الطموح و العمل والمثابرة والالتزام وقليل من المشاغبة تكون الحياة ناجحة

Sunday, May 27, 2007

سوريا مصدرة الديمقراطية يا بختنا والله


يروى لى احد الاصدقاء انهم كانوا مسافرين سوريا وصارت مشكلة بين خاله وواحد سورى وتهاوشوا قوم يا السورى ونادى الشرطة عليه ويسوله سالفة لى ما وصلت السالفة استخبارات وان ساب النظام ودنيا وينحبس الريال بسوريا فوق الشهرين

ليش قاعد اقول هالسالفة

لان قعدت اقرى مقالة الكاتب المزيون أحد أصنام الليبرالية ( بو شميس) وهو يقول ان الطالب السورى محمد الخطيب اللى انخرط فى العمل الوطني ( الكويتي) مع نبيها خمسة السؤال اهو شكو بالعمل الوطني * بالشأن الداخلي* ؟ وسألت واحد من الشباب كان ملحق عليه بالجامعة يقولى هذا ظل قيده بالجامعة فوق الخمس سنوات يعنى المفروض ينفصل وكان يدخل على الطلبة بالمحاضرات بعد ما يستأذن من الدكاترة ويكلمهم عن الوسط الديمقراطي

بو شميس كاتبنا الامريكى شيقول يقول ان الاخ السوري صار بالصدفة رئيس التجمع الطلابي ( يا حلاوة ) تهقى بو شميس لو كويتي يخلونه اصلا يتكلم والا يقرى اصلا خبر سياسي بسوريا

ورش عليها شوية بهارات بو شميس يوم غرد وقال ان الطالب السورى كويتى المنشأ عربي الهوي ( يا زين الحجي ) مو انت اللى قلت فى فترة من الفترات ان الشأن الكويتي فقط للكويتين ؟ وين هالحجى

وتخيلت واطلقت المخيلة للعنان الخصب وقلت لو كويتى يطلع بمظاهرة فى وقت الاستفتاء الحالي فى سوريا ويقول ( ما نبي بشار الاسد ) تتوقعون شنو راح يسوون بالولد؟؟ هالسؤال لكم اجابته

الوطنية مو حكر على عبداللطيف الدعيج و لا القوي اللى تسمي نفسها وطنية ولا التجمعات الاسلامية اللى مع الاسف بعضها اخذ الاسلام ستار لها

الوطنية بأنك تخلص حق هالبلد وتعطيها مو بس معاهم معاهم عليهم عليهم

واتمنى ان القضاء يخلصنا من قضية على الخليفة ويحكم فيها علشان يتفرغ حق باجي الحرامية من (( قوي الدفاع عن المال العام )) شفت شلون حاميها حراميها


تدورن شلون شوفوا المقال

اضغط عليه للتكبير



55 comments:

ام الحفيز said...

مشاري
والي يسلمك لا تنقبه هذا لطيف دعدوووووع ترى تفوح ريحته اكثر ممن هي فايحه وهو على قولة المثل مثل خيشت الفحم ان دنيت صوبها اتلفتك وان طاحت عليك- اسمالله عليك- هم اتلفتك ،هذا مال حقران ولا احد يدير له بال خلووووه اليما( ينشف )قطيعه تقطعه وتقطع كل من على شاكلته خلوووه تخليه ياكل وانت بكرامه ويزق بالصحن جليل الحي طــــــل بعينه هذا كويتي ....الكويتي الاصيل بغاريته على ديرته وحبه لاهلها وترابها مو قاعد بامريكا بحضن الماسونيين والموساد يلقمونه الفتافيت وعقب ينبح علينا وماااااااااااااااااحي يشيله


قطيعه قثيتني بنصايف الليوووول

الله يهديك يا مشاري

om-bukhnag-zare :) said...

