الطموح و العمل والمثابرة والالتزام وقليل من المشاغبة تكون الحياة ناجحة

Monday, June 26, 2006

منو اللى يحميها؟

كنت بالنادي وحاط السماعات واركض على الجهاز وانا اقلب بالقنوات جان تطلع بويهى اغنية قديمة جدا

منو اللى يحميها

منو اللى يداريها

منو اللى يباريها

منو اللى يراعيها

تصدقون اللى بكتبه ماله شغل بالوطنية لكن حتى الفن اندثر عندنا يعنى كل شى تعبان وما اقدر اقول اكثر من هالشئ وكل هذا بسبب جم شخص قاعدين يتحكمون بحياتنا يا حلو ذيج الايام

الماى

امس انقطع عن بيتى الماى وقعدت اضحك لانى ذكرت كل القصص اللى اقراها بالبلوقات وشنو مشكلة الماى وصج تنرفزت واختلطت على المشاعر بين ضحك ونرفزة

ياناس الماى نعمة حافظوا عليها والحين فى تحذيرات ان السنة الياية النقص راح يكون بالكهرباء

واتذكر فى سنة 95 قريت عن شغله اسمها حرب المياه وهى تكون بدايتها فى قارة اسيا فى المنطقة العربية وذلك لقلة المياه لان الدول فى العالم كله راح تبدى الصراع بسبب حاجة الماء وليس حاجة اثبات قوة او شئ اخر

مخرجات الثانوية

عندنا مشكلة ما كنت اشوفها لما كنا بالثانوية صاروا المدرسين الخصوصين مثل وجبات المطعم مدرس طالع ومدرس داش وهذى حالة الاهل وروح دفع بالفلوس واللى يدرسون بمدارس خاصة يطلعون بمفاهيم وافكار جديدة ولو كانت المدرسة تحمل فكر غربى غير اسلامى تعمل على نسخه على الطلبة وهذى بحد ذاته مشكلة تستحق الدراسة

وسلمولى على اللى يهوهو ولا يتحرك يسوى شى

15 comments:

sOulvOice said...

ياحلو هالاغنية

الحين قمنا انقول

منو اللي بايقها

منو اللي ناهبها

شنقول شنخلي ,هبوط بالفن هبوط بالرياضة هبوط على مستوى البنية التحتية والخدمات العامة

لوول حاشني هبوط من صج


قطع المياه والكهرباء عن قريب والتخبط اللي عايشينه الفترة الاخيرة من انتخابات وفساد وغيره وغيره شي يبعث عالكدر هل فعلا نعيش عصر الاصلاح مثل ماقالولنا!!

وان كانو فعلا ينشدون الاصلاح فأي اصلاح يقصدونه!!اصلاح امورهم ولا امور الدولة!!,بس بفهم معنى الاصلاح من وجهة نظر الخبراء الفلتة عندنا


امريكا اللي اهي امريكا بدت تفكر انها تقلل اعتمادها على نفط الخليج واحنا ماعندنا غير هالجم بير نفط وندري انه عمرهم ماراح يتعدى ال50 سنة الياية ومع هذا قاعدين محلك سر ,طبعا هذا موشغلك ولا شغلي انما فيه جهات مهمتها التخطيط الاستراتيجي البعيد المدى ,وينهم الحين مادري؟ وشنو كان دورهم قبل سنوات وليش مااتخذو احتياطاتهم من قبل هم ماني عارفة!!



واخيرا :الله يعينك على قطعة الماي ويعينا عالياي



مشكوور

FatmaQatar said...

الماااااااااااااااي =(

من شوي قمت الا الماي منقطع عن البيت مادري ليش .. هالفتره عندنا تصليحات بطرق الدوله عشان اسياد فحاطين على بيبان ابيوتنا ..أونّه أدب.. ان راح تنقطع الكهربا من هالوقت لين هذا الوقت وكذلك بالنسبه للمياه

:( حزينه جداً من سبة الماي لأن اليوم مخططه اروح النادي ولازم ارجع اسبح
((تم التأجيل))

neelaah said...

مشاري

ما يبيله
ماكينه
ب 57 دينار

و لا ذل الحكومة

لمياء الحالمة said...

