مجتمع الحشاشين
لا أقصد بمتجمع الحشاشين الذين يشربون الحشيش ولكن أقصد بها كلمة الحش بالكويتية والنميمة بالعربية او الغيبة
فى مجتمعنا تعج وتضرب الرؤوس فى بعضها من كثر الحش
المشكلة أراها واضحة هي باننا لا نري انفسنا بل نرى الغير فقط دون ان نضع المراة التي تعكس شخصيتنا
الموضوع فقط كان مقتصر على النساء والقليل من الرجال لكن فى الوقت الحالي لا الموضوع بدأ يأخذ منحنى اكبر فالرجال يتلذذون بالحديث والكلام والحش بشخص اخر لا أعرف السر فى حب الكلام عن الغير لكن ما هي المساؤى
أولا تأكد بمجرد ان تعطى ظهرك للشخص اللى تحش فيه راح يلف ظهره ويتكلم فيك
ثانيا شكلك يبين ضعيف عندما تتكلم عن غيرم وتنسي نفسك
عند النساء لذة ومتعة فى الحديث عن الاخريات وخصوصا بعد تعميم مصطلح ((الهيلق)) اللى كل من قام يمشى ويقول عن الاخرين هذيل ((هيلق)) لا اعرف بالضبط ما هي المعايير والضوابط اللى ما يدخل الشخص فيها ضمن اطار الهيلق
هل مثلا لازم يكون عندى فلوس
او مثلا لازم اكون منتمى لتيار معين
اذا قلنا الفلوس انا اتوقع لا لان ناس كثيرة عندها الفلوس والاخلاق بالحضيض فالفلوس مو مقياس
تيار معين هم لا لان ممكن اكون منتمى لتيار واخلاقى نفس الشى مع الناس مرض
التعامل – الاخلاق – الادب
موقف لتتغير الجو
اخر يوم بالسفرة بعد ما سلمت الشنطة للحملة وارسلوها المطار تذكرت ان الملابس اللى بروح فيها المطار ناقصة اشياء جدا جدا مهمة
وتوهقت وكنت سهران فاضطريت ان اروح اشترى ملابس من السوبر ماركت
50 comments:
يا اخي من الفراغة و الترف الحش صار ظاهره
لو عندهم شي مهم و اهداف و اولويات جان ما ضيعوا وقتهم بالحش و قذف بيوت الآخرين بالحجر بينما بيوتهم من زجاج
على ما قالوا : الفاضي يعمل قاضي
الله يعين
مشاري طبعا الحين الكل بينبذ هالآفة..الكلام سهل
عالعموم شكرا على البوست لان التذكير مطلوب والذكرى تنفع المؤمنين
لأ لأ يا مشاري، شسالفة؟
مرة النساء ومرة الليبراليين، ليش يبا الهجوم المسلح هذا
:)
والله ماكو حشاشين مثل الرجال، والدليل ما يحدث في الدواوين
والحمدلله على السلامة وحج مبرور
جينات
هذي الزبدة
الحش و الخز و البلعه
مشاري إنت كنت في أي حملة؟
إن شاء الله بحج السنة الياية و محتارة أي حملة أنقّيي أبي أشوف أراء الحجاج!
هاي شبيك علينا ;pPp
للامانة انا احش باللي يستـــــــاهل وعاهته واضحة للعيان بس اذا تحصلي فرصة والتقي بالشخص اقوله ملاحظاتي عليه ماعرف اخش بقلبي
ف تقدر تسميه "نقد عنيف" :D
------
خلك من الهيلق انا تلوع جبدي من كلمة اسمعها 900 مرة باليوم
سنعين
فلانة سنــــــــعة
فلان سنــــــــع
والمصيبة ان مقاييس السنع مالتهم مقاييس دايخة مثلهم
هاذي عادات وتقاليد الحريم ( الحش والقراض) مهما غتكلم المره وتقول انا ما احش ..تلقاها لا شعوريا تقوم تقرض..
