الطموح و العمل والمثابرة والالتزام وقليل من المشاغبة تكون الحياة ناجحة

Sunday, April 16, 2006

what women need? (موضوع حار)



ادرى ان موضوعى هالمرة شوى حساس بس انا كاتبه علشان ابى استفيد من التعليقات اى مرة بالدنيا لها احتياجات اساسية من الرجل وانا قعدت افكر وتوصلت حق جم شغله اساسية وابى اعرضها واشوف الاراء

الرعاية caring

الرعاية قبل الحب وهو احساس المرأة بانها فعلا محل اهتمام أولى للرجل وليست شئ ثانوى فى حياته
وان ظروف الحياة لا يمكن تخليه يحيد بالنظر عن شريكة حياته وتكون تحت رعايته كانها طفل صغير ولكن هذا مو فى كل الحالات حيث المرأة تحتاج للشعور ايضا فى الاستقلالية


الحب loving


الحب هو احد المتطلبات الاساسية فى علاقة اى شخصين ولكن لما يكون الحب بين رجل وامرأة يجب ان يكون الحب نابع من مكان واحد بدلا ان يكون الرجل مشتت الذهن ومشكلة اغلب الرجال انهم ما يحبون لانهم ما يشعرون فى الحب والبعض الاخر معرض للاهمال علشان هالشى فقد قدرته على العطاء

الامان securing

اغلب النساء لا يشعرون بحياة امنة وخصوصا بوجود بعض النساء الاخريات ممن يتفنون بتخريب اى علاقة سواء حب طاهر او علاقة زوجية والرجل مسؤوليته توفير هذه الحاجة الماسة لطبيعة المرأة التى مهما بلغت تحتاج للشعور بالدفء عن طريق الامان

التزين

وهو قد يكون
مفهوم جديد للرجل ليش بس المرأة مطلوب منها انها تضعف وليش المرة مطلوب منها انها تكشخ حق الريال فى نفس الوقت الرجل مطلوب منه هالشي ان يلبس ويكون حالق وشكله مرتب وريحته حلوة ومطلوب منه ايضا ان يكون جسمه حلو مهما بلغت المرأة من ادب جم واخلاق هم اهيا لها حاجة انها تشوف زوجها بشكل حلو علشان ما تبدى تقارن لان بمجرد وصولها لمرحلة المقارنة تكون فى مرحلة حرجة ترى حتى فى الروايات الدينية والله العالم مطلوب من الرجل ان يتزين لزوجته

هالاشياء اهيا اللى قدرت اتوصلها وراح استفيد من مشاركات بنات حواء لانهم اكيد اخبر بهالموضوع
وسلمولى على اللى يهوهو ولا يتحرك يسوى شى

25 comments:

gahwah said...

salam,
i liked your subject today, all women need the things you said you a absolutely right, but you missed some things all women in need it is respect.. lots of men dont respect their wives and insult them infront every1..... i can write pages about this subject

sarah said...

ممكن سؤال
انت متزوج؟؟؟
ترا انا مو متزوجة
واتمنى اتزوج واحد بتقكيرك
وحنى لو انت متزوج مافيها شي الشرع حلل اربع
والزواج زين وستر للمراة والرجال
بس انشالله ماتكون متزوج
وترا احنا مانطلب مهر واجد ونشري الرجال اللي مثلك وشرواك وياهلا والله
قلت لابوي انك بتخطبني باجر
:)

NewMe said...

I totally support Qahwah… All what any women need from a man is RESPECT… Love, care and all come inevitably…

In fact, I live a life based on 3 passions:

1- RESPECT every living creature… You are no better than them!!!
2- LOVE unconditionally… No one is Perfect!!!
3- LEARN as much as you can… That is your only way to success!!!

Interesting post… It feels good to know men actually try!!!
I hope one day they will learn to deal with our mysterious complex personalities!!!

layal said...

تختلف حاجات انثي عن اخرى
قد تحتاج لمن يحاورها اكثر من ان ينظر لها كشكل خارجي والسلام
من يقدر حاجاتها وتضحيتها
في المقابل ما هي احتياجات الرجل ؟؟؟

lawyer said...

