الطموح و العمل والمثابرة والالتزام وقليل من المشاغبة تكون الحياة ناجحة

Wednesday, April 04, 2007

ربعي العزوبية




عندى شباب تتراوح اعمارهم بين 25 و27 سنة لى الحين ما تزوجوا وعزابية وكل واحد فيهم له قصة الصراحة تضحك بيومياته

الاول يقولى مشارى انا لا عندى سوالف بنات ولا هم يحزنون

من البيت لى الدوام لى الكرة واقعد بالديوانية جنجفة لى الساعة 3 الفجر ارجع البيت بالضبط انا والجلب واحد

افخ انام اربع ساعات واروح الدوام

وبما ان ماكو احد ساكن بالبيت الا انا والوالد والوالدة يقول فتلقانى انام بالديوانية مرة وبالصالة مرة

يعنى وين ما اقط راسى انام ويمكن لو انام بالحمام محد يدرى عني

يقول متعتى ان يوم الاربعاء والخميس اروح المباركية واقعد اتطمش بالقهوة على الرايح والراد اطلب صحن كباب واشرب بعده استكانة جاي واطير الديوانية واطيحله جنجفة

الحين قولى شسوى ولا تقولى اتزوج ؟

قولوله شسوى ؟

الثاني يقول انا حدى مرتاح صاير نحلة من وردة لى وردة مفتك ارد البيت وامسك التليفون وسوالف لى الصبح ما عندى شغل اروح الدوام اطقطق على الخفيف بالشغل وقعدة الشباب

الديوانية ما احبها بس اساتنس اقعد بالبيت وامسك الخمس جرايد واقعد اقراهم كلهم صفحة صفحة لى ما تدق على وحدة واطيحله سوالف وضحك

المشكلة انى مليت وما ابى اتزوج ؟

الثالث مسميه ماكدونالدز يقولى مشارى انا رايح البيت امر اطق الكرت بماكدونالدز طالع رايح الديوانية هم ماكدونالدز الصبح استئذن من الدوام اروح ماكدونالدز اشترى ريوق وارجع

وعندى وناستى بالدوانية سوالف وضحك والعطلة القز ما يحلى عندى الا بالمارينا تصادف لك وحدة كانت وياك بالجامعة وتلقاها تستهبل تيى تسلم شلونك فلان وخبرك اخوك مملوح وعريض المنكبين لو ما هالكرش شوى

واذا درت انى لى الحين عزوبى لزقت فينى لزقت عنزروت

الحجى انى ما افكر بالزواج الا بعمر الثلاثين بس الحين فاضى ومتملل شسوى ؟

هالنماذج حقيقية ولكن الكلام فيه صيغة المبالغة شوية ولكن الافكار وحدة هذيل الشباب كلهم اتفقوا ان الزواج مو الحين شفيهم الشباب قاعدين يتأخرون بالزواج مع الامور ميسرة بالنسبة لهم ؟

61 comments:

المعلمة عهود المسيلم said...

بصراحه
ماني عارفه شنصحهم فيه
:)
بس يمكن يبيلهم زواج؟؟؟
الأول الملل ذابحه ويمكن لما يتزوج
يلقى الاهتمام من زوجته ويصير تغيير ونقله كبيره بحياته ويرتاح

الثاني اللي من ورده لورده
هم يبيله زواج بس بالاول يروح للعمرة ويدعي ربه يهديه ويصلحه وبعدين يدورله بنت الحلال اللي تعصمه من التنقل من ورده لورده
وترحمه من السوالف اللي مامنها فايده

أما الثالث والاخير فمنعذرها
الكرشه لازم تطلع له دامه من رواد ماكدونالدز 24 ساعه :)
فأول شي لازم يخفف من هالوجبات ليما تخف الكرشه ويخطب بنت الحلال وقول له
الزواج حياة حلوة ورومانسيه..الخ
بس ياخوفي لا ياخذ له زوجه تطق الكرت معاه بماكدونالدز
:)

تهقى الزواج هو الحل لهم؟
والا بيتوثمون بزوجاتهم؟
ماادري انا بنظري الزواج
هو الحل الأمثل لهم

المعلمة عهود المسيلم said...