أخوي مشاري .. وسع بالك علي

بغض النظر عن مقالة الدعيج والتي قد نتفق معه فيما ذهب اليه أو قد نختلف
اقول أنه في أي تجمع أو تيار او حتى عمل مؤسسي تحتاج إلى قوى شبايبة فاعلة تساندك وتعمل لصالحك وليس بالضرورة أن تكون هذه القوى الشبابية من الجنسية الكويتية ...
وعليه فإني لا ارى أي إشكالية في انضمام الطالب السوري للحركة الطلابية
كذلك لا وجود للمقارنة بين دولة الكويت وهي دولة مؤسسات تكفل جميع الحريات ..وبين جمهورية سورية فيها ما فيها من قمع للحريات ... لذا لنا الفخر والإعتزاز عندما نرى طالب سوري يمارس عمله النقابي وبكل حرية

و إذا كان هذا الطالب له مآرب أخرى أو عليه مآخذ فمن المؤكد ان القانون سوف يطبق عليه

في النهاية .. المواطنة الحقة ليست حكرا على احد أو على توجه دون الاخر وهي ليست في ترديد العبارات ولا في المظاهرات .. والمواطنة الحقة هي ذلك الإحساس بالمسؤولية تجاه وطنك وخيراته وتجاه الآخرين

أرجو المعذرة اخي مشاري لأني علقت على موضوع ليس من إختصاصي ولكن ماذا أفعل؟؟ اللقافة الكويتية تمكنت مني ولا استطيع الفكاك منها :)ا

ودمت لنا مبدعن غير معصبن :)ا

فراوله said...

مساالخير والكرامه"لصاحب الفلتات الخطيره"أخى المحترم وصرنا نشوف الغلط يتكرر بكل صوره وكل يوم، بس الدهى والمر ان نسكت ونتفرج على هالاغلاط والتسيب

والله مادرى شنقول غير الله يكووووووووون بالعون ويبدل حال من حال
اللهم آميييييين

:)تحياتى للفلته

Anonymous said...

ما عندي تعليق بعد الأخت أم بخنق زري .. ولعدم صف الكلام من أجل الكلام فأنا احيل الى ما قالته

Kuw_Son said...

أولا هذا كاتب ليبرالي .. و أنا دم ضروسي هالفصيلة من البشر !!

ثاني شي .. شلون صار رئيس القوى الطلابية هذا السوري !!

لا و صدفة بعد !!

مو الأولى واحد من طلبتنا الكويتيين هو اللي يمسك هالمكان !!؟

ماكو قياديين من الطلبة الكويتيين يعني !!؟

أنا مع كلام أم بخنق بس مو انه يصير رئيس !!

bo_sale7 said...

كلام سليم وهذا المفروض يصير
صح لسانك
لمتى الكويت مافيها كويتيين يديرونها
عمال نظافة بنغلاديش
قضاة ومحامين مصاروة
تجار سوريين وباكستان
دكاترة بلغار
والحين حتى الطلبة يابو اللي يشتغل عنهم
وليش بس الكويت اللي فيها وطنية وقومية وعروبة !!
لو المعاملة بالمثل جان قلنا ماشي
لو هالطالب ما انحاز لقائمة هم جان قلنا اوكي
يعني لو الاخوان يسوونها او السلف يسوونها شراح تقولون ؟؟!!
الغلط غلط وما ينفع ترقيع الاخ اللطيف عبد اللطيف
اصلا هو ترك الكويت وقاعد يفصل الوطنية ويلبسها للي يبي !
هزلت

malak said...

مالي بالسياسه


بس ودي اقول حق ام الحفيز : اشدعوه!! اشدعوه@@


لكويتي الاصيل مايقول عن اهل ديرته اللي قلتيه

لكويتي الاصيل بافعاله وكلامه
الطيب
...

انا عن نفسي اموت على لكويت وحكامنا

وعندنا حرية الكلام بس ماعندنا
تطبيق هالكلام

;)
..
اجابتي
بيعدمونه اكيد :(

...

اتقي شر من احسنت اليه
السوري
الفلسطيني

وانت رايح

:)

...

خوش موضوع

Nora said...
This comment has been removed by the author.
Anonymous said...

عزيزي مشاري
أنتظر نتائج فرز الإستفتاء السوري على الرئاسة
أعتقد النتيجة سوف تكون صدمة

زهر الخُزامى said...

حبيت بوستاتك الرومانسية
فيها نداوة الورد ساعة الفجر

امبراطـــورة اشعاري said...

مرحبا اخوي مشاري.. انا بعد مالي بالسياسه بس اللي قريته والواقع ماينسكت عنه صار مصخره..
على قولت المثل : البيت بيت ابونا والغرب يشاركونا
السوري يقعد والكويتي يشوف دربه !!!
هنيه تشتغل الواسطات عندنا بالكويت اللي بكل مكان تلاقي الناس منزعجه منها.. بس الله يكون بالعون ويرحم الجميع..

