الطموح و العمل والمثابرة والالتزام وقليل من المشاغبة تكون الحياة ناجحة

Monday, November 20, 2006

القروض مرة ثانية

البورصة طايح حظها

والفوائض موجودة

والتجار متهاوشين
فلنجيب على التالي

من يملك الصحف ؟ تجار

من يملك ادوات الاعلام ؟ تجار

من يملك البنوك ؟ تجار

من نادى بالمساواة عندما اسقطت ما يقارب 8 مليار قروض للمديونيات الصعبة ؟ لا أحد

من شفط أموال الكويت وأخرها اليمن تسحب 200 مليون وثاني يوم تشتكى من قلة القرض وتطالب بأن يكون هبة غير مرتجعة

من يتكلم عن فوائض مالية مستثمرة باستثمارات مسموعة غير مرئية

وبعدين يقولون القروض ما تطيح

خلو الناس تقتنع ليش ما تطيح القروض واحنا نقول لا تطيحون القروض لكن بلع بلع بلع والناس ما تستفيد وسقوط الكويتى من الطبقة المتوسطة الى الطبقة الفقيرة بسبب سياسة مالية فاشلة فى بلد قائم على الاقتصاد هذا العيب بعينة وعلمه

سلمولى على اللى يهوهو ولا يتحرك يسوى شى

لان صج صج سم حالى

30 comments:

Q8LoVeR said...

يبا هو والروح وقلبه واسبابه

لي الحين كل شعوب الخليج يصرفون على شعبهم ويزيدون محبتهم للحكومه
احنا قاصين علينا بكلمة ديمقراطيه الي ماشفنا منها ولا شي كله واسطات وتمصلح وحشو وكلام فاظي

الحين ديره كسبها المالي 57 مليار دولار بالسنه
ماعندها مليار واحد حق شعبها تطيح قروضهم ؟
وعندا 25 مليار حق الدول الي بره الي ماتهش ولاتنش ونصها ليست ذات مواقف مشرفه مع الكويت
و25 ثانيه حق فلان وعلنتان كل سنه طبعا

واخرتها المواطن الكويتي مدلع ؟!؟
اي مدلع خير ياطير
عندنا خير ليش مانتدلع ابي اعرف ؟

ليش الي يبوقون ربعكم بتدلعون والباجي ياكلون تبن شنو ؟

مو احنا الي نحمد ربنا احنا دايما نحمد ربنا الحمد لله
بس انتوا الي حمدوا ربكم عندكم شعب نظيف ومسالم وساكت عنكم وعن بوقاتكم وبوقات ربعكم
بس والله كثرة الدق تفج الحديد

اسمحلي اخوي مشاري معني محايد بالقظيه بس محتر صراحه لما اشوف الخليجي الي ياخذ 300 الف دولار قرض وبظرف شهر يطيحه شيخ من شيوخ ديرته عيديه حق العيد ولا هدية قايل فيه شعر
ومايطول بيته بالكثير مع القرض 3 سنين
ومعاشاتهم دبلات الي عندنا
واحنا زيادة 50 دينار على بدل الاجار ورفضوا
عن ابوكم اكو ادمي يسكن بشقه اجارها الشهر 150 دينار
عزابي اسكل اهلي ومرتي وعيالي وخدامتنا بغرفه وحده ؟

ماقول الا اللهم لك الحمد يالله لاتبلينا بما فعل السفاء منا

PearL said...

صح لسانك يا مشاري

حالنا كل ماله واردى

لي متى الله اعلم

neelaah said...

كلام طالع من القلب
و من حرة

و بالفعل الكبار يتخانقون
وصغار المستثمرين

اهم اللي يقل مستواهم المعيشي مع نزله السوق

sOulvOice said...

اتفق وبشدةةةةة ويه

q8lover




جان فلووسنا بتنقط على عوير وزوير لاوالله اخذ قرض واحرقه انشالله لوعلى جنطة



الكويتي اولى بخير ديرته وكل من يغرف من هالديرة بدون حساب سواء من اهلها ولا من الغرب شحقه مستكثرين عالمواطن اطيحون قرضه


واللي ماخذ قرض على سيارة ولا شي كمالي عليه بالف عافية طيحووهم يستاهلون عيال الكويت ابرك من المساعدات اللي تنقط بحضن اللي مايستاهلووون


تدري مشاري هم اكو عالم الحسد تارسهم الله مرهي عليه وماعليه ديون ولاقرض وموعاجبه ليش يطيحون القرووض عن غيره


بطلو حسد

kuwaitia said...
This comment has been removed by the author.
kuwaitia said...

انا رايي مع q8lover

الكويت كل مالها وللاردى

بس ما اقول الا آآآه يا بلد

الحجيه said...

السلام عليكم جميعا

أخ مشاري شيء بديهي أن التجار هم يملكون هذا شيء مو غريب ولا عجيب من عمر الدنيا التجار هم ألي يملكون أمريكا قراراتها وسياستها تحكمها اليهود والسبب هو المال الذي يملكونه فأصبحوا قوه يحسب لها إلف حساب .

القروض ما تطيح والسبب ما في عدالة ليش الواحد ما يمد رجلة على قد لحافه الأشياء الأساسية ميخالف يقترض بس العالم تشوفه على قد لحاله وسيارته


BMW750





ليش ما ادري ليش يحمل نفسه أكثر من طاقته ولا البيت يصرف عليه أكثر من طاقته 10 مرات ليش وعقب يشتكون لازم كل واحد منا يتحمل قراراته

القروض الخارجية سياسيه . مع الأسف أغلب الناس تغيروا بس يبون يأخذون دون عطاء .

إسقاط القروض بيعلم الناس الاتكال وعدم التفكير الكافي باتخاذ القرار المستقبلي وفيه ظلم للاغلبيه
الملتزمة

مع الأسف بعض النواب ألي يروجون لإسقاط القروض ما فكروه بمصلحة المواطنين كآكل ولكن بجزء صغير جدا لمكاسب انتخابيه فقط لا غير ونسوا شيء اسمه مصلحة الكويت ما فكر بهذه المبالغ أطور التعليم من مناهج ومعلمين ومدارس حتى يكون المواطن بأرقى مخرجات التعليم ويكون اللبنة الأساسية لتطور الوطن ورقيه
ما فكر بطرق تطوير الاقتصاد وعمل فرص عمل للشباب حتى يستقر ويعطي اسخ العطاء ويكون له مصدر ثابت مستقر للدخل

انشالله الي فيه الخير للجميع ربي يسخره ويبارك فيه ويحفظ كويتنا برجالهاونساءه المخلصين

mishari said...

راح ارد على الكل بس ابى ارد على الحجية لان ما تعرفون شكثر هالموضوع مأزمنى


ياحجية انا ما ادرى شنو خلفيتج الاقتصادية
لكن انادارس 4 سنين بكالريوس بالاقتصاد
وسنتين ونص تخصص بنوك بالماجستير
وخبرة7 سنوات بالبنوك
واشوف شنو اللى قاعد يصير مع العلم ان شغلى يمر عليه كل العمليات اللى قاعد تصير

بس علشان افهمج انا ليش قاعد اطالب باسقاط القروض
90% من الكويتين مقترضين واكثر من هالنسبة اتوقع الحين
معظم القروض وهذه احصائية المركزى للعقار يعنى مو علشان لعب
الكويت فيها فوائض مالية ولما تقولين فوائض يعنى مبالغ زائدة عن الحاجة وتكون بعد خصم المصروفات من الايرادات وفوقهم مبلغ فائض
وينه؟
شسوووون فيه ؟؟
وين يبون يصرفونه؟
السنة اللى طافت كان فائض مادى 7 مليار ؟
شنو كان انجاز الحكومة فيه؟
ليى الحين محد يدرى
لكن لو المواطن وانا اول واحد اشوف فى تطوير او مستشفى جديد
او فرص وظيفية للشباب المحتاجة
او مدارس ضمن نظام تقنى مميز
اقووول اوكى واانا ما افهم
بس تقوليلى
مد ريولك على قد الحافك
هم عن الحاف شالووه من الناس
لو تعرفين البنوك الربوية شلون تفكر وشلون تسحب العميل سحب
ذيج الساع تعرفين
وبعدين ماكو شى طبيعى بالدنيا
اليمن تزرع قات ونص الشعب سكران واحنا نصرف علييه؟؟؟ ليششششش؟
الفلسطنين يطلعون بمظاهرات ضد حكم الاعدام مال صدام واحنا نعطيهم فلوس ليش؟
ممكن افهم
لا تقوليلى سياسة خارجية
لما تكون السياسة الداخلية تعبانة فمن باب اولى اعطى الكويتي
بنغلادش اعطيها مليار دولار؟؟؟؟؟
واهم كل يوم جرائم دعارة بالكويت ؟؟؟
يا حجية لا تزعلين منى
بس اذا ما تعرفين بالاقتصاد
انتى اخت عزيزة وغالية اتمنى انج تتكلمين بالخير
اللى مو ماخذ قرض اللى مرهى عليه
ولاتقوليلى ماد ريوله على قد الحافه
وصلى على النبى انا اقول احسن

wakee7 said...

مشاري

من صجك ولا اتغشمر ؟

هذا وانت دارس اقتصاد الله يعين لو انك دارس جغرافيا .. جان علوم

Cr8ivia said...

انا ضد اسقاط القروض لعدم تحقيقه العدالة صراحه ..
في ناس توها مخلصه قروضها و عايشه سنين في تقشف و ناس ماخذين قروض سبهلله ..
انا مع الراي اللي يقول حل وسط مثل اخر راي طرحون
توزيع مبلغ على كل مواطن او كل رب اسره
يحقق عدالة اكبر

المهم هذا ما يمنع ان مرارتي انقعت بعد ال 200 مليون لليمن
و مادري جم مليون للسلطه الفلسطينيه
و مليارات المديونيات اللي استفاد منها 34 كويتي فقطّّّ!!

بس شنقول؟

الله فوق

7amee elDyar said...

القادم اسوء

والفجوة راح تزيد بين من يملك وبين من لا يملك

3ateeja said...

انا اقولك ليش ضد اسقاط القروض
لأن اول شي بيسويه المواطن ...بعد مايطيح قرضه
انه بياخذ قرض يديد :)
.
.
وقرضنا يا ولا على وحده ونص

bo9ali7 said...

الكويتي..والله انه مسكين

الحجيه said...

السلام عليكم جميعا

أخ مشاري بالعكس أنا معاك ما أنكر أن التخطيط للمستقبل والاستفادة من الفوائض تعيس
بس مو معناه أن أهمل الشعب كله وأعطي القلة ألي ما خططت صح للاستفادة من الأقساط بالمعقول . في اقتراح سمعته من فتره يقترح أن الحكومة(تشتري) تأخذ القروض من البنوك وثم تقوم بتقسيطها على المواطنين بدون فائدة ؛ وأنشاء الله ربي يعين الجميع
أخ مشاري أنا قلت ياريت النواب ألي يطالبون بأسقاط القروض المفروض يطالبون بتطوير القطاع الصحي والاقتصادي و غيره من أمور تعمل على استقرار المواطن واطمئنانهم ؛ ولازم يطالب النواب بخطط زمنيه محدده لتطوير أي قطاع في الدولة وبعد ذلك أذا تأخر الانجاز يتم محاسبة المقصرين .
أما القروض الخارجية مثل ما قلت امور سياسيه
أخ مشاري أحنا قاعدين أنتناقش مو قاعدين نفرض على احد ألي قاعدين نقوله كل واحد منا له رأي ؛
وفي الختام احنا اخوان .
"الاختلاف بالرأي لايفسد للود قضية"

على فكره سمعت عن ناس يسافرون بأقساط !!!!!
سمعت عن ناس يقترض علشان يشتري أسهم !!!!
وفي الختام كل الشكر على طريقة الرد

mishari said...