احساسي يقول ان ربعك ودهم
بالزواج بس مترددين
من هالخطوةويبون منك التشجيع
فدورك تشجعهم وتحثهم على الزواج

قال رسول الله محمد صلى الله عليه وسلم: { أما والله إني لأخشاكم وأتقاكم لله لكني أصوم وأفطر وأصلي وأرقد وأتزوج النساء فمن رغب عن سنتي فليس مني } [متفق عليه].

وقال : { يا معشر الشباب من استطاع منكم الباءة فليتزوج، فإنه أغض للبصر، وأحصن للفرج، ومن لم يستطع فعليه بالصوم، فإنه له وجاء } [متفق عليه].



ذكرهم بهالأحاديث وربك الهادي
واسفه عالاطاله

Ra-1 said...

الحين تأخر سن الزواج
مو بس الشباب حتى البنات !

KQ8 said...

هذول اخرتهم شياب قاعدين على دجة باب البيت بيدهم عصاتهم ويتحلطمون على الرايح والياي لاحنيس ولا ونيس الا بابو ولا كومار

اذا ماتزوجوا

Tekana said...

الاول اقوله.. تزوج لا يوم تقعد تلقى نفسك نايم بالحوش ولا عند العتبة وانت ماتدري

الثاني اقوله ,,خيرتك بتصادفك نحلة من هالنحلات تخلي قلبك يطقطق وتدور طريج الملاج

الثالث اقوله.. خلك من الماكدولدز وشوفلك بنت حلال تطبخلك لقمة سنعة احسن لك ,والفراره بالمرينا وايد مو زينة ترى :P
عموما هالثلاثه متى ماحسوا انهم بيتزوجون بروحهم بيدورون بنت الحلال بدون اى ضغوط من الاهل او شي ثاني لان اهم شي تكون عند الريال رغبة من داخله انه بيستقر مو بس عشان اهله بيفرحون فيه ... وانا اشوف احسن سن للزواج حق الريال عقب ال 28 :)

Anonymous said...

الزواج مو مجرد شي يسد فيه فراغ في حياته

الزواج = حاجه + رغبه + قدرة

ربعك كلهم يمكن عندهم القدرة لكنهم يفتقرون إما للحاجة أو الرغبة

و الواضح إنه كلهم يفتقرون الرغبة

و بعدين الزواج يخوف

آنا بيصير عمري 27 و لي ألحين مو قادره أقدم على هالخطوة

Kuw_Son said...

تبي الصج ..

خلللللهم على راحتهم .. متى ما طق في بالهم يتزوجون الله يسهل عليهم ..

أنا واحد ما أفكر الحين أبدا أتزوج .. الوالد والوالدة الله يحفظهم لوعي جبدي بالحنة والرنة !!

يالله يا ولد متى نخطب لك !؟

يالله بتتزوج !؟

وأنا أذن من طين وأذن من عجين

مالي خلق أحد يفتح لي هالسالفة كلشششش

خلهم على ماكدونالدز والمارينا أبرك

Яeema said...

الزواج يبيله رياييل أصحاب قرار

يعتمد عليهم

لأن الزواج متطلباته ماهي سهله

و يبيله مصاريف وايد
ماعاد إللي عنده معاش بس يقدر يعيش ويا المرا
لأن الكماليات صارت من ضروريات الحياة

بيت
مدارس
مصاريف الحياة
أول الياهل ما يكلف شي
ألحين الياهل يكلف أزيد من العود


و ترا ع لي فكرة
همن البنات ماشين بهالدرب
مالهم خلق كفاح
يبون الريال يايلهم بقراطيسه

عنده بيت لأنها ماتبي تسكن عند بيت حموله
تبي علي الأقل سفرات قصيرة
معناها تبيه عنده جم بيزة

يعني أنا ألوم الأثنين


فنصيحه خلهم عزابيه أبرك ولا ياخذ البنت و بعد جم شهر ما قدر عليها رجعها بأسم مطلقه

--------------

الحين شسوون؟
كل واحد يعيش دور الثاني
إللي من البيت ليه الدوام يتعرفله علي وحدة
و الصايع من بنت ليه بنت يشوفله هوايه و إلا نادي يريح ملائكته و شياطينه إشوي


أما بو ماكدونالد
يسوي ريجيم و يشوفله ممشي يتريض إشوي



تدري منو أكثر واحد بالكويت مستانس؟
صاحب الهوايه

Q8LoVeR said...