اي والله انك صاااااج يا مشمش
اول مرا في حياتي اتفق وياك
طبعا اكييييييد
كل كلامك عدل في عدل

خلني اقولك شغله المرأه مهما اكبرت تبي في نهايه اليوم كلمه حلوه لمسه حنونه
تبي تنام و تحس ظهرها مستند على شي قوي
خلني اقولك سالفه وايد اثرت فيني
رفيجه امي امرأه ثريه جدا جدا جدا

ملايينها لا تعد و لا تحصى
مو متزوجه و اهي كبر امي الحين عمرها بيصير 50 يعني
امي تسولف معاها و انا قاعده ساكته عيني في القهوه على الي رايح و راد لكن من سمعتها قالت كلمه اخترعت
ما صدقت
قالت حق امي
فلوس و عندي
خير و عندي
لكن ما اغنتني عن حاجتي لرجل في حياتي
انا كبرت و كان ابوي خايف من الرياييل يطمعون فيني
ما درى فلوسي كلها بتروح حق الخدم
الي يبوق و الي يشتغل و الي يطلب
لو عندي ريل و اعيال اصرف عليهم
بس في نهايه العمر يقولون عني حرم فلان
او ام فلان
اكو واحد يناديني يماا!!
اكو ريال اتهاوش وياه
يقولون فلانه مرضت من ريلها حسر فيها
بس ما يقولون فلانه ينت من الوحده !!!

عووووووورت قلبي
امي قالتلي سمعتي شتقول
بس من يعتبر

الحجيه said...

السلام عليكم جميعاً
الموضوع أساسي ومتشعب لابد أن نعرف ماهو مفهوم الزواج أولاً http://www.balagh.com/matboat/osrh/31/r50xn895.htm وبعد ذلك نعلق على الموضوع . بالنسبة للرعاية هي الطيبة , الحنان ,عطف والرحمة يحتاجها الطرفين ماتتصورون شنو مفعول الرعاية والاهتمام على الأنسان تعطي الواحد طاقه لامحدودة للعطاء بكل المجالات , نشوف شلون الماء برقتة يفتفت أقوى الحجر عليكم بالحنان والرعاية هم مفاتيح الهدوء و السعادة

أما بالنسبه للحب فهو منبع كل شيئ طيب بالحياة الزوجة , لان بالحب استطيع أن أتنازل عن بعض الأشياء للطرف الأخر حتى تستمر الحياة والشعور يكون متبادل بين الطرفين , اذا كان الحب موجود كل شيئ بيهون لان كل طرف بيلتمس العذر للآخر ويكون العتب هو ملح الحياة الزوج




الأمان هو الأيمان بالله وطاعة والابتعاد عما نهانا عنه
وَاتَّــقِ اللهَ فَـتَقْــوَى اللهِ مَــا

جَـاوَرَتْ قَلْـبَ امْـرِىءٍ إِلاَّ وَصَلْ

لَيْـسَ مَـنْ يَقْطَـعُ طُـرُقاً بَطَـلاَ

إِنَّمَـا مَـنْ يِتَّقِـي اللهَ الـبَطَـلْ

( ابن الوردي )
بتصوري ان الايمان والتقوى هم صمام الأمان لكل شيئ بالوجود فمابلكم بالحياة الزوجه

التزين او النضافة والمظهر الائق الغير مزعج لابد منه للطرفين لان هذا من حق الطرفين حتى تستمر الحياة الزوجية بدون مشاكل
http://www.ibnothaimeen.com/all/books/article_17004.shtml
وفي الختام بقول أن أساس السعادة الزوجية هو التفاهم التفاهم التفاهم بين الطرفين , وصفاء النية اذا احد يشد الثاني يرخي حتى لاينقطع الحبل وبعدها مايفيد الندم ابد . واعتذر على الاطاله

wwwwwww said...

كل الكلام إللي قلته و قالوه الجماعة صحيح 100% المره تحتاج أول شي الحب
ثم الاحترام.. الاهتمام.. الأمان.. التزين.. و فوق كل هذا التضحية
إنها اتحس إن هالزوج إبدّيها على عمره و يفديها بروحه.. هذا صج الريّال اللي تحتاجه كل وحدة
لما يتجرد الريّال من الأنانية إللي يتصف فيها معظم رياييل هالوقت
راح إكون فعلا الرجل إللي تتمناه كل مرأة
و أكو شي ثاني يمكن مو الكل يتفق معاي فيه
بس أنا ما أقدر أعيش مع إنسان إسمه زوجي إلا لما أحس إنه يشركني في كل شي إبحياته
مو نكون زوج و زوجته و كل واحد عايش حياته و ما يدري عن الثاني!!
أنا هذي ما أعتبرها حياة!!
لما المره تسمع أخبار زوجها من الناس و إهيا أخر من يعلم
أنا عندي الانفصال أحسن
أنا بالنسبة لي الزواج امتزاج روحين في روح وحدة.. إهيا السكن و الملاذ و الأمان و الاطمئنان
يقول لها و تقوله كل تفاصيل يومهم
حياة وحدة.. عشرة.. مستقبل واحد!
مادري أنا يمكن أبالغ في هالشي
مادري إذا أكو أحّد يتفق معاي؟
بس أبي أوضح إني ما أقصد الزوجين يجابلون بعض 24 ساعة و ما يفترقون
لا لا لا جذي العيشة لا تطاق!! أنا اللي أقصده إنا الزوج يعتبر زوجته أهيا روحه
و يثق فيها أكثر من روحه.. و ما يخش عنها أي شي بعد الزواج
يشركها حتى في تفاصيل شغله.. يستشيرها.. إحسسها إنّه كل اللي قاعد إسويّه علشانها و علشان عيالها
مو علشان نفسه!! هذي مواصفات الزوج إللي أتمناها بس مع الأسف
رجل بهالمواصفات نادر الوجود.. و اللي تحصل ريّال جذي ما شا الله صج يا بختها
;)

