الطموح و العمل والمثابرة والالتزام وقليل من المشاغبة تكون الحياة ناجحة

Monday, May 14, 2007

لا يالفهرة
لما فتحت اذاعة المارينا كانت تحمل معاها تغيير كبير فى طريقة الطرح والمواضيع ولكن اللى استغربت منه كمية الجرأة
والوقاحة وقلة الادب
يعنى انا اذكر قبل الغزو لو احد اتصل على الاذاعة والا التلفزيون يستحون وحالتهم حالة
الحين تكلم المغنى وتصرخ (وااى اموووت عليك) يعنى بهالسهولة كلها وعلى الملأ عادى تقولين حق واحد جذى
ناهيك عن اللى تتصل وتقول انشاء الله يموت زوجي
واللى تتصل تقول حبيبى ابيه يرجعلى
الموضوع ما ابى اطول فيه
ولكن السؤال شنو هالجرأة اللى تصنف ضمن الوقاحة اللى نزلت على البنات؟
ماكو حيا؟ ماكو رادع ؟
واخلى الموضوع لكم

58 comments:

PearL said...

بداية موضوع وايد حلو

لكن يا مشاري
الدنيا الحين تغيرت عن قبل خمس سنين

فما بالك عن الغزو

قبل ما كان في البوي فريند والجيرل فريند مثل الحين

الحين صار هالشي عادي


بالنسبة للحياء للأسف اختفى مع وايد اشياء ومن نواحي كثيرة
وبهالسالفة الاهل لهم دور كبير بأنهم يزرعون الحيا عند البنت و الولد على حد سواء

بس مرينا اف ام بصراحة عليهم مرات سوالف
كلش مالها داعي

يعني حتى المذيعين فيهم وقاحة
وللاسف مع ان كلامهم و اسلوبهم اهوه اسلوب الشباب الحالي الموجود بمجتمعنا
لكن مهما يكون المفروض يكونون مثل حلو


يعطيك العافية

bo_sale7 said...

ماكو قدوة

ولا اكو طموح او مستقبل


البيت هو المدمر الاكبر بالكويت ... المدرسة تحاول ترقع لكن 6 ساعات والولد يرجع باجي اليوم للدمار وقلة الادب وعدم الاحترام والنزاعات

مشكل

ام الحفيز said...

مشاري

ياحليلك....تسمع مارينا الفحم؟؟؟؟

مارينا فحم ما فيها الا اعوير وازوير والمنكسر والي مافيه خير بالله عليك هذول مذيعيييين وعووووووووووووووه عليهم
اللسانهم بذي وقلت ادب ولا حسيب ولا رقيب عليهم هيــــــــــلق متجمعه عبر الاثير
اما الي يتصلون فيهم بعد ما اردى من المربوط الا المفتلت ادب سيييز ولا تربيه ولا بعض هالابني مال تدعس الشحاطه بحلجها قطيعه تقطعهم هالفهااااااااااره ما جبلنا عليها والتنهوووص بالحجي خلووووه تخليهم وتخلي هالاذاعة الي ملفيتهم...قطيعتهم على الله شـــــــــــــلاء

اهووووو بس عطونا قادري يا بنات خل الفرور تطلع.

Mohammad Al-Yousifi said...

كوني من جيلك فأنا حالي من حالك أستنكر هالسوالف

لكن لازم نعترف ان ما بيدنا نغير هالأشياء أو نسوي رادع أو مانع على قولتك

لازم تتأقلم ان في ناس غيرك عايشين بهالديرة و هم اهم كويتيين لهم اللي لك و عليهم اللي عليك و هذه تصرفاتهم و تربيتهم

كل اللي قدر تسويه اهو انك تربي عيالك عدل جود ما يسوون هالسوالف

طبعا الكلام هني مو بس على هالسالفة

على كل شي نشوفه و ما يعجبنا

أبو إسحق said...

مشكور مشاري عالموضوع

و بالنسبه المتصل و المتصل فقط هو اللي يتحمل مسؤولية كلامه فكلامه بالتالي ينعكس على شخصه و الجرأه اللي تتكلم عنها قامت تصير حتى في الشارع

و بالنسبه لاذاعة المارينا فهي ماشيه على مبدأ الجمهور عاوز كده الى درجه انك تحس انه مركبين المايك بديوانيه مو باستديو

و ما قول غير اذاعة مونت كارلو و اقطع
107.30 اف ام

شكرا لك

magnoonah said...

