الطموح و العمل والمثابرة والالتزام وقليل من المشاغبة تكون الحياة ناجحة

Wednesday, February 21, 2007


حب سنة 70

الجزء الثاني



بعد توقف لولوة ونظراتها للشخص اللى كان يختفي كل شوى الى ان اختفى تماما
لا شنو هالخرابيط خل امشي بس انا ما احد هزني جذى من قبل
حتى اللى كانوا يحاولون يوصلون لى وغالبا ما يكونون اخوان رفيجاتي
يمكن دفاشته وتضحك لان كل الشباب يتعاملون بذرابة زايدة ولبسهم غير
عن الشباب هاليومين بنطلون وقميص وكل واحد فيهم يتخيل انه عبدالحليم
بس هذا لا هذا-عبدالحليم الكويتي
تدرين شلون خلج من هالسوالف وامشى لكن ظلت الصورة ملتصقة بعقل لولوة
شاب -عشرينى – حنطاوي – دشدادشة – بسيط لدرجة لا تذكر
كانت الفترة مشتعلة قومية وديمقراطية وأفكار التحرر على المجتمع الكويتي
لكن بالنسبة لبدر كانت الحياة بسيطة جدا فهو انسان يعشق الواقع الكويتى القديم
وبالنسبة له الرومانسية تكون بعد ما يوقع الملاج
(كاتب عقد القران)
اما بالنسبة للولوة كانت تعتقد انها ضمن الجيل الجديد اللى الناس تتكلم فيه عن الحرية ولكن بأدب
وكان الفصل بين اللبس والاخلاق بمعنى ان اللبس لا ينم على أخلاق الشخص
مثلما يعكس الوقت الحاضر فكانت الافكار تقدمية مثلما يقال متحررة فكان الزمن يعتبر خليط من السلبيات الجديدة والتمسك بعادات اختلط فيها الجيد والردئ
وكانت تحلم باللى يخطفها على حصان ابيض وتتمشى وياه على شارع البلاجات عند التل السياحي - مكان شوبيز حاليا
جلس بدر فى المحاضرة يفكر كنت شوي جلف معاها صح ؟ عاد شكلها بنت ناس ومحترمة
بس كنت قاسي بس اطلع اعتذر منها اذا لقيتها
كان يتكلم بدر بينه وبين نفسه
انتهت المحاضرة طلع بدر من المحاضرة ويتلفت ويسأله صديقه شفيك يقوله ابدا بس فى شئ فى بالي وسرحان فيه
طاف يومين وما شاف لولوة قال ماكو الا انطر نفس المحاضرة الاسبوع الياي يوم الاثنين
الصبح وبدر يلبس قال فشلة شكلى جذى داش الجامعة وانا بكلم البنت خل اتعدل بلبسي
لولوة من الجانب الاخر كانت بدت تنسى الموضوع الى ان يوم الاثنين واهيا طالعه من المحاضرة شافت بدر واقف عند باب الكلية كانه ناطر أحد
تقدم بدر وكأنه رايح يكلم واحد من دفاشة المشية سلم عليها
وردت السلام عادى وكانت خايفة قالها انا بس بغيت اتأسفلج
انا اللى دعمتج ذاك اليوم ردت عليه اى ادرى ذكرتك بسيطة حصل خير
بس بدر هالمرة حس بشئ غير حس ان هالبنت وقف معاها وكأنه يعرفها من سنين
قالها تصدقين انا شايفج
ردت عليه ما اعتقد بس انا هم نفس الاحساس وبينها وبين نفسها تقول تكفى لا تمشى
تكلم بعد ابى اعرفك وبدوا يسألون بعض عن تخصصاتهم وان كل واحد فيهم شكثر ويتخرج
وشرايهم بالانتخابات والحركات القومية وكان بدر بالاخيرة
معلوماته صفر رد بكل برود عبدالناصر اللى لاحقينه صدقونى
ودى الناس ورى وراح يودى مصر والناس اكثر ورى ذكرى كلامى
وبعد عشر دقايق قال انا اسئذن الحين بدت المحاضرة أقدر اشوفج بعد المحاضرة ؟
ردت : ليش؟ قال : ها لا ابدا بس سؤال نقز براسى
ردت: اقولك شى ولا تزعل
بدر: قولي
لولوة: مصطلحاتك غريبة مع ضحكة غريبة تعكس عيون تبرق بالحب
بدر : لا انتى يبليلج قعدة يا اكشت بالمحاضرة او اشوفج بعدها
لولوة: روح المحاضرة وانطرك تالى
بدر : تنطرينى ؟لولوة : اى انطرك
يتبع
الجمعة انشاء الله الحلقة الاخيرة
النهاية وين راح تكون بالكويت ؟
تحت اى ظروف؟
ننطر ونشوف

16 comments:

2 u ALL said...

