الطموح و العمل والمثابرة والالتزام وقليل من المشاغبة تكون الحياة ناجحة

Sunday, September 17, 2006

البيت بيت ابونا والغرب يطرودونا


اللى صارلى يوم السبت شى غريب وبقوله باختصار رحت اربع جهات حكومية ولقيت ردت فعل من الموظفين الكويتيين ايجابية بشكل مو طبيعي فمثلا تأخرت معاملتى عند شخص تأخر بسيط واعتذر منى للتأخر فاستغربت بعدين رحت جهة ثانية ولقيت هم نفس الترحيب والاستقبال الحار فاكتشفت ان الشباب الكويتي بعكس الشياب من الموظفين واعين ويعرفون قدر المسؤولية واقدر الحين اقول ان الكويتين فعلا شباب منتج ومعطاء ولا ينقل مشاكل البيت الى الدوام وسالفة السندويشات والبيبسى بالدوام صارت باماكن مغلقة مو جدام المواطنين والبشر اللى يخلصون معاملتهم

لكن واه من كلمة لكن

في أحد الجهات الحكومية لقيت شخص مصري كبير فى العمر ولحيته بيضة وبدأ الاخ يستظرف دمه اخذ منى الاوراق وبدأ يكلم الشخص اللى يمه وطنشنى ؟

ليش؟ واطق عليه الشباك قتله لو سمحت

الموظف المصرى : ايوه تفضل

انا : المعاملة لو سمحت

الموظف المصري : اه بس الكمبيوتر

انا قاطعته : الكمبيوتر ما طليت فيه

الموظف المصرى : مستعجل ؟

أنا: اى مستعيل وابى امشى عندى شغل وايد وما اقدر اخلص شغلى اللى اليوم

الموظف المصري بثقل دم : طيب هى عالنار

انا بثقل دم اكثر : طيب زيد الزيت خليها تغلى بسرعة مستعيل

وعلى هالحالة والاخ النار والثلاجة وسخافة مالها اول ولا اخر

سؤالى ؟ ليش مقعدين لى الحين ناس غير خليجين باماكن عمل حكومية

يعنى مثلا الاخ قاعد يصنع الذرة ؟

انا اللى باط جبدى وحارنى ان الخليجى بدأ يصير عنده وعى باهمية المسؤولية عليه وبدأ يهتم بالمواطنين وعملهم وأكد على كلامي صديق كنت اسولف له السالفة

فكونا منهم ؟؟؟

رحنا المدارس وعند الباب ردونا ؟؟؟

اول يوم دراسي رحت جمعية مشرف والا شباب الثانوية كلهم بالجمعية قاعدين اللى على الارض واللى يفتر بستاربكس واللى بالمكتبة واللى فى امها خير تمر لازم تتجمرك من الكلام وملاقة المراهقين

يا مدارس يا مدرسين يا وزير التربية اذا ما تبون تدرسون الطلبة من اول يوم ليش تخلونهم من الصبح يداومون

عدلوا شغلكم وماله داعي

احنا ما صدقنا ان الصيف يخلص علشان يخف الضغط على المجمعات والاماكن العامة وخل شوى يصير عندهم شى يشغلهم بس شتقول ؟؟

الكويت وما ادراك ما الكويت سنة2006

على الهامش: خبر غير مؤكد حتى اليوم منحة من ولي العهد لكل كويتي بقيمة 200 لكل مواطن ( شاقين المخبى الربع )

وسلمولى على اللى يهوهو ولا يتحرك يسوي شئ

39 comments:

الكويتي الحر said...

اي والله صدقت مشاري
الله يفكنا من غير الكويتيين اللي تارسين الوزارات

اما عن جمعية مشرف
يا اخي ساحة الجمعية اللي فيها ستاربكس حوسة ولوية ماتدري شنت فيه
وهالمرة بعد طلبة الثانوي لا بالله كملت

tweety said...

