كالصاعقه على عندما أجابة نعم واكيد على اساس قبلي والي مافي خير باهله مافي خير لوطنه والقبليه وطنيه قوميه!!!!
لاتعليق

(3) حريم :
اعتقد الجواب نفس حريم (1) ولاكن السؤال الي يطرح نفسه اشلون سمح لهم بالدخول بهل لبس!؟
* * *
وَإِذَا أُصِيـبَ القَـوْمُ فِـي أَخْـلاقِهِمْ

فَأَقِـمْ عَلَيْهِـمْ مَـأْتَمـاً وَعَـوِيـلاَ

( أحمد شوقي )

Unknown said...

gahwah: شكرا للمشاركة ولكن حالنا بالكويت مزرى ويعور القلب والله يعينا

lawyer: الحمدالله على السلامة
الحجاب مشكلة صار بدال ما اهو نعمة صار نقمة المفروض يكون ستر صار تفصخ والله يعين

@z3Nf:والله ما ادرى شقول بس اللى اتفق معاك فيه ان لازم تكون فيه توعية من المشايخ وحملات اعلامية بتوضيح شنو اهوا الحجاب

nadia anz7a: انا دعيت ربى مليون مرة ان الله ما يبلينى باهلى ولكن هذا الوضع ما يصير الواحد يسكت عليه ولازم ان الواحد يتكلم عنه
chatterbox : والله يا اخت شقولج بس الجكر والحلاة ماله شغل بالستر بس المشكلة ان البنات ما فيه الحين وحدة جيكرة الجيكرة تضعف نفسها وتسوى جسمها مثل عارضات الازياء علشان تلفت النظر بجسمها بس كلها اشياء غلط ويحسبون ان الريايل ما يدرون عنها انا اعرف رياييل وايد لما يدورن حريم يدورن هالنوعية بس مع الاسف محسوبين علينا ريايل

الحجية :لصراحة وبدون مبالغة استمتع بوجودج يا اختى للاحساسى بعمق تفكيرج وفكرج وادبج الجم واهتمامج بقضايا عامة نادر ما الواحد يشوف اخت عزيزة مثلج تهتم بهالامور ولكن مشكلة المجتمع الكويتى وخصوصا بعد الغزو صار الناس عندهم حساسية زايدة من اللى يقولهم غلط او حرام او شى يمنع فعل مشين انا ما اقولج ان خالى من العيوب ولكن كل انسان اذا ما ساهم فى اصلاح مجتمعه راح المجتمع كله يوقف
ومشكورين كلكم من قهوة لى غاية لاخت الحجية

Unknown said...

chatterbox:الصراحة اعتب عليج لانج ما انتخبتى وخصوصا ان المجلس البلدى ما يقع تحت الولاية العامة وقعدى مع ريلج فرى راسه شوى :)

3ateeja said...

السلام عليك اخيي مشاري
اخوي مشاري كل الكلام اللي قلته على عيني وعلى راسي
لكن كلمة ديوث شرعا مو بمحلها
لأن تعريف الديوث هو الرجل الذي يرضى الفاحشه في اهله ..مو الذنب وعدم الغاريه و و و و..هذا يندرج مدرج آخر ..اما اذا تبي اللفظ عامي فممكن تطلق لفظ ديوث على اصناف كثيره من الرجال
حريم 2
بالنسبه لي شخصيا ..حنان ونعم وبرنامج انتخابي واضح وشامل..لكن حضرتك ما ادري اذا كنت تعلم بأعداد الناخبات..وتقسيماتهم بالدائره الانتخابيه ...نفسها ..يعني المسئله ماهي مسئلة اطلاق احكام وبس ..المسئله محتاجه قياس ..اكثر منها كلام وانا اختك
وكون حنان الثانيه رغم الفجه اللي بينها وبين صويلح الا انها في نظري انتصرت انتصار بليغ..
الموقف الثالث موجود في مذكرات انسان بسيط وعلقت عليه لكن ما يمنع اني اعلق عليه عند اخيي مشاري
قول آمين
عسى الله لا يبلانا ..ووجودهم في هذا المكان وبهذا اللبس غلط ..وله عدة علامات استفهام ..ومثل ما سمعت بالرادو ان امهم وابوهم امطلقين ..فشكلهم يبون يعطون اهلهم كف وفضيحه..والله اعلم لآن تصرف غير طبيعي في مكانه الغير طبيعي ..:)
ويعطيك العافيه اول وتالي
ام مضحي

الاء سعود المجيبل said...