مشاري

مايصير جذي, أمنيى حياتي إني أكون صاحبة اول تعليق عندك, بس ماعليه, فيه تطور, اليوم المرتبة الثالثة, يمكن باجر أصير الاولى
:)
__________________________

الاذواق بالنسبة للاغاني تغيرت, وصار الناس يركضون ورا الصرعات الجديدة, ونسوا الأغاني القديمة, سواء الوطنية أو حتى العاطفية

بالنسبة للماي, للحين المشكلة ماصارت عندنا, يمكن لأننا مقتصدين, أصلاً ماعندي خدامة تفتح الحنفية على الآخر عشان تغسل جلاص واحد
:)

مع إن المدارس الخاصة فيها مميزات, خصوصا بالنسبة للغة الإنجليزية, لكني ضد هذا الشيئ, أولا لأن التكلفة وايد عالية, وثانيا, أحس بان الطلبة إللي يدرسون فيها جنهم من كوكب ثاني

mishari said...

soulvoice-misso: صح امريكا بدت فعلا تتخلص من التزامها بالنفط الخليجى واحنا قاعدين نجابل هيفياء زفت

FatmaQatar:زين يحطون اوراق احنا لا احم ولادستور :S

neelaah : اهلا وسهلا حاطين ماكينة بس القرادة قرادة :)

لمياء الحالمة : انتى الرابعه مو الثالثة :)
بس تبين الصج برافوا عليج انا احترم الست اللى ما عندها خدامة بالبيت وتدير شئون بيتها بنفسها
الاغانى القديمة سواء وطنية او اى كانت كان على الاقل فيها مشاعر الحين الشى صار ماصخ وبدون طعم علشان جذى كل يوم خميس اسهر على ام كلثوم يعنى مو كل خميس يعنى مرات على المزاج :)

>>Sama Oman said...

أي والله ما نحس بقيمة الشيء الا لما نفقده

وانا ما فيه شيء ينرفزني الا لما اشوف احد يسكب الماء و يهدره بدون فايدة
لو اخواني خلوا الماء يسكب اصارخ عليهم مع انهم اكبر مني!!! :)

أغار بشدة لرؤية الماء يهدر ، لانه حرام و افكر باللي ما عندهم ماء و يذهبوا اميال تحت الشمس للحصول على ماء
وياريته ماء نظيف
بل ملوث وسخ ، انا ما اطيق المسه ...بينما هم يشربونه!!
:(

عذراً موضوع الماء هو ما شدني بصراحة

وعذراً أخرى على قلة كتابتي للتعليقات ، أنا ادخل و اقرا بس ما قدرت اكتب شيء
لآن هذا المتصفح عندي جلس يلعب لعبة خايسة شوي
بجانب أنه ما يتركني اقرا براحتي لما اخرج اوف لاين حيث يلغي كل الصفحات و لا أجدها.
بس الحين احسه الله هداها ربما التهديد بالفورماتنج نفع :)

الحجيه said...

السلام عليكم جميعا
أي والله يا أخ مشاري أتقوله صج ويعور القلب الله وألف الله على ذيك الأيام كانت النفوس صافيه ما تفكر بالتفكير الوصخ مع الأسف استغلوا الدين لخراب البلد وتعطيله وتيسير لمصالحهم


الماي : نعمه من نعم الله والمشكلة قله قليله ألي يهتمون بالمحافظة على الماء تشوف الخدم يغسلون الرصيف بدم بارد وبدون أي أحساس والماء يهدر ما من والي شتقول إذا معازيبهم ما يعلمونهم ولا يمنعونهم وبالأخر يلومون الحكومة وأنا ما أدافع عن الحكومة عليها بعض اللوم

مخرجات الثانوية : مو بس الثانوية حتى المتوسط مدرس طالع ومدرس داخل المشكلة بالمدرس مو بالطالب ياريت في ابر ذمه وضمير شان بينصلح حلنا بأغلب الامور

الآن لابد أن يكون اختيارنا صحيح وبضمير ونتقي الله في أنفسنا والوطن يستحق أن نختار الأصلح ليمثلنا بالمجلس القادم

Q8LoVeR said...

يالله ماعليه يااخ مشاري
جرب تحط تانيكين فوق السطح عشان تلحق على الماي مايخلص مجربه الطريقه

السؤال هل معقول الكويت مافيها ماي ؟
عندنا خليج يشرب الكره الارضيه لمدة 6 سنوات
ماظن ابدا عندنا اي مشكله بالماي
لكن من المسؤول ورا انقطاع الماي ؟
وشنو سببه ابدا مو نقص
لكن تحويل مياه ومد انبوب ماي لي دوله ثانيه
وبيع ماي الشعب الي اهو ملك الشعب لدوله اخرى
و و و والحكومه ابخص ;p

Яeema said...

