الطموح و العمل والمثابرة والالتزام وقليل من المشاغبة تكون الحياة ناجحة

Sunday, July 08, 2007

حلول سياسية من الفنتازبا اليومية



الكهرباء



بدلا من صرف 10 ملايين دينار على حملة نوفر لها ( واللى خلتنا نتصرقع وما نخلي شى الا نطفيه حتى لسمعت الراديو بالسيارة ابى اطفيها وانا امشى من الخرعة ) يعطون كل مواطن كويتي بيزيتين من هالعشرة ملايين ونسافر لى ما يحلون ازمتهم ويدزون بعدين مسج ردوا ترى صلحنا كل شى


تصريحات الوزراء

طول ما ان وزراءنا كل ما تحجوا طمروا لهم نواب ما ادري من وين وكل وزير وحسب حب نوابنا الافاضل له بالمجلس يسن قانون بعدم تصريح أي وزير الا بعد موافقة المجلس بالثلثين على التصريح


سياحة كويتية

جزيرة فيلكا يسوون فيها ديسكو وينزلون فيها المشروب علشان العلمانيين ما يقولون احنا دولة غير حضارية ومتخلفين لا بعد وكل شهر اقدع رقاصة نخليها تهز الوسط بنص الجزيرة بدال اللى يصير فى جزيرة كبر والناس طراريدها تطبع ويتوهقون وتعال يا خفر السواحل فجج ترى تكلفة تصير وبعدين ليش يا وزير الداخلية ما خفر السواحل طلع السكارى من طبعتهم مو رايحيين يتنفهون ويوسعون صدورهم


الاسكان

طول ما احنا ما عندنا اراضي وكل ما قالوا هالارض نبنى عليها قالت شركة النفظ لا هذى فيها نفط ( جان زين القي تحت بيتى نفط) ابطله بالقطارة وبقولهم يا مليار والا ماني طالع أنا اقول يأجرون حق الشباب شقق فى لبنان والا مصر ارخص لهم ونحول لهم اهناك وظايفهم ويعيشون لى ما يحق السكن بس نشترط على الكويتى ما يسمي ولده عصمت والا ما ياخذ البيت


الصحة

يسكرون كل المستوصفات ويخلونها يا نادي صحي او حضانات باسعار رمزية ويحطون دكتور وممرضة حق كل فريج والفريج يتحاطط على معاشاتهم كل شهر بالنص مع الحكومة منها طلعنا فلوس من الحضانة ووفرنا على الحكومة نص راتب حق الطبيب


المجلس

شوفوا الحب يمينه ويساره

على غرار البرلمان المصري واعضاء المجلس فيه يدخلون الحب ( المكسرات ) الى قاعة المجلس ارجوا من امانة المجلس الموافقة على منح نوابنا طاسة مكسرات والسماح لهم بتكسير وتقشير ولزلزة المكسرات بدلا من الجلسات المليقة وانا مستعد اسوى مناقصة المكسرات والقروضات والنواب لهم خصم والوزراء ادبل عليهم السعر

وزير الكتروني



اقترح وضع وزير الكتروني علشان اخوي لا تقولون واسطه ما واسطة يكون الوزير مبرمج معاملة قانونية وقع معاملة غير قانونية يكون زاهب بطراق والا تفله بعين النائب بس تتوقعون ما يضبطون الياباني اللى يسوى الوزير الالكتروني ويعطيهم الرقم السري ماله ؟


لاى اقتراحات فنتازية الباب مفتوح اعزائى


65 comments:

Nachla said...

مشاري
خوش موضوع بس العنوان
يعني شنو
فانتازبا؟

What Will Be , Will Be .. said...

احلى شي الوزير الالكتروني صج عجيب

وحبيت اتشكر منك على مساعدتك لي في التقرير
مشكووووووور واااااايد
صار احسن تقرير الحمدالله

:)

kila ma6goog said...

وينزلون فيها المشروب علشان العلمانيين

ماله علاقة؟

Fahad Al Askr said...

أولا: أتفق معاك على موضوع إعطاء المواطنين فلوس للسفر وكذلك شقق القاهرة بس لبنان صعبة الأوضاع فيها

ثانيا: أعتقد إنك تدري إن مو كل الوزراء بغباء الفقيد علي الجراح سياسيا

ثالثا: أتمنى من الحكومة الأخذ باقتراحك الخاص بالسياحة على محمل الجدية

رابعا: ليش وزير الكتروني، هل خلت البلد من ريال تكانة

salfa3ajeeba said...

3la golat '7alid ilnifeesi allah yir7omah 3a6o kil mowa6in malyoon wi '7al yibtilish bajyalah ilqadmah:)

so2al 7ayawi wi mohim,

iseer isammon 7ishmat:))

pop_cornaaa said...

مشكوور على هالموضوع الجميل , وأنا محد حارنى غيير من حبنا لها بنوفر لها حتى اليهال علمووهم , وينك يا بابا جابرر كنا قبل نغنى عن الوطن والأميير الله يعز أياامك ,,,
حتى ذاك اليوم كانواا حاطين برنامج عن حياة الراحلة\مريم الغضبان الله يرحمها كانت تشكرر الشيخ جابررر الكل يذكرك لى الحين يااغلى أبوو بالدنيااا
:))))
وسلامتكم طلعت اللى بجبدى

White Wings said...

ممتاز يا مشاري
أنا شخصياً مع الاقتراح الأول بتسفيرنا كلنا واعادتننا عند انتهاء الأزمة
:)
والعلمانيين بالله عليك اشعليهم من جزيرة وهز وسط وهالكلام، يا مشاري، العلمانية فكر سياسي، ليش تخلط الأوراق؟؟
بالله عليك العراق ممكن ينجو بدون قيادة علمانية؟؟
يعني وبعدين؟؟
:)

The Voice Within said...

لووووووووووول


البوست مسكت



فوقه مظاهرة

Krakatoa said...

انا اقول اللي قاله خالد النفيسي رحمة الله عليه

خل يعطون كل رب اسرة مليون دينار وخل يبتلش اهو بأجياله القادمه والمتاخره

ابن زيدون said...

اهي وقفت بجزيرة كبر على مشروب يا مشاري

شوف اليخوت الي تمر صوبها شقاعد يصير فيها ، الناس لاعبة لعب و خفر السواحل مهما سوو ما يقدرون يحلون هالمشكلة

انا اقترح ان الكويت تسوي رحلات مجانية جوية و بحرية حق تايلاند و دبي مع شقة و وغيرل فرند روسية و إلا أسيوية على حسب الذوق حق يحلولنا مشكلة هالمنجس هذيل

( ؛

Shaima'a Alkandari said...

شغل عدل

ياخوي بالنسبه للفلوس اللى خلوها دعم للحمله فهذا بلدنا لازم نعمره ونخليه فعلا حار صيفا يعني طف كل شي واقعد بالحر

ديربالك يمكن بيوم يقولون قعدوا بره لان الجو الطبيعي اوفر

وفيلجا وماادراك مافيلجا \\
خل الطابئ مستور

وهذيله جزر الكويت وصل على النبي


شفيك الحين لو بيخلون الديره كلها بيوت ويوزعونهم للناس جان شفت اللى عندهم هالشقق المفروشه والبيوت التأجير والديلوكس خسرانين وماكو راس مال ثاني

خلها على الله حجه من الحجج قالوا نفط تحت هالاراضي شرايك اروح وامسكلي ذاك الشبر واحفر تحت بيتنا وان سألني ابوي اقوله ان مشاري قالى يمكن في تحت البيوت اليديده نفط

خوش فكره تصدق الخاصه بوزارة الصحه شرايك تروح تعرض الموضوع على الجهات المختصه ونتحد ونطبق هالشي اللى بيوفر وايد وايد للحكومه والدوله

خلها يضيعون وقت ويكسرون هالحب لان ماوراهم فايده عالاقل بيربحون موردين المكسرات

حلو حلو رجل الكتروني بس بيدورون طريقه للوااسطه



مشكور اخوي مشاري

om-bukhnag-zare said...
This comment has been removed by the author.
om-bukhnag-zare said...