لا تدوخ راسك بسوالف الحريم ترى تتعب وخصوصا حريم الكويت
المشكلة ان الحين الرياييل قاعدين ينافسون الحريم بالحش
مرض
صج مرض .. ومثل ماقلت المشكلة نشوف عيوب الغير
بس ما نشوف عيوبنا
ويمكن البلاوي اللي عندنا اكثر من اللي عند الناس بألف مرة
ما اقول الا الله يستر علينا بس
حسام بن ضرار :صحيح الفاضي يعمل قاضي لكن ترى الحش موجود من ايام الفراعنة
بسورة يوسف
((وقال نسوة فى المدينة امرأة العزيز تراود فتاها عن نفسه قد شغفها حبا))
هذا من الحش اللى قالوه الحريم
bo9ali7 : اشوى انك فهمت قصدى على طول انا قصدى التذكير :) مشكور يا بوصالح
White Wings : انا قلت الرياييل ما يحشون بالعكس يحشون ونص بس الحريم اصحاب خبرة
وادواتهم اكثر بالحش :))
والليبرالين بالنسبة لى الحين افلاس لعدة اسباب
لا فكر
ولا قدوة
ولا هدف
ولا اى شى مرجو
فباي باى عليهم
Яeema : والله وانتى صاجة صح صح صح جينات بس جينات حولة :))
Anonymous : عسى الله يكتبلج الحج انشاء الله
انا كنت بحملة الكندرى
وماشاء الله عليهم ممتازين فانصحج فيها
sOulvOice : صحيح :) ماكو مقاييس بس مدامج طلعتى حشاشة ودى ودى ودى اعرف
انتى شنو تحشين فينى :))
Ghasheema : انا معاج بس ترى الحش مو بس محصور بالشباب الحريم يمشون ويحشون واذا ما لقوا احد حشوا بنفسهم
Krakatoa : شوف اهيا من ناحية عادات وتقاليد صح عادات وتقاليد بس شتقول بعد لازم الواحد يذكرهم ان هالشى غلط
PearL : لو كل واحد لهى بمشاكله وحلها جان الدنيا بخير بس اغلبنا لاهى بمشاكل غيره وناس نفسه :)
مشكورة
أهاااا
"قال نسوة في المدينة"
حط 4 خطوط تحت كلمة نسوة في الآية الكريمة
اعتقد انا معاك حطينا إيدنا على الجرح
آفه موجودة عند غالبية الحريم
عشان جذي ارد و اقول
لو عندهم شي مهم و اهداف و اولويات جان ما ضيعوا وقتهم بالحش و قذف بيوت الآخرين بالحجر بينما بيوتهم من زجاج
وبعدين فيه مثل شعبي يقول : "العياب عند الباب" ومثل ثاني يقول " ما يعيب إلا المعيوب"
للأسف أن الناس اللي تحش ناس فاضية وسخيفة وماعندهم شي بحياتهم مهم فيلهون روحهم بالكلام عن الناس وخصوصياتهم
أعرف بنات حشوا بوحدة وأهلها حش وكانت عازمتهم في بيتها بعد ييتها من الحج ومدخلتهم بيتها !!! تخيل قلة الحيا وين توصل بالناس
صراحة اللي ما يفهم بالاصول ماعنده أصل واللي يقوم بهالتصرفات انسان مايعرف العيب ولا الاخلاق
بس عصبت انا
:p
أولا تأكد بمجرد ان تعطى ظهرك للشخص اللى تحش فيه راح يلف ظهره ويتكلم فيك
فيه حكمه او مثل نفس الجملة التي ذكرت آنفا --> ذابحتني اللغة
والحش مومقتصر على فئة معينة والدليل ان الصحابه كانو يسئلون الرسول صلى الله عليه وسلم عن اللسان والكلام الغير مقصود هل هم مؤاخذين عليه ام لا :)
ومعنى الحديث : وهل يكب الناس على وجوههم إلا حصائد ألسنتهم ؟
ومعنى حديث آخر ان الشخص يلقى في جنهم بسبب كلمه لم يلقي لها بالاً
عسى الله يجيرنا من السنتنا ويحفظها من الغيبه
.
.
.
