الطموح و العمل والمثابرة والالتزام وقليل من المشاغبة تكون الحياة ناجحة

Wednesday, November 01, 2006

شقصتى ويا هالمكان

هالسالفة صج وصارت يوم الاثنين بس خل اعطيكم القصة من اولها سنة 88 او 89 كنت اتمشى بمششى مشرف مع رفيجى وفجأة سمعت صوت سيارة مسوية حادثة وصوت الهرن بصوت عالى رحنا ركضنا صوب السيارة وقاعدين الناس يفتحون الباب لان السيارة انقصت بالنص بسبب اصدامها بعامود النور والا طاح شابين حزتها متوفين

انتهى

يوم الاثنين كنت انا وصديق لى راجعين نلعب كرة بعد رمضان ورايحين ملعب الهيئة اللى بمشرف وخلصنا الساعة 7 وقتله ترى عندنا لعب مرة ثانية الساعة 9 شنسوى وين نروح قالى امشى خل نتمشى بالممشى (مشرف)

وقفنا واحنا قاعدين بعد فترة والا يقوللى تشوف بعيد اهناك فى واحد طايح رحنا نشوف شنو الموضوع والا رجل كبير بالعمر طايح على الارض واشخاص قاعدين يتصلون بالاسعاف انا نوعا ما اعرف اذا فى نبض من الايد مسكت ايد الريال والا باردة والنبض تقريبا شبه مختفى حطيت اذنى على صدره على انى اسمع شى ماكو حاولت ادلك القلب بس خفت لان قلت اخاف اسوى حركة غلط او شى تأثر عليه بس حطيت ايدى على صدره والا يشهق والاسعاف لى الحين ما وصلت قلت حق واحد واقف شوفوا فى بجيبه تليفون او مفتاح سيارة

لقينا مفتاح السيارة والا سيارته قريبه

فتحت السيارة لقيت الموبايل وخليت واحد كبير بالعمر شوى يكلم زوجته بعد دقايق والا المرة ياية وتذكر الله

وتوها كانت تبدى تبجى والا مسكينة تتذكر تقول انا انسانة مؤمنة وتدعى الله ان يرحمها بالهموقف وبنات الحلال الحريم يذكرونها بالله

رجعنا الريال وكانت الاسعاف وصلت

والا يقوله

Rest

ما فهمت المعنى الطبى لها

جان اسأل واحد فيهم قولى الريال حى ميت شنو الموضوع جان يقولى سكتة قلبيه انا وين لونى وين مخى مشكلتى بهالمواقف ما اعرف اعبر وجامد يعنى ما يبين على التأثر

مشينا ورحنا لان قالولنا الاسعاف ممكن تمشون علشان الزحمة مشينا

اليوم افتح الجريدة والا اسم الريال متوفى امس بالليل كنت قاعد افكر بمصيره لان شفت اهله زوجته وبنته شنو صار فيهم

يمكن هالموقف كان درس لى لامتنع عن اشياء كثيرة لان مو اول مرة اشوف الموت بعينى

يارب ترحم هالانسان اللى اقصده وترحمه رحمة تدخله فيها الجنة وتصبر اهله وترزقهم جميل الصبر والثواب عليه

وارحم المسلمين والمسلمين الاحياء منهم والاموات

62 comments:

sOulvOice said...

الله يسامحك يامشاري بروحي اليوم منقمتة خلقة ييت وكملتها علي بهالبوست

ماحب اشوف احد حي بعدين يموت

ادري مافهمت




اقين



ماحب اشوف احد اعرفه و او كان جدامي بمكان ما وبعد فترة قصيرة يموت



الله يرحمه ويرحم موتى المسلمين صارلي جم يوم بس اتحلم بالموتي

tweety said...

بسم الله الرحمن الرحيم
اسم الله عليكم اشصاير !!!!! اشفيك انت وسوسو ترى انا كلش قلبي قلب سمجة

بعدين لا تقعد تخرعني وايد بممشانا يعني يوم تعدل الجو قلت هالسالفة !!!
الله يصبر قلبي بمشي واتلفت أخاف أشوف هالمنظر

يومه الله يرحمه
يمكن أرهق نفسه بالرياضة

Om Jaber said...

الله يرحمه و يصبر أهله0 أنا حاسه فيك يا مشاري لأني تعرظت حق نفس الموقف قبل أربع سنين في يورو ديزني0 تخيل الأبو مسجي على الأرض وعياله حواليه يبكون كان منظر مؤلم ظليت احلم فيه شهر0 و أكثر شي كان امعور قلبي إن الأبو كان راسه على الأرض و الأرض امثلجه0 يا الله حسن الخاتمه0

Яeema said...