صبحك الله بالخير اخيي مشاري :)ا

اخيي دام الموضوع فانتازيا خل اقولك اقتراحي ويا حبذالو وجيف جان يسووونه على وقت احفادنا :)ا

بدل هالفسفه الزايده والمساعدات اللي قاعدة ترجع لنا عايدي وصايرين مثل الثومة ماكولة ومذمومة

ياليت يسقفون الكويت كلها ويكيفونها ماعدا المحميات :) بس تكفى قولهم ديروا بالكم ترسي المناقصة على الخرافي وربعه ترا حيييييييييييل ازعل :(

كويتيه مقهورة said...

بصراحه هالقصص وغيرها ماتصير

غير بالكويت ومن حبنا لها بنوفر لها

لو كل وزارة ومؤسسه حكوميه ومباني

حكوميه وفنادق ومنتزهات ومراكز

تجاريه سكروا هاللمبات

اللي جنها لمبات عرس حتى بالليل

جان ماحتجنا نوفر لها

مشكور أخوي مشاري دائما مميز بطرحك

SolaimaN said...

اقتراحاتك يا اخوي ماشوفها فنتازيا

كلشي جربنا فيهم،بس مالهم علاج فلازم انجرب حتى

الحلول الغير منطقية

واقتراحي طال عمرك زياده الرقابه في المنافذ والحدود على الخمور

علشان ايداوم الاعضاء والحكومه الصبح بدون خدار امس

وايد يازتلي سالفه الوزير الالكتروني

صج لوووووووول هذي

retaj:) said...

لو ان الدنيا تمشي برايك جان تضيع

في اشياء صح من كلامك


وفي لا

هل الوزير الالكتروني بيحل كل المشاكل ؟

حل الكهربا خوش حل حق الوناسه والسفر بس مو حل دايم


وسالفة الحب خوش شغل


اى والله لي متى متى يعطونا بيوت واراضي

حسام بن ضرار said...

حلول ممتازه

و يبيله نائب الكرتوني بعد




حملة الترشيد هذي كل تكاليفها بتروح بجيب شركات اعلانية مستفيدة و الله اعلم

ما دام وراها جمعية المهندسين ، فلا تظن ان السالفه من قلب

kila ma6goog said...

ليش ضاغطنا بالوطن؟؟


لوول

7ajyyah said...

السلام عليكم جميعا
أخ مشاري تعليقي باختصار شديد دمار دولتنا العزيزة تم بفضل النواب الأفاضل
مدودهين الوزراء والي يخالفهم يدخل جدول الاستجواب
تأخر عندنا التعليم بسببهم الصحة كذلك مشاريع التنمية أصبحت بخبر كانا بعد بسببهم
بس فالحين بمنع الاختلاط وستار أكدمي في بلاوي بالديره واهم همهم توافه الأمور والله قهر

صاج ياريت يحطون لهم مكسرات جود يلهون فيها ويعتقون الوزراء

afyaa2 said...

اما الصحه الاسكان خوش اقتراحات (: وناااسه جان زين يتطبق هالشي ..
اما فيلكا.. علمانيين شيوعين راس ماليين ليباريين فربي يستر علينا
عموما خوش بوست

Fahad Al Askr said...

شفيك اللهم يا كافي نازل فينا، وبعدين وين المدونات اللي ترجع كل الأمور السيئة للدين، شدعوة ترى كلنا مسلمين بس ما نرضى بالغلط، وإلا شرايك يا بو الشباب

فراوله said...

مساالخير لكل الخير
لاخوي العزيز مشاري
والله تسلم ايدك علي هالتقرير العجيب خلطه موطبيعية وممزوجه بنكهات ساخره من اعمق قلب
اعجبتني موووت سالفة النواب اللي حاطين حب عشان يتسلون فيه..بس الاقتراح حق اللي موجودين شي اسهل من جذيه لانهم مايحبون التعب وهم يكسرون المكسرات والحب
دمت بود ياصاحب القلم الشريف
:)

أبو إسحق said...