قولولولولولولولولولولولولولولولوش
عادي انا متعودة دايما ايبب لما اكون اول تعليق :p
اولا : الجهات اللي رحت ولقيت مرحبين فيك اكيد مريت على دوامي وانا سويت لك المعاملة اشوه اني باخذ اجازة :p
ثانيا : شوف عاد انت مو ساكن عندنا على بو خذيت علينا قمت اتبدع في عيال مشرف شنو اهم الوحيدين اللي يزرقون من المدارس يعني !!!؟ اس كلش والا عيالنا عاد عين السيح يمكن رايحين ستار بكس يذاكرون ؟ قوية لووول
ثالثا : انا انشالله راح اروح انشر اشاعة المنحة اليديدة على كل اللي اعرفهم واقولهم مشاري اللي قال عشان ما اتونسني ويطلع فشوش
بما اني اول تعليق استقبل منك صحن لقيمات اول يوم رمضان

tweety said...

لووول
الكويتي الحر بذبحك !!! خربت مخططاتي
من وين طلعت !!؟ لا مشاري بلوقك مسكون لوووول

سالفة قلب said...

ابصراحه شي يبشر وايد

وانشالله للأحسن

وبالنسبة لجمعية مشرف روح الصبح وشوف

الشباب اللي ماتعدى 12 و14 كل واحد

بيده سيجارة

شي يعور القلب

ReLaaaX said...

وااااااااي حسبي الله عليه والله صار فيني حارج



اما عاد الثنوية .. والله الله يعيييين الاداره .. إذا الناظر والاداره والمدرسين يحوشهم طشار .. اللي اسمعه الغشمره الثقيله مالتهم تفشش تواير او تزلق على السياير !؟



الميتين .. والله ياليت يكملون احسانهم لأن الميتين طارت على اللابتوب لا وزدت فوقها اميه وخمسين بعد :)

Fuzzy said...

والله في تحسن ببعض الخدمات مثل المخافر النموذجية وفرع الداخليه ببرج التحرير وغيرهم ... طبعا الاخ المصري يمكن فنشوه بس رد نفس الوظيفه بعقد من شركة .. الوزارات لقت ثغرة لقانون التكويت تفنش اجانب وتصير اكو درجة شاغرة لكويتي وبنفس الكويت يوقعون عقد عمالة مع شركة
:)

اما سالفة المنحة فأنا أقولك

مجلس الوزراء قرر التالي:

- دفع 50% من نفقات دراسة الطلبة في المدارس الخاصة وذلك لتخبط وزارة التربية
- تغطية كل مواطن ببوليصة تأمين صحي تسمح له العلاج بالمستشفيات الخاصة بسقف أعلى 1000 دينار سنويا وذلك لتخفيف ازدحام المستشفيات الحكومية وللقضاء على ظاهرة رمي ادوية وزارة الصحه في سلال القمامة
-زيادة قرض بنك التسليف الى 100 ألف دينار والسماح للمواطن بشراء أرض بشرط البناء في خلال سنتين

والله ما قصروا خلاص ما نبي ال 200

Fuzzy said...

تويتي
سلامات حلمانه هاهاها داشة تيببين صكيتي على السنعوسي بالمطار

عبدالله الظفــيري said...

اول شي يعطيك العافيه على المواضيع الحلوه وتسلم ايدك ...

على العماله الي تسمى بالعماله الاجنبيه او العربيه خل نكون صريحين روح شوف الشؤون يوم سوو اضراب وصكوا باب الشؤون والناس ناطره لان كل الموظفين كويتيين ولا فوق هذا قبل الدوام بساعه ونص يقولك الكمبيوتر خربان ليش بالله ؟؟؟
لو مو هالمصرريين وغيرهم صدقني راح تلقا الشغل متلتل والمكاتب مصكره .. هذا الواقع يا اخ مشاري ادري راح تقول مو كل بس الاغلبيه راح تلقاهم مو موجودين والي يعرف المدير والي يعرف فلان الفلاني .. واشغالنا بدال لا تنطر ساعه او ساعتين تنطر شهر او شهرين الي يقولك والله المعامله ضاعت وما تقدر تكلمه كويتي ... وانا اقول هالكلام من تجربه والله يهديهم انشالله

اما على موضوع المدارس الغلط او المشكله عمرها ما تصير من طرف واحد دايم يكون فيها اكثر من طرف وعلى ما اعتقد هم الاهل يلعبون دور كبير بهالشي لين الناظر يخليه يداوم تلقا الوالد داش على الناظر ابي اطلع ولدي يعني هم يا اخ مشاري لازم الوالد يربي ولده عدل يعني لو مربي ولده وكل ولي امر مربي عياله على السنع ما تلقاهم بالشوارع والا المجمعات والا الاماكن الثانيه اهم شي التربيه مايصير كل شي على الوزاره قلنا غلطانين بس ليش ننسى الدور الكبير على اولياء الامور...