أول شي ماكو موبايل بال88

و بعدين إنت بسك من سيرة هالموت

الدنيا حلوة تمتع فيها


الراحة النفسيه ويا رب العالمين و متي ما أديت إللي عليك
بس هذي الراحة

يبيلي أخلطك ويا رفيجنا السعودي

Krakatoa said...

اخوي مشاري..الشخص اللي تطرقت له بممشي مشرف صديق للوالد..وامس الوالد راحله المقبره انا مادريت بالقصة الا يوم رديت من الدوام..الوالد حده متكدر

انا لله وانا اليه راجعون

albandry said...

اللهم امين

المشكلة مو باليوم

المشكلة انت اللي تقبس


وسلمللي عاللي يهوهو مايسوي شي!؟

نون النساء said...

لا حول ولا قوة إلا بالله

انا لله وانا اليه راجعون


الله يرحمه ويغمد روحه الجنه ويغفر له ان شاء الله

Kwaitiyya said...

واااي ! بسم الله ! يالله ياربي ترحمه وترحمنا برحمتك ! ياربي حسن الخــــــاتمه !

المشكله : هل من متعــظ؟؟؟؟
الموت أقرب لنا من نفسنا بس وين اللي يخاف من الله

أنا مره شفت موقف جذي بعد ! واحد غرقان وطلعوه وسووله تنفس صناعي بس ماكو فايدة ! وزوجته وعياله حواليه يبجون ! واي عوار قلب

ام الحفيز said...

مشاري

الموت حق والله يرحمنا برحمته ويرحم امواتنا واموات المسلمين امين يا رب

وقطيعه الممشى مال مشرف الحوادث فيه عجيبه غريبه يطري عليكم الي يبوقون اغطيت البواليع...وواحد طاح بالبالوعه ولقوه ببالوعة بيان...وغير التحرش ببنات خلق الله واللويه اتصدقون عاد ان ممشى مشرف صار شبه!!كيفكم

ريما
هااااااااااو ما لحقتي على تلفونات النقاله التول منطلق 1 واثنين وثلاث في 86و87و الخ كان في تلفونات نقاله بذيج الحزه ومشاري صاج.....

pop_cornaaa said...

الله يرحمنا برحمته بصارحه صج المووت يخرع بس هم لابد منه وماكوو أحد يمووت ناقص عمرررررر :(((
اكره شى بالدنيا بس كلشى له نهاية

albandry said...

reema
القصة الاولية 88 مافيها موبايلات
القصة الثانية مالت المشى امس صارت

ام الحفيز انتي زوغة
********
وقطيعه الممشى مال مشرف الحوادث فيه عجيبه غريبه يطري عليكم الي يبوقون اغطيت البواليع...وواحد طاح بالبالوعه ولقوه ببالوعة بيان
************
طاح بممشى مشرف ولقوه ببالوعة بيان
كعكعكععكعكع
شلون هذي؟؟!!!!
مو نايمة سامحوني بطفركم
سوري مشوور رديت بدالك

حسام بن ضرار said...

لا إله الا الله


يا من بدنياه اشتغل
وغره طول الامل

الموت يأيتي بغتة
والقبر صندوق العمل


الله يرحمه برحمته ويصبر اهله ويعظم اجرهم ومشكور على هالبوست اللي كله عبره وعظه

a7La eNG said...

الله يرحمه و يرحم جميع موتى المسلمين


وااااااااي قريته وايد
يعوور القلب
:"(

and it's still my BD. week !
9adaaam 7sain mo nora ;)


قصتي مع ممشى مشرف تضحك كان بيتنا جباله اروح مشي مع الخدامة كل يوم

بس ماني قايلة احسن خل يضيق خلقك عشان ما تروح .. امش بالمنطقة مثلا

;PppP

تدري زين سويت انك ما حركت فيه شي
انا اعرف ناس انشلت و السبة الشيلة الغلط .. القصد يساعد بس النتيجة مأساة

الله يرحمه .. و يرزقنا حسن الخاتمة

Яeema said...

أم الحفيز
لحقت علي الرمادي بو أريل بعد بالسيارة



النقال أول واحد ينشال باللإيد كان إنطلق 3
أعتقد
بس هم ثقيل !!!


يقولج ممشي؟

إنطلق واحد يبيلج صبي يشيله حقج

إلا جااان مشاري كان هلك

هذا شي ثاني
ههههههههه

Cr8ivia said...

انا لله و انا اليه راجعون!

اعتقد لو اشوف احد يموت جدامي مانام شهر

الله يعينك
والله يرحمهم بواسع رحمته

بتطب ممشى مشرف مره ثالثه؟

ام الحفيز said...

ريما
هاااااااو منطلق واحد ابرك من تجنطة السمسونايت الي فيها التلفون الفستقي
وتنحط مصارينه بالدبه...والتليفون عند مقعد الدريول

بندري

هاوهاو ماتدرين كل الجرايد اكتبوا عن الي طايح الله وكيلج (اللهم لا شماته)رحله لا على البال ولا الخاطر
one way ticket in to the gutter

حسبي الله على سووووج استاثمت بهالتعليق

الحجيه said...

السلام عليكم جميعا
أخ مشاري الموت حق على الجميع هم السابقون ونحن اللاحقون ربي يرحم الجميع برحمته الواسعة
السؤال من منا يعتبر ويعلم أن الدنيا فانية لا محال
قبل فتره توفت إنسانه عزيزة على قلبي فجئه دون أي مقدمات ؛ وعند تغسيلها وتكفينها شعرت أن الدنيا ولاشيء نطلع منها بأرخص شيء بكفن وبس ويبقى عملنا علمه عند الله ؛ الناس تلهث وراء زيف الدنيا وتنسى الآخرة الدائمة بلا نهاية , ما نقول إلا ياالله حسن الخاتمة لنا ولذريتنا وحبايبنا وأخوان وأخواتنا المسلمين والمسلمات في قصيده حلوه
******
الموت هيـن والبـلا وش ورا المـوت عند الحسـاب يهـون سهـم المنايـا
باكر نمـوت وتصبـح قبورنـا بيـوت عقـب القصـور بضيقـات الـزوايـا
في جوف الارض وكل من حولك سكوت وتعاقبـن بالقبـر عــوج الحنـايـا
يـارب يامنجـي نبيـك مـن الحـوت سترك وعفوك يـوم كشـف الخفايـا
باكر ليا جينـا علـى داعـي الصـوت شيبـان واطفـال وشبـاب وصبـايـا
ندعـي وحنـا بيـن باكـي ومبهـوت ورحنـا لهـا ننقـاد مثـل السبـايـا
يـارب تهدينـي قبـل لحظـة الفـوت وتغفرذنـوبـي ياكـريـم العـطـايـا
اشكيك هـم داخـل الصـدر مكبـوت وايامـي الـلـي بالخطـايـا مـلايـا
أن لاذ بك من كـان طايـع ومبخـوت فـي مـن يلـوذ المرتكـب للخطايـا
يـارب ياقـادر علـى كـل طاغـوت لاياقـف اللـي وحـدوبـك خـزايـا
رحماك لامنـا صحينـا مـن المـوت واليـا وقفنـا عنـد بـابـك عـرايـا



الشاعر / متعب التركي
سؤال احد فكر يستعد للموت ألي محد يعرف متى يكون ؟

ام الحفيز said...

الحجيه

اكيد مستعدين والجفن كاهو بالكبت عندي يسمع حسج

والموت حق وهذا دربٍ كلن بيمشي فيه ويالله حسن الخاتمه

NewMe said...

نفس قصتي وياااااك
من تجيب سيرة الموت
يموت لي عزيز
واللي يرحم والديك
ممكن ما تجيب السيرة
ما بقى لي أحد!

السالفة وما فيها انك وملاك الموت
تدورون في نفس المحيط
انا منك اقعد في البيت ولا اطلع

امزح
لوووووول
صدفة عمرك سمعت بالصدفة
وبالمناسبة ياليت تدعي لنا انا بعد والا ما استاهل!
:)
دمت بحب
تحياتي

EsTeKaNa said...

!!سبحان الله شي غريب
بس أحس تكرر الموقف في ذات المكا الي تكون موجود فيه قد يكون اشاره لي،ولك،ولكل من يقرا هذا البوست اشلون الموت قريب ولا يغره طول الامل


الله يهدي الجميع ويحسن خاتمتنا اللهم آمين

الحجيه said...

السلام عليكم جميعا
ام الحفيز الاستعداد للموت مو بالكفن بالعمل
إنَّ حياتك إنما تبدأ بعد مماتك ..

يا ابن آدم أنت الذي ولدتك أمك باكياً *** والناس حولك يضحكون سروراً
فاعمل لنفسك أن تكون إذا بكوا *** في يوم موتك ضاحكاً مسروراً

قال عمر بن عبد العزيز لبعض العلماء : عظني ، فقال : لست أول خليفة تموت ، قال : زدني ، قال : ليس من آبائك أحد إلى آدم إلا ذاق الموت ، وسيأتي دورك يا عمر .. وسيأتي دورك يا عمر .. فبكى عمر وخرَّ مغشياً عليه .
قال رسولنا الكريم ألف الصلات وسلام عليه
( والذي نفسي بيده إنَّ أحدكم ليعمل بعمل أهل الجنة حتى ما يكون بينه وبينها إلاَّ ذراع فيسبق الكتاب فيعمل بعمل أهل النار (فيعمل بعمل أهل النار) فيدخلها ، و إنَّ أحدكم ليعمل بعمل أهل النار حتى ما يكون بينه وبينها إلا ذراع فيعمل بعمل أهل الجنة فيدخلها ، وإنما الأعمال وبالخواتيم )
يا مقلِّب القلوب ثبِّت قلوبنا على دينك
يا مقلِّب القلوب والأبصار ثبِّت قلوبنا على دينك..

العين الساهرة said...

الله يرحمه برحمته الواسعة ويرحمنا معاه ويحسن خاتمتنا، اللهم آمين

Hosno said...

اي والله هالمشهد يظل بالبال لفتره طويله
الله يرحمه انشالله بواسع رحمته ويصبر اهله

kitty said...

استغفر الله العلى العظيم شهالحاله يا مشارى

:(

انا لو مكانك بقعد اصرخ يمكن

ما اعرف اتصرف فى هالمواقف

ذكرتنى بحادث صار جدامى ايام الجامعه

ومنت بروحى والحادث مره دشت بالشبه

صفطت ونزلت اركض لوووول

المره قشيانه

انا قمت ارجف ،، وقف مخى

شسوىىىىىىىىىىىى جان اقول ماكو الا 777

واتصل عليهم ساعه على ما رداو وقلت

المكان وسكرته ، الحين عابلى يا كيتى بالمره
صحت وقامت اتالم وتبجى وانا ابجى

مشارى امبين ريلها مكسوره وظلوعها

جان اقولها وين يعورج

النهايه قمت اصرخ

شسوىىىىىىىى شنو يعورج

الحين الاسعاف بيون

ههههههههههههههههه استغفر الله صج شسوى

مره كبيره بالسن ما اقدر اسحبها اشيلها سيارتى

وتخيل قايله ظهر ولالا قطو بالشارع ماكو الا انا بس

والله ما انسى هاليوم
:)

الله يرحمه

uTMoST said...

الله يرحمه يا رب ..
انا اخوي قالي عنه يقولي شلت راسه عن القار ..
عمره 16 سنه تعقد و عليه ,و المشكله ان ولده وياه بالمدرسه فحاس بالذنب

والله موقف صعب
مانحطيتوا ب هالمكان إلا ل سبب , جان زين نتعظ ..

~ajMaLjaMeLa~ said...

وعليه كسر خاطري عاد انا امشي بممشى مشرف سبحان الله ماصادفني شي هناك
عسى الله يرحمه ويتغمده برحمته
ويسكنه فسيح جناته ويصبر اهله :(

Nescafé said...

الله يرحمه ويصبر اهله

يالله ترحمنا برحمتك

Яeema said...

mishari !!!!!

قريت القصه مرة ثانيه
لا إتلوموني والله راسي مفتر لما ألحين


البندري
توني أشوف تعليقج
لو شايفته من قبل جان فهمت إن القصه قصتين ببعض




مشاري لو مسافر مو أحسنلك؟

هذي آخر قعدة لك بالعيد

بالكويت

شواطىء ورمال said...

السلام عليكم
اي هذي الدنيا
قال تعالى ( انك ميت و انهم ميتون :
صدق الله العظيم
بس شعور يخرع اذا شفت انسان يموت جدامك واتعرف و تتيقن انا الموت ما يعرف صغير او كبير :(
الله يعينه عليه و يرحمنا اذا صرنا مكانه
الله يرحمه برحمه الواسعه و يسكنه فسيح جناته ويلهم اهله الصبر و السلوان
امين امين امين

Fuzzy said...