Q8LoVeR :مكافات الوزير الحين زادوها بغمضة عين وانت الصاج لى 100 الف تندفع مرتين بالسنة يعنى المجموع 200 الف بالسنة لكل وزير
الديمقراطية صارت جنها منة علينا الله يعين لو مو امريكا فارضتها فرض علينا وغصبن على اللى يرضى واللى ما يرضى

PearL :والله الناس ملت بس الواحد شيقول ؟

mishari said...

neelaah:يا نيلة يا عزيزتى وانتى بكرامة اثنين والا اقولج هونت ما ابى اسب يتهاشون السوق ينزل على خاطر عيونهم 300 نقطة هذى دولة ؟؟؟
ويقولون دولة مؤسسات ؟؟


sOulvOicE:تصدقين عندى صديق دخله الشهرى بدون ما ابالغ مو أقل من 6 الالاف دينار الله الحمدالله مرهي عليه وعسى الله يزيده
يقول ليش يطيحون القروض خل يعطون كل واحد قتله انت محتاج ؟؟؟؟

mishari said...

kuwaitia : المشكلة كل من يقول اه بس وين اللى يسمع ؟؟؟؟؟


wakee7 : عزيزى تعال اقنعنى بالارقام بعد نتكلم
من مبادئ الاقتصاد تقول لما تكو ن الدولة اقتصادية نفس الكويت لازم يكون اقتصادها الداخلى قوي احنا اللى صاير تنفيع وفتح التسهيلات حق الشركات والبنوك بدون محاسبة ولا حسيب ولا رقيب
يعنى علشان اعطيك ابسط شى
المركزي يحط قانون بدون عقوبة؟؟؟؟؟؟؟
فهمنى وين صارت ؟؟؟
يعنى تقول حق البنك لا تتجاوز مع المواطن 50% بس شنو عقوبتها لو تجاوز؟؟؟؟
محد يدرى

mishari said...

Cr8ivia : سؤال برئ جدا جدا
يوم طيحوا 8 مليار عن 35 شخص احد تكلم وقال عدالة ؟؟؟
الاجابة لان لانهم تجار

يوم عطوا كل دولة تفلت وسبت الكويت ومسحت بكرامة الكويتين الارض مليارات احد قال عدالة
ياعزيزتى اللى خلص قرضه معناه خلصت احتياجاته واللى يبى البنوك مفتوحة و لاتقوليلى بالكويت فى احد عايش على قد حاله لان الكل بدأ يعيش اقل من حاله
لما يقرون مكافأة سنوية حق الوزراء كل سنة 200 الف دينار بسكات بدون محد يتكلم وين العدالة ؟
لما الكويتيى يتجه حق مستشفيات القطاع الخاص ويدفع من جيبه لان المستشفى الحكومى تعبان وين العدالة
لما الكويت تطلع بالمركز 39 من اصل 41 دولة بالتعليم وين العدالة بصرف الفوائض على تطوير البلد
بالصيف الاعلان بالجريدة عن فوائض مالية وجك بم والا ماكو ماي ؟؟؟
ماى يا بابا مقومات الحياة تنقطع عن دولة فيها فائض مادى

يبه والله والله والله لو اشوف ان الفوائض بتستثمر فى مصلجة الناس اقول لا تطيجون القروض لكن لما تصير النهيبة من كل صوب لا والله طيحوا وطيحوا وطيحوا حق كل كويتى
اانا ما ادرى جم عمرج بس الكويتى بالغزو ولى اليوم واهو يقدم تنازلات من اجل الحكومة واليوم بالجرايد 3 شهداء جدد
وين تضحية الحكومة من اجل كافة الشعب والا بس حق التجار واصحاب الدماء الزرقاء

mishari said...