~ se3loah ~ said...

الاخلاص

ليش نسيته؟
يخلص لها .. مهب عيونه ما تنزل عن اللي رايحه واللي جايه
على فكره انا ذكرت ابسط شي بالخيانه .. هذا غير اللي لهم صديقات وعلاقات من ورا الزوجه

بعد نسيت .. النفس الزينه
ويبعدون عن العصبيه قد ما يقدرون

النظره للمرأه .. مهب بس شكل وجمال
لازم تكون نظرته ابعد شوي

3ateeja said...

مشاري الله يهديك كاتبلي موضوع حار وانا يوعانه هقيته جدر قبوط ...
المهم
طبعا انت الشغلات اللي كتبتها شغلات اساسيه لكنها ليست فقط ما تحتاجه المرأه ...المرأه تحتاج للشعور انها مرغووبه ..على جميع الاصعده
ومحتاجه لثقه
ومحتاجه لأسلوب جيد للتعبر عن الحب لأن ساعات الريال يحب المره بس ما يعرف يعبر او ما يعرف يعبر صح ...
محتاجه للي يفهم نفسيتها بشكل اساسي كونها كمرأه ..واذا ما فهمها يحاول يفهم
وطبعا الحب يشمل الاخلاص لأن مو معقوله يحب ويخون ..ويشمل جميع انواع الصدق
بالنسبه للمراه اكره رجل عندها الرجل الكاذب اللي يكذب عالفاضي والمليان ..والرجل البخيل لأن البخيل يفقد مروئته في كثير من المواقف والبخل عدو المرجله ..
طبعا انا بالدرجه الاولى احتاج لواحد يسمعني
مابي واحد يوجهني لأني ادري شبسوي ..يعني لما المره تشكي لا تعطونها حل يا جمااااااااااااااااعه خلوها تطلع اللي بقلبها سكتوا انجعموا ..ابي واحد يسمعني
ويقولي شفيج من قلب مو تادية واجب
الانصات اكتبها مشاري الانصات
واحترام خصوصيتها ..

neelaah said...

موضوع عجيب
و اسمح لي اتكلم بإسهاب

شوف خلينا نتفق انه المرأة و الرجل لازم يعرفون عدل انه بعد الزواج لا يختفي الحب و لكن تتغير طرق التعبير عنه

انا اعتقد انهمعرفه هذا الموضوع ممكن تكون سر اي علاقة زوجيه ناجحه

قبل الزواج التعبير عن الحب يكون احبج و اموت عليج ولهان عليج وايد

بعد الزواج تكرار هذا الكلام ممكن يفقده قيمته و لكن التعبير ممكن يختلف بمعنى زوجي مو محتاج يقول لي احبج و اموت عليج على طول، بس ممكن يعبر بطريقه ثانيه مثلا لما اقول راسي يعورني الاقيه يايب لي حبتين بندول
مشكلتنا الاساسيه في مجتمعنا ان اغلب الازواج و الزوجات ما ينتبهون حق طرق التعبير الصغيرة و يصرون على حاله الشغف اللي لا يمكن لها انها تستمر طويلا

و بعدين اهم احتياجات المرأة على الاقل بالنسبه

الصدااااااااااقه
فهي اجمل الف مرة من الحب بين الازواج خصوصا لما كل واحد يحاول يتأقلم مع اهتمامات الثاني
مثلا زوجي يحب السياكل ، احاول اني اقرب من هوايته و افهمها و ما اسخفها

او زوجتي تحب الافلام العربية و المسلسلات احاول اني اتابع معاها و اهنم بأهتماماتها

واخيرا عدم التسفيهه من افكار المرأة

بمعنى لما تيي زوجتك وتقول لك انها تخانقنت مع صديقتها و انها متضايقه وايد

لازم اتحاول اتبين لها انك تفهم اللي اهي تمر فيه مو تقول لها انه عادي ما عندج سالفه

امبيه قرقت وايد

nOOna said...