بنت الشاميه said...

الاخ مشارى: هذا رايك فى عبد الطيف

دعيج وانت حر فيه...وهذى مو اول مره

تتهكم عليه......مهما كانت مواقفنا

مع الاخرين ومدى اختلافنا

فهو يظل مواطن كويتي من القاع

وله مواقفه السياسيه المميزه


وقلمه الحر اللى يكتب فيه اذا خشوا

غيره روسهم....طمعا لمال او منصب

او للحفاظ على كرسي دبق مثل ما قلت

اختى ام بخنق زرى

واضم صوتى لهاو

أايد كل ما كتبته فى ردها

وان العمل السياسي ليس حكرا لاحد

ترى

ناس وايد تحسب لمقالتة الف حساب وحساب

وشكرا لسعت صدرك وتحملنا

Anonymous said...
This comment has been removed by the author.
Anonymous said...

عفارم عليكم يا ملاك ويا بنت الشامية .. اختلافك مع سوري ترأس محاضرة او تجمع او ايا كان لا يستتبع انتقاد الدعيج الكويتي الوطني .. واذا مو عاجبنا سوري يقود طلابنا .. فالله يخلي طلابنا الكويتيين خل يطلعولنا واحد يقودهم .. وانا اشوف طلبتنا فيهم الخير ان شاء الله .. بغض النظر عن مدى صحة هذا الأمر بس خلط جميع الأمور مع بعض والرمي عشوائيا يمين ويسار !؟ .. غير دقيق


تقبل مني يا مشاري .. ويا قارئ ان كنت تحمل رأيا غير رأيي


نأسف عالاطالة

بوغازي said...

والله يامشاري كلامك صحيح...بس ما أقول إلا الشرها مو على الطالب السوري الشرها على إلي حطوه على شان يقودهم.. ويابو الحجي حق عمرهم وحقه
.
أم بخنق (ومن يؤيدها) رأيكم له احترامه وتقديره.. بس ما توصل المواصيل إنه يصير رئيس (مثل ما قال أخونا كويت صن).. خل ينظم للحركة الطلابية براحتة.. ويمارس عمله النقابي بكيفة.. بس عيب بحقنا أن يكون هو الرئيس ويتدخل (وهنية خطورة الموضوع) في الشأن الكويتي الداخلي الخاص.. ليش إنشاله؟؟!! وشنو يعني؟؟!!.. باجر حتى الوزراء والنواب خل يجيبونهم من دول ثانية بعد.. شنو ماكو قيادات بالبلد؟
.
حركة طلابية كويتية لازم يرأسها طالب كويتي وأي أحد ثاني يبي يشارك فيها حياه الله والساعة المباركة.. بس يعرف حدودة (ولا غيروها وخلوها حركة طلابية عربية أو عالمية وخل يرأسها ذيك الساع إلي تبون)ا
.
مقيولة من قبل: يا غريب كون أديب.. ومرة ثانية الشرهة مو عليه على إلي حاطينة
.
ومادام القيادات والرآسات قامت تصير (بالصدفة) فالله يستر من يوم يصير فيه رئيس وزراءنا (بشار) الأسد... وتقبل تحياتي:)

tweety said...

أنا مع أم بخنق زري بكل اللي قالته

رغم أني شخصيا لاحقة على محمد الخطيب بالجامعة وكنت أعرفه شخصيا وما أحبه بس ما شككت بنواياه

والدعيج أنا ما أقرى له الا صدفة لأني مو من متتبعي السياسة ومع هذا ما أعتقد أنه كاتب سيء أو مواطن سيء كونه ليبرالي هذي مو تهمة ضده

هناك كتاب متأسلمين أشد ظلما وبهتانا هبوا علينا من كل حدب وصوب وخلونا للأسف ما نحترم أحد منهم لتناقض مواقفهم ويرجع لهم عادات كثيرة في المجتمع ساهموا في انتشارها وهي لا تمت للإسلام بصلة

أبو إسحق said...

شبابنا فيهم الخير و البركه - و مثلما نجح البعض منهم في اتحادات الطلبه و القوائم ممكن ينجح منهم في القوى الطلابيه

bo_sale7 said...