موضوع ذا شجون
حسام بن ضرار":يا بو ضرار المرة الكويتية لو صار عندها اهداف وشى مهم تسويه بحياتها جان اختنقت وماتت
نص بنات الكويت هوايتهم تدرى شنو
التسوق
بالله التسوق صارت هواية
شتقووول
والنص الثانى يحشون باللى يتسوقون
tweety :اعصااااابج الله يخليج انتى خلقة عصبية هالدور تعصبين جذى:))
والله يا توتو وايد بنات الكويتى سخف الدنيا فيهم وما همهم الا الحش
ReLaaaX:اول شى الله يبعدنا عن النار يا بنت الحلال
وبعدين ثانى الناس تقط الكلمة الحين وما تثمنها وهذا اللى مخلينا بلويه
والله يستر يا ستى:)
السلام عليكم جميعا
يا اخ مشاري صج بلوتنا بهل الزمن لسانا المصيبة الريايل أصبحوا أزود من الحريم بالقال والقيل مثل ما قلت يشوفون عيوب غيرهم واهم مرفوع عنهم القلم ما يشوفون إلا عيوب غيرهم شقولون الاولين
عدوك موب من قال فيك ، عدوك من بلغك وهذي حقيقة لازم ننتبه لها ونأخذ الحذر منهم
شقال الأمام الشافعي
نعيب زماننا والعيب فينا . . ومال زماننا عيب سوانا
ونهجوا ذا الزمان بغير ذنب . . . ولو نطق الزمان لهجانا
وليس الذئب يأكل لحم بعض . . . ويأكل بعضنا بعضا عيانا
نتكلم عن المثل العليا واحنا كلنا نحش...اقولها من غير اي استثناءات ...ما مر علي الا انسان واحد فعلا ما يحش ...خالي حتى العايله كلها تسميه ...فليقل خيرا او ليصمت ...احاول كثر ما اقدر اني ما احش...واقضب لساني ...بس مع ابوي صعبه ما احش ..
والمشكله الاكبر ان في ناس تعتقد ان الحش ..هو ذكر عيب ليس في المحشوش به << ركز عليها
ولكن الحش هو ذكر اخاك بما يكره ...يعني بخيل ونقول عنه بخيل ...امدمغ ونقول عنه امدمغ هالشكل ...ولما نقول شي مو فيه هذا الادهى والامر وهو البهتان ...
وفي ناس انا اعتبرهم اكثر من الناس اللي يحشون ...وهم اصحاب الشراره الاولى بالحش
يعني احنا نسولف في امان الله عن المكياج
تيينا اخت كريمه وتقول شفتوا مرت فلان ترى بدون المكياج تخرع ...ويجرى الحديث عن مرت فلان بين مؤيد ومعارض ...هذيله انا اعتبرهم اكثر من الحش نفسه ....
ومن حجى لك حجى فيك هذي قاعده يجب اخذها شعار...بحياتنا واسئل ميرب
الحش أكيد داء
أصلاً
الرسول صلى الله عليه وسلم
بما معناه
وهل يكب الناس على وجوههم في النار إلا حصائد ألسنتهم
وعتيجة كلامها صح
نادراً ما نلقى أحد ما يحش
لأننا مرات
نحش حتى مو بدافع سيء
لكن يتطلب الكلام هذا الشي
لكن مهما
كان
لازم نبتعد عن الغيبة
تحياتي،،
يالله شكثر شريرة انا بمجتمع ملائكي هههههه
مشاااااري
loOOol
لالالا عاد مو معناته امشي واقرض بخلق الله اممم شلون اوصلك اللي اقصده بصورة صح امممم شووف
مو حش كثر ماهي ملاحظات او امور تميز شخصية هالانسان عن غيره وانا الله خير راداري بسرعه يلقط العيوب
النقد متى ينقلب الى حش لما تخفي حقيقة اللي جدامك وتقعد اطبله واتمدح فيه ومن وراه قرررررض بس لما تقول فلان فيه كيت وكيت وتصرح بهالشي جدامه ومن وراه طلعنا من دائرة الحش
------
"التسوق
بالله التسوق صارت هواية "
طعنة :"(
---------
عجبني رد عتيجة وميامي
واقعي
هاووو هذي نفس الحملة إللي راحوا عليها بنات خالتي شوف شلون الدنيا صغيرة!
