الطموح و العمل والمثابرة والالتزام وقليل من المشاغبة تكون الحياة ناجحة

Tuesday, November 06, 2007

كابوس سياسي



قبل الغزو في سنة 90
حلمت بأن هناك جنود في الكويت
واستغربت الحلم حيث كنت صغير ولم أعي فحواه
وبعدها بايام قليلة حصل الغزو

أمس حلمت بحلم وقد يكون بسبب قراءتي لرواية ثلاثية غرناطة
بأننا مهجرون
أي تم ترحيل الكويتين من البلد
أو هروبهم من خطر قادم
لاأعرف بالضبط
ولكن أتمنى من الله العلي العظيم أن يتم علينا الامن لان فعلا الوضع مرعب

ايران من جهة - وازمات داخلية من جهة
يعني بمعنا أخر وين ما نطقها عوية

Polo


أنا طبعي من زمان أحب البلوزات اللى فيها قولة
علي شكل البولو
وكنت أشترى جيوردانو قبل لا يفتح بالكويت وكان الفرع اللى بالسيتى سنتر دبي

وفجأة الكويت كلها قامت تلبس رالف لورين البولو تى شيرت
وكنت طالب وحدة
و الحين والله مستحي ألبسها بسبة أن صارت حلاو
اللى ودي أعرفه ليش نهب هبة بالشى لي ما نطيحه ونخليه ما يسوي؟؟

سؤال الاسبوع
العمي ليش يلبس نظارة سودة ؟ شفانا الله واياكم من كل شر؟

26 comments:

العرزاله said...

أما تفسير الأول فهو

الكويتيين أصلا أغراب في ديرتهم من زمان فهموها مثل ماتبون

أما الثانيه

إذا بتوخر عن كل شي يهبون فيه الكويتيين فماراح تركب ولا سياره ولاتلبس شي ولا تروح مكان..كل من قام يسوي ويملك نفس الشي

ماقمنا نميز بين ..و..

أيضا فهموها مثل ماتبون

أما الثالثه

فالصراحه حاولت أدورلك بكذا مكان حتى السايتات الكافره بس مالقيت

أنا أعتقد هناك سببين (حلوه هناك؟)

الأول اللي تأليف ومو متأكد منه إنه عاده قديمه يميزون فيها العميان أو الكفيفين ما أحب كلمة العميان

الثاني وشبه متأكد منه

إن الكفيفين عادة عيونهم مو سويه..يا صغيره أو بيضه أو مشوهه فعشان ماتبين يلبسون الأسود

ويكفيهم ان الرسول -ص- قال فيما معناه ان الله يعوض اللي فقد حبيبتاه يو القيامه

هذا والله اعلم وشكرا على حسن المتابعه

سلام عليكم

QiYaDiYa said...

ذكرتني باختي الي عمرها 10 سنين!

كانت توها راده من المدرسة ..
سألتي صج بتصير حرب !!

انا ويهي كله علامات استفهام !!
قتلها اي حرب !
قالت مع ايران !

قتلها منو قالج !
قالت رفيجاتي بالمدرسة قاعدين يسولفون و يقولون انه بتصير حرب !!

طمنتها و قتلها ما راح يصير شي ان شاء الله ..

عقب هالحوار حسيت بقيمة الامن !
مجرد التفكير في هذا الموضوع يخليك تستشعر عظمة هذه النعمة!

محـــــارة said...

أجاوبك من الأخير .. الله يشافي كل أعمى بس أعتقد قوة الإضائة مزعجه له بس هذا توقع مو شيء طبي بأمانة

.....

بالسالفة اللبس اي عادي مو انت بالكويت اصلا لما شيء ينتشر انا طبعي اكره اروح اشتريح احس شنو المتعه اخذ قطع الناس تتمشى بالمجمع كلها لابستها وعلى الفترينات مرززه شكو أخذها زيادة عدد بس !!

لا والادهى عندنا كل الاعمار تلبس نفس الستايل الياهل والكبير الريال والمره الكل يركض بالزحمه

....

بموضوع حلمك اتمنى يكون حلم وبس وربنا يستر

مشكور خيو بس مشتهين جرعة حلوه من التفائل مو ملاحظ معاي ان العالم كله صايبه مرض الملل والكائبه وربي يبعد عنك هالداء بس حتى انا صايبني ابي اكون سعيده وااايد بس مو قادرين ليش مادري

Q80MINI said...

ليش تقولنا حلمك مشاري
شغلتها فينا باجر الكويتيين كلهم شارين خبز وماي صحة
عسى الله يحفظ كويتنا واهلها الطيبين
اما سالفة نظارة الأعمى نسيت شنو فايدتها:)

فريج سعود said...