7amee elDyarالفجوة تزيد بسبب تطبيق الرأسمالية بدون التفكير فى مساؤوها وبدون تثقيف الشعب اللى بدأ يدو ر حول نفسه بسببهم


3ateeja : ياعتوج خل اقولج شى وايد مهم
ما يصير تطيح القروض بدون اصلاح للعملية الائتمانية الموجودة يعنى تقليل نسبة الالتزامات وتشديد الرقابة على البنوك بدال ما يخلونها تسرح وتمرح على كيفهيا

mishari said...

bo9ali7: بس مسكين ؟؟ شوية مسكين خلها على الله


الحجيه": يا حجية اول شى انتى اخت عزيزة وغالية ولا تتوقعين انى قاعد اتناجر او شى
بس انا ما ادرى شلون انتى تقولين قلة وما نسبته فوق 90%مقترضين بالكويت
شلون يكونون قلة ما في عايلة بالكويت ما فيها مقترض ما تركب
والتخطيط معدوم معدوم معدوم بالكويت من عمر الدنيا
اخر مستشفى تم بناءه بالكويت سنة 1980
اخر جامعه حكومية 1977
وين التخطيط
الماى ينقطع
الكهرباء على وشك مشكلة جديدة
يا حجية اللى ايده بالماى مو نفس اللى ايده بالنار
والله لما كنت اشتغل قبل متقاعدة كويتية رفضوا يدزوهنها علاج بره راحت خذت قرض علشان تتعالج
العقار يرتفع بالكويت والناس تبى تسكن ملت من نطرة 15 سنة على 200 متر بنياان
يالحجية شوفى الامارات شوفى قطر شوفى السعودية وين كانوا وين صاروا خلكم شوي حقانين
واليوم تطلع جمعية احياء التراث اللى اكثر الجمعيات مخالفة لقانون وزارة الشوؤون علشان تقول بفتواها بعدم جواز اسقاط القروض
وينهم يوم طيحوا عن التجار مليارات ما قالوا ربا ونصب وبوق
خافوا االله بالكويتى الفقير اللى عايشين على 100 وميتين دينار

Cr8ivia said...

mishare

i agree with u .. totaly agree
العداله باح و الملايين اقصد البلاااايين اللي قاعده تروح للعدو و الغريب و اصحاب الكروش تدمي القلب من الحسره

بس اسقاط القروض لا
من قالك اللي توا خلص قرضه خلاص؟
و السنين اللي عاشها بقشف و حريمه عشان يسدد؟ و غيره ياخذها باردة مبرده
و صدقني في ناس تاخذ بدون حاجه

انا مع التوزيع المتساااااوي
يعطون كل رب اسره كويتيه
او كل مواطن كويتي
مبلغ و قدره بدال اسقاط القروض

مثل ذيج المره بالجريده كان الاقتراح .. مثلا لو كانت 2 مليار القروض تنجمع و تتوزع و بل بلا بلا
و كل مواطن ياخذ 2000 دينار
او كل رب اسره ياخذ 6 الاف
او 10 الاف

مو مشكله المهم الكل الكل

الكويتي الحر said...

مشاري

كل الاسباب اللي قلتها ما تبرر اسقاط القروض

tweety said...

مع احترام لرايك واتفاقي معاك ان في ناس فعلا لوما الحاجة ما اقترضوا بس هم الاسقاط مو حل لأن في ناس اللي عايشة في فوضى مالية تمشي واتبعزق يمين وشمال على أمور مو مدروسة أو أمور كمالية بترد تقترض مرة ثانية وتعالي يا حكومة زيدي الرواتب والا طيحي القروض مرة ثانية واحنا نبتلش بارتفاع الاسعار

يفترض يكون الحل أكثر منطقية : تحديد الفايدة مثلا

انا هاللي يهوهو لو شايفته جان زنطته

mishari said...

Cr8ivia : انزين انا بصير طيب وباقول خل يعطون كل واحد 2000 دينار ؟؟؟؟؟؟
الموضوع مو موضوع اسقاط قروض؟؟
راح يزيد من العشرة 8 مليار شنو راح يسوووون فيهم ؟؟؟؟

ابى افهم ؟؟


الكويتي الحر : يا عزيزى لما يوقفون مرة بسبة 50 دينار عن الدورية ويقولها عليج امر قبض ويبون ينزولنها من سيارتها علشان تركب الدورية انا اقول الا تسقط وتسقط وتسقط
لان الكويت بلد خير بس صايرين مثل البقرة العورة
حليبها حق الذيب وعيالها عطاشى

kila ma6goog said...