ما اقول الا اللهم لا تاخذنا بما فعل السفهاء منى


والحمد لله والشكر على كل حال
ضياع الحياء
هذي اكبر مصيبه من مصايب امتنا العربيه

انت لو تشوف الي انا اشوفه والله يشيب راسك اذا الي على المارينا صدموك فالي حوالي بلاء متحرك


الله يستر علينا

SHAHAD said...

كلامك ع الجرح يا مشاري
الحيا مو صوب هالبنات كللش
أما الرادع مابي اقول الأهل
لأنه اللي يدقون كبار يعني بالعشرين ماهي ياهل
لازم هي تكون رادع لنفسها
بس بصراحة استغرب شلون يدقون ويرضون هالمذيعين يتطنزون عليها وإلا على كلامها ومرات يطفرونها
للأسف هي راضية ومستانسة
لا وتدق عشان تضحكهم عليها أو على زوجها !
الله يهدي الجميع

ana_sokkarah said...

كلامك صح والموضوع ينرفز يختك فصخوا بناتنا وشبابنا

يبه انت تتكلم عن كلامها الوقح بس ماشفت الشوارع لاحول ولاقوة الا بالله حشى صاروا بنات شوارع والله حتى الغرب مو بهالجرأة وبهالوقت يختك المحترمة تعتبر معقدة جدا جدا جدا ومحد يبيها

ما أقول الا الله يستر على مستقبل الكويت اذا هذول شبابها وبناتها اللي راح يشيلونها وقت عازتها لهم.. اييييي هيّن

آنا اقولك الحل لازم ندزهم دورة تشفير حق كل شي واعادة صقل عقولهم بالحيا والادب

الله يعطيك العافية على طرح هالموضوع وعساك دوووم عالقوة

Catism القطويّة said...

مدونة رائعة. سأحرص على زيارتها إن شاء الله.

للأسف صار الحياء عملة نادرة قد تباع في السوق السوداء في يوم ما!
لا يهمني أن يكون شخص ما قليل الحياء، فهذه حريته الشخصية. لكن أن يظهر في وسيلة إعلامية وينشر ما لديه لأجيال وأطفال، هنا أقول لا وألف لا.

إذا قل ماء الوجه قل حياؤه *** ولا خير في وجه قل ماؤه

وجزى الله العاملين على حملة ركاز خيرا. فقد كان موضوعهم قبل مدة عن الحياء. آمل أن تستمر مثل هذه الجهود.

charisma said...

واالله صاج
انا من اسمع جذى اغير المحطه ما اتحمل
وييع حدهم
وينرفزوون

شالله حادك لا تسمعهم ابرك

QiYaDiYa said...

اييييه موضوع صج يعور القلب !

عموما انا ما اسمع مرينا اف ام .. لكن في بعض الاحيان اقعد اغير القنوات بالسيارة و اذا كان قاعد يتكلم المذيع اسمعو اذا اغنية اغيرها بس اسمع شنو قاعد يقولالمذيع بس عشان اعرف شنو قاعد يصير بالدنيا و في المقابل اقدر اني اقدم البديل الي يبعد الشباب عن هالبرامج والقنوات التافهه !
و الصراحة انصدددددم !!
انحدار بمستوى الحوار و مستوى الطرح !
على قلة ادب !
على سوالف ماصخة !

الي يدل على سطحية القناة و سطحية المذيعين و المتصلين بعد !

هالاذاعة لا حسيب و لا رقيب ..
قاعدة تبث افكار سلبية للشباب و للمجتمع
و تموت القيم الفاضلة فيهم ..

و الدنيا ساااكته !
و مستمتعه بالي قاعد يصير !

يعني معقولة برنامج ساعة كاملة عن المغازل !!
و قصص شلون الاوادم يغازلون !!

و هالموضوع قالتلي عنه وحده ..
واحد متصل يهدد اذا ما حطيتولي هالاغنية او مادري شنو بالضبط راح اغير المحطة و احط اذاعة القرآن !

الحين اذاعة القرآن صارت دون المستوى !

بس الي ابي اعرفه انه شلون اقدروا انهم يطلعون تصريح للاذاعة !