لا حول ولا قوة اللا بالله

الاعمار بيد الله وكان يومه هالريال
الله يرحمه

وخر عن هالممشي حوادث سيارات وناس تطيح وتموت روح ممشى ثاني

FatmaQatar said...

يا الله شي حده مؤلم ="(
الله يرحمة بواسع رحمته ويصبر هله

ويحفظك يا مشاري من كل سوء

لوحات said...

الموت راحة

ولكنه راحة تسبب الألم



الله يرحمه ويرزقه من جنانه والرياض
ان شاء الله

ام الحفيز said...

الحجيه

صاجه الاستعداد للموت مو بالجفن ولا بالمروكع والسجود لكن بالقلوب النظيفه والخاليه من الحسد والغل والاحقاد والنواياه الحسنه و بالاعمال الصالحه...وهذا اانا كل ما افتح الكبت اشوف اجفني جدامي واقول يالله حسن الخاتمه واتعض واقول هذا دربٍ مكتوب ولازم نعمل بالدنيا للاخره
والخوف من العقوبه
وسلامتج وعساج تحيين

mishari said...

sOulvOice : ترى فهمت من اول مرة ادرى تحسين انج فقدتى قريب وهالشى بروحه يعور

tweety : سكتى يا توتو والله ما تتخيلين هالسالفتين ما انساهم لا وقاعد اسولف مع واحد جان يقولى شفيك مو اول مرة حتى راشد الخضر الله يرحمه متوفى اهناك
راشد الخضر الملحن

mishari said...

Om Jaber : يا ام جابر هذا نذير حق الانسان ان ماكو مكان عن مكان يروح عن الموت وين ما نروح ممكن يلقانا

Яeema : اشوة انى قريت التعليق الثانى وما رديت عليج حزتها انا وين وانتى تتفطنين على :)
ريما لا تسئيييين الظن فينى وانا اخوج ;)

mishari said...

Krakatoa : الله يرحمه والله يا خوى مسكين يوم اهله وصلوا المكان كانوا يقولون ان ما فيه سكر ولا شى بس هاليومين ضايق خلقه
الله يرحمه ويغمد روحه الجنة

albandry: انا قبس؟ ليش
هذا موت ما فيه مكان او وقت
وبالعكس يمكن يكون انذار علشان اتعظ

mishari said...

نون النساء ": الله يرحمه ويرحم امة المسلمين اجمعين

mishari said...

Kwaitiyya : تصدقين لما قريت كلامج قعدت افكر ان صح الموت يكون قريب منك بس الانت ما تدري وهذا شى بلوة


أم الحفيز : عاد شبهة الله يسامحج ليش بس يعنى هذا الموت ما فيه مكان او وقت بس الواحد شيقول يالله رحمتك وحسن خاتمتك

mishari said...

pop_cornaaa : الله يرحمه والنهاية وحدة للكل صدقينى بس احنا ما خذتنا الدنيا

:(


albandry : اخذى راحتح بس ترى هذيل سالفتين منفصليييييين

الحجيه said...

السلام عليكم جميعا
أم الحفيز الركوع والسجود بين الإنسان وربه وخفايا القلوب ونواياها سبحانه اعلم فيها وكل بني ادم بشوف ناتج عمله عند رب العالمين بالدنيا والآخرة . وكل شيء سلف ودين

Delicately Realistic said...

I Just read this story in another blog. Sij hal deera zgeera.

Someone i know passed away this week and i posted about it & it turns out some ppl actually know him.

Wayid sima3t news about ppl dieing this week. :(

Allah yr7amhom
Ina lil Allah o ina ilaihi raji3on.

albandry said...

مهو واضح اتعضت
طبقت على طول
وانت فاهمني

mishari said...

حسام بن ضرار :الموت يأتى بغتة والقبر صندوق العمل
بيت شعرى يختزل الحياة وسرعتها
عسى الله يكتبلنا حسن الخاتمة


a7La eNG: ابى مرة تكتبين تعليق بدون ما تطلعين لسانج :)
بس تدرين صج شى يعور القلب
الموت لما يكون قريب منك يخليك تعيد التفكير بوايد اشياء

kuwaitia said...

الله يرحمه وقمد روحه الينه

اي والله صج الموت قريب منا

يالله حسن الخاتمه

mishari said...