علي الماي حطينة ماكينتين وحدة تحت عند الحنفية الرئيسة و الثانية عند التوانكي

بيتنا فاضي هالأيام تعال إسبح عندنا
هاهاهاهاها

لاحظ الماي ترا بالشوارع مقلله
من الري بالتنقيط السخيف إللي صار كل تعبان و ماكو صيانه له فكام يرش بهبل

إسمحلي بنقطة
أنا مع المدارس الأجنية
لأن مدارسنا صارت متروسه من المدرسين و المدرسات إللي كل مالهم خلق يدرسون
جنك داخل بلدية الكويت مو مدرسة

المدارس الحكومية النموذجية بنعدون علي الأصابع

المدارس الأجنية متطورة
كتب الحكومة ماره عليي و لما الحين المعلومات ما تطورت
لا بالرياضيات الحديثة
ولا بالعلوم
و الهرم المقلوب صار مايل مع إنقلابه

كافي قاعدة أشوف مناهج الإسلام يعطونك أسءلة و القصة مو موجودة ، عاي إعتبار إن الأهل عارفين

عيل وين مسألة البحث عند الياهل
مناهجنا الحكومية مناهج للأهل بالدرجة الأولي

كل تدقر و تجعم
أو إعتمد علي المدرسين

أشوني ماحاشتني هالفترة إلا بشيء لا يذكر


أخوي بالثانوية العامة إدعولة بالتوفيق

علمي نفسي
:p

kila ma6goog said...

ممتاز

mishari said...

>>Sama Oman<: لاتعتذرين اختى المكان مكانج تبين تقرين وتشخبطين على راحتج :)
الماى نعمة ولكن ما نعرف قيمة هذى النعمة الا لما نفقدها

الحجيه : كلمة استغلوا الدين ترى مو شى سهل اختى
اللى يستغل الدين بصورة خاطئة خسر الدنيا والاخرة
عسى الله يخلينا من اهل الصلاح
مخرجات الثانوية هم اللوم يقع على الاسرة ولكن هم نوعية المدرسين تعبانه والله يصلح الحال

Q8LoVeR : انت اختصرت مشكلة الماى
يعنى شنسوى يحطون بايب واحنا نقطن :))
شتقولهم لو اهم الماى ينقطع عندهم جان استحوا


Яeema : اول شى الله يالدعاوى تيى عليكم مكينتين؟؟؟ ساحبين ماى الفريج كله عيل انتوا

وبعدين انا مع المدراس الاجنبية لكن اللى تحافظ على هوية الطالب من ناحية دينية واخلاقية مو المينن اللى يطلعون لنا

kila ma6goog : وانت خوش ريال :)

7saweya said...
This comment has been removed by a blog administrator.
7saweya said...

لول اهم شي لما انقطع الماي عندنا بالجابرية .. كنت قاعدة اتسبح و مندمجة و الشامبو بشعري جان ينقطع :(
يلا عادي بس عرفت اتصرف :D
و المدرسين الخصوصيين .. اعتقد مافي مدرسين خصوصيين كويتيين .. اكثرهم من الدول العربية .. لان رفيجتي بالثنوية سقيطة .. راحت حق ابلة العربي (كويتية) قالتلها ابلة ابي درس خصوص واشتريلج موبايل جان تقولها الابلة خطي مفصول شسوي فيه عيب هالكلام .. تقولها ابلة اصفرلج فواتيرج بعد بس نجحيني .. جان تسقطها لول والله ضحكت عليها ضحك
بس المدرسات المو كويتيات اهمه اللي يقطون نغزات يعني ترا احنا نرضى ندرس دروس خصوصية
و سوري طولت عليك
ثانكس عالبوست

mishari said...

7saweya:المكان مكانج وحياج الله :) ما طولتى ولا شى
بعد هم رفيجتج خبلة فى مدرس كويتى يعطى دروس خصوصية :)
معاشات المدرسين الكويتين عالية مو محتاجين :)

Anonymous said...

Cool blog, interesting information... Keep it UP » »