مثل هالبرامج تسرح و تمرح على كيفها ..
و البرامج الي تنشر الخير و هدفها انه ترتقي بالمجتمع مالها مكان صار !!

ادري طولت ..
لكن بعلق على كلام اخوي كله مطقوق ..
بالعكس ما لازم نسكت ..
لانه انت تربي عيالك من صوب و اهم يلعبون بعقلهم من صوب !
و اذا ما وقفنا هالشي من الحين ما راح نقدر عليهم بعدين ..

اعتذر عن الاطالة ..
بس جد موضوع ضرب على الوتر الحساس !

Mamloo7a Q8ia said...

خووووش موضوووع يا وخيي ...شي يفشل
فعلا الحيا خف لا وشكله بيختفي من هاللي قاعدين نسمعه ونشوفه؟؟
مو معقولة!! لما تسمع اللي يتصلون ويتغشمرون مع المذيع او الضيف انت تستحي وهم ولا بالبال.. شي يرفع الضغط !؟!؟
انا بطلت اسمع هالنوعية من البرامج ابتعادا عن ارتفاع ضغطي

راعيها said...

كل شي يهون ولا هذي اللي تقول يا ليت زوجي يموت .. روحي طلبي الطلاق .. هذي جدام الاوادم جذي عيل بينهم شنو يصير

بالنسبه للإذاعه .. ليلحين ما شفت شي .. احنا تابعين الغرب و راح نوصل لمرحلة القنوات الاباحيه و القنوات الجده مثل ديسكفري .. هم مروا بنفس المرحله

tweety said...

من ناحية اليراعة والوقاحة زادت فهذا شي لا يمكن ننكره مع الاسف والله يستر من جيل الطلائع هذا مع ان الينون زايد حتى من الكبار الحمدالله والشكر والدليل برنامج فوزية الدريع ...الناس يننوا صراحة على اللي يقولونه عادي وعلى الهوا
ولكن

قايلتلك ألف مرة لا تعمم رجاءا كا أنا عمري وصل 28 عمر الورد :p
وليلحين أستحي وغيري وايد يثمنون كلامهم ويوزنون تصرفاتهم بعيدا عن المياعة والمصاخة والدلع الصناعي وقلة الحيا

الا تقول لي جبده عشان توخر التجاعيد ! أنا أدري هذا مو منك من الغيرة لأني ليلحين محافظه على شبابي وجمالي وانت الشيب تارس راسك
ما يبرد واهي :p

بنت الشاميه said...

اخوى مشارى


كلامك صح بس الرجاء لا تعممون

بناتنا والحمدالله فيهم الخير


انتو تشوفون وتسمعون فئه صغيره من

بنات بالمجتمع ...مو كل بنات المجتمع

وهذول قله قليله ....والخير فى الباقى

ولازال المجتمع الكويتى بخير ومحافظ

بس ما تشوفون هالنوعيه من البنات لانهم فى بيوتهم

عافين كافين....والحيا مغطيهم من راسهم الى ريولهم


وبعدين هالاذاعه ما اسمعها ولا اعرف اصلا ترددها

واذا موزينه ليش تسمعونها.....اكو

محطات احسن منها الف مره

وبالاخير ما يصح الا الصحيح

هذى فئه قليله ضاله ندعوا لها بالهدايه

والستر والحيا

. said...

تصدق مشاري؟

الظاهر صارت هالكلمات تنقال من الرجال والنساء بالويه عادي
يعني وحدة تكلم البياع
تقوله
بعد عمري!!!

مديري اول امس اشرحله
غلط غير متعمد مني
وانا مشتطه اشرح
قالي
... والله قالي
يااااااااااا حبيبتي انا قلتلج شي؟
سكت ولا كلمه
اكيد اكيد مايقصدها
بس ماتنقال
! :)
وسلامتك

نون النساء said...

شنو تتوقع
من مذيع عندهم اسمه على اسم سيد البشر
محمد
ووده يسمي نفسه جاك

وييع


مو بس بهالإذاعة لان هاذي عبارة عن مجتمع مصغر عن المجتمع اللي احنا فيه..

