الطموح و العمل والمثابرة والالتزام وقليل من المشاغبة تكون الحياة ناجحة

Saturday, August 19, 2006

ليش لازم ننطق على قفانا علشان نقول اى



فى قضايا اشوف الحكومات العربية ما تسويها الا لما تنفرض عليها من بره يعنى لازم مثل ما يقولون ضرب الجزم وراح امسك الكويت الحين مع السعودية

الكويت ثلاثة قضايا تحركت بقضيتين منهم بسرعة الريح بعد تقارير منظمة حقوق الانسان الدولية التابعة للامم المتحدة

اولا البدون هاليومين اشوف الكويت تركض بتخليص معاملات البدون واستخراج هويات وشهادات ميلاد ووثقون عقود زواجهم اللى ظلت سنين غير موثقة قانونيا يعنى حتى من الزواج حرموهم بعد تقارير الامم المتحدة اللى فرضت غصب على الكويت انها تتحرك

ثانيا الخدم بعد تاريخ الكويت دولتى الحبيية وشعبها اللى الله يهديهم والبعض منهم مو الكل اللى يعامل الخدم كعبد له وناسى ان هالانسان ياى بعقد لمدة سنتين ويرجع بلده حطولهم الحين حد ادنى للرواتب مع اجازة شهرية او اسبوعية ما أدرى بالضبط شنو بس فى تعديل

ثالثا القضية اللى ما تحركوا فيها هى الأولاد الصغار الى يهربونهم من اليمن علشان سباق الهجن (الابل) بالكويت لانهم صغار ما تتجاوز اعمارهم العشر سنوات لان اوزانهم خفيفة على البعير

قمة الاستخفاف بانسانية الانسان

السعودية

انطلاق سريع جدا بعد الضغط الامريكى نحو الاصلاح بشتى المجالات وتطنيش حاد للشعب وميوله وتقاليده اللى فيها تناقض حاد بين الطرفين كتل تنادى بالاصلاح وكتل تنادى بالتمسك بالدين والعادات والتقاليد

مصر

باختصار مصر اش ولا كلمة ولا ما فيش فلوس

على طارى البدون معلومة وصلتنى واستغربت منها فى الصين يوجد 12 مليون بدون والسبب قانون الانجاب اللى بس يشترط وجود مولود واحد

وسلمولى على اللى يهوهو ولا يتحرك يسوى شئ

20 comments:

bo9ali7 said...

سأتكلم عن الكويت..ببساطة..الكويت لا تملك سيادة على نفسها

3ateeja said...

قضية البدون موجوده بكل ديره ...ما يت على ديرتنا
حتى بأمريكا موجوده بس ابوي ما يقدر الا على امي ...وهالحجي مو معناته اني مو مع حل قضية البدون ..بلعكس ..البدون آدمي حاله حالنا...
وقضيته اكبر من انا نناقشها بسطرين محتاجه كتب وفصول لكن ميزتنا لكويتيين حلوه الا وهي التبسيط
بالنسبه للسعوديه .. لاتعليق
بالنسبه لسباق الهجن اللي اعرفه الحين ومن الوالد ان ماكو يهال يهربونهم ولا شي المشكله انحلت ومن زمان ..وانا شفته شغله يحطونها على لبعير يوم سألت الوالد عنها قال هذا سايق أليكتروني...يعني مو آدمي..حتى طقتني البوهه وتالي استوعبت ..لأن ممنوع يحطون لزغار
اما من ناحية الصين ..فالحمد الله يا ربي على نعمة الاسلام اللي شجع وحفز على التكاثر..في الكتاب والسنه وهذي مخالفة الفطره الانسانيه ..ياهل واحد شسوي فيه ..؟؟!!واهم عندهم قانون ان لهم ياهل واحد اذا يابوا الثاني يمنعونهم من حقوقهم المدنيه وخاصه انها دوله اشتراكيه ..او على عهدي قبل ان كانوا الولد الثاني ما يتكفلون فيه
سؤال حلو ..من اول من وضع معاش حق الاطفال- الاولاد-ومكتوب في قوانين الخدمه المدنيه في انجلترا وغيرها؟؟؟؟؟
ترى سؤال حلو

Яeema said...

simply because we are rulles by them )super countrys.
simply bcoz we are arabs and muslims
simply we have no power and everything we bring it from them.

خل الشعوب العربية تحترم من حكوماتها عشان الناس
إللي برة تحترمها

دول مثل ورق الكلينكس

لا صناعة عدلة و الفلوس في المكان الخطأ
لا قرارات و مناقصات بوق أشكره
ماكو خوف من وغاريه علي البلد

أقول مشاري
أبي واسطة ليه إنسجنت ترا ما عبر عالحر

for your information , the next super power countries will be the far east ( asia )
after that we will be ( but we wont be alive since then .


i need to type in english so i can type faster :p
if you may allow me

فيزوقراطي said...