اللي يدعي ان عبداللطيف الدعيج وطني ومادري شنو وكتاباته ينحسب لها الف حساب ...مادري من وين يايبين هالحجي
انا تحديت الكل ومنهم عبداللطيف الدعيج انه يعتذر عن مقال نشره بجريدة الطليعة عنوان مشاهدات كويتي بالكويت ...فيه من الطعن والتجريح اللي ما قالته قناة الجزيرة فينا ...محد قال ليش ومحد طلب منه الاعتذار !
والوطنية انه يقعد بره الكويت ويشرب بيرة باردة وهو ينظر للكويت ويفصل الوطنية على ربعه بس ؟
الكلام مافي اسهل منه بس وين الفعل
وهذا الرابط للحكم على وطنية ومقالات الاخ اللطيف اللي مقالاته ينحسبلها الف حساب !
http://bosale7.blogspot.com/2006/04/blog-post_20.html

White Wings said...

اشصاير يا مشاري؟ ليش مزعل الليبراليين؟
:)
أتفق مع كلام أم بخنق، وأقدر رأيك، بس انت تنتقد رأي الدعيج أم شخصه؟
إذا تختلف معاه في الرأي فهذا مفهوم ومقدر، بس يبدو أنك لا تكن الود لشخصه وليس لآرائه وهذا ليس من الليبرالية والديموقراطية بشيئ وانت ليبرالي :) متنكر
تسلم ايدك على القهوة، خففت النقاش الحامي

2 u ALL said...

صدقت أخي العزيز فالوطنيه ليست ثوب يلبس وينزع ..!! والوطنيه ليست حكراً على أحد ..!! والوطنيه ليست كلام ولاتنظير فاضي ..!! أنما هي شعور ينبض بالحب ..!!وأنتماء صريح وصادق للكويت وأهلها ..!! وخوف وحرص على ممتلاكاتها ومقدراتها ..!! وحفظ وصون لتقدمها وأزدهارها ..!!؟

بنت الشاميه said...

لازم نفرق بين الشخصية>> وفكرها>> ولا نخلط الاوراق
هذا من اساسيات الاعلام النافع
بتناقش شخصيته الخاصة ما اعرف عنه
الا المعلومات العامه مثلك ومثل غيرك

اما فكره...اعرف فكره وافهم خطه السياسي

وبعدين السياسي المميز شلون تعرفه واللى يعمل

لفكره الف حساب وحساب؟؟؟؟؟؟.بالهواش والا

المطارح بالشارع........والا.. بالقوة يفرض رايه؟؟؟؟

اخر مره وصل الكويت... طلب الامير مقابلته شخصيا

للتحاور معه......ودار حوار بينهم من القلب الى القلب

بالشأن الداخلى والخارجي....ووزع الديوان الاميرى

المقابلة للصحف.......واحتفظوا بجزء خاص

لم ينشر ... بس كان كلام صريح من كويتى خايف

على هالارض...ما باعها مثل غيره ما باعوها

وبارخص الاثمان .

هذا الحديث الخاص ترى يفيدكم انتو يالشباب اكثر

لان قال اللى انتوا تبونه وتطالبون فيه

بس وجها لوجه


سئلواعن هذا الحديث الخاص......؟؟؟؟؟؟


واعتذر عن الاطاله وتقبلوا الراي الاخر

مثل ماتقبلنا احنا رايكم

What Will Be , Will Be .. said...

خلني على شيكاغو احسن !!


بس يتروالي ماحطوه رئيس الا بموافقة طلبه كويتييين


مثل ماقال عبدالله

ليش مانقوا كويتي يقودهم !!!

عجبى

3ateeja said...

الوطنية بأنك تخلص حق هالبلد وتعطيها مو بس معاهم معاهم عليهم عليهم

هالله هالله الشور شورك يا يبه و الراي رايك يا يبه

بس عجبتني سالفة عربي الهوى
والهوى هوايه

bo_sale7 said...

ترى الامير يستقبل كل الناس
استقبل جمال العمر ...يعني جمال العمر وطني وينحسب له الف حساب ؟
استقبل على الخليفة ...يعني شنو رايج ؟
استقبل حتى الملحق التجاري المصري وتم تصوير اللقاء !
وبعدين انا عطيت مثال على نظرته للكويت والكويتيين وين الوطنية اذن ؟
واحترام الاراء مو معناه نلغي العقل والمنطق
والوطنية انه يقعد بره الكويت ويطيح له سب بالاكو والماكو ويوزع صكوك الوطنية على كيفه ؟؟
العقل نعمة
تحياتي

بنت الشاميه said...

من عمر الدنيا شيوخنا ما يردون احد ابد...اذا طلبوا الزياره

واذا كان المفصود جمال العمر وربعه

والمتطفلين اللى امثاله ما يكملون حتى

فنيالهم الا فزوا وطلعوا


ما يفجون حلجهم..الا للاجابه عن اللى

ينسئل عنه

اما الدعيج فتحاور مع

صاحب سو الامير وسئله عن رايه

وتحاوروا بأريحيه... واستمع الامير الى

كل ماقاله دعيج عن الكويت


اخوى الشيخ ابو صالح

اكو فرق ان تطلب الزياره لصاحب السمو

او الامير يتحاور معك ويستمع لك

انت مختلف وياه ....حقك

بس الريال عنده فكر سياسي

نتفق,, نختلف... كلنا عيال قريه وكل

من يعرف اخيه

وسامحنا مشارى الواحد لازم يتحاور مع

اخوانه....وانت تبتلش فينا

دمت بسلام وحب

Mohammad Al-Yousifi said...

اتفق ان ما كان لازم يبالغ بالمدح و الترقيع للخطيب

ما كان لها داعي

حسام بن ضرار said...

تهقى بو شميس لو كويتي يخلونه اصلا يتكلم والا يقرى اصلا خبر سياسي بسوريا
---------------------------------

هالسطرين بروحهم يكفون للرد على بوشميس


تسلم ايدك

Unknown said...

ام الحفيز : ليش اسكت المشكلة يا ام الحفيز باط جبدى لان يعتقد ان بروحه الوطني واحنا كلنا عملاء وحكوميين وفشلة
يا بابا اذا كنت كاتب صحفى
احنا كلنا نحاول واحنا بعمرنا ان نكون مبدعين بمجالنا
وبالعكس احنا فرصنا اصعب لان المنافسة صارت اشد

Unknown said...

om-bukhnag-zare : محشومة يا اختى من اللقافة

بس لنأخذ الوضع من هذه الصورة لو كويتى وطالب وقعد كثر ما قعد اهو بالجامعة 6 سنوات واكثر هل راح يعطونه المجال انه يدرس؟ لى صديق بنفس السنوات قعد وفصلوه وهذا سورى ضبطوه وقالوله لا تعال امتحن بعد
يعنى فضلوه على ولد الديرة
ليش؟؟؟؟؟؟؟

Unknown said...

فراوله : الواحد لازم مو بس يسكن لازم يغير سواء بالقول او بالفعل

بس انتى قلتى
الله يصلح

Unknown said...

Abdullah : عزيزى عبدالله
هالناس المفروض الواحد يعرف تصنيفها شنو وعلى اساس تنعطى هالفرص اللى ما تنعطى حق كويتين

Unknown said...

Kuw_Son : يبى يشتغل يشتغل اوكى بس مو يصير رئيس بالصدفة
يا سلام على الصدف الصراحة

Unknown said...

bo_sale7 : الاخ اللطيف قام يمدح بالولد ويرفع له تقول موت بس مع الاسف يار يت هالمدح كان لطالب كويتي متفوق فى مستوى علمي او شئ مميز

Unknown said...

malak : يعدمونه؟ بس بهالسوله
بعد ما يورونه الويل قصدج

Unknown said...

عتيج الصوف : اللى صوتوا 11 مليون
ونسبة الموافقة 97.86% يعنى جنا يقول قاعد على قلوبكم

Unknown said...

مجرّد... أنثى : شكرا ولكن هاليومين المود سياسى وانشالله الاسبوع القادم

Unknown said...

امبراطـــورة اشعاري : المشكلة ان هالسورى واسطته اكبر من الكويتين لو انا مكان اساتذته جان امسح فيه واعلمه مستواه شنو
لا دوام ولا دراسة واخر شى يسافر من سوريا لى الكويت علشان يمتحن ولا كأن شى صار

Unknown said...

بنت الشامية : والله يا اختى الكويتى طول ما اهو كويتى يكون كويتى من القاع ما فى كويتى قاع وكويتى على الحفة

هذا اولا وثانيا يا اختى الكريمة

ومثل ما ينحسب له حساب فى غيره وايد ينحسب لكتابتهم حساب واذا تبين اسطرلج اسماء كثيرة

Unknown said...

Abdullah : اتقبل رأيك بكل رحابة صدر ولكن صدقنى طلبتنا وخصوصا الكويتين يمتلكون الجرأة
والمعلومة
والحنكة السياسية والدراية بالاوضاع الداخلية اكثر من سورى

Unknown said...

بوغازي : اختصرتها والله يا بوغازى

يا غريب كون اديب
والادب انك ما تتدخل باهل البلد وسياسيتهم الداخلية

Unknown said...

tweety : انا ما اهاجم الليبرالية ولا شخص عبداللطيف الدعيج
ولكن انا اهاجم الدفاع والتبجح بالصدفة
والتغزل بالهوى العربي اللى ما استفدنا منه شئ يوم احتجنا العروبة ولى اليوم العروبة ما خذينا منها والقومية الا كل سلبيات الكويت

Unknown said...

أبو إسحق : وانا مع هالكلام يا بو اسحق

Unknown said...

bo_sale7 : اتذكر مقالته فى الطليعة والكم الهائل على التهميش للكويتين وكأن الاخ نازل من القمر

Unknown said...

White Wings : اولا انا لست ليبرالي
انا انسان مسلم مستقل عن اى توجه بالشارع
ثانيا اين التهجم على شخص الكاتب
انا كنت اتساءل عن ما يبدع فى مدح شخص ليس له شأن فى جانب السياسة الداخلية وهو الكاتب نفسه كتب من فترة منتقدا من يتدخل فى الشأن الداخلي الكويتى وفجأة يكون عادى لشخص ينتمى لحركة هو مؤيدها

والقهوة مجانا :)

Unknown said...

2 u ALL : صحيح ولو وجد هذا الفكر اللى تفضلت فيه
لن تجد يوما شخص يأتى ليفرض عليك ما تفعل وهو يدير بالريموت كنترول مجموعة اشخاص

Unknown said...

بنت الشامية : السياسي اعرفه يا بنت الشامية لما القاه يعايش البلد بارضها وواقعها
مو قاعد برة الكويت ويسب فيها وياكل من خبزتها واهو اهناك

معاش من القبس
معاش سابق من الزمن
معاش التأمينات
شيبى بعد؟
مو الكويت ؟
واهو شنو عطى الكويت غير ان لما زارها طاح فيها وباهلها سب؟

Unknown said...

بنت الشامية : ونسيت اضيفلج شى
أحمد الديين يقابله الامير
احمدالخطيب يقابله الامير
الجماعات السلفية والاخوان وجميع التيارات يقابلهم الامير

شنو المشكلة لما يقابل كاتب

تبين تعرفين الامير منو قابل وان شخصيته تغيرت بعد ما مسك الامارة وازداد اكثر وسع صدره على من يكتب

محمد عبدالقادر الجاسم اكثر شخص بالكويتي كان ينتقد شخص رئيس الوزراء وتوجهاته
يعنى مو انجاز لما عبدالطيف الدعيج يقابله الامير

Unknown said...

What Will Be , Will Be .. : من ردى التوجه

Unknown said...

3ateeja : اى اقولج عتوج الريال صارله بلبل برازيلى

Unknown said...

بنت الشامية : وبو صالح
المكان مكانكم واثيرتوا الحوار صراحة

Unknown said...

kila ma6goog : والله يا بو سلمى الا طبله لما قال بس

Unknown said...

حسام بن ضرار : جان خلوه اصلا ما يفكر يعبر بالسيارة او طيارة او صاروخ صووب سوريا

قماشة said...

لا تحاتي علبى الوطنية ترى احنا في حضن وطن كبير


وفي وايد مخلصين بهالبلد بوطنيتهم


وقواك الله

Unknown said...

قماشة : بس يا اختى الكريمة الواحد مل من اللى قاعد يصير الناس طايرة جدام واحنا يالله هبابة نمشى خطوة
زهقنا

ام الحفيز said...

مشاري

ما اقول الا الله يعطيك على قدر نيتك...وحبك لهذه الارض الغاليه على قلوبنا....ومثل ما قالوا القافله تسير و.....تنبح