لوووووووول ظحكوني والله

لا والله خلال هالسنه تزوجو فوق ال 10 من الربع اعمارهم 21 20 19

فمادري يمكن اهي تجرب نفسيه سابقه وانتهت بتحطم نفسي الله لايبلانا

Q8LoVeR said...

والله لايقولها بس شكلي بصير نفس الحاله :#
اشوف انه احسن اذا ماصار الي في بالي وصارت السالفه قصب لووول مشكله الراس اليابس ارجوا انك فهمت قصدي

حسام بن ضرار said...

مع اني ضد التعزب

لكن من وجهة نظري انا اعتقد اذا الواحد مو في باله الزواج لا يغصب روحه على بو يجامل فلان وله علان

و عندي نظرية الثانيه اهي ان اذا الواحد عدا الخمسه وثلاثين عزوبي فخله يستمر عزوبي ابرك له

تخيل فرق بينه وبين اكبر عياله خمسه وثلاثين سنه؟

شبقى من العمر؟

NewMe said...

ربعك هذلين شكلهم عايشين من غير هدف
وما انصحهم بالزواج لان بالنسبة لي تأسيس أسرة وبيت
لا يمكن يكون طريقة لتفادي الملل
بل فقط وفقط من اجل الحب يكون الزواج
وبعدين لابد عندهم هوايات يحبون يمارسونها
عن نفسي قبل لا انشغل بدراستي
تدربت ركوب خيل بس وقفت اللحين
وناوية اكمل بعد التخرج
من اسبوع سجلت في دورة للرسم بالالوان الزيتية
للحين ما بديت واتمنى يصير عندي وقت لما يدقون علي
ويحدون المواعيد وايد خاطري وما ابي اكنسل
واللحين الصيف ياي ممكن يروحون سكوبا دايفنج
وممكن ينظمون في لجان أعمال خيرية
واذا عندهم فلوس يشغلونها يفتحون لهم تجارة من أي نوع
كافيه/مطعم
محل
اعرف واحد كان متولع يبني بيوت كان كل مرة يبيني بيت اتقول اهو اللي بيسكنه يهتم بالتصميم والتفاصيل ويتابع
العمال ومن صجه
اول ما يخلص يعرضه للبيع ويبدى في بيت يديد
مع الوقت كبرت السالفة براسة وفتح له شركة عقارات
وطبعا السيولة يابه من الجم بيت اللي بناهم
وممكن يروحون دورات تدريبية في اي مجال يفيدهم بالعمل
او الحياة بشكل عام
هم بس شكلهم حابين الربادة
ولو تزوجوا ما اظنهم بيتغيرون
بس مصيبة اذا فعلا ما عندهم لا هدف ولا اهتمامات
من صج الله يعينهم على نفسهم
دمت بحب
تحياتي

NewMe said...

عفوا
تحديث من المصدر
صاحبنا فتح
شركة مقاولات
وورشة نجارة
ومن كم يوم
ومصنع أبواب ونوافذ المنيوم
بس ما يرضى اقول اسمهم
لووووووووووول

queenB said...

Mshari,rab3ick if they live in USA they will carry name looser..second those everyone of them need 5 or 6 yrs till they reach 30 and start be mature and when they be 35yr physically will ask for marriage. u know what i mean!! ,when get married after he relax will find he married wrong woman ,(example when be in love not u who choose even not ur brain,ur heart,same with marriage not brain who choose something else )till now they are not mature and don`t have experiance about women or life..

wakee7 said...

اذا تزوجوا بعد اختيار صحيح للزوجة راح يتحسفون على تأخيرهم
اما اذا كان الاختيار غلط
راح يتحسفون على قرارهم

Anonymous said...

احلى شي الي يطق الكرت بماكدونلدز XP
كااااااااااااااك
احس في تقارب بينا في سالفت XD

ماكدونـــــلـــدز ..أنا احبه (L)

همممم اقول ترا والله حدهم اريح لهم =\
حد ياخذ حصااه ويبط نافوخه @@

keep it up ولد عمي ;p

White Wings said...

قولهم يجمعون طوابع
ما عندهم سالفة :) يعني الزواج ما يخطر بالبال الا لما يملون؟ عاد هذا سبب؟
عسى أنت مو معاهم؟
:)

tweety said...