سمعت عن سالفة المباراة والله طلعت صج!!!!!

حمد الله والشكر بس الله يستر عليهم بس...:)

يعطيك العافيه...:)

Unknown said...

3ateja: عدد الناخببين اعرفه وقاريه قبل الانتخابات والشى الطبيعى ان اصوات الحريم اكثر من الريايل بس اظل اصر على رايى الحريم طالبوا بوجود الحق فى التصويت لهم لعقلانيتهم فى التصويت ولكن ظهور الميل القبلى من الجانب الانثوى ظل نفس ما اهو موجود عند الذكور والوضع السياسى والوعى الانتخابى اصلا عندنا يفشل ماكو تربية سياسية عندنا وفى فئة من الناس مثل الغنم شنو ينقالها تمشى

q8ya: شكرا على المشاركة والله يا عزيزتى اتوقع كانوا يحسبون انهم فى مباراة برشلونة
زين اللاعبين ما هدوا المباراة وجابلوهم مو من زين الكرة عندنا بالكوت علشان لاعبينا يدودهون

Яeema said...

yah yah yah shal kalaaaaaaaaaaaaaaaaam!
أهدك 4 أيام ألاقيك طاب فيننا

بس والله معك حق
أنا إشذنبي أشوف هالمناظر

مادري ليش يعني!

حريم 2
مادري شالسالفة

حريم3
أمبييه صج؟

الظاهر بيروحون المسيلة و ضيعو الطريق

Яeema said...
This comment has been removed by a blog administrator.
ii said...

مشاري الله يخليك .. خل التعليقات تطلع بصفحه لحالها
لانه من جد تتعب بالقرايه

Unknown said...

Reema:مختصر مفيد شكلج حق كل فقرة برافوا:)

noona:شالهغطة وينج ما تبينين والا اخاف مسوية ريجيم؟ ولاهية
انا اتفق معاج بكل شى قلتيه بس اختلف معاج بان مالج ميول انتخابية اذا انتى بنت الديرة تقولين جذى ابو فراس شو بدو يكووول؟

se3loah :حاضرين بس ودى اعرف شنو اللى تبينه وترى احنا بالشوفة احسن صمونة من مطعم كباب وقوطى بيبسى باااار يسرسح علشان الياهل الخاكى اللى حاطته وسلميلى على اهل الرياض:)

gaFsHa ;p said...

حريم 1 ..
ولله في خلقه شؤون
اعتقد فيها نقص ..
و هذيلا اللي يلبسون جذي و يطلعون شعورهم
عاده يكونون مغصوبين على الحجاب يوم كانوا صغار !!

حريم 2 ..
الدائره الخامسه ..
غالبا ما تكون محسومه للبدو او للعوازم بالتحديد لان البدو فيها اغلبيه و لان الممثل السابق لهالدائرة السيد عبدالله المحليبي .. عازمي بدوي !!

بالنسبه لجنان بوشهري .. تمنيت انها تنزل بدائرتنا عشان اصوت لها ..
و ابارك لها حصولها على المركز الثاني و هالعدد الكبير نوعا ما من الاصوات
اعتقد لو ان المرشيح الشيعه اتحدوا مع بعض جان فاز احدهم .. =/
ادري ان الانتخابات الفرعيه ممنوعه بس قاعدين يسوونها و يدرون عنهم الحكومه ..!!

حريم 3
استغفر الله
هذيلا مادري شنو ..
و بعدين ما حسوا بالعيب و الناس خز فيهم ..
اعتقد خذوا جزاهم من نشر صورتهم مع ان اتوقع ما همهم هالشي ..

الله يستر علينا و على خواتنا و بناتنا


شكرا لك اخوي ..

Яeema said...

يعني قاعدة برة إشبقول
والله مادري عن أخبار الديرة

إنشاء الله أول ما أرجع أكتبلك معلقة

خير الكلام ما قل و دل

مو كل يوم أقولك منظر الحريم إييب تلوث بصري هالأيام

يا حلوهم والله إللي يتشرهون

:*

Unknown said...

Edelstein مشكورة اول شى على هالاطراء باختيار المواضيع وهو هذا الصح ان نقص بالاضافة اى ضعف عقليه البنت الكويتية اللى تبى تبرز اللى فيها دون تفكير او حياء

Mz GaFsha: شكرا للمشاركة الاولى لج فى مدونتى واتمنى ما تكون اخيرة وكل كلمة قلتيها صح وانشاء الله تنزل مرشحه عندكم نفسها وتصويتن حق الشخص اللى يستاهل

Reemaa: الاماكن