Cr8ivia : انا مريت اليوم يم ممشى السرة انقمت قلبى هالمرة تبين اطبه بس تصدقين يمكن اطبه مرة ثانية علشان اتذكر الموقف واتعظ اكثر


الحجيه : والله يالحجية ما ادعى الا ان الله يرحمنا ويخلى الموت جدامنا متعضين ويبعدنا من كل شر
مشكورة على القصيدة
لانها فعلا قوية
مشكورة وايد وعسى الله يتمم عليج

mishari said...

NewMe : اذا انا وملاك الموت ندور بنفس المحيط عيل قريبا جدا جداجد ا
انا فى البحرين
:P

الموضوع يا عزيزتى ان الموت قريب من كل انسان وملاك الموت ليس هو منفذ لامر رب العالمين

رحم الله الناس من الضعف والوهن وكتب الهداية للجميع



EsTeKaNa : صح اشارة وقوية بعد تصدقين استكانة احس الله يحبنى بسبة هالشى علشان اصحى من اى غلط

سبحان الله

mishari said...

العين الساهرة : اللهم امين
شاكر مرورج الكريم


Hosno : الله يرحمه وصدقينى ما راح انساه لان مشهد ما اعتقد يتكرر الا ما ندر

mishari said...

kitty : بهالمواقف تصدقين ما اذكر يوم انهرت يعنى يمكن لما توفت يدتى لان الخبر كان ياينى مبجر الساعة 6 الصبح علشان جذى شوى خمس دقايق كانت اضعف خمس دقايق بحياتى لكن بعدين ذكرت الله ومسكت نفسى


uTMoST : عرفت اخوك مساكين اهم شباب صغار بس تبى الصج مرات اقول افضل انهم يشوفون جذى لانهم رياييل ولازم يعرفون المعنى من الدنيا قبل لا يفوت الفوت

mishari said...

~ajMaLjaMeLa~ : الله يرحمه ويكتبله الجنة

بس الله يهداج شتصادفين واحد متمدد على الارض ومسلم الروح اشوى انج ما شفتيه


Nescafé : اللهم امين
شاكر مرورج

mishari said...

شواطىء ورمال : صح الموقف كبير بس هذا درس صدقينى
والله يرحمنا برحمته ويرزقنا العفو المغفرة


Fuzzy : والله يا خوى شقولك انا قعدت افكر ان صج ماكو مكان ولا لحظة الواحد يختارها علشان ينتهى والله يرحمه ويرحم امة المسلمين

مشكور

mishari said...

FatmaQatar : الله يرحمنا اجمعين
ومشكورة يا بنت عمى


لوحات : قد تكون راحة له من الالام الحياة والم لاهله

اللهم امين

mishari said...

Delicately Realistic: if you can pass to craveyard and see

bs 9adgene al7ayat ehya jethe tenthee faj2a bdon anthar

albandry :صح كلامج وانشاء الله الفال حق الناس ونكون صاحين

mishari said...

kuwaitia :اللهم امين شاكر لج مرورج وناطرين بوست يديد

White Wings said...

الله يرحمه ويصبر اهله
ويقويك ويعافيك

tweety said...

مشااااااااااريييييييييييي

الريال طلع رفيج ابوي :(
يقول السبت مافي شي قاعد يمي يسولف !!! سبحان الله

الله يرحمه ويصبر أهله

mishari said...

tweety : الله يرحمه يا تويتى الدنيا صغيرة شتقولين عن الكويت
الله يرحمه ويصير اهله

me said...

alah yir7ima..bes tara hathi risala min rab el 3alameen lik o lazim tifham ma3naha...tara hatha mo shay 3adi...

alah yir7amna jamee3a

sOulvOice said...

اوة كده هذا التمبلت اللي يفتح الشهية للتعليق


روعه لايق مع الصورة

kila ma6goog said...

الله يرحمه و يغمد روحه الجنة انشاءالله

ادري مو وقت غشمرة بس قولي متى بتروح الممشى عشان ما اروح

take it easy on ur self

الكويتي الحر said...

الله يرحمه ويغمد روحه الجنه

والله يجزيك خير يا مشاري بتذكيرنا بهادم اللذات وهو الموت وكفى به واعظا
لان كثير منا موحاطين له حساب

mishari said...

sOulvOice : راح يتغير :) معلش يبيله قعدة شوى :)


kila ma6goog :باخذك معاى جتف بجتف علشان اخليك تخترع منى عدلللللللل
:))))

mishari said...

"الكويتي الحر
ويجزيك معانا بالخير بعد بس صدقينى هذى الحياة اهيا جذى تعيش اليوم وتشتغل حق باجر
عسى الله يرحمنا برحمته :)