ماشالله عليك يا ميشو متألق هالايام
ما نلحق على مواضيعك

شوف رجاءا ربعك العزابية ما يبون يتزوجون خلهم على راحتهم وأعمارهم ما تعتبر كبيرة , لا تعقدون الاوادم اذا كلهم تزوجوا البنات اللي بأعمارنا من بياخذهم بالله !!!؟ :p
غصب تبينا نتزوج متزوجين ومعيلين يعني !!؟

أنا أول شي بو ماكدونالدز بغيييييييييت أحبه عشان الماكدونالدز مو عشانه بس شقته يقز لا وبمارينا بعد قلت الله لا يبلانا
ربعك من سوالفهم بينهم وبين الركادة والنضج درب طويل لا تورطون بنات الناس فيهم

عموما أعتقد مثل ما قالت تكانه أن الزواج أفضل للرجل من بعد 28 اذا مو بال30 فما فوق لأن هذا السن بالنسبة للجنسين سن النضج والوعي فالواحد يكون متصالح أكثر مع نفسه قادر على تحديد احتياجات وإتخاذ قرارات سليمة ما يندم عليها بعدين

في حل ثاني : تشتغل لهم خطابه :p

Яeema said...

anonymouse:
طالمه عارفه السنع ماشاء الله عليج

لييش ما عرفتي السنع لما إتكلميني بهالأسلوب؟

Яeema said...

مشاري
راح أختفي من مدونتك طالمه الأنونمس موجود

فإعذرني علي هالقرار


دمت بخير

الحياة فيها أشياء أجمل بكثير من إني أضيع وقت مع هالأشكال


و دايما أقول
أنا ماراح أربي إلا عيالي

tasty_as_berry said...

صباح الخير جميعا

بما أن بقا دقيقه ويصير مساءا لوووول توقيتي مضبوط :)

والله موضوعك مشوق .. يا مشاري

النوع الاول :

يحيرني جدا لان الغالبيه منهم يرفض الزواج لأن كبت للحرية ، لكن في وضعه أصلا فراغ كبير وليس مستعد للمغامرات النسائيه، إذن ما المشكلة !! يعني ما يمنع يكون بحياته مرأه تهتم فيه وأولاد وبنفس الوقت أحفاد حق خنت حيلي امه وابوه خصوصا بروحه بالبيت معاهم.. !!

إلا إذا كان في سبب ثاني يمنعه وربما عدم تحمله للمسؤولية وفي هالحالة رحم الله أمرأ عرف قدر نفسه.

النوع الثاني :

عاجلا ام آجلا سيقع في شر اعماله ... :)
عندما يتنقل من وردة لي وردة أهو بالواقع مو حاط في باله زواج فما راح يعني نفسه يدرس هذه الوردة ويتمعن في صفاتها فبالتالي ممكن يكون طوف عليه وردة فريدة من نوعها ..لما يحين الوقت اللي يمل فيه واحتمال يكون أهو دوره الوردة حق نحلة خبيثة ...


اما النوع الثالث :

هذاأصلا ياهل وينه وين الزواج ...!! لا يمت للنضوج بصلة ..

هذا رأف في بنات خلق الله وأن ما فكر بالزواج إلا بال30 .. هذا إذا كان عمر الثلاثين أدى لنضوجه بالفعل :)


وعموما لاأؤيد عمر الزواج إلا بعد 26 وبعد العمر الشخصية الشخصية الشخصية ..

يعطيك العافية وتحياتي :)

Alather said...

سؤال : ليش التفكير لازال يقف عند ملاحق البنات .. والتسكع .. متى يصير فيه هدف
وفي وعي


الله الهادي

Nora said...

hehehe ..

شوية انصدمت بس شوية
;Pp

اول نموذج ممتاز و تقليدي ما عليه كلام
.
.
.
25 وايد صغير احس يفكر و يتأمل بنفسه افضل

و الله اعلم

اللي يقوولك اخوي عمره 17 و يقول يالا ترى ادش الجامعة و اتزوج


انا مع الزواج المبكر اذا الاهل فاهمين خاصة مع وقتنا الشريري هذا

بس اذا السالفة قص و لزق
لا والله يقعد ينطر لين يختار بنفسه

بعدين ترى الصاحب ساحب فا لا تماشي بو مرينا انزييييييييين


;Pp

sologa-bologa said...

ترا الحرية زينة
وعدم الارتباط بالتزامات الحياة
الزوجية
شي جميل

يا زين الحرية

كل ربعي اللي تزوجوا تدبسوا

وعلى قولة عبدالوهاب

أحب عيشة الحرية

ودمتم بحب

Mohammad Al-Yousifi said...