نبيها شيوعية؟

لوول هذا النزام الرأس مالي

White Wings said...

احنا ما نعارض اسقاط القروض ونقف عند هذا الحد، بس نقول في حلول اخرى أنجع وأقل مغامرة وتهوراً من هذا التصرف
أشوفك متحمس، جم قرضك؟
:)

الحجيه said...

السلام عليكم جميعا

أخ مشاري لا تقارن لان المقارنة غير صحيحة بالدول ألي قلت عنها شوف سعر الكهرباه عندهم كم شوف سعر البنزين عندهم شوف حرية التعبير عندهم؛ نسيت قطر لما أسحبت الجنسية من مجموعه من المواطنين بسبب قله تنتمي لهم حملوهم ذنب غيرهم
ودي أعرف ليش الكويت كل مذمومة وينسي طيبها
كل ألي يصير عندنا مع الاسف لانعدام الذمة والضمير عند البعض والله يكون بعون الغالية الكويت . ويسخر الخيرين لخدمتها ورفعتها ويبعد عنها كيد الكائدين الحقد الحاقدين المفسدين
اللهم آميييين .
أنا ضد إسقاط القروض ولكن مع علاجها

mishari said...

kila ma6goog : أنا أقول بطل من قراية هالكتب اللى عافستك علينا والعب جنجفة احسن :)))


White Wings : صح يمكن انا على قرض بس الحمدالله يعنى حق شى مفيد ومستثمر لكن انا اللى منبطة جبدى منه ليش اللعب بفلوس الناس
اللى منبطة جبدى منه ليش يعطون حق دول شعوبها اذا قالوا كويتى تفلت عقب اسم الكويت
يحر والا ما يحر ؟؟؟؟

mishari said...

الحجيه :تصدقين عاد انا عندى مثل الورد ادفع ضرايب وادفع سعر عالى على الكهرباء والماي وكل شى
بس مقابل خدمة زينة
لا تصير النظرة ان كل شى زين وما عندنا مشاكل
الديرة متروسة حرامية
بنغلاديشى يطلع حق ربعه اجازات قيادة ب 200 دينار
ويطلع مرتشى ضابط عود بالداخلية
ديرة يصير فيها فائض ميزانية وينقطع الماي عن شعبها
صدقينى
انا ضد اسقاط القروض بس بشرط
خل تضمنلى الدولة انى ما اودى عيالى مستشفيات خاصة بسبب التخبط فى المستشفيات الحكومية
مستعد اودى عيال مدارس حكومة اذا اضمن ان نوعية المدرسين زين بدال ما اغلب المدرسين دروس خصوصية ويايبنهم من دول عربية بس يبقون
مستعد اول واحد يدفع ضريبة مقابل خدمة جيدة
الكويت زينة وطيبة وارض نظيفة
لكن الناس والمتحكمين بارزاق الشعب يبيلهم قصب
يا حجية اللى محيرنى ان لما تصير السالفة حق وزير محد يتكلم
والا وزير فوق معاشه يزيدون مكفأته السنوية من 100 الف لى 200 الف فهمينى من زين الوزراء والا من الحلول العبقرية اللى عندهم
صلى على النبى بس ترى الشق عود والظاهر انتى عايشة بالململ والحرير وما تدرين الناس شلون عايشة
يا حجية فى ناس من التعفف تستحى تطلب والاهل ما عندهم فلوس علشان يشترون هدوم مدرسة حتى لو ب5 دنانير
انتى وين قاعدة دقى سيارتج سلف وروحى شوفى خلج من المناطق البعيدة دشى الفيحاء
والا القادسية تلقين ناس مالها حس
بسكات كل شى علشان ما ينحرجون

الديرة ديرة حرامية وبس

tasty_as_berry said...

Q8LoVeR أنا معاك قلبا وغالبا ... مشاري مؤيده لكلامك 100 %

يعطيك العافية ،،