اسمحولي اضيف بعض الاشياء ايلي من الممكن تحتاج لها بنات حواء من الجنس الاخر
أول وأهم شي انه يحس فيها وبكيانهاويعاملها معاملة أوادم مو مجردشي ثانوي مثال بسيط على كلامي وقت المعاشرة مو لما يخلص منها يقلب ويهه الجهة الثانية وماتسمع الا شخيره كفاية منه لمه حنونه وبوسه على الجبين تسوى الدنيا ومافيها
ثاني شي هو عدم الغيرة والحسد لما الطرف الثاني يكون احسن منه شهادة أو مكانته في العمل مرموقة للأسف نلاقي بعض الازواج او الزوجات ايلي فيهم عقدة نفسية لما يشوف زوجته او زوجها ناجحين بالعمل بدال ما افرح واستانس وادعم زوجي واعتبر نجاحه من نجاحي على قولتهم وراء كل رجل ناجح امراة عظيمة تلقاها تحتر وتغار وبتموت من الحسرةعلى شنو بالعكس الناس راح تقول اكيد هذا مرتاح في بيته ومرته امريحته من جميع النواحي
والاهم من هذا وهذا الاحتــــــراااام
اسفة طولت عليكم بس مشاري يبي يعرف شنو المرة محتاجة من الريال صح مشمش
وسلامتكم

wwwwwww said...

noona:
أحب أعلّق على موضوع الغيرة من نجاح الزوج أو الزوجة
لما الزوج إكون أناني في نجاحه
و يعيش إبعالم ثاني مع هالنجاح
من غير ما يشرك زوجته و عياله في نجاحه
و ما يسوّي هالنجاح علشانهم
بس علشان نفسه
و نفس الشي الزوجة إذا ما شاركت أسرتها في نجاحها
شلون تبين كل واحد يفرح حق الثاني!!؟

nOOna said...

سنع ومنع:
ردا على سؤالج انا اتفق معاج على انانية الزوج او الزوجة وعدم مشاركتهم الفرحة حق بعض لما تلقين الزوجة وعليه عليها تييب الكيك والمعجنات وتسوي حفلة صغيرة بينها وبين اسرتها تلاقين الزوج من الغيرة والانانية ايلي فيه يقولها على شنو هالخساير شنو مو امصدقة ترقيتي بشغلج صج بنت فقر ويدقرها والعكس صحيح بالنسبة للزوج مع زوجته
ومشكورة وايد على قرائتج لملاحظاتي

NaDiA AnZa7a said...

ماشالله الكل وفى وكفى ماخلولي شي اتكلم فيه .. بس احب ااكد على ان الاحترام والاحترام اهو اللي يحتاجة الطرفين مو بس المرة
والاهتمام ثانيا
وهم انروح وانرد وانقول ان الطرفين اذا كانو يخافون الله ويراعونه في تصرفاتهوم راح يكونون حياة زوجية ناجحة مايهزها شي

وبس مابي اطول عليكم

3afoor said...

أنا ما راح أتكلم عن الزوج أو الحبيب ..لا عن الرجل بشكل عام اللي ممكن يكون زميل بالعمل، أخ، صديق أو زوج
بالنسبة لي شخصياً أهم شي عندي التقدير و الامتنان..حدي هالشي عندي وايد مهم..إن كان زوج فأبيه يقدر تعبي في تربية أولادنا..وان كان زميل بالعمل أبيه يقدر مساعداتي له..وان كان مديري أبيه يقدر انجازاتي ( حدي متعقدة من هالموضوع!!)
آنا بالنسبة لي هالشي يعني لي الكثيييييييير

WW said...

It's a very weird and complicated concept to be honest.

الدنيا فيها مشاكلها, بس بكل صراحه

Life for married couples in kuwait now-adays is different than what it looked like 5-10 years ago, its always on the change.

Q8ya said...
This comment has been removed by a blog administrator.
Q8ya said...

كلامك حلو وصحيح...