حسافة والله صارو الأوادم الزينة
ناس يوصفون بالتخلف

واللي تطلع تصارخ بالإذاعة زعلانة من حبيبها حمودي وتهديه اغنية وتقولة ارجعلي..هاذي الستايل والأوبن مايند


قطيعه

Almas said...

يا أخي انت حيل تعجبني تطرح مواضيع مهمة جدا

المشكلة تكمن بالشخص نفسه وعلى حسب البيئة إلي عاش فيها

في ناس تربيتهم والأجواء إلي عاشوا فيها تسمح لهم بهالشي وفي ناس العكس

وبالطبع الإعلام مساهم بهالشي لأنه بإمكانهم يحطون حدود من البداية لما يتصل عليهم المستمع ويقولوله شنو المسموح وشنو المحظور

لكنهم للأسف يعتبرونه تمدن وتحضر وأسلوب الحياة الحديث

إحنا نقبل الرسائل للأم، الأب والإخوان والعائلة

بس إلي مو مقبول الرسائل الغرامية

المفروض تنمنع .. لكن شراح نقول أمام هالمقولة إلي ماشين فيها هالأيام وهي: القاضي راضي

KQ8 said...

ثقل دم..مو طبيعي..خصوصا برنامج الدوانية..ياخي اذا الانسان الله ما حباه بخفة الدم إلهيا...لا يتصنع

في بعض المستمعين "شباب وبنات" تيرعوا وساعدوهم ربع المرينا..

خصوصا المذيع..اللي علباله ان هو دون جوان زمانه الدقس..بتاع هلا هلا هلا هلا

ياخي عليه دسووومة وثقل دم والمشكله انه يحاول انه يتميع..وكلششش موراكب عليه

الوجد said...

أول زيارة لي
عجبتني كثير مواضيعك

اما هذا الموضوع فحدث عنه ولا حرج
شي مو طبيعي
حاجة تفشل

ماأعرف شنو هالدلع وقل الحيا في هالمداخلات

واستغرب منهم ان اكثرهم كبار قي العمر
يعني مو اطفال

بس اعتقد الفراغ قاتلهم ويشغلونه بهالطريقة

Unknown said...

PearL : الموضوع مو مسألة تغيير
التغيير لابد منه لكن اذا خاطئ
لازم الواحد يرفضه

يعنى لو فى علاقة حب نظيفة لازم تكون نهايتها زواج
لكن بوى فريند ولعب هذا المفروض ينرفض

Unknown said...

bo_sale7 : صح انا معاك بس بالمقابل ليش نخلى اللوم على البيت
شوف المدرسة ونوعية المدرسين شلون صايريين وتشوف القدوة الدايخة

Unknown said...

ام الحفيز: والله يا ام الحفيز كنا متفائلين بالتغيير بان راح يكون للافضل بس هالناس تلوع الجبد
والطريقة اللى يتعاملون فيها واطية وايد

Anonymous said...

هلا ولد عمي
امس لما شفت موضوعك قلت الا اسمعها
فقعدت اسمع برنامج الديوانيه الي يجي الظهر !

ترا همّ عندنا برنامج ثبّت الموجه على صوت الخليج
بنفس الوقت
حطيتهم في نفس الوقت
حسيت بفرق شاااااااسع !
على انهم نفس الهدف !

الي اعرفه ان بسهوله تقدرون تغييروون هذي الشغله
واكو حرية بذي الجانب .. وما شاء الله عندكم بدائل =D

* أذوني عورتني من تعوّي ألسنتهم رجاجيل وحريم @@

Unknown said...

kila ma6goog: صح انا معاك بس
فى شى اسمه حدود دنيا بالاخلاق يعنى المفروض والطبيعى ان اى بنت تستحى
لكن هذا ماكو مستحى لا اللى يتصل والا اللى يرد
واحد طايف عمره 40 سنه يعنى يعرف حدود وعادات واخلاق البلد وما يتعامل على هالاساس هذى مشكلة الصراحة

Unknown said...

بو اسحق اذا ماشية على الجمهور عايز كده عيل كدينا خير لان الاذاعة اهيا اللى تصلح مو الجمهور يصلحها

Unknown said...

magnoonah : انتى لازم تقولين لنا شنو تشوفين :)

Unknown said...