اما على المنحه الله يسمع منك .. بس مشكلتنا يالكويتيين ما يترس عينا التراب ... وصدقني واكيد هالشي انت عارفه وانا اقول اكثر الكويتيين مو كلهم ... اذا تبي تسكتهم قولهم والله زادو معاشكم والا منحه راح تصرف كلهم لو يشوفون الغلط يسكتون عنه .. هذا الي يسكتهم يا حب اهل الكويت العض وانا اتوقع الاغلبيه يا حبهم للفلوس من بعد الغزوا...

اما على الموضوع الي طاف انا قلت ابي اكتب هالشعر : يا امة المليار عدد الحصا والرمل في تعدادهم
فاذا حسبتهم وجدتهم اصفارا
من كل مفتون على غيثارة

الحجيه said...

الاسلام عليكم جميعا

صدقت والله يأخ مشاري شباب الديره فيهم الخير كله ولكن ما في فرص لإظهار قدراتهم تشوفه متحمس وغيره يكسر مجاديفه ؛ ولا المقيمين مو بس بالدوام يتفلسفون حتى بالشارع يزفك واهم عكس السير مو معقول يصير بالكويت كذا الكل مستهين بالقانون لان القانون نفسه مستهين نفسه مثل ما قلت وزارة التربية المفروض الطلاب بالمدرسة ولكن عدم الالتزام أصبح الطلاب بالشارع والله يحفظهم من عيال إبليس الأهل مأمنين عليهم بالمدرسة والوزارة مهيتتهم وين الحسيب والرقيب على أداره المدرسة لازم تصير حمله قويه شعبيه ضد الفساد والتسيب المفروض يكون الحساب فوري ومباشر حتى يكون عبره لغير كان وزير أو اصغر موظف خل تصير سلطة القانون هي الحكم
يمكن عقبها الذم والضمير يصحون من نومه أهل الكهف وينعدل حال العالم

KQ8 said...

ياخوي يامشاري..شقولك شخلي..اديوان الحمدة المدنية عندهم مستشار واحط حدرها الف وخمسمية خط ياخذ شهريا حول 5 آلاف دينار وهو من الجنسية المصرية وعلى كلام الجماعه ان اهو احد " العقول" المفكره لمشروع الحكومة الإلكترونية ..وشوفت عينك لا حكومة إلكترونية ولا بطيخ وكاهو قاعد مثلات تمثال ابو الهول يتفلسف ولا يتحرك ماغير يكبر بكرشه ويزغط من هالبيزات اللي لو احد من الموظفين الكويتيين في الديوان كلفوه بهالامر مايخذ ربع اللي ياخذه هالبطه المرحه...!!!

انسان جدا متعجرف وهو اللي فاهم بكل حاجه ولا حدش يقدر يئلو اي حاجه...!!!

المصري من هالطقة مثلات السبرنج خلك دايس عليه لأنه اذا وخرت ريوك طمر بوييهك...!!!

نون النساء said...

^
^
اي والله لوووووول

يعطوني الخمس تالاف وأسويلهم خوش مشاريع
بدال موقعهم اللي كل يومين والثاني داون
لووول



بالنسبة للمدارس عادي
صار كل شي عادي ونورمال

اما الوزارات للحيني ما دخلت دوامة المعاملات اللي يبيلها فرارة
عيل الرياييل حق شنو انخلقوا
:P

Mohammad Al-Yousifi said...

خوش كلام

Nora said...

كيف الصحة اول شي ؟؟

صح صح صح صح صح الف مرة مو تقليل قدر لأي احد بس اللي ما يحلل فلوسه ليش يضيج علينا الديرة
!!!

شايخين الله وكيلك حتى و عساهم ما يمسكون اي شغلة الا عقدوها و اللي يشووفهم يقوول وزراا على الخبة


لي الحين عبالهم ايام بيوت الطين و اول ماطلع النفط .. يكون خبرااااء


200
؟!
امممم مع اني احب الشيخ نواف
بس اخاف من حلالهم فشلونا عند العالم طراااروة صرنا يقطون علينا 100 و 200
!!

fuzzy :
اذا القرارات اللي قلتها بتصير صج فااااا الله يفرحك اخيرا قاموا يفكرون
!


جني انهديت و صرت شرييييييييييييرة
يالا ما عليه ديرتنا و شيوخنا و انا بنتهم امووون
(( klesh ma '7agait))

;PppPPPp

Fuzzy said...

a7la eng

ترا بفتن عليج وادليهم بيتكم هاهاها نحشههههههههه

Anonymous said...
This comment has been removed by a blog administrator.
Anonymous said...

ولد عمي الصراحه الموظفين الأجانب لما يشوفون ما في حدّ كفو يمسك مناصبهم ياخذون راحتهم وبالذات اهل البلاد مدلعين وفسقانين ..
الحمدالله ان في مسؤوليه عندكم والشباب قامو يحسوون =") وبعدين مو غريبه عليكم .. عجبتني شغله وهي ان في بعض الشباب الي هم طلبه في نفس الوقت يشتغلون بمطاعم وبالاستيشنات ^_^ والله ذي حلو للاعتماد على النفس ويحسون بقيمتهم وغلاة بلادهم

الله يقويك مشاري ^_^

Mamloo7a Q8ia said...

فعلا أغلبية الشباب الكويتي في الدوائر الحكوميه واعين وراقين في تعاملهم وليس الكل اما الخبرا الاجانب فحدث ولا حرج حاطينهم علشان يخلونك تكره نفسك وتكره الساعه اللي خلتك تروح تسوي المعامله.. ولا لما يحاولون يتكلمون باللهجه الكويتيه بعد .. تكمل السالفه
اما طلبة المدارس والله انا اشوفهم يحوسون في الجمعيات والمجمعات طول السنه يعني تسيب من اول يوم لآخر يوم ماكو فايده
خوش خبر الله يبشرك بالخير عاد انا كنت متوقعه منحه جديده في موضوعي اليوم
اللحين اقدر اسوي مشروعي ؟؟
شفيهم معلقين على الميتين
الخمسميه شفيها ؟؟؟

Unknown said...

الكويتي الحر : الله يفكنا بس ؟؟؟
20 الف مواطن كويتى عاطل عن العمل؟؟؟ بذمتكم هذا ما يقهر ؟

tweety : اول شى وقبل كل شى
انا ولدت بالنزهة وترعرت بمشرف وساكن فى بيتى الان فى منطقة غير اهلى كلهم تارسين مشرف من ق 1 لى قطعة 5 و 6 ما نعرف فيها احد الا حق بيت النائب :P حق الواسطات
ثانى شى راح عليج اول تعليق :P

ثالث شى انتى لو تشوفين المغازل ؟؟؟؟
الصبيان مو مخلين وحدة بحالها والله انا قاعد امشى وحسيت نفسى بثانوية مو بمدرسة

Unknown said...

MuLaN : والله انا لاعت جبدى من نفسى بسبة هالسخيف لو ما انى ماسك اعصابى جان شاف شى ما شافه :)


سالفة قلب : صح شى يبشر بس خل يفكونا من الوافدين اللى بالقطاع الحكومى واحنا بخير

وبعدين والله صدقتى الشباب 12 سنة 14 سجاير ؟ الله يصلحنا ويصلحهم

Unknown said...

ReLaaaX : تصدقين انتى من كثر ما تصلحين بهالابتوب جان شريتى واحد يديد احسنلج

وبعدين انا مو صار فينى حارج الا طفحت غثى منه

:)

Fuzzy : تدري لو الحكومةتتخذ هالقرارات
جان البورصة من تطير فوق ؟؟
جان اقول حق الحكومة مشكورين وكثر الله خيركم
وعلى طارى المخافر الله يعطيهم العافية والله الواحد يستانس لما يشوف كله كويتين بس مرات تشوف شغلات ما ادرى شلون بس ميخالف كويتين منك وفيك يمونون

Unknown said...

عبــدالله الظفــيري : شوف وزارة الشؤون عاد موضوووووع ثانى هذيل مو بالكويت عايشين بعالم ثانى بس شوف مثلا البلدية فى اجراءات تخلصها بالانترنت معاهم وهالشى سهل امور كثيرة
المخافر النموذجية وهالامور اللى على هالشاكلة

انزين المدارس الله يهداك اى ولى امر تقول يلحق انا اقول لازم يخلون كل المدراس قطاع خاص ويعممون الباصات ويخلون المدارس كلها بمناطق بعيدة عن الخدمات العامة مثل الجمعية


الميتين خبر غير اكيد لكن يبه نبى البورصة تتعدل مو الميتين :)

Unknown said...

(الحجية)
أهل الكهف كانوا ناس يخافون الله
بس اللى يقاعد يصير تجاوز فى الذمم ولو ما دعوات الامهات حق عيالهم جان عيال ابليس مسحبين يهاليهال حق المخدرات ولوية

(Krakatoa )
هذا تلقاه لواء متقاعد فى مصر ويايبينه اهنى يعلنا بافكار الوزارات المرض اللى اهناك مشكلة مصر انها فيها ناس تفكر بس المركزية والبيروقراطية اللى فيها تقتل

Unknown said...

(نون النساء )

يعنى الحين الريال بس حق المعاملات ؟؟؟؟االله يسامحج
الحين هالاشعار والرقة والانوثة اخر شى جذى نظرتج لنا:))

(kila ma6goog)
اشكرك عزيزى :)

Unknown said...

(Kitty ) اللى على راسه بطحه :)))

بس والله ما قصدتكم خبرى بشغلكم ماكو مراجعين بس صج الناس نوعا ما تغيرت وبدت تحس بالمسؤولية :)

والصبيان من ردى المدرسة والمدرسين


(A7la Eng)

هلا هلا هلا :) شلونج بنية
الحمدالله شوى احسن :)
بس انا اقولج لا تخافين واذا احد بلغ عليج اعرف راعى خبز ايرانى عجيب مع رهش حق الدفى والشتا ياى :)

بس على قولتج مو بس شايخين الا لاعبين لعب

زهبتى بخورج ودراريعج حق رمضان :P

Unknown said...

(FatmaQatar)
تبين الصج انا قاعد احس ان اهم مفروضين علينا وعلشان جذى لازم نشلعهم من عرجهم عاجلا ام عاجلا
بنت عمى شلون رمضان بقطر :) نيى نرمض عندكم والا الكويت ابرد :)




(Mamloo7a Q8ia )
اول شى خطوة عزيزة لان اتوقع اول مرة تعلقين عندى
ثانى شى خشى فلوسج ونطرى لان احتمال وايد امور تصير :)
انزين الشباب بالمدارس من اول يوم لى اخر يوم تدرين ليش لان المدرس حضرته ايى حق الطالب بالبيت بعد الدوام يعنى شنسوى نوعية المدرسية تعبانة
وبالنسبة حق موضوع الموظفين اتوقع لان نوعية الموظفين تعدلت يعنى اغلبهم صاروا حملة دبلوم وجامعيين عكس قبل موظفين بشهادة متوسطة ويخلونهم جدام الاوادم

Unknown said...

3afoor


(3afoor )
شصاير بالدنيا شالغطة ما صار دوام يديد غطيتى عن البلوقات كلها شفيج

بعدين يا عزيزتى انا مو اعصابى باردة بس الواحد لو ما بمد ايدى على واحد
تبينى عقب هالكرف وحالتى حالة ودراسة وخبتى خبة وماجستير واخر شى امد ايدى على واحد
برستيجى ما يسمحلى :P

:))
بس والله من صج كنت شعرة وامد ايدى بس تعوذت من ابليس

Mamloo7a Q8ia said...

ما شاء الله عليك يا مشاري.. انا وصلت الكويت اليوم والجو حلو مثل ما بشرتني في موضوعي السابق والديره لها وله خاص ما اقدر اعبر عنه
راح اعطيك لقب "بشار" كل مشاركاتك معاي فيها بشارة حلوه لي
شكرا لك

ReLaaaX said...

لا حرام بس كنت اسوي له فورمات .. اقولكم كان صبور الله يرحمه



بس الحين الله يعين اليديد

Anonymous said...

حيااااااااااااااااااااااااااااااك الله ولد عمي ^_^
امس كان في هوا خفيف ويا حلو رمضان دام الي شرواكم يزورونا =")
ياالله عزّم انت وزوجتك وتفضلوا يا الغاليين =D

albandry said...

eeeeeeeeeeeeeee wala

saj ya `7eweeeee
ana e7tareeet weyak

oya kerhoom etha estamlego
la o foog kel hatha ya`7thon rashawee o `7arabeee6 3ashan yamshy she`3lek beshee beshee

amma men7a thania 200
`7eer o ne3ma wanasa leesh laa
mangool laaa e7na hat we bas

bas yayna remethan ma7ad fakar eytesadag feeha

العين الساهرة said...

الله يسمه منك. بصراحة أتمنى يكون في وعى شبابى بالمسؤولية لأن هم راح يمسك بزمام المور في المستقبل. وبالنسبة حق الطلبة ، أنا ابى أنسف وزارة التربية من عرجها وأسوى وزارة تعليم محترمة وشروط جزائية للمدرسين والإدارة المدرسية والطلبة واولياء أمورهم علشان يلتزمون بالتعليم

Anonymous said...

انا اشك ان عيال مشرف يداومون

جمعيه بأي حزة ادشها مترووسة مصبنة !!

ماعندهم دراسة!! مايناموون!!

ولكن ن ن يظل ستاربكس مشرف قمرهم كلهم



**************


امس كنت بهيئة حكومية الموظفين مالهم خلق يطلون بويه المراجعين واللي نرفزني بزيادة ان الموظف كان منشكح عالكرسي ويالله بالزوور اسمع صوته وكل شووي هااا ها لين يه مندوب وقاله
"معاملة شيخ"

سبحان الللللله هل النشاط فجأة عالموظف وب3 دقايق جاوب على استفسارات 3 مراجعين وخطر الرابع لعيون الشيخ


اسوء اوقات حياتي اتمام مراجعه بجهات حكومية



شكرااااا على فتح باب التعليقات :)

Unknown said...

(Mamloo7a Q8ia)
انا اقول اشوى انى ما خرتها :) بس الصج الصج جربى الجو الصبح مو طبيعى درجة الحرارة 28
بعدين ما ابى بشار:))
شوفيلى اسم ثانى

Unknown said...

(ReLaaaX)

يا بنت الحلال روحى بعيه مستعمل وفكى نفسج :)



(FatmaQatar )

خلاص الفطور عندكم
صج عندى سؤال الصورة اللى حاطتيها صورة شنو ؟؟؟

Unknown said...

(albandry )

حق كل شى تقولون لا الفلوس ما تعرفون :))

بس صج عفسوا الدنيا علينا الله يسامحهم
وفكرة صج سالفة الصدقة حتى لو بجزء منها
:)


(العين الساهرة )

عيل خل يخلونى امسك زمام الامور على قولتج وانا اوريج :)فيهم

Unknown said...

( soulvoice )

واذا معاملة شيخ بس المشكلة لو الله يفكنا من فئة معينة تموووووووت على الواسطات
جان احنا بخير
وبعدين صج انا بالنسبة لى احلى ستاربكس مشرف الصبح شى خيال :)

Anonymous said...

http://static.flickr.com/84/246582414_4bac08f127_o.jpg
هذي هي وان شاء الله تفتح وياكم ^_*
خلاص ولا يهمك برز لستت طلباتكم الي تبينا نسويها لكم حق الفطور =")
قطر بتنور يا عيال العمّ بوجودكم ^_^

Unknown said...

FatmaQatar :صخرة والا شنو هذى مو واضحة :)
او بالاصح ما فهمتها

Anonymous said...

لوووووووووووووووووووووول
مشااااااااري افا
هذا خبز رقاق
دام ما عرفته اول ما تجي عندنا ولد عمي بتاكله ^_*