بس قولي الريال شنو يبي؟؟؟

Яeema said...

man needs?
woman needs?

perfection is not existing

اللي أقدر أقولة
تفكير المرا يختلف عن تفكير الريال

و كلمن يبي و يبي
و لا أحد قال بأعطي لمجرد العطاء
و صدقني يتشوفة بعدين

الإنسان كإنسان سواء رجل أو إمرأه دائما يطمح بالمزيد و هو إنسان طماع

إذا مرته إتحبة بس كل طالعة ماراح يعجبة
و إذا مرته ربة بيت و سنعة
قال هذي ما تقرا و بس همها البيت

خلنا بالنقاط اللي ذكرتها:

الرعاية:
البنت تكون مدللة في بيت أهلها
بس لما تتزوج من واجبها ترعي أولادها و زوجها فيصير واجب عليها

هذا العرف السائد

الحب:
الزوج طالما تزوج فمعناها يحب مرتة و هذا ما يختلف عليه أثنين فكافي إن إهيا حقة بروحة فلازم يحبها

و إذا مو لازم فمافيه خير
الحب ينبني بالمواقف الطيبة بين الزوجين

الأمان:
متي ماصار الزوج موفر حق بيتة عيشة سنعة و إفلوس إتخليهم إبغني عن الناس و إمإمن لعيالة تعليم جيد

أنا عندي الأمان هو المادة
متي ما حست المرا إن ريلها قد أي طارئ
فهذا أهم شي


التزين:
أعتقد إتعرف وجهة نظري بهالموضوع
لازم جمال العقل و الروح يقابلة جمال الشكل و أقصد المحافظة علي كل شي من أول ما خذاها

مو ذنب الريال من أول بطن تنتفخلة

و همن الريال
إشذنب المرا إتجابل إكروش


ما قريت كل التعليقات
بس أحب أضيف شغلة
الإحترام و الثقة

و إذا راحت الثقة أعتقد راح الإحترام

و كل واحد يكبر مخة
و أعتقد إن فيه أشياء أهم في هالدنيا إن الواحد يفكر فيها

مزاجيه said...

الله يهداك يامشاري صاير فوزيه الدريع خخخخخخ ...ترا ابكل بساطه المراه كتله من الاحساس ...ابسط شي عشان تملك قلبها اتحسسها اشكثر اتحبها... فاجئها ... اهتم فيها ... لا تنتقدها ابشكل عنيف .. او صدقني ابتلقاها الصدر الحنون لك .... وبس

Q8ya said...

وسلمولى على اللى يهوهو ولا يتحرك يسوى شى


خوووش جمله اعجبتني.... فيها معاني كبيرة

;PpPp

Anonymous said...

من اللي ياب طاري فوزيه الدريع ياعيوني

أخاف بس ياعيوني

و خوش موضوع ياعيوني

ناطرين صاحب الموضوع يرد على كلام الشباب هني ياعيوني


اورفوااااار يا عيوني

mishari said...

للجميع : كل اللى قلتوه على عينى وعلى راسى ولكن جميع الاخطاء تحدث فى الحياة الزوجية او اى علاقة حب نظيفة نتيجة نقص الدين واللى اشارت اللى الاخت الحجية والاخت نادية انزحا
وانا كنت متعمد اشوف افكار الحريم كلهم اللى تكلمت عن الاخلاص والا تكلمت عن الاحترام والتفاهم وكل هالامور وخلو الدين اللى اللى مع الاسف كلنا مقصرين فى تطبيقه على انفسنا ويمكن اكون اولكم انا وعسى الله يصلحنى ويصلح الجميع لكن اذا الرجل او المرة عرفوا واجباتهم الدينية تجاه ازواجهم وزوجاتهم كانت الحياةالزوجية سعيدة
وشكرا للجميع بدون استثناء وكنت اتمنى من بعض الاخوات ان لما يعلقون بدون تطنز لان الكلام اللى ينتكتب يدل على شخصيتك وشكرا مرة ثانية للجميع وحياكم الله باى وقت وارحب بتعليقاتكم بكل صدر رحب

nour alwjod said...

اهم شيء يخاف الله في نفسه ويتقيه ويخشاه في كل وقت وزمان.. واذا الشيء انوجد .. وماذكرته ينبع من الدين.. سيجد نفسه يرعاها ويحميها ويحبها يحترمها وأكثر وأكثر ماتتمنى..

والمثل هي .. لا تكن انانية .. فيوم له ويوم لها .. وأيام تجمعهما مباركة

مدونتك متألقة

صاحبة الحروف الأربعة

PearL said...

الموضوع وايد حلو
يعطيك الف عافية

هذي اول مرة اشارك بال blog

حبيت اضيف نقطة انا اشوف انها حيل مهمة

support
او الدعم اللي يقدمه الزوج لزوجته

بالنسبة لي هذي نقطة مهمة