SHAHAD : ترى الدقة مو بس حريم ترى حتى الرياييل يتصلون يقول اذبح مرتى
اطلق مرتى
يعنى لما تكون خصوصية البينت منتهكو بهالطريقة يكون الوضع مبتذل

Unknown said...

ana_sokkarah : بهذى صدقتى يبيلهم دورة تشفير علشان بس الواحد يعلمهم شلون يختارون الكلام اللى ينقال

Unknown said...

Catism : وقالوا قبل الحيا نقطة بالجبين اذا راحت النقطة زال الحيا

Unknown said...

charisma : المشكلة الواحد يقول معقولة فى جرأة جذى تخيلى
مرة وحدة تقول عن طليقها

الله ياخذه كنت اخشه بالغزو ؟؟؟

يعنى هذى جم عمرها؟

Unknown said...

QiYaDiYa : صح انا معاج ما لازم نسكت لان راح يؤثرون عليهم ويصير هم يمكن التأثير مو على الصغار هم على الصغار لكن الوحد شيقول ديرة البربس لا عبين فيفها البسوس

Unknown said...

Mamloo7a Q8ia : تصدقين مملوحة
انا ما عندى مشكلة على الاقل الواحد يستحى جدام الناس
ولكن ان يجاهر بقلة الحيا هذا قمة العيب

Unknown said...

راعيها: لو عندنا شى نفس ديسكفرى الواحد يقول اوكى
لو عندنا قنوات جادة الواحد يقول اوكى

بس الله يستر

Unknown said...

tweety : اولا اولا اولا
انا ما فينى ولا شعرة شيب
ثانيا كلى شاب ولله الحمد

بعدين صحيح توتو
الموضوع صار حتى ان وصل للدلع الصناعى الماصخ اللى اشكره مصطنع والواحد يحس فيه ان البنت فقدت قيمتها

طولة العمر الحلو والشباب الدائم يا عزيزتى

Unknown said...

بنت الشامية : اولا ما تم التعميم
ثاني شى السمع عادة ما يكون مصادفة

لمعرفة مستوى الحوار وليس حبا فيهم

وانشاء الله الله يهدى الجميع

Unknown said...

positive : مو هذا اهو زاد الكلام الحلو على غير معنى
يعنى على ابو انه عادى
يالله روح اقولها
انزين لو الوحدة تفكر تقولها مع واحد وياها بالدوام

كويتى؟؟
اكيد بتقول فشلة انزين ليش مو فشلة من الاخ اللى قلتيها له؟

Unknown said...

نون النساء : اللى طالعة تصارخ وحبيبها حمودى زعلان منها مال الله يعزج شحاطة واكفها فيها على يبهتها

الله لا يبلى عيالنا يارب

Unknown said...

Almas :مو احنا اللى سمحنا حق نفسنا ان يكون القاضى راضى شستفدينا غير المصخرة؟
والمستوى الواطى
وخليها على الله

Unknown said...

Krakatoa : بهذى صدقت نكت قديم
ملق الدنيا
وسخافة مالها والى وجان زين فى اضافة حق اللى قاعدين يسموعنهم كله كلام فاضى وصراخ على الطل

Unknown said...

الوجد : يا اختى لو صغار كان الواحد حط العذر بالعمر بس كبار يا مال شقول

الله الهادى

Unknown said...

FatmaQatar : المشكلة البدائل موجودة ولكن المشكلة الاكبر ان الناس اللى تدير المحطة عندهم الخبرة والشهادات العلمية اللى من خلالها يقدرون يسشتفون ان شو العيب والغلط يعنى مو جهلة لا ناس مثقفة

بس الله يعين

layal said...

ان لم تستحى ففعل ما شأت
هذه البرامج برامج من لا شغل له

Anonymous said...

layal : بهذى صدقتى واختصرتى

barrak said...

بعد المارينا مالت منو
خلاص لااتحجون
اهم يبون جذيه
على الاقل هذي محطه خاصه
فيه برنامج يحطونه بالجهاز الحكومي وزارة الاعلام
يوم الخميس مره شفت لقاء مع لاعب مشهور بس باقي المذيعه تلمه وتاخذ رقمه على الهواء مباشره

حسام بن ضرار said...

ولكن السؤال شنو هالجرأة اللى تصنف ضمن الوقاحة اللى نزلت على البنات؟
----------------------------



تبي الاجابه؟
مافيه تربية اودام

والادهى و الامر
ماكو رياييل ببيوتهم يأدبونهم و يعلمونهم الستر




مع عدم التعميم بالطبع : عشان ما يجي سيء نيه و يسيء فهم التعليق

Anonymous said...