اقتراحاتك منطقيه اكثر من مطالب بعض نوابنا :)

تحياتي

Mishari said...

Nachla : فنتازيا تعنى البعد عن الواقع
:)

Mishari said...

What Will Be , Will Be : يبيلنا كل شى منه الكتروني علشان نفتك
بس

وحاضر والحمدالله ان طلع من التقارير الزينة

Mishari said...

kila ma6goog : اتصدق بو سلمى كل مرة اكون ابى ارد على قدر كلامك سطر بسطر وكلمة بكلمة
بس هالمرة لا
ليش؟
لان حضرتك مو راضى تشوف شغلة مميزة
ان العلمانية اذا كنت انت علمانى اول شى تدعو فيه هو حذف الدين وهذا من بدايتها
والاشادة بكل شى يكون ضده حتى لو هالشى بالاستهزاء
احد كبار العلمانيين بالكويت وكان احد السفراء باحد الدول كان يتطنز الاخ بان الناس شلون تروح تلف على مكان 7 لفات
يقصد الحج
كان ولا زال ناس منهم يطالبون بوجود مشروب والمراقص لتنشيط السياحة
بو سلمى لا تزعل منى
انت رجل تصلى وتعرف ربك ويمكن انت مؤمن بفكر سليم
ولكن من تركض وراهم فكرتهم بتطبيقه غير نهائيا وعندهم ما يقوم به البعض من عبادات دينية او ممارسات يجب ان تنتهى

وصدقنى له علاقة مثل ما ان للماى علاقة بذرة الاكسجين يا عزيزى

Mishari said...

Fahad Al Askr : والله يا عزيزى اى
ماكو رياييل يصيرون وزراء تدري ليش
شوف النواب ومانى قايل الكلمة

Mishari said...

salfa3ajeeba : هذا الاقتراح الطيب:)

Mishari said...

pop_cornaaa : الله يرحمه بس الموضوع الحين صار اكبر من جذى بوايد

Mishari said...

White Wings : يه يه يه شلون ماله شغل؟
محد ينادى بوجود منتجعات ويكون فيها
كاااااااااااااافة
مستحضرات الوناسة والفرفشة والدمبكه غيرهم

يا عزيزتى كلنا نعرف شلون يفكرون ولا نجذب على بعض
العراق غير وبينا وبينهم ساعتين بالسيارة

اهنى الكويت

Mishari said...

The Voice Within : يبيله بس انا انطركم بالسيارة:)

Mishari said...

Krakatoa : صح اقتراح اوافق عليه وبشدة بعد:)

Mishari said...

ابن زيدون : والله يا خوى ابتلشنا
واذا قلنا حرام قالوا رجعيين
واذا قلنا عيب قالوا متخلفين

يبه انا متخلف ورجعي حلو جذى زين؟

Mishari said...

Shaima'a Alkandari : اختى شيمياء

انتى حفرى تحت بيتكم وانا اطقلج هرنات تشجيع :)

لان اتوقع راح اشوفج معلقة من الوالد قريبا جدا :))

وبالنسبة للمستوصف انا اقول صدقونى احسن بدال الممرضة الهندية لقزت الياهل ابره تقول بتشلع فخذة

Mishari said...

om-bukhnag-zare : اييييييي والله صدقتى خوش اقتراح وحلو
يعنى جان الواحد قاعد بالظلال وشغل عدل

واذا بغينا الشمس يبطلون الشتر ساعة بس وخلصنا

Mishari said...

كويتيه مقهورة : ميخالف ينسون من هالبطاط والبديان اللى ياكلونه من صباح الله خير

Mishari said...

SolaimaN : وانا يازتلى الصراحة سالفة انهم ايون بخدار المجلس
بعدين يبه الحين فى تصنيع محلي ما تشوف عيونهم طالعه :)))

Mishari said...

retaj:) : علشان جذى سميتها فنتازيا
:)
وبعدين صدقينى الوزير الالكترونى على الاقل ما عنده مشاعر بيفكنا من الواسطات

Mishari said...