أضف إلى ذلك قضية حقوق المرأة التي لم تتحرك لولا الضغوط الأمريكية، خصوصًا زيارات سفير الولايات المتحدة واجتماعات السفارة المتكررة مع شخصيات سياسية بارزة!!

Fuzzy said...

مشكلة البدون حلها بسيط .. يمنحون اقامة دائمة - مثل الكرت الاخضر الامريكي - وكان الله غفورا رحيما
اما مشكلة الخدم فيجب وضع حد أدني للمرتبات من قبل وزارة الشئون والعمل وتحديد ساعات العمل المنزلية والاجازات
وموضوع تهريب الاطفال لسباق الهجن فقد حلته دولة قطر الشقيقة عبر اختراع الجوكي الآلي اللذي يغني عن الاطفال ويتم التحكم بالريمون كنترول. هالمشاكل لها عدة حلول لكن الحكومة ما شاء الله عندها هواية تكديس المشاكل

الحجيه said...

السلام عليكم جميعا

قضايا الكويت
1: البدون من فتره بعيده شغالين فيها والحين
بخلصون يعني مو ضغط .

2 : الخدم مشكلتهم مشكله مساكين كرفت
وتعب وكلمه شكر ما تنقال لهم الله يكون بعونهم
ويحنن قلوب الكفيل عليهم ويعطونهم كل 15
يوم أجازه طول اليوم ويتذكرون أنهم بشر
لهم مشاعر ولهم طاقه محدودة .

3 : سباق الهجن من فتره يستخدمون الدمية
الآلية التي توجه عن طريق الرموت كنترول
كل نشوفهم على القناة الرياضية .

بالنسبة للسعودية : حسب اطلاعي
الملك عبد الله بن عبد العزيز كملك عادل
ورمز للشهامة والإباء، فلا يظلم عنده مظلوم
ولا يتعدى ظالم ، فالملك عبد الله لم ترصد في
شخصه تلك المخازي الأخلاقية وتلك
التعديات المشهورة على الأموال والأعراض
والأنفس..... كغيره إلا أن الرجل تجاوز الثمانين من العمر ، ولم يكن له نصيب من الدرس وضروب العلم والخط ، ولنا في قراءته للخطب المكتوبة سلفا بيانا يزيل اللبس والاشتباه ، فالرجل ليس له من أمر الإصلاح سوى فيما يراه ويعتقده،وما علق في ذهنه ومخيلته، ولا يصل الأمر إلى أن تكون مملكته دستورية، وان تكون للشعب مؤسساته المدنية ومجلسه التشريعي المنتخب، وان تسود الشفافية في طرح القضايا ومعالجتها، وان تمنح المرأة حقوقها المشروعة ، وكذلك الأقليات المذهبية كالشيعة في المنطقة الشرقية ونجران والمدينة المنورة وأتباع المذاهب الأخرى في الحجاز، لأنه بذلك سوف يصطد م بنفوذ الأمراء ورجال الدين الذين يحيطون به ويمسكون بزمام الأمر من تحت سلطته، فهل يمكنه تخطيهم وتجاوزهم دون أن يقصيهم من مناصبهم؟ وكيف له ذلك دون دخول البلاد في آتون صراع سافر على الحكم والسلطة كالذي شهدته في عصر الملك سعود وأخيه الملك فيصل! ( منقول)

مصر: ما عندي فكره

kila ma6goog said...

تم التحرك بالقضية الثالثة و هو استخدام الروبوت

شفتها بالامارات و الكويت اتوقع يسوونها قريب

و ان بغيت الصج اعتقد ماكو اي تغيير يصير عندنا الا بالضغط الخارجي سواء كان واضح أو من تحت لي تحت

a7laa7ob said...

على قولتك
لازم ينطقون

White Wings said...

معلومة الصين جديدة علي، معقولة؟؟
مشكلة العمالة (الخدم بالذات) مشكلة كبيرة، وعندما أتناقش فيها ,ابدي رأيي أن لازم يكون هناك قانون ينظم حقوقهم، تقريباً أنطق الا شوي :)
صحيح، ناس ماتجيش الا بالشخيط :)

mishari said...

bo9ali7 : لاتطب وايد والا لانك قاعد بلندن تاخذ راحتك :)

3ateeja : صح كلامج موجودة بكل مكان بس امريكا على فكرة مو موقعة على معاهدة حقوق الانسان علشان جذى اهيا غير ملزمة بهالشى

reemaa:اوقف معاج افا عليج اذا سجن بس ما قلتلى تحبين الخبز الايرانى بسمسم والا عادى علشان اذا يبته لج مع الرهش تكونين بمزاج وانتى بالسجن :P

mishari said...

فيزوقراطي : صاج والله هذى فاتتنى بالعكس هذى اهم شى يمكن واوضح قضية للعيان اشكرك على مساهمتك :)

Fuzzy : الحلول موجودة ودول كثيرة تقدمت برعاية وتجنيس البدون من الخليج ولكن الله يهدى ربعنا لا راضين يرحمون ولا يخلون رحمة الله تنزل

الحجيه : وعليكم السلام ورحمة الله
يا حجية الا ضغط ودعاس روس من حقوق الانسان ربعنا خلو هالفئة تثور ويطلع منها المجرمين ومروجين
الخدم عندنا حريم الله يسامحهم ويصلحنا معاهم يعتبرون هالناس عبيد ويتعاملون معاهم بقسوة وهالشى منهى عنه حتى بالدين

mishari said...

kila ma6goog : والله هذا الصج التغير ما يصير الا غصبن علينا ومرات بالقوة وعلى الله

بس سالفة الامارات اطلعوا فيها طلعه ماخلو شى اهل فيلجا :)

a7laa7ob : الضرب فى الميت حرا م :)


White Wings :والله منقولة من شخص عنده معلومات غريبة عجيبة
ديرى بالج لا يوم يحكرونج وانتى تتكلمين :) حزتها لا اعرفج ولا تعرفينى :)

Яeema said...

mishari : sushi will go fine with me , to be fit , i dont wanna add wight :p

LonDonY said...

اي والله شي يحررر
يدلّك انهم قادرين يسنعووون الامووور
بس في بالهم .. ليش انسنع ؟؟؟ دام ماكو شي يستدعي، خل القرعة ترررعي
وتعلموا على طريقة لوي الذراع
وطريقة المطرقة اللي اتحد المسمار
ولا ما يتسنعووون منهم ومن نفسهم.. اشكره ماكو ضمير

عورني قلبي يوم شفت اعلان واحد
بدون يبي يبيع كليته .. وحاط رقمه!! كوووووفي عنان يعدل اوضاع ناس
في بلدنا ؟؟؟ الله يرضى ؟؟؟
تبي الصج؟ الاصلاح ما يصير الا
اذا قام ... من النوم وقال: ابي اصلح!

B u t t e r f l y said...

ممممممم

قضية الخدم الفتت نظري و سمعت معلومة من مصادر مؤكدة كالتالي:

الله يسلمك بعض الطلبة المدلعين والذين لا أعلم لما أتوا للدراسة في الخارج اذا يبون من يطبخلهم ويغسل و يكرف

المهم،يتم احضار الخدم معهم و يندفعلهم المعاش الأدنى اللي ينعطى بالكويت للخدم الجدد يعني الآفرج

المهم قومي يا فلانة تشيحطي على زملائج الأمريكان و قولييلهم ان عندي ماي اون برايفت مايد ويوصل الخبر عند مادري وين بس جهة مسؤولة

دزولها نوت ان مايصير تقعد عندها الخدامة لأنها
under-paid وهذي تعتبر مخالفة وعليها غرامة لأنها نوع من أنواع العبودية

محد قالج فجي حلجج قلعة

---------------------------

على صعيد آخر ..

سمعت سالفة الصين و البدون من قبل بعد
وبالنسبة لهذي القضية بالكويت آنا ضد تجنيس البدون

وطبعا بكلمة البدون هنا لا أقصد الكويتيين اللي صارلهم اشكال وماحصلوا الجنسية ولكن نوع آخر

والله من وراء القصد
--------------

مراسلتكم من بلاد العم سام

فراشة

mishari said...

Reema:i hope we can find it for u this time


LonDonY :تظل الانسانية المفقودة فوق الجنسية
الله يبعدنا عن الغرور

B u t t e r f l y : هذى اللقافة وما تسوي الخدم لويه

التجنيس انا معاج ما المفروض يكون جذى لكن فى ناس تستاهل انها تتجنس لان ما عندها ديرة غير الكويت

Fuzzy said...

كثرة المشاكل تلهي الناس الظاهر

الكويتي الحر said...

اخوي مشاري

البدون نصهم معروف جنسياتهم ولازم يتطبق عليهم القانون
والنص الثاني لازم يعطونهم اقامة دائمة الا اللي يستحق التجنيس منهم مطلوب تجنيسه

اما الخدم فاعتقد لازم يكون هناك عقد معتمد من الداخلية يحفظ حقوق الخادم وكفيله والمساكين عمال الشركات

tweety said...

خل يتدخلون من بره ويحلون لنا مشكلة الكهربا

Krakatoa said...

يامعود خن خلص من قصة هالبدون تراها صارت مثلات المسلسل المكسيكي...لاعت جبدونا..