واحد من الربع طالب كونتينر شيرتات بولو صيفي وشتوي من تايلند
تبي احجز لك عشرتعش قطعة ؟
الصراحة انا بشتري منه كل الالوان حق البر

bo9ali7 said...

LOOL
اي والله
هبة الكويتيين تخرع

EarthQuaker said...

عشان لا يشوف الي لابسين تي شيرتات بولو (a)


او بالاحرى بعض العميان عيونهم تطالع لي فوق فشكلها يصير غريب شوي فيلبسون النظارات عن حجي الناس تدري ربعنا بالشماته ما يطوفون حتى الميت

الطارق said...

عزيزي مشاري

أجارنا الله وإياك شر الحروب ، فعلا كلمة الحرب لها وقع مختلف عن أي كلمة أخرى .

السؤال لماذا نكون دائما عرضة للتشرد إذا ما وقعت أي حرب ؟! لماذا لا يكون عندنا دفاع ذاتي قوي ؟! بصراحة لا أظن أن فكرة الصمود في حال الحرب تراود الكثيرين .


السؤال ، كيف تحملت قراءة الرواية ( ثلاثية غرناطة ) وما هو شعورك بعدها ؟!


أخيرا ، لا أظن ان الأعمى سيلبس نظارة طبية .


تحياتي

Barrak said...

رجاء كلش ولا البولو ترى ماأرضى

Kuw_Son said...

فالك ما قبلناه ..
لا تقول مرة ثانية أي حلم أو كابوس مزعج .. نهانا الرسول صلى الله عليه و سلم عن فعل ذلك ..

الله يحفظنا و ديرتنا ..

و المسكلة صج .. يهبون هبة بشكل مو طبيعي ..

من صار شعر البولو كبير و على الزند .. صار موضة و الكل يلبسه !!

أنا ما همني لبسوه الناس ولا قعدوا .. أهم شي يضبط علي ولا لأ ..

و العمي عفانا الله .. أظن ما يقدر يتحكم بتوجيه عيونه .. علشان جذي يلبس نظارة سودة علشان يخش منظر العين و هي تزوغل

Smile said...

ان شاء الله يكون الحلم خير لك

ثاني شي .. يعني مو شي يديد الكويتيين كل يهبون بالشي عطه بس سنتين وتروح موضة البولو
والحين يايه موضه القوله الصينيه
شنو هذا
!!!!
لا السؤال ليش الواحد اللي يشوف داخل المجمع ما يفصخ النظاره

فتى الجبل said...

الديرة صارت قبايل
وصرنا احنا فيها أغراب
والعمي يلبس نظارة سودة
عشان اذا سألوه ليش ما تشوف قال من سواد النظارة

someone_q8 said...

السلام عليكم
اخوي مشاري بالنسبة للأحلام اعتقد ان الانسان المفروض ما يحط آماله بالاحلام ولا يهتم لها بأي شكل من الاشكال لانه مجرد حلم ونعم ان الاحلام يكون تفسيرها احيانا صادق ويقع , لكن لا يمكن ان نسيير امورنا ونعيش بخوف بسبب حلم,
قال رسولنا الحبيب صلى الله عليه وسلم : ان اردتم الشؤم ففي ثلاث : المرأة والدابة والمسكن. طبعا الحديث واضح ولا اريد هنا ان اشرح الحديث بشكل كامل
لكن خص الرسول على ثلاث امور فيه من الشؤم ولم يذكر الحلم
بالنسبة للموضة فا شعب الكويت معروف بالهبه على اي شيء يهبون وهذا شيء عادي :)
بالنسبة للأعمى اسأل الدكتور افضل :)
ولك مني كل تحية واحترام

عتيج الصوف said...

مشاري
الكويتيين شعب يحب الهبات مثل ما انت شايف العموم صار مدون و كل من يخربطلي شوي عباله صار مدون و خاصة مدونات الجنس الناعم اللي تييب القثى من مذكراتهم الشخصية
يا انها تتحلطم تبي زواج يا انها تتحلطم على اهلها
على العموم موضوعنا عن الهبات و الصرعات في الكويت و ان الكوايته يهبون بالشي لين يطيح حظه
نصيحتي لك يا زميلي العزيز البس ما بدالك لك ومالك شغل بحد
انت حلو بعيون من يعزك و يحبك
والباجي مجرد مقلدين حالهم حال الشواذي :)
بالمناسبة ولهت على مدونتك و بوستاتك الجميلة :)

Ealaf said...

حمانا الله وديارنا من كل سوء ,,

وبخصوص الـ - هبات - فلله الحمد لست ممن -يهبُ- مع الناس فيما - يهبون فيه - بل احاول وبشدة تحاشي كل ما - يهبُ- به الناس !