مشاري .. ترى علقتنا ...!! ما يصير جذي ..!!وبعدين ما أعتقد أنك راح تخلص الجمعه..!!! ألا أذا تبي تكلوت علينا السالفه بسرعه وتختصرها ..!! أنا عن نفسي ودي أسمعها كامله ..!!!؟

مبدع .. كملها كلها ..!!؟

MiaMi said...


ما عندي مشكلة ،،

ننتظر للجمعة ،، ونشوف

بس أكيد الجزء الأخير ،، ولاّ بعد!؟

Miss Writer said...

واي شخباري سوالف الجامعة
مشاري نبي شي مميز مثل غالبية اوقاتك
القصة للحين عادية ومعتادة
وما ادري اذا انها واقعية او من نسج خيال مقتبس من واقع؟

Miss Writer said...
This comment has been removed by the author.
sologa-bologa said...

لي الحين الخط الدرامي
للقصة وايد حلو

وان شاء الله النهاية أحلى

عندي احساس يقول إنها قصة واقعية
حصلت في تاريخ الكويت الحديث الجميل
خلال فترة السبعينات

أما بالنسبة للعمر
جنه ما كو فرق وايد بالعمر بيني وبينك
ترا كلها خمس سنين

يعني لا تصغر نفسك وايد
:)


ودمت بحب وخير وأنفة

kila ma6goog said...

:)

ناطرين

عاشه said...

لا جيه مايصير يامشاري

نبا تفاصيل
شو تقول بتخلص القصه بالجمعه
ليش تمثيليه هيه ام ثلاث حلقات
نباتفاصيل
مواعيد
غراميات

يابويه الناس هنيه قطايع تعبانيين
ههههههههههههههههه

والله إسلوبك جدا ممتع

تسلم أخويه ونتريا البقيه

san3a_wa_laken said...

شكلها خوش قصه
اندمجت
وابى اعرف النهايه

Ghasheema said...

whats with the part 1 and part 2 part 3

sayra motha hal ayam....lazem t3algoonah :P

ba3deen wayed lee alyem3a...7aram 3alik

al8esa 7elwa...ow na3kes feker jeel alsab3eenat......great idea mishari...

I will wait...ba3d shasawi :P

bo9ali7 said...

bnshoof a5rat'ha

3ateeja said...

جرأه وخزياااااااااه تقوله تبرق عيونك...زنون بي ام مو عيون ههههههههههه كمل كمل ...ترى بسافر

magnoonah said...

ايه ده مشاري يكتب قصص ولا بحلقات بعد!!!!!!!!!!!!!!!!!!!!!!!!!!

اسلوبك كويتي بحت حتى بالقصص والحلو انك قاعد تطرح افكارك ورايك بطريقه جديده واسلوب مشوق


بس شـــــــــــوف اخر حلقه يوم الجمعه مو تسويه مسلسل مكسيكي وتكسر فينا
حلاة الشي وسط

ويعطيك العافيه

Anonymous said...

السلام عليكم,
كتابتك للقصه رائع وشوقتنا نعرف النهايه بس ان شاء الله ماتطلع لولوة اختة من ابوه loool
ناطرين النهاية باجر^_^

amal said...

أممممم,,,
الدفاشة ,,,
لا زالت موجودة,,,
يبدو أنها سمة كويتية,,,,


بس صح كلامك,,,
ساعات تجذب الانتباه,,,

وتثير الاعجاب أن كانت طبيعية غير متكلفة,,,

التكلف,,
وأصطناع الذرابة مقيت,,,
والدفاشة التي يتسم بها أهل الجزيرة,,
مقيته كذلك,,,

خلك طبيعي يا مشاري,,
وكمل,,,
ناطرين
:)

afyaa2 said...

ايييييه نقلتتنا نقله الى اجواء ما كنا نعرفها.. لكن لمسنا بعض جوانبها

..

اشعر بارتباط بهذه الفتره الزمنيه
لااعرف لماذا ..
لكن سلمت يداك ..
وناطرين

ReD Lady™ said...

كنت مسافره واليوم رديت واشوه الاجزاء كلها كملت يسلمووووو
والله يعطيك العافيه صراحة اندمجت فيها اشوه في الجزء الثالث
صراحه قصة تشد انتباهك تسلم والله