الطموح و العمل والمثابرة والالتزام وقليل من المشاغبة تكون الحياة ناجحة

Thursday, April 24, 2008

ما بين العقال والمسج


ديمقراطية المسجات ؟

هناك شريط يطوف في القنوات الفضائية من فئة ( ارق سنود ) و( وفالك المجلس ) و ( وديوانية فلان الفلاني ) ناهيكم عن مسجات القبائل فخذ فلان وعلان وغيره والعوائل وكأن اللى داز المسج وصي على كل هالامة واهو يحركهم بصبعه اللى دز فيه المسج وين نتطور اذا كانت عقلية المساندة قائمة على عائلة وقبيلة وطائفة شوي طلعوا من هالزاوية



ديمقراطية العقال ؟


أحد المرشحين كان قد بدء المقابلة التلفزيونية بكلام جميل وسلس ومنظم وكان يعطي أفكارا ممتازة لو أخذت بعين الاعتبار , ولو أن توجهه كان نوعا ما مختلفا فهو أول شخص أراه من ضمن المرشحين من يقبل بالوزارة قبل أن ينجح , فالعادة أن جميع المرشحين يكونون في صف المعارضة والمحاولة في أظهار قدرتهم الخطابية بالصراخ والولولة الا أن صاحبنا كان هادئ لولا أنفجاره أخر الحلقة فما كان منه الا أن نزع العقال من علي رأسه وبدء يلوح فيه ويرميه على الطاولة مناشدا قبيلته المؤازرة ؟؟؟ وعلي قولة شخص لا

أعرفه هيك الديمقراطية بدها تنجح


!!لفت الانظار


المرشح الشاب هيثم الشايع من الشباب المخلصين المشهود لهم بالخلق الرفيق وقد التقيته في مكة المكرمة وكنت اتابع مقالته بين فترة وأخري في القبس يستحق هذا الشاب الاشادة لأنه نجح في لفت الانظار اليه نتمني التوفيق لي بوحمد



تعليق


البعض يرسل لي لماذا لا أتكلم عن المرشح صالح الملا و أنا أكن الاحترام لشخص من أرسل وللمرشح ولكن أولا المدونة ليست مكان للترويج عن شخص ما ( الا اذا كان يدفع 500 دينار وما فوق ) شرياكم بالاستغلالية

غشمرة مو تصدقون

ثاني شي احترامي لشخص المرشح ولكن لا أجد ما اتفق معاه فيه وخصوصا ان طرحه لم يأتي بجديد وخصوصا هو طرح المنبر الديمقراطي الذي لم يتجدد


أخيرا تمنياتي الخالصة

لحدس بالسقوط ما عدا للاثنين الى عليهم دوائر باللون الاحمر

الطارق لا تزعل ولكن وجهة نظر





27 comments:

فتى الجبل said...

وآنا تمنياتي لكل احزاب التاسلم بالسقوط
ما ردنا قري الا هالاحزاب السنية والشيعية

ButterFlier said...

غرور جمعان ينرفزني

ام الحفيز said...

يبلنا حمله فري كويت - من العيار الثجيل- من هالتجمعات والتحزبات الي همها الوحيد انها تزيد الاصفار بارصدتهم طبعا على يمين الرقم وتحلب الديره حلاب
وما نقول الا يعين الله

Enter-Q8 said...

شنو عبالك اطلعوا

شــك بــوم


هذا كلام قدس سره الدويله عن الحربش باللقاء
لما قال لا هذول تم اعدادهم ووو

انزين ليش يا دويله افندي ما اعددت الباقي
الحربش اشوف اصدقهم
مع ان الاخوان يفتقدون المصداقية
ابشرك خضير باااط
شفت الندوة النسائية
و اخوانه هالمره مو واقفين معاه

kila ma6goog said...

ممكن تقولي ليش ما حطيت دائرة على دعيج؟

أمنتك بالله

Dr. Orange said...

الى أم الحفيز
حملة فريكويت اللي قامت ايام الغزو في لندن من أفكار وإعداد الأحزاب اللي تبين تقاومينهم!!

وليش كل واحد ما نحبه نقول عنه حرامي؟ اشدعوة ماكو ولا واحد شريف؟
خل يكون عندكم شوية من الاحمر الله يخليكم

ShamiYa_RockS said...

لو كان اسمه هيثم و بس .. هل راح يكون له كل هالدعم و الانتباه؟ طرحه و برنامجