الطموح و العمل والمثابرة والالتزام وقليل من المشاغبة تكون الحياة ناجحة

Saturday, October 14, 2006




تخيلت ان البلوقرز كلهم ساكنين بشارع واحد وقعدت اتخيل على هالمنوال

اول ماادخل الفريج على ايدى اليمين بيت ريما وقاعدة الاخت بالحديقة وحاطة طاولة و كيك وقاعدة عندها لوير وضحكها واصل لاخر الشارع وكيتى وسالفة قلب يسولوفون ويقولون حق لوير بس سكتى من هالتكعكع فضحتينا

بعدين ايى بيت فززى القى عند الباب سيارة قديمة وقاعد يصلح وكل شوى حاذف جهاز من فوق السطح والا راديو طاير

بعدين بيت سوول فويس قاعدة تطل من الدريشة وحاطة شريط عبدالحليم وتغنى والشباب يمرون عليها تحت يا معودة عطينا ويه عبرينا

Peral

تحط مطاارات عصير وفيمتو وبيذان عقب الفطور وتوزع على الفريج واليهال وتقولهم شربوا هذا بدال القرقيعان

شوي عاد بيت احلى انجنير (بيتهم كشخة) وايى انا كل شوى اطق عليهم الباب طابخين هريس واهيا تطل اى لحظه لحظه خل ايبلك وامها تصرخ عليها يالله دشى شموقفج بالسكة تقولها لا مو غريب مشارى بلوقر عادى واحد من الربع

البيت المقابل حق بيت احلى انجنير بيت استكانة والا رابطة خيط فيه قوطين ويسولفون مع بعض

على طول لزق بيت عتيجة ومملوحة ولابجين على بعض مع ام الحفيز ونون النسوة وكل يوم فارشين بالحوش وانا ايبلهم رهش واقعد عندهم وجاى وسوالف عيايز وضحك

كويتية وباتر فلاى رفيجات وكل يوم يفترون بالفريج راكبين قوارى

طبعا بوصالح كل شهرين راجع من لندن ومأجر عندى ملحق ويقوللى على ما اتخرج واتزوج واخذ البراحة اللى يمكم وابنى بيت

الكويتى الحر ما يصدق على الله متى تصير مسيرة ويروح الاخ يجمع عيال الفريج وركضة بنيدر علشان الرش والصابون


تويتى وما ادراك ما تويتى كل يوم تقعد بالسيارة وتشغل المسجلة وتتسمع وتزعج الجيران بالصوت العالى ومشاخط

طبعا البندرى انا مطيح عندها كل يوم واقولها كيفج مالى شغل محد قالج تنادينى مشوور

اخر الفريج اكو بيت انجليزى دور واحد بحديقة تاعمة والا بيت نيلة كل يوم قاعدة بالبلكونة وتشرب قهوة وحاطة فيروز

بالمقابل بيت كلا مطقوق كل يوم ياى وبايده جيس كتب ومسوى جزء فى بيته مكتبه عامة

طبعا كل ويك اند ياين عندنا المدونين البحرنين مثل

Other and me

واكون انا مستيفهم

ومن قطر

Fatamaqatar

والسعودية

Sara –Se3lwa

العين الساهر والحجية ربع وكل يوم اثنين مسوين درس دينى عندهم ورمضان كل سنة اهم يوزعون النقصة على الفريج

طبعا انتر كويت كل يومين مسوى سمرة بالديوانية عندهم ويسكرون الشارع

برنسس مع هدوء بيتهم ماكو لوية

Cr8ivia

محامية جديدة وكل يوم تروح تشيش الحريم على رياييلهم علشان يرفعون قضايا عليهم طبعا تعلمت هالطبع من منو كبيرهم الذى علمهم السحر لوير

حسام بن ضرار كل يوم جمعة بعد صلاة العصر يجمع الشباب عنده ويسوى ندوات عنده

البوست هذا من المخيلة واتمنى ان محد يزعل بس حاولت ان اسوى شى خفيف واذا نسيت احد صدقونى كلكم قراب من قلبى واذا نسيت لانى الحين صايم

سلمولى على اللى يهوهو ولا يتحرك يسوى شى

66 comments:

Яeema said...

looooooooooooooooooooooool
نسيييت تكتب إنني مجابلو مجلات الأزياء

Яeema said...

طبعا حسيت إنك بتحش فيني اليوم فقعدتلك قعدة

نسسسيت إنني مجابلة القهوة

kitty said...

قاعد انحش فيك انا وريمه عمرك طوييييييييييييل

لوول

لحظه احنه مطيحين بحديقت ريمه وتحط لنه كييك وصراخنه شايل لوووووووووووووول
عاد ترى صج بس عند سالفة قلب اليمعه بالصج نفس الى قلته ههههههههههه

غلطان جان خليتنى فاتحه بيتى واسبل اكل موالح وحلو
سبييل عشان الله ياجرنى فيكم يا اخوانى وخوانى البلوقرز
اطباقى كلها كل يوم طبق واوزع بالفريج نقصات

هههههههههههههههه

اصدق عاد مشارى
دايمن لما ادش البوقات احس انى داشه فريجنه وانا احنه بيوت يم بعض اسير من بيت لى بيت
ناس احس من ادش بلوقهم يهللون ويرحبووون
ناس ريحت طيبهم وحلاوة روحهم فااايحه
وناس العكس جنه يقولولك لا اتعتب وانك ظيف ثقيل
حتى كله اقول بسير على فلانه ولا سيرت على فلان اليوم ههههههههه

اشوه مو بس انا الى اتخيل هالشى

بس عجيب البوست :)

الحجيه said...

السلام عليكم جميعا
أخ مشاري صج فكرتك حلوه وغريبة تخلي الواحد يتخيل انا تخيلت الفريج نفس طريقه المسلسل الكرتوني في سما دبي اسمه فريج http://www.samadubai.ae/servlet/Satellite?c=Page&cid=1158493246305&pagename=SamaDubai%2FProgram%2FFullDetail الله يديم التواصل بين الجميع بالخير

albandry said...

وووووايييييي
يا خف طينتك مشور


وناسة خليني ادش ويكفريج البلوقرز
ايونس

ياااااااااااااه

سؤال
هل في يوم تخيلت انك تتقابل مع واحد من اللي بالشارع ولا تدري انه اهو
في الواقع

بس ولو انه خيال بس الساعة المباركة اللي تجابلني كل يوم وتطب بيتي تنوره
بحبلك كل يوم بصحن رهشة وخبز مسمسم وحليبه
:)

اتشرف بمعرفتكم جميعا
احبكم بالله

Q8ya said...

هههههههههه بسك من الفراره ما عندك شغل

;PpPp

بدعت والله فكرة عجييبه...يا ليت صج ...:)

نون النساء said...

لووووووووول

جان مسويلي مسرح أخطب فيه على الأقل

هههههههههههههههه

بس لا خوش جارات جاراتي
ايننون حق جاي الضحى والعصر

:P

سالفة قلب said...

هاهاهاهاها خوش سيناريو

فرحت يوم شفت اسمي معاكم بهالفريج

هذا انما يدل على ان احنا فعلا اسره وحده تجمعنا علاقة طيبة ومحترمه

شكرا لك مشاري على هذا الابداع

مرة ثانيه لاتنسى كيتي وريما ولوير عند سالفة قلب بالحديقة وقاعدين ينتحرون باللزانيا وسلطة الناشوز

مشكور صج ادخلت السرور في قلوبنا

kila ma6goog said...

عجيب بوستك و خوش قريج نسبة الحريم فيه عشرة لواحد

هذا فريج الاحلام مو فريج البلوجرز

و تصدق انا فعلا حلمي تكون عندي مكتبة بس اربح منها, وايد احب الكتب بس احس مشروع مكتبة يفشل بالكويت

خاصة اذا النفسية مثل جماعة مكتبة المثنى

EsTeKaNa said...

hehehehehhe:)
يا حافظ ليش نسولف بقواطي؟
انتركم على الاقل
وييييييه يا الدنيا
الحين احلى انجنير بيتهم كشششششششششخه
قول والبيت اللي جبالهم بعد
:pPP~
خوش بوست

a7La eNG said...

looooooooooooooooooooooooooooooool

حلوووة حلوووة حلوووووووووووة

و انت وين بيتكم ؟؟

صح اطل و بويهي ماااسك للبشرة
;Ppp

بس امي كلش ما عندها مشكلة الا باليريش و الهريس لانه يوصلنا 4 باليوم
hehehehehe ..
so change the menu plz

بدعت مشاااري و أضحك الله سنك
هههههه من وين طلعت هذي
!

اهااا خالد بن الوليد
;D

حسام بن ضرار said...

حسام بن ضرار كل يوم جمعة بعد صلاة العصر يجمع الشباب عنده ويسوى ندوات عنده
--------------------------------

الله يهديك وايد محسن الظن فيني

LOOoooooooooOOOOOOOOOoL


الله يسمع منك و يرزقنا



انا اعتقد اني راح افتح ديوانية احط فيها بلازما واشغل عالعربية او الجزيرة واقعد احلل اخبار مع الشباب



:)



بوست حلو نفه علينا يا مشاري

pearl said...

افا

شكلي قاعدة اقزز
مو قاعدة معاكم بالفريج

sOulvOice said...

lOOOOOOOooooooooooooooooOOOOOOOOOL



نسيت تقول حاطة وردة حمرة بشعري


اتخيل الوضع حده طماشة جنه قاعدين بالبدع وبيوتنا نفس نظام الكافيهات هناك
حده ه ه لايق على وصفك




مشاري اتخيلك راكب قاري وشعرك فرق على جنب وقميص ابيض فاج اول 3 زرارت وكتب الجامعه ورى بالسلة

احمد رمززززي

Fuzzy said...

هاهاهاها مو بيتي هذا مأجره واهم شي اني ميكانيكي اصلح سياره هاهاها انا وين وتصليح السيارات وين !! انا السياره عندي مثل البعير اركبها وتمشي بروحها مالي شغل فيها

Mamloo7a Q8ia said...

يا حلات هالفريج ويا زين اللي فيه ويا حلو جيراني

وبعدين ليش سوالف عيايز يا كافي تونا رادين من السبا وشادين و مادين وسوالفنا شبابيه .. وبعدين كلنا نحافظ على الرشاقه وما ناكل رهش كل وحده منا ماسكه لها خس وخيار وجزر وحوشنا حطينا فيه حمام سباحه علشان اللياقه
مشكور يا مشاري على هالبوست الخفيف على القلب ومشكور انك تذكرتني معاكم في فريج البلوقرز
الله يشرح صدرك ويونسك مثل ما ونستنا بهالبوست

Hosno said...

ماشالله عليك
فكره راقيه وحلوه وفيها خيال يعطيها
طعم مميز

:)
بالتوفيج
في شقق اجار ؟ ولا منطقه عوائل ؟

Princess said...

واااااااو وناااااااسه . . قاعده اتخيل الوضع . . بس ما قلت لنا وين بيتكم ؟!؟ والله يا اخوي مشاري خيااالك واسع و جمييل . . و ونستنا بهالسالفه . . اتوقع اسم المنطقه بلوق لوق . . جاده الحلويين . . لول .. زيين انه بيتنا هدوء عااد صج ما احب الازعاج :)

ام الحفيز said...

مشاري

اعيوني نبي رزه واليسلمك باسم الشارع واقترح
Avenue De Blogaaarz

وبعدين انا والمجموعه الي معاي شخباري رهش لالالالا اقول قالب ميلفوووي وتريمسوووه وافترنووون تـــي مع سكوونز وكريم ومربى وسندويش اصابع وانا لابس الشفقه الورديه وتاييييير شانيل مع سكربينه وعيوني اتلاقط على شارعنا منو راح ومنو رد وسلامتكم

الكويتي الحر said...

أشوه يعني أنا مسافر

:)

bo9ali7 said...

LOOOL
what a nice freej
:D
chan zain wallah

sOulvOice said...

مشااري نسيت انك شايب عيل ماينفعلك القاري


اتخيلك دشداشة وجريمبة وتلعب بالمسباح واتحلطم عالزمن و الناس

mishari said...

Яeema:الساعة 6:30 الصبح مجابلة القهووووووة ؟؟؟؟
شنو هذا ؟؟


kitty : مشكورة وعسى الله لا يخلينا منج :))
وافا عليج ولا تزعلين نفسج باجر سوى بيتزا ودزيها لى :)

mishari said...

الحجيه : مشكورة وانشاء نتواصل بالخير على طول :)


albandry : البندرى تصدقين انتى وحدة من الناس اللى تصادفت مع ناس برة بالشارع واقول هذا او هذى شكلهم بلوقر واقعد اقول يمكن هذى البندرى :)

شفتى شلون :)
وانا بعد احبك فى الله واتشرف فيج مو كافى تقوليلى مشور :)

mishari said...

Q8ya : قاعد اتطمش واقول شلون بتكون الحياة :)


نون النساء: انتى شكلج ودددددج نحطلج مسرح وتخطبين وتسوين امسيات شعريه:)

بس ملحووقة

mishari said...

سالفة قلب :عاد صج احب اللزانيا عاد الله يهداكم عزمونى على يوم :)

عليكم بالعافية واحنا اللى نتشرف بوحدة مثلج يا سالفة :)


kila ma6goog : بالعكس ترى مشروع المكتبة ناجح
جرير - ستاربوكس

ترى بس يبيلها اصرار وتسويق :)

mishari said...

EsTeKaNa : تغييييييييير تغييير
وعلى ابو انكم طالعين فيها طلعه :)
شفيج


a7La eNG : شفتو حتى بالتعليق مع بعض :p
حيالله العزيزة :)
شلونج زينه ؟
ليييييييش ناقص تخرع تطلعيلى مع الماسك :)
واضحك الله سنج انتى بعد :)

mishari said...

حسام بن ضرار: زيييين يا معود ما بغينا نشوفك تضحك كل معبس شكلك :)وانت تكتب
زين اشوة انى محسن الظن عيل هذا خوش خبر لى ترى :))



pearl : افا عليج رزيييتيج بالنص تامرين واعذرينى ترى والله ماشاء الله حاولت اسطركم كلكم اول شى بس الصيام المخ يفوت

mishari said...

sOulvOice : عاد اقولج شى انا ايام الجامعة لازم القميص داخل وازرار القميص شوية مبطلة :)
بس قارى ما كنت اسوق قارى :)
بعدين ما احب الدشداشة ولا احب الجريمبة :))
ويوزى تونى بعز شبااابى

ما تشوفين ابى اتزوج مرة ثانية :p


Mamloo7a Q8ia : حمام سباحة فى فريجى
لالا ما اتفقنا على هالامور ناوية الصبيان يطلووون من فوق السطح ويشوفون الحريم جذى لا يبه عيب :))
هذا وانتى لابسة بخنق :)

mishari said...

Fuzzy : انا بغيت اكتب طراد جان اقول لا سيارة ويلبس بلسووت بالحر وقاعد يبدل رنكات موستنغ :)
موديل 64


Hosno :افا عليك قطية ونشتريلك بيت زاوية فيه ديوانية وحياك
وبالعكس نبى واحد عزوبى علشان السهرة تصير عنده كل ويك اند ونفتك من الحريم
:)

mishari said...

Princess : شفتى شلون مضبطج حاطج فى بيت هادى :))

بس مالج شغل ادز عليج اليهال يحذفون صخر على بيتكم :P


أم الحفيز : طحتتتت عليج يعنى تدخلين وما تعلقين كل مرة ليش يا اخوج لهدرجة مواضيعى ما تعجبج :)
شدعوة
المهم ما ينفع ام الحفيز وملفيوى ماااا تركب يبه ما ترهم
وبعدين الاسم معاج انا نبى شى رزة
والسيارات ما تدخل الفريج تسفط بره ونى بقوارى :)

mishari said...

الكويتي الحر :افا عليك موجود :)


sOulvOice : يوزى عنى :) ترى كلللللش مو جذى انا
ما شتفينى بالبدلة جنى رشدى اباضة :P

bo9ali7 : رديتك من لندن واقرى وشوف :))

sOulvOice said...

hehehehehe


ترى قتلك قاري لاني تخيلت رووحنا بالسبعينات زمن حليم

بعدين شفيها الجريمبة احلي شي بالكووووون جريمبة مع العقال طبعا ونظارة شمسية وفرزاتشي البنفسجية


ولاتزعل البس برمودة ان بغيت ;pP

mishari said...

لوووووووووووول يخرب بيت خيالج
فرزاتشى البنفسجية عاد
انا من ربع ريبان
:P

على العموم كل شى منج حلو

Cr8ivia said...

LOOOOL mishare that was a very creative nice funny post walla heheh
يحليلي ايدد السكان happy to shesma (:

و اشوة اني مو محامية صج جان شيفكم والله :|
ههههه و عليه على لوير فقيره والله يحليلها عاد مسالمه جدا :P

tweety said...

لوووووووووووووووووووووووووووووووول

في أحد يتبرع يزنطك يبرد جبدي فيك ؟ :p

انا صج كله الستيريو شغال بس عاد بالبيت مو مسجلة السيارة
سويتني العبد مو تويتي لووووول

خوش فريج وايد عجبني صراحة بس أنا أكون متعهدة الحفلات في الفريج نحضر لكم أحلى الحفلات لأرقى الفنانين ونحيي كل مناسباتكم السعيدة : أعياد الميلاد , النجاح ,المالد , القريش, الخطبة و الاعراس ما عدا عرس مشاري الثاني :p
بس مطلوب طقاقة للفريج وعلى من تتوفر لديها المواصفات تقديم ال سي في عند أم الحفيز كونها من المهتمات بالفنون الشعبية
ملاحظة : يشترط للقبول النجاح في الاختبار واجتياز المقابلة الشخصية

الله يهداج يا سوسو مشاري وييييييين وأحمد رمزي وين :p

tweety said...

صج نسيت
اليباب علي بعد

:p

neelaah said...

مشاري موتني من الضحك
اولا
لازم اتعرف اني كل يوم الصبح
لازم اسمع فيروز او نجاة الصغيرة
الشاي علاقتي معاه جيده بس علاقتي قويه مع القهوة

و بعدين شوي شوي تقول عيوز و لابسه نفنوف بو قصه؟؟

وايد سعيده بأنطباعك عني
و وايد حبيت البيت

FatmaQatar said...

وناااااااسه ليته صج ="(
بس تتوقعون لو بأرض الواقع وتوفرت كل الفرص لجمعتنا راح نصير جذيه ؟
خياااااال ورمضان يعطيك جو عجيب =D

حسام بن ضرار said...

زيييين يا معود ما بغينا نشوفك تضحك كل معبس شكلك :)وانت تكتب
-----------------
شقالوا لك


قبسه بن ضرار؟


:)

Om Jaber said...

ashwaaaaaaaaaaaah. zain elly lal7een ma 7a66ait wala post fy my blog wella chan al7een mishari galeb baity "marqa9" ;P

Mamloo7a Q8ia said...

ياحلوك يا مشاري و ياخفة طينتك فعلا راحت هالسالفه عن بالي بس ماكو مشكله نغطي الحوش
ونتسبح بالبخنق بعد
شفت شلون انا محافظه وحجره
الله يجمعنا بالخير ولا يفرقنا من شر ويديم تواصلنا

mishari said...

Cr8ivia : انا ناطرج تشدين حيلج بالبوساتات وانا اوريج :))


tweety : علشان ابينلج انج حدج قديييمة
ستيريوو ؟؟؟
شخبااارى ستيريو نوعج مسجلة وقوارى الخيران وقاعد فوق اللى انا ما اعطى ويه :p :p

بعدين ما شفتينى ايام الجامعة
لازم القميص مبطل وحالتى حالة خبة
بس كنت خوش ولد مؤدب
:))
بس احب اهتم بشكلى
الحين ما ادرى شفينى جنى دثرت
فشرررررررررتى ادثر اما مشووور

mishari said...

neelaah : لا بالعكس تخيلتج بجينز برمودا وسكارف وبلوزة بيضة
وقاعد ماسكه الكوب وتهزين راسج على الالحان
:)
نيلة بالعكس انا قاعد استفيد من معلوماتج واحترم عقليتج المميزة اللى نفقدها بكثير من الحريم
ولو انى احس انج عصبية وشرية ام طير
بس ميخالفة اخت عزيزة :))


FatmaQatar : انتى مالج شغل خلينا نتخيل وغرفتح على واحطلج عليها علم قطر وصورتى فى بوستر :p

mishari said...

حسام بن ضرار :اشوى عيل فكيتها يعنى

محشووم عن القبسة :)


Om Jaber : ناطرج انا لى الحين فى فكرة ثانية براسى :))
بس ما ابى اقولها

mishari said...

Mamloo7a Q8ia : لا يكون زعلتى :)؟
ترى اتغشمر
لان يبه ما يصير خواتنا ونغار عليكم بعد

NewMe said...

عاد كل ويك اند ما ينفع
صج انا طير على سعفه
بس على قولتك
ولنفسك عليك حق
بس ماتقصر على الضيافة
والا انا قريتها غلط؟
ما نبي نستغلك
كلك ذوق
:)
وشارع يشرح القلب
دمت بحب
تحياتي

Mamloo7a Q8ia said...

ليش زعلانه ؟ مشاري شنو فطورك ولا كاتب الرد وانت صايم ؟؟؟
انا ما كتبت شي يبين اني زعلانه!!!! ترى هذي مو اول مره تكتب رد غير اللي انا كاتبته
اضم صوتي للاخت
soulvoice
واقول شايب

Яeema said...

البيت إبصوب و التعليقات إللي إتقشي بصوب

الساعة 6 و أنا إشدراني قاعد تتكلم برمضان

ما حطيت التوقيت

أنا بدون ريد بووول و قهوة ما أصير أنا

mishari said...

NewMe : اى شدعوة كل ويك اند شعندج :P
بعدين مو الا سنعفة انا خابر الحين تطورتى :P


Mamloo7a Q8ia :افااااا انا شايب هذا يزاى اراعى مشاعرج :)
بس ميخالف
مقيولة
من حبك كل عشاك :P
ماله شغل المثل

mishari said...

Reeema: افا عليج دلتين وكرتون ريد بول هاللى بيخلى عيونج الله يهديج تطلع من مكانها خفى على نفسج :)

بس على العموم ميخالف محقوقلج :)

Mamloo7a Q8ia said...

لا عاد كل شي ولا انك تزعل يا مشاري
ومشكوووور على مراعااتك مشاعري
بس اموت واعرف شنو اللي
انا كاتبته واوحى لك اني زعلانه
بعدين المثل عجيييييب
موتني من الضحك

العين الساهرة said...

خوش بوست عجيب، أشوف الإجازة اتت بثمارها، إشلون يتلك فكرة الفريج، بصراحة عجيب ، جان زين صج، أنا لما ما لقيت إسمى قلت بزعل عليك وبسمعك كلام، بس بعدين لقيتنى منوره ، دروس دينية كل أثنين، جزاك الله خير، لازم يطلع في الفريج مطوع ولا شرايك، مر عليى نزلت جزء جديد من سلسلة الأنبياء، مو تقول درس دينى

layal said...

بل نيله وبو صالح تقريبا نفس ما تخيلتهم
:-)
وما قلت لنا انت شلون بيتكم ؟؟
وشنو تسوي
خلني اقول لك
مشاري :
كله يدور في الفريج من بيت الي بيت
طالع من بيت داش بيت قهاوي وسوالف

tweety said...

حتى لو خاب روحك والقميص امبطل
هم أنت وين واحمد رمزي وين

عبدالفتاح القصري ممكن أتوقع

:P

بعدين اسم الله على ليش قديمة !!!؟
لا تنسى انك أقدم مني يابو الرهش

لوووول

ام الحفيز said...

مشاري

اشدعووووواه عزيز وغالي انت يا مشاري ان شاء الله بادبل جبدك في التعليقات

mishari said...

Mamloo7a Q8ia : افا عليج بس انا ما اقدر ازعل الجياكر هالمرة مماليح :) ؟

العين الساهرة :
وانا اقدر استغنى وما احطج وانتى دايمامنورتنى ومواصلتنى
وترى من صج وايد معجب بقصص الانبياء اللى حطيتهم :)

مشكورة وبيض الله ويهج بالدنيا والاخرة :)

mishari said...

layal : انا يا عزيزتى بيتنا غيييييير
بيتنا دور واحد وجدامه حديقة صغيرة وحاط طاولة بره مع عدة القهوة وجرايد
وكل يوم مطلع الهوز بره وارش الحديقة :P

tweety : اللى يدرى يدرى واللى ما يدرى يقول خمطة عدس
من الحرررررررررررررة
والوااااااااااهى :))

بس تدرين شلون بادزلج صورة ممثل اجنبى وباكتبلج عليها
اناااااا :P

lawyer said...

مشاري مت ضحك توني اشووف بوستك :)

يونس بس ذبحني بيتا مدري شنوو
عفسني

mishari said...

أم الحفيز: اى وانا اخوج ترى ما نستغنى :)

neelaah said...

مشاري
هههههههههه
صراحه مت من الضحك
انا عصبيه شويه
عصبيتي نابعه من الحق
يعني قد ما اقدؤ ابتعد عن الاشياء اللي تستفزني
و احاول اني اكون هاديه
بس اذا عصبت اعصب بطبيعيه
لا اكسر و الا اتخانق و لا اقل ادبي

بس اكيد اكيد طيبه

و مو ام طير

و انت هم اخو غالي
و تعويذه البلوجات

mishari said...

lawyer : حيالله فطومة
اول شى تقبل الله صيامج وصلاتج وكل شى زين منج وحط عنج كل شى مو زين :)

شفتى شلون من القعدة يا خوج بالبيت المخ بدى يشتغل :)


neelaah : اهوا طيبة لا خلاف عليه بس
سووووورى
هم شرية ام طير :)

neelaah said...

مووووووووووو

شريه

وام طير يعني شنو
يعني جذابه؟؟؟

والله مو جذابه

mishari said...

انزززززززززين خلاص عيل عليج اليوم طبق حلو
من ايدج يكون علشان اعرف مدى الطيبة :)

صحتين عليج وعلى ابو العيال والاولاد

pearl said...

:):):)))))

من قدي


مشكور مشاري

mishari said...

pearl : اافا عليج
اشوة انج شفتيها :))