Krakatoa said...

تصدق يا مشاري..حلمت حلم نفس الشي جنود ولابسين كاكي وبيدهم سلاح..بس هذا كان قبل الغزو بفترة متوسطه...يعني يمكن نص الثمانينات

ام الحفيز said...

مشاري
اقول كل القصه ومافيها سياسه فرق تسد...وحسبي الله على الي يقبضون من برااا...لتفريقنا امهات اصوات الديموقراطيه ظاهراً وفي الباطن اديموالنقديه...ما اقول عساها زقوم ونار في صدورهم اللهم امين

الجفيف يلبس الششمات على شأن يغطي شكل اعيونه احيانا او حتى يعرفون انه جفيف... وبعدين جفيف البصر يبين بس خوفك من جفيف البصيره اللهم ياكافي

وبعدين بلوزات البولو يا عيوني ما تزين الا على الي له قالب ولا الي ماله قالب لو يلبس ارلف لوران كوتورر بعد ما تزها عليه....واذا قالبك زين اشعليك من الي لبسها قبلك او عقبك المهم انها تكون عليك انت احــــــــلى

فراوله said...

مساالورد والجوري
اخوي العزيز
اول شي الله يجعل حلمك حلم وبس..لان مافينا شدة ازمة ثانية
الله لا يقوله
....
وثانيا:
انت بالكويت..بمعني ان اي شي يشوفونه حتي لو كان يلوع الجبد
ينتشر وبصورة مو طبيعية
يعني تقليد أعمي
تحياتي لك
ياصاحب القلم الشريف
:)

ShamiYa_RockS said...

أول خمس أسطر من البوست حسيت جني بفلم رعب
:////
صج و الله خفت
و ان شاءالله, الله يحفظ ديرتنا و ما يصير الا الخير
و عن ال
Polo Shirts
فهذي سوالف
guys
ماعندي خبرة فيها
:P
بس أشوف وايد شباب يلبسونها ..صح

و اجابة لسؤال الاسبوع فاجابتي نفس ماقالت "أم الحفيز"

Very.Q8ya said...

sar uniform wana ekhtik, sheghil medaris lol shakla ewaz3oonhom ib balash :p bs tara 3ashan sha3bna shwayya o aghlaba shabab fa etha sheft 4 labseeen, yetrawalek enna il Kuwait kelha =]

o 3ala so'alek mabi aftey, I don't know

الدائرة الخامسة said...

مساء الخير حبيبي مشـــاري
يبة اذا انت من النوع اللي يحلم ويتحقق حلمه ... يا رأيت تقرا رواية فرايحيه وتنعنش .. لا تقرأ الروايات المأساوية... وتوهقنا

بعدين .. على سالفه البلوزة
خلك على الدشداشة احلى شيء فيها ان كل الناس متشابهه وما احد يتحرش بالثاني
كلها نفس التفصيل ولون ابيض

اعتقد الاعمي يلبس نظارة سوداء لأنه ما يسيطر على بؤبؤ العين فتلاقاها مرة فوق ومرة تحت واغلب العميان بسبب عماهم تشوة في حدقه العين وهذا نوع من التستر على العيوب وان الانسان يطلع بشكل افضل

وسلامتك

qesat_5ayal said...

لنفس السبب الذي يجعل الموضة في عيني كأنها مبتذلة والسبب كثرة الاستعمال والهبة بدون قناعة او حتى حب جماله



الله يحفظنا

tweety said...

أولا الله يكافينا الشر من حلومك
عاد إحلم بشي حلو إحلم فيني مغيرة شغلي إحلم بأن أسعار العقار انخفضت إحلم بشي سنع واللي يسلمك

ثانيا اشدعوه يعني أنا نوعي اللي ما ألبس شي وايد منتشر ! اشوية تواضع يا ميشو لا تسويلنا جمالو في غرورو
:p

kila ma6goog said...

الله يخلي عمتي - أم زوجتي - مضبطتني عدل مع فنايل بولو

لو رادة علي مالك امل اقط اربعين دينار على فنيلة

الـفــــجـــ الــبـــعـــيـــد ــــــر said...

الله يبعد عنكم الحروب والفتن يا مشاري
ويديم الامن والامان عليكم وعلينا
.
.
.
ساعات نحب نتمير بلبسنا ونييبه من وراا الشمس واول مايتواجد في السوق نعوف لبسه
.
.
.

اما بالنسبة للنظارة دوم اسال هالسؤال وما اعرف رده

تحياتي لك

حسام بن ضرار said...

الاحلام لا تبنى عليها استنتاجات او احكام


تفائل ولا تشط بعيد