لا تلومهم الزواج يخوف

layal said...

اذا احنا يا البنات عندنا مثل هذي الافكار شنو تنتظر من الشباب ؟؟
عدم الرغبه في تحمل المسؤليه هي السبب

مشاري اظن صاحبك (ماكدونالد- من الاكل منتفخ :-)

LuLu said...

hmmm wayed interesting

ana agool khalhom mirta7een.. il zawaj 3awar raas oo balawee oo yahaal lazem te7mel hamhom until you die. leesh 3ad!

Unknown said...

الوفـا طبعي :والله الزواج اعتماد على النفس ومرات يكون اهوا الحل بس مو بكل الحالات بس بحالاتهم يمكن يكون اهو الحل

بس الكرش مشكلة الصراحة كل من ماكدونالدز :))

Unknown said...

Ra-1 : بس انا اشوف له مخاطره التأخير سواء للشاب او للبنت

Unknown said...

Krakatoa :والله انا معاك شكلهم تلقاهم اخرتها بيوم البحارة (اذا لى الحين مفتوح) وطنازة عليهم اليهال :)

Unknown said...

TeKana : عقب 28؟؟؟
حرام عليج انا تزوجت عمرى 25 وكنت داش على 26 وتحسفت وناسة الواحد يشوف عياله يكبرون واهو صغير عندى صديق تزوج عمره 19 بس كان رجل بمعنى الكلمة وقد المسؤولية والحين ماشاء الله كبروا عياله واهو لى الحين شباب وهالشى وايد حلو

الله يكمله بالخير بعد علشان ما احسده

Unknown said...

True Faith:والله يا اختى الكريمة الخوف من اتخاذ هالخطوة شئ طبيعى ولكن عدم اتخاذها شئ خطير بس الواحد دائما يقول اخلى رب العالمين معاى وراح يعطينى على نيتى

Unknown said...

Яeema : قصيتى الحق الصراحة بهالجملة


و ترا ع لي فكرة
همن البنات ماشين بهالدرب
مالهم خلق كفاح
يبون الريال يايلهم بقراطيسه


لان صج قلة صاروا البنات اللى يبون يكافحون مع ازواجهم وهالشى ما يصير حريم اول كانوا يصبرون على الظيم والظلايم والحين طلعوا اجيال
ولكن بنات هاليومين اقل شى ركضه على الطلاق

والانانومس شلناه بس لا تتكدرين انتى اخت عزيزة وما نرضى عليج

Unknown said...

Q8LoVeR : فهمت فهمت بس تكفه بسرعة تزوج عيل لا نغير اسم البلوق مالك :)))

لى ---lover :)))

Unknown said...

حسام بن ضرار : والله يا بوضرار العزوبية شئ صعب ومو شئ انا اتذكر لما كنت عزوبى جنى قطو لايث الزواج مثل ما اهو ستر للبنت ترى طمانينة للرجل واذا لى الحين مو متزوج ترى تزوج يا معود
لان مو شى والله القعدة عزابى مو شى

Unknown said...

Kuw_Son : لا لا لا لا
انا باخطبلك واشوفلك وحدة لنكككككك يديدة ريلها متوفى صارلها 20 سنة :))
بس يا معود تزوج ترى والله زين الزواج بس تأكد ان الطيبون للطيبات وانت طيب وتستاهل كل خير

واذا بغيت تخطب قولى ايى معاك البس بشت وايى معاكم اقط الويه

Unknown said...

NewMe : الله يزيده هذا ماشاء الله عليه عقلية بس بالعكس لهم هدف وهواية اللى يحب يتادول بالبورصة واللى رياضى
بس صاحب ماكدونالدز ما كو سالفة
بس حضرتج على هالدورات والنشاطات ذكرتينى بالمثل للى يقول
سبع صنايع والبخت ضايع:)))

Unknown said...

queenB :اول شى علشان يكون الموضوع واضح
هذيل ناس عندهم هدف واضح ولكن تقدرين تقولين الحياة بالكويت صايرة سريعة وايد وبنفس الوقت البنات الزنين ماكو يبيون
واما على كلامج الزواج بعد الثلاثين هذا انا عندى ارفضه تماما لان الواحد يكون تخطى مرحلة الشباب اللى يبي يستانس فيها وبكون دائما يبى يسترخى

Unknown said...

Anonymous:لما حطيت الانانومس علشان الشخص اللى مو مسوى ريسجتر يقدر يعبر عن رأيه بادب واحترام بدون كلام جارح لاحد فاعتقد من باب اولى احترام صاحب المدونة وعدم مهاجمة احد من زواره وخصوصا اذا كانوا يعتبرون من الاشخاص المحترمين اللى ما ضر احد بكلامه

Unknown said...

wakee7 : اول مرة اشوف وكيح ((بالصفة)) حكيم برأيه
اتفق معاك باللى قلته 100% لان فعلا منطقى

Unknown said...

FatmaQatar : محد عفسنا الا ماكدونالدز انا كنت اموت عليه بس الحين فجأة ما قمت اكله ليش ما ادرى

بس خفى خفى

Unknown said...

White Wings : انا من ربع الطوابع قبل الغزو كنت اجمعهم واطق درب لى مكتبة العجيرى وبعدين انا متزوج الحمدالله
وعندى لؤلؤتين زى الورد الله يحفظهم

Unknown said...

tweety : متألق هالايام؟؟
وانا قبل طايح حظى؟؟
الملافظ سعد يا بنتى

ماكدونالدز عشق بس والله مرات احس ان من كثر ما احبه اكره
بعدين العمر والتكانة مالهم شغل فى بعض
وخطابة ما راح اشتغل يالله معابل بنفسى انا :P

Unknown said...

tasty_as_berry: انا ضد ربط النضج بعمر ماله شغل بس اتفق معاج على الحالة الثانية ان على يوم بطيح على ويها عدل والزواج خطأ من يعتقد ان اهو سد فراغ لان الزواج حياة كاملة وتغيير فى المنهجية كلها بدلا من التسكع العزوبى ويمكن الشى اللى محد يدريه عن الشباب بمجرد بلوغه السن اللى يعتقد ان سن مناسب له للزواج ويكون لى الحين عزوبى ان يكون كاره حق غرفته لان تكون موحشة بالنسبة له ويكون بالضبط شعوره نفس شعور الارملة

Unknown said...

Alather : اى والله الله الهادى ولكن هذا ليس هدف هذا طيش عسى الله يصلح الشباب والشباات منه

Unknown said...

a7La eNG :
اول شى انا مع فكرة الزواج مبجر
بعدين الصاحب ساحب صح بس هذيل موظفين عندى بالدوام وسويت عليهم ملاحظة واستقصاء قلت خل اشوف شلون كنت افكر بعمرهم والحين شلون الشباب يفكر لقيت ان كل ما فتح مجمع يديد بالكويت قلة فكرة الزواج
والحين فاتح الافنيوو الله يستر بعد

Unknown said...

sologa-bologa : الحرية حلوة وجميله ولذيذة
ولكن نومة الليل بروحك يا خوى بالفراش تييب المرض واول مرة افهم من كلامك انك عزوبى ؟؟؟؟
يعنى تخيل وانا قاعد اكتبلك التعليق بنتى الكبيرة تعل راس اهل اللى خلفونى والا تفتح لعبتى :(
شفت الحرية ؟

Unknown said...

kila ma6goog : بوسلمى صدقت بس ماكو مفر

Unknown said...

layal : وانتى الصاجة مكرش :))

بس خل اقولج طبيعة الحياة خلت الشباب يكون هذا مستوى تفكيرهم واهم اعتب على البنات لان وايد منهم صاروا سهلين والمحترمات قاموا يخافون فتلقينهم منعزلين الا ما ندر منهم

Unknown said...

LuLu : ليش هالاحباطات الله يهديج :))

tasty_as_berry said...

مشاري أنا اتفق معاك النضوج ما ينحصر بعمر معين ..

لكن أنا حصرته بحكم تصرفات النوع الثالث ..
* رايح راد على ماكدونلدز واللي فهمته من كلامك مو حبا لوجبة ماكدونلدز نفسها ..

* يقز بالمارينا ويشوف ان متعته يصادق بنات الجامعة ..

* وما يفكر بالزواج إلا بعمر الثلاثين ( يعني مازال بالعشرينات)

هاذي برائي تصرفات غير ناضجة :)

تحياتي ،،،

AseeL said...