حسام بن ضرار : والله راحت عن بالى سالفة جمعية المهندسين بعد
انا لو منهم احولها نادى صحي والا ملعب صابون
لان الصراحة ما اشوف منها فايدة الا خصومات على اماكن سكة

Mishari said...

kila ma6goog : ليش دايما تشوف بنظرة سودة يا اخى؟

صف نيتك ولا تصير سوداوي

Mishari said...

7ajyyah : والله الحجية ما اقدر اضيف على كلامج
وتصدقين والله اقول مرات لو يحلون هالمجلس ويخلون الناس تشتغل وبعد سنتين يرودون يسون انتخابات وايد ابرك من هالتبربس

Mishari said...

afyaa2 : خلاص عيل اختارى شقتج لبنان والا مصر
وانا ادزلج ايميل حق الوزير

والصحة نسوى الجبرة مالت الطبيب يم بيتكم:)

Mishari said...

Fahad Al Askr : لا عزيزى في
والظاهر ما مروا عليك المدونات اللى سكروها اصحابها علشان ما يخلون الناس تشوف المصخرة والتخمبق الفكري

اللى بس همه يسب الدين بطريقة مباشرة
ويقولك اشكره انا ما اعترف بهالدين

يا عزيزى ترى المدونات مليئة
وتأكد انا لو باطب فيك اطب فيك جدامك لان المحترم ما استحى بينه واعده اخوي

Mishari said...

فراوله : احسن لهم يا فروالة واذا انتى بعد عندج مناقصة فراولة وكرز
نحطلهم بالمجلس
نخليهم يطقطقون بدال هالصيحة اللى مسوينها لنا

Mishari said...

أبو إسحق : وينك يا ابو اسحق
مكانك خالى يا خوي

لا تغيب ترى من جد افقد كتابتك المميزة والتى تضيف لنا المعلومات يا ريت الناس على الاقل مثل تفكيرك

The Voice Within said...

اوكييييي !!


تنطرنا بالسياااااااارة ! :P



مافيش مشاكل انت اقعد بالسيارة بس ها ... انسويلك موكب


ويين ما تلتفت تلقا اوادم حولك


ونصفر العداد ( تحسبا لاي طارئ )

Anonymous said...

استاذ مشاري
نحترم وجهة نظرك وبالفعل تعبر عن وجهة نظر شريحة كبيرة من الشارع الكويتي تأكد باننا نقف وراء ما تقول وقد لا نكون مدونين ولكن خبرة السنين جعلتنا نعي ونميز من هو على صواب
انا رجل فى 47 من عمرى و عندما اري نموذجا برقيك الفكري وتمحيصك للامور وحتي قفشاتك ان دلت فتدل على انك انسان مفكر قل وجوده
قرأت ما كتب فى جريدة الوطن وبالرغم من عدم حبى لهذه الجريدة الا ان كلامك منطقي ومعتدل الى ابعد الحدود واعلم بانهم حاولوا اصطيادك بالماء العكر ولكن ردودك كانت واضحه
وقرأت ايضا هجوما على شخصك من بعض المدونات ولكن تأكد يا اخي ان الشجرة المثمرة هذا هو حالها فى مجتمع ينام ويصحى على افكار واهية

دمت بمحبة وسلام وعطاء لبلدك بفكرك السامي

وعلى فكرة عجبتنى سالفة وزير الكتروني

بو عبدالعزيز الفهد

Vancouver said...

قبل لا تكتب البوست شنو كنت شارب ???? ، او ماكل ??? لا تشرب
لبن مع المجبوس بالصيف

اثاره موحلوة كلش
هاهاهاهاها

ZoZOta said...

مشاري يا مشاري

انا عن جد استمتع بكتاباتك الساخره

واقتراح السفره هذا ييه بوقته
بس من يسمع لك

يبت طاري فيلجا يا زينها من جزيرة
تصدق حرام اللي قاعدين يسوونه فيها
المفروض يسلمونها حق شركه علمية تديرها كمنتجع سياحي كويتي
وبدل ما نروح هاواي ولا جزر الأباطور نروح فيلجا

:)

اذا تبي نفط ادز لك شوية
واذا على العيشه بلبنان انا اول وحده اروح

اخيييييييه عليها
ديرة مو مثل باجي الدير

اقول مشاري شغلك شغل نواب
دهنا في مكبتنا
نواب ومكسرات
ياااااااااااه
اخاف باجر التفت ولا اشوف مطحنة مشاري
غميضه عليك

الوزير الإلكتروني خوش فكره
بس اللي عندنا يضبطون ابليس نفسه
بلا نيله

حيل حيل حيل عجبني البوست

:)))))

Q8LoVeR said...

انا اقترح لتلافي مشكلة الكهربه والماي
تعطي الحكومه كل بيت مكاين كهربه 50 الف شمعه وانت رايح
وتحفر لكل بيت بير

واقترح تعطي كل رب اسره مصفاة نفط صغيره عشان يشتري النفط رخيص ويحوله بانزين عندهم بالبيت بلا زحمه المحطات بلا مصاريف زايده

والي يلقى بير نفط تحت بيتهم يعطونه بانزين مدى الحياة اهو وذريته ويسكنونه بقصر في المسيله ويمعطونه 50% على كل مناقصة نفط على البير الي طلع له

وأقترح بإشراك المواطنين بأسهم شركة الخطوط الجويه واعطائهم تذاكر سنويه لا خلها نص سنويه الي مايبي يسافر تترحل له لي السنه الي بعدها

انشاء سكه حديد مترو او اندر قراوند والدخله عند كل راس عاير حق هالقطار

توفير موبايلات وخطوط تلفون لمن يكمل من ابناء الكويتيين سن ال 10 سنوات

فتح شركه 3 للاتصالات من والى الشعب وتصير الدقيقه 5 فلوس وقت الذروه او اقل مع اسقاط 50 دينار شهريا من رصيد كل مواطن

الكويت وايرلس كلها مثل نيويورك

وتخصيص لابتوبات لكل فرد جديد في العايله

انشاء جسور جديده من راس المنطقه الى مجمع الوزاراة كل منطقه بروحها

واذا كان الفريج الواحد فيه اكثر من 3 نفس مكان الوظيفه يسون لهم جسر ثاني حق وظيفتهم على راس العاير

واخيرا حساب الفلوس الي وزعتها الكويت على الدول الثانيه وماردتها مع الفلوس الي انباقت مع الفلوس الي ضاعت بالاستثمارات والي شفط منها من شفط واخذ منها من اخذ ومع المشاريع القادمه في الاعطاء
وجمعها في رقم واحد وتقسيمها على عدد المواطنين واعطاء كل مواطن نفس الرقم الي بيطلع !!! اعقتد بنصير بليارديريه

400 مليار فلوس الكويت تصدقت فيها بحرب العراق وايران لاننساها هذي بعد

المهم ان طلع لي اقتراح بعد سجلته عندك

تحياتي

Q8LoVeR said...

اقتراح سريع تخصيص طائره مع كابتنها ومظيفين ومساعد الكابتن لرب كل اسره لسفرات الاهل عشان لاتروح وماكو حجز
الا عندك طياره ويفضل الاير بص اليديد خوش شي شفت صوره

Kuw_Son said...

أحلى شي الوزير الالكتروني هههههههه

يتفل بعين النائب لوووووووووووووووول

حلم جميل بوطن أفضل said...

ليش الفانتازيا .. عيش الواقعية يا مشاري

إسماعيل الشطي يتمخطر في بشته بالصف الأولاني

ناصر المحمد يشكل الحكومة الثالثة في غضون سنة

سعدون حماد يتكلم عن الفساد

معصومة مبارك تقول بأن تخفيف الوزن هو الطريق لحياة سعيدة

حدس ما زالت في طور مداولاتها لتحديد موقفها من الإستجواب

عورت قلبي بفنتازيتك يا مشاري

:)

Q8DOLL said...

لوووووووووول شهالحلول شكله مزاجك وايد رايق
وانا اليوم قاعدتلك وبمسك نقطه نقطه وبعلق عليها بعيد عنك فاضيه

الكهرباء
والله حل حلو حتى لما نسافر راح نوفر الكهربا لأنه محد راح يكون موجود
وياريت المسج يكون من حبنا لها ردوا لها

........
بالنسبه لقانون تصريح الوزرا اقترح يرفقون طلب مع صورة شخصيه واهوه بكامل كشخته يمكن من كشخته النواب حبته

..........

جزيرة فيلجا لو سمحت ابي توصيهم مشروبي المفضل فيمتو

...........

تصدق لو يأجرون لهم بلنان شرط محد يقدم طلب لبيت ولا يبي بيت اصلا بالديره
وياريت تضم اسم شربل لأسامي العيال

...........

بالنسبه للسحه اقصد الصحه والله صاج ماكو فايده من المستوصفات جووود تنفع فكرتك ويصير مكان للتكشت

...........

المكسرات والحب فيها خطر على النواب يايبا لانه لازم يكون معاه قانون منع التراشق بقشور الحب الشمسي والفستق والنقل يامعود مانبي نواب مقضضين

..........

ياريت التفله تكون عن بعد عشان مايحشو الوزير الاكتروني طشار ويتبب في عطل مؤقت
وياريت التفله يكون معاها شويه ليزر يحرق اللي جدامه بعد مره وحده

Nachla said...

ادري يا حظي شنو معناتها بس صلح البدلية يا حظي

فانتازيا

مو فانتازبا

با=يا

Mishari said...

The Voice Within : الطوارئ بهالحالات عديدة والله يستر

بس مانبى اضواء كل شى بهدوء:))

Mishari said...

Anonymous : بو عبدالعزيز اخى الكريم
اشكر لك وقفتك واشكر لك هذا الكلام الطيب ولكن تاكد ان الشد من الجانبين وهذا ما يجعلنا نحن فى هوة كبيرة

والله يستر من الجاي

Mishari said...

Vancouver : اول شى انا ما اكل عيوش واللبن اشربه بروحه :))

يمكن من الحر ترى

Mishari said...

ZoZOta : انا اموت على شى اسمه لبنان بس وخرى عنها بالصيف

عندكم نفط ومجابلة الانترنت ؟؟؟

الصراحة فسقانة

ما تبون واحد يحفر؟

Mishari said...

q8lover:
كل بصوب وتخصيص لاب توب حق كل فرد بالعايلة بصوب:)

الصراحة اقتراح ايجابى

وبعدين يا اخى اللى ما يبى يسافر ليش نتحمل فلوسه لى السنة الياية يبى والا مع السلامة خلك موضوعى :P
:))

Mishari said...

q8lover :جذى راح نطلع دويلات من بطن دولة

شسويت بالفلوس فسفست الحلال يا اخوى :)

Mishari said...

Kuw_Son : بعد جربنا كل الحلول ماكو فايدة ومدام احنا فى عصر التكنولجيا لازم نسلم امورنا للتكنولجيا
:))

Mishari said...

حلم جميل بوطن أفضل : مو واقعيتنا مؤلمة وتلوع الجبد
ولو تبى الواقع طل بس على بيوت النواب بعد اخر جلسة اذا كان فيهم واحد قاعد والكويتي الفقير مبطل حلجه ويغنى من حبنا لها

Mishari said...

Q8DOLL : المسج عجبنى :)
من حبنى لها ردوا لها :)

النواب حتى لو تلبسين بخنق لهم وتلفحين بالمجلس ما يحبون احد

الفيمتو تبينه مثلج والا عادى؟

اسمى ولدي شربل وبيضون وخورى بس خل يعطونا بيت اهناك على الوادي وخلصنا

الصحة فكرة هم نسوى المستوصف مكان نكشت فيه
:)

والباجي وخصوصا سالفة الليزر مااقدر اعلق :))

Mishari said...

Nachla : شفيج الله يهداج يا حظى ويا حظى من اول شى قولى فى خطأ املائى
عيب؟