إنتا كنت قسم أجياد ويللا العزيزية؟
"طبعا أكيد مو دار التوحيد"
;)
حدددده مو شي غريب .. هذا ابيخ شي في السفر كله ناااسي وبسسس ولا توسوس انك ناسي :D
يرى القذاة في عين صاحبه و لا يرى الجذع في عينه !!
هذا المثل ينطبق على ما تفضلت به يا مشاري ..
يقول الله تعالى : " أيحب أحدكم أن يأكل لحم أخيه ميتا" !!
أعوذ بالله تخيل ذلك المنظر !!
الغيبة تحرق الحسنات .. شينفعك الكلام في الناس و الخوض في أعراضهم و أشكالهم و عيوبهم ..
انشغل بعيوب نفسك أولى من أن تشتغل بعيوب غيرك ..
عسى الله يستر علينا و يقينا شر الحش و الحشاشين
في بعض الرياييل صاروا اخس من الحريم يحبون يحشون..واللي عيب اذا اقعدوا حشان بفلانه وعلانه .. واللي اسمعه ان صاروا يتحدون من يعرف هذه البنت اللي مشهوره في الجامعه علشان اخر اللي عندهم سالفه يحشون فيها ..
اما مفهوم الهيلق لغاية الان ما اقدر احدد معناته عند بعض الناس بالنسبه لي الهيلق هو اللي ما عنده اخلاق ولسانه طويل .. وخاصة الحريم اللي تقعد تصرخ في مكان عام
الحش صار مثل الغتره والعقال والديرمه والبخنق
صار تراث عندنا
وظاهرة الحش ازدهرت بعد التحرير للجنسين
كلاك يامشاري يهز
ونظرتك ثاقبه لامور تحدث يوميا ولكننا لانتلمسها مثلك
الهلاقة عندي
كناية عن انعدام الاخلاق
like when we say CHEAP ..
أصل الكلمة في المجتمع الكويتي
ما اذكره بس في سنة الهيلق مثل سنة الهدامة شي جذي
.
.
يزاك الله خير على التذكير
كلام عتيجة قمة الواقعية
قرار سنة 2007 اني امسك لساني
اذا بنطلق .. فجأة اطق ايدي و اقول ماله داعي ههههه
;Pp
في شريط للشيخ نبيل العوضي
"امسك عليك لسانك"
عجيب .. كنت اشوف السالفة سيئة
بعد ما سمعته .. صارت كارثة
تنعكس علي انا قبل الضحايا
اهنيك على نظرتك اللي احبها عن المرأة الكويتية
:/
الحجيه:كنت اقرى ذاك اليوم جملة
لو كل شخص تكلم الكلمة اللى قى قلبه لكان الحوار بين الناس قصير
من طبيعة الانسان ان يتكلم عن غيره وينسى نفسه وهذا عيب
الرجال دخلوا على الخط وكأن هالشى عادى رجال يتكلمون ويحشون برياييل وبحريم بعد وهالشى مصيبة
3ateeja : صح من حجى لك حجى فيك هذا المثل سمعته من زمان وتأكدت منه بتجارب عديدة
تخيلى فى ناس عتوج لان فيهم غيره عندهم استعداد ان يتكلمون فيك ويشهون صورتك بس علشان ما تكون علاقتك طيبة مع الناس
sOulvOicE :اول شى انتى احس انج هدوووووء وخوش بنت
بس لسانج حطي يمج دوى مر كل ما تحجيت بأحد حطيه على لسانج :))
بعدين من صجى اتكلم وايد ناس او بالاصح حريم هوايتهم التسوق :))
Anonymous : مثلا مثلا مثلا
شفيها اذا كنت بالتوحيد؟؟؟؟
ليش اللى راحوا احسن منى :))؟
لايبه اختى العزيزة انا كنت بالعزيزية وبعمارة الرياييل وكل شوى تال برد وقاعد :)
Common_Sense : تصدق والله مرات من كثر ما مخى مشغول اكون اتكلم بالموبايل واسأل اللى اكلمه ما ادرى وين موبايلى :(
MiaMi : صحيح كلامج
نادر ما نلقى الشخص اللى ما يحش
لكن الواحد يقول الشى بس على الاقل خل يحس ان قاعد يقول شى غلط ويستغفر
لان هالشى ترى مو هين
((أيحب احدكم ان يأكل لحم اخيه ميتا فكرهتموه)) هذا الحش
عسى الله يفكنا من
للاسف الحش بين النساء والرجال زايد
وللاسف ايضا ان الرجال زايدين اكثر بعد من النساء
انا صار لي فتره احاول امسك نفسي عن الحش واتذكر ان اكثر من في جهنم بسبب اللسان فاقطع الحش حتى لو كنت بنصف السالفه وانشاء الله اقدر اقطع هالعادة السيئه كليا
Kuw_Son : على نوووووور
المفروض ان ننشغل بعيبونا ونواقصنا
الحريم عندهم حساسية ما يقدرون لازم يحشووون والا بعدين تحوشهم امراض
Smile : انا اولا اتفق معاج على تعريفج حق مفهوم الهيلق
بس ظاهرة الشباب اللى يتلكمون فى بنات بالجامعة هذى تقريبا من التسعينات ويمكن يرجع هالشى حق العدد الكبير اللى بالجامعة الحين
barrak : اى والله صار من العادات والتقاليد
تصدق حتى بالمسلسلات يحاولون يبينون ان هالشى عادى ولازم تتكلم عن الغير
شكرا اخوى العزيز على المدح الكريم منك
a7La eNG :قراراتج وايد هالسنة
الله يستر ما ادرى شنو بتبدين شنو بتخلصين
:P
عندى اقتراح لج بهالسنة
اذا قدرتى تكتبين تعليق واحد بدون ما تطلعين لسانج راح تكونين بطله :P:P
Mamloo7a Q8ia :والله الله يزاج خير علشان هالشى تذكرتيه وبمجرد انج تحاولين هذا معناه ان فيج خير كثير:)
مشاري
شنسوي يارجل ماكو انشطةوايد بالديرة الوحده تقدر اتمارسهم من هيك اقتصرت هواياتنا على امور جدا محدودة مثل التسوق وتحليلك بمحله هادية واحب الهدوء
حتى كلامنا بالبلوقات في بعض الاحيان يصل لمرتبة الحش"الذرب"
اللسان آفة وانشالله عالسنة اليديده ربي يقدرني اهذب هالافة :)
sOulvOice : ماشى يالاميرة النائمة :)
انشاء الله هالسنة سنة خير عليج
وحده كبيره بالعمر الله يذكرها بالخير كل ما سمعت حش اذكر كلمتها لي لما دار بينا حوار حول استغراب ان شلون الشخص يحش بالغير و اهو اصلا معيوب؟ (احب اسوالف مع الكبار بالعمر و العجايز+الشياب) فا يا اما تقول الكلمه للشخص وجها لوجه ولا اسكت؟ ليش الحش فا قالت لي
"أبن آدم شايل عيبه على راسه، يشوف اللي عند الناس ومايشوف اللي عنده"
و بالنهاية عامل الناس كما تحب ان يعاملوك، ان حشيت/ حشيتي ترى عادي باجر المثل بيصير لك
و عن سبب الانتشار لهالظاهره، لانه ببساطه ماعندهم شي اهم يملى حياتهم من مراقبة الغير و انتقادهم مع اعتقااااد المنتقِد للناس بأنه انسان كامل؟
الحل؟ بما انه خلل اجتماعي و يمس مجتمع كامل فا التغيير من طرف الشخص سهل انه ما يسمع ولا ايتكلم بطريقة الحشّ! و التمنى ان هالتغيير يصير عدوى تحوش الغير و يبطلون حش او على الاقل
they would spare you the pleasure of joining them :D
Post a Comment