الجرأة .. والفهاره مثل ماعنونت كتابتك يا مشاري :) موجودة في "بعض" بناتنا الله يهداهم .. وكثير من هالبعض يتحججون بهالجرأة بحجة واحده وهي "دام مايعرفوننا خل نتكلم على كيفنا" يعني دام بنتكلم عالهوا جدام ناس ماتعرف منو احنا ف بنتكلم على كيفنا !!

طيب ليش ؟ اذا اغلب الناس ما تتقبل مثل هالفهاره بالكلام العلني اذا صدر من بنت ف ليش تنزلين لي هالمستوى ! انا اشوف اغلب الردود والتعليقات على هالموضوع ترفض هالأسلوب وهالطريقة وهالفهاره .. اللي قال ان تلوع جبده واللي تغير المحطة من تسمع هالكلام واللي مستغربة اذا في احد يسمع المرينا من اصل بسبب هالكلام اللي فيها !! معناته الراي العام اغلبه ضد التصرفات التي تصدر من "بعض" بناتنا

تكفون يا بناتنا .. لا يصير عذر ان "دام مايعرفونا" يخليكم تقولون كلام ما ينقال .. دام ما ينقال عيل المفروض ماينقال سواء يعرفكم اللي سمعكم او ما يعرفكم .. في اداب عامه مثل ما يقولون وفي محافظه على شعور الناس

Unknown said...

barrak : مو الحجى ان سكتنا فار علينا التنور يا البرك

Unknown said...

حسام بن ضرار : نية طيبة يا بو ضرار بس قبل قالوها
لو شتسوى ما تسكر الفهرة فخوذها

Unknown said...

Abdullah : المسألة مو بس ليش ما يعرفونا لان الناس تغيرت صدقنى الحين يبون الظهور وتدز حق رفيجها مسج اسمعنى شنو كنت اقول
واسمع المارينا دازتلك رسالة
وهلم جرة
اثار التكنولجيا يا عزيزى

Q8LoVeR said...

صراحه انا اقولك الشغله ومافيها
حرية شخصية
حتى رفعت علم ايران حرية شخصية
والنشيد مال حزب الله حرية شخصية

Unknown said...

Q8LoVeR : ما ادرى من صج والا تتشغمر؟
الحرية الشخصية مو انك تتعدى على الغير بالتلوث الاخلاقى

Q8LoVeR said...

لا يالغالي مو من صجي شدعوه
ههههه ماتوقعت تطوف عليك
اسمحلي والله عزيز وغالي

Anonymous said...

ملاحظه مهمة :

هالبنات اللي قاعد تتكلم عنهم يا مشاري ويتكلمون بجرأة الى حد الوقاحة موجودٌ بعضٌ منهم هنا في المدونات وللأسف .. صار "بعض" البنات يتكلمون بجرأة تجاري جرأة البنات اللي تقصدهم بالمرينا أف أم .. لا بل أكثر .. وعذرهم .. محد يعرفنا خل ناخذ راحتنا !! وكأن راحتهم بفهارتهم !!

أيا "بعض" البنات حسافة على نفسكم والله .. اذا انتوا تخافون او مايطلع هالنوعية من الكلام جدام الناس ليش عيل تقولونه هنا في مدوناتكم .. الا تشعرون بالنفاق والازدواجية بالشخصية ؟

وعلى قولة محمد مساعد الصالح .. والله من وراء القصد

Sara said...

للأسف مرينا اف ام وايد جريئين وصايرين قليلين ادب ومايستحون هذا غير انهم يشيشون الازواج على بعضهم ويدورون المشاكل هذا غير الألفاظ اللي مالها داعي اللي يتلفظون فيها ببرنامج الدوانية .. اله يستر بس

Unknown said...

Q8LoVeR : لا بس لازم نطفرك شوى :) عزيز وغالى

Unknown said...

Abdullah:والله جنى عرفت قصدك:)

بس قول الله يستر عليهم :)

Unknown said...

Sara : الجرأة شى وقلة الادب شى
هذيل قاعدين ينتهجون طريق سخيف للتسويق