الطموح و العمل والمثابرة والالتزام وقليل من المشاغبة تكون الحياة ناجحة

Friday, December 07, 2007

بو خالد وبومشاري والخمسين

عندي اثنين من الزملاء معاي بالدوام بوخالد واهو احد المخضرمين بشئون الموظفين وبو مشاري ماكو شى يمر عندنا الا بعد تصديقه

راح ابتدي فى بو خالد ,هالرجل فيه طبيعة حلو ان يعرف يمتص الغضب وحبيب جدا والواحد يتشرف بمعرفته ولكن انا كل شهر منتفين معاشى واتحلطم واتصل على بو خالد واول ما اقول( الو) يضحك ( يدري الشيطان ان داق اتحلطم ) يقولى الخصومات هذى مالت التأمين ارد عليه اقوله ويسطرلي الاستخدام مال التأمين وطبعا ثلاث ارباعه رايح حق اليهال لدرجة انى ودي مرات امرض علشان استخدم التأمين ( استغفر الله ) بس الزبدة سألت بو خالد راح تنزلي الخمسين والا لا والا راح يسون حركات نحسب البونص ونحسب التذكرة طبعا بو خالد مشكورا طمني ( الله يطمنه ) بأن الخمسين انشاء الله راح تستقر بالحساب اذا تم الموافقه عليها من مجلس الوزراء الشهر القادم

سؤالي لكم شنو شروط هالخمسين وشقصة المجلس كل ما استعسر طلعوا مقترح الخمسين ؟

اما بومشاري

فأما هالرجل لله في لله تحبه دائما مبتسم وكلينا انا معاه مواقف من الناس اللى نجتمع فيهم يخلونك بنص هدومك

زبدة بو مشاري أن مثال وقدوة حق اى شخص ملتزم دينيا ودك تصير مثله ما شاء الله يبتسم وملتزم وما يعرف يكره أحد ففعلا هالانسان قدوة ودائما اقوله لا تنسانا بدعائك لان شكله دعاءه وحدة بوحدة

سؤال اليوم

ليش كل يوم جمعة الوطن تحط خبر بالصفحة الاولي بال head عن العراقيين وعن اختراق الحدود؟

هل ماكو اخبار ؟ والا ترحيل حق الاخبار المهمة حق يوم الاحد؟

قبل كنا نقول يوم السبت

17 comments:

Anonymous said...

مرحبا ايها الزميل مشاري و لك تحية انت و من معك من الزملاء في الإدارة بومشاري و خالد او بو خالد كما اعتقد...

يبدو ان سالفة ال50 دينار لن تستقر في هذه الحكومة "الجعصه" و التي تلمح ان هناك مفاجآت اكبر من ال50 في شهر فبراير الظاهر راح يسحبون من كل واحد خمسين ضريبة اعتصامات و حنه !

انا اقترح يا زميلي ان نطالب الحكومة بتخفيض الرواتب..يمكن تعاندنا و تزيدها :)

Eng_Q8 said...

عسى الله يتمم عليهم

وبالنسبه للوطن الظاهر تبي تنحش الناس علشان يجيبون شعب يديد

كل شي جايز دام انه طلع براءه

Tekana said...

اعتقد الخمسين بس عشان يسكتون الناس عقب ما شيشوهم نواب اسقاط القروض
والوطن كل يوم حاطة عنوان رئيسي شكبره حق الاثارة وزيادة الاشاعات

العرزالــــــه said...

سياسة جريدة الوطن تغيرت من فتره مو بسيطه

قامت تعتمد على سياسة الاثاره ولو على حساب الكويت

وهم تعتمد سياسة الاغتيالات الصحفيه
اي واحد مايحبونه خلاص يشتغلون عليه يلوعون جبدنا فيه وبقصته

تدور اي موضوع عشان تحطه مانشيت واذا مالقت غيره تقعد تحن عليه ايام

تذكرون وزير الداخليه؟ اسبوع كل يوم مانشيت عن الداخليه

الكوادر؟
اسبوع كل يوم عن الكوادر

الحين عن العراقيين كل يوم عنهم

يعني لازم يكون مانشيتهم مثير

charisma said...

صبحك الله بالخير
:)

دايما اقول يا حلو الديانه السمحه
الى لما تشوف صاحبها تقول يالله ارزقنى ديانته او ديانتها

الله يهنيهم

والخمسين والله ما يندرا شالطبخه

والله يزيد ويبارك

وتحياتى لك يا سيد مشارى
:)

Q80MINI said...

واحد دعوته وحدة بوحدة وواحد حوبته وحدة بوحدة:)

انا مستغرب من سالفة الخمسين

بكل دول العالم تكون فيها زيادة الرواتب بنسبة مئوية
10%
25%
اول مرة اشوف دولة تزيد مبلغ معين ثابت لجميع المواطنين
50 حق اللي شهادته اولى ابتدائي
50 حق الجامعي
مايصير
طبعا لا تنسون انها مو 50
راح تقص منها التأمينات يعني تقبضون تقريبا 47 دينار بس:)

على نفسها جنت براقش said...

الخمسين ما منها فايدة و لو الحكومه جان زادت اكثر
الحين كل شئ يزيد سعره و الخمسين ما تمشى مع التضخم الحالى

لو عندك و لد بالمتوسط يبى مصرف حق المدرسه دينار باليوم يعنى 20 بالشهر شيل الاجازات و غير مصروف العطله قول بتعطيه 5
هذى 25 بالشهر
و اذا عندك ولدين هذى الخمسين طارت
بالعقل الشعب قاعد يطر من خير ديرته؟؟
وين العدل ناس تطلع من بطون امهاتها و تمشى لها رواتب 1000
و شرط ما يناشبون الشعب بالتجارة
و ما شاء الله عليهم مو مخلين مشروع مو داخلين فيه بالعلن او بالباطن

الاء سعود المجيبل said...

اعتقد في خمسين...:)

صبا said...

الله يخليكم حق بعض وان شاءالله تستمر صداقتكم على طول
والخمسينه بصراحة مادري عن شروطها
بس اظن ان لها حد معين بالمعاش
يعني لو معاشك فوق الرقم المحدد
اقبض من دبش

J Daily said...

في كل الادارات الحكومية في الشخصيتين (:

Aldenya said...

الخمسين دينار قصه قديمة
ومادري هالقصص راح تتحقق وتكون نهاية سعيدة
اما مقابلها راح يكون فيه شروط ومشاكل أخرى

وبالنسبة لزملائك
إن شاءالله دوم مجتمعين بالروح الطيبة


والوطن
مادري عنها
شنو كتبت وشنو ما كتبت

Anonymous said...

مرحبا

أخاف كاتب البوست عنهم بتساحلهم عشان البونص والترقيات :p

أما سالفة ال50 يا طويل العمر فهذي اللي يطخخونا فيها عشان نسكت احنا كنا نبي دراسة للرواتب ودراسة لنظام الترقيات والعلاوات يوازن بين الكفاءة والأقدمية وكادرات تقدر المجهود خاصة في بعض الوظائف التي تكرف كرف اليهد ومنها القطاع الخاص بس شكله ماهنا نصيب الشكوى لله

فتى الجبل said...

أصحاب الوثن ما يرتاحون الا اذادخلوا الديرة بمشاكل

sar7an 3abdelba9eer said...

ماكو فايده لا اب 50 ولا مليون طول ما هالمشافيح الي مسمينهم تجار قاعدين لنا قعده , وانا اتوقع الحكومة ماشيه على سياسة "الشعب لازم يكون فقير , فالفقراء يدخلون الجنه" ولا شرايك؟

Anonymous said...

وي وي وي

هو اشحقه يا حافظ طالع تعليقي بروحه
وين اسمي
أفااااااااااااااااا
أنا تويتي

محـــــارة said...

عن الوطن ماعنديش خبر

عن 50 المسألة صارت لويه وزحمه الكل يبي يضرب كل نقابة قامت تعتصم وتطالب والأعضاء هذا يوم السعد عليهم مثل مالعبوا بمشاعر العالم بإسقاط الديون صارت الرواتب أهيه السالفه

ماننكر أن الكل وده بالخير .. بس مثل مارددناها نبي إصلاح فعلي سوالف أكل بو يوم وجنه الكويت مو لنا مانبيها ياعمتي الحكومة

الخمسين تأجل بت تنفيذها لأن رفع العلاوات وبالأخص الأطباء وأطباء الأسنان والصيادله راح يتم بـ فبراير وغيرها من القطاعات مثل التربية فمايقدرون ينفذون قرار رفع الخمسين وعقبها تطلع نتيجة الكوادر بفبراير

صدقني بهالسالفة من مصلحة الشعب بس المسألة يبيلها بلع شوية من العافيه للأعضاء ويتركدون بسهم ياخذونا بالصيحة وجنه الشعب ناطر الفزعة منهم .. ونبي مصداقية من الحكومة وسوالف يلعبون على الشعب بأعضائة لعبة القطو والفار وياك الذيب صارت ماصخه

Kuw_Son said...

الله يخليكم حق بعض .. خوش يمعة في الدوام :)

و الظاهر ان القراء في الويك إند شوية ..

فيبون الخبر القوي حق الأحد ..

مثل البلوقرز .. ساعات ما ينزل موضوع في الويك إند .. ما وده يحرقه :)