كل انسان بظروفه واذا كان الانسان مو قد الزاج والاستقرار وحمل مسئولية بيت لا يتزوج ويبهذل بنت الناس وياه

الشغلة الثانية ان في ناس عندها ظروف تمنعها او تشغلها عن الزواج

وفي ناس تحب الصرمحة للأسف

في شباب في منتصف الثلاثينات و ما تزوجوا للحين

الزواج مو لعبة او مجرد اطفال وفراش
اذا ما كان في شخص تحس انك تحمل له مشاعر حقيقة وتشوفه توأم روحك وشريك حياتك يفهمك وتفهمه لا يتزوج الواحد وايد افضل من شعور بعد الرضا وحياة عل الماشي و زواج تحصيل حاصل والسلام

وانا اتفق مع العزيزة التي اصبحت في قائمة أحلى الصديقات newme :)
تحياتي

AseeL said...

بعد الرضا = بعدم الرضا

charisma said...

مو بس ربعك مشارى
هذا الواقع
جنك اتكلم عن خوانى وعيال خالتى
واغلب الشباب تقريبا هذا حالهم

وصدقنى لى يا النصيب محد بوقفه

خلهم مرتاحين
وشوف كل انسان وشالله يقسم له

:)

Purplecious said...

و منو قال الزواج تسلية

شنو ماكو حلل للملل الا الزواج؟


شنو هذا؟
اش هالعيشة اللي عايشينها؟

استحوا على ويوهكم ريايل شكبركم الواحد يشتغل يسوي شي

والله لو أنا ريال جان اشتغلت بشركة و لا بنك و أكرف بشغلي ما أرد لبيت الا 8

على الاقل اشغل نفسي بشي مفيد

و محد فر راسهم الا ربعهم المتزوجين
مساكين من المشاكل اللي يسمعونها بالدوانية كشوا

و أنا بصراحة كبنت لما أشوف هالأشكال و النماين و العقليات من الرجال أخاف من الزواج
أخاف أرتبط بواحد يطلع من شاكلتهم
شلون أأمن على واحد من هذول يربي عيالي؟



هذولا يااما انهم عمرهم ما تحملوا مسؤولية بحياتهم

يا طول عمرهم شايلين مسؤولية و ملوا يبون يرتاحون

SHAHAD said...

ونقول ليش العنوسة زايدة ؟
لوول دام هذيلا نماذج شبابنا
عموما الزواج مو حل
لازم يبدي يغير من نفسه وحياته
وإذا حس برغبة في تكوين أسرة يتوكل على الله
وربك يسهل

Unknown said...

tasty_as_berry :لا اهوا عاشق لماكدونالدز بشكل غريب :))
بس صدقينى النماذج طيبة وكثيرة

Unknown said...

AseeL : المشاعر قبل كل شى صحيح والمسوؤلية ومقدار تحملها هى العامل الرئيسى فى اختبار الرجل ولكن مع الاسف صحيح هناك اشخاص يحبون الصرمحة مثل ما قلتى

Unknown said...

charisma : النصيب لما يصيب ما يرده احد وهذا الصح النصيب اهيا الفكرة ان الناس مو قادرة تستوعب التغيير اللى قاعد يصير عندنا وانا اتكلم هم عن نفسى التغيير وايد كبير

Unknown said...

Purplecious : اول شى على هونج يا معودة ماكلة فلفل وداشة اعصابج

الثلاثة اللى كتبت عنهم موظفين فى بنوك محلية ويكرفون كرف الشر ولهم هدفهم بالحياة ومو ناس هامشين ولهم نشاطهم
لو كان واحد فيهم ما له توجه او يتشيطن احسن من البنات اللى الحين ماكو هدف ولا عيشة وكل وحدة عند نفسها اهيا الكاملة على الطل
وفوق شينها قواة عينها غير الجكر فوقه قلة اخلاق ولسان طويل تقول دلاله
بعدين شنو هالتعميمات القوية اللى عندج
واللى يرحم والديج مرة ثانية لبغيتى تدشين تعلقين عندى شربى شى بارد قبل لا تدشين

Unknown said...

SHAHAD : صحيح التغيير المشكلة لازم يكون من الناحيتين لان طرف واحد ما ينفع
يعنى يا اخت شهد حتى البنات الحين توجههم اختلاف مو نفس قبل وتفكيرهم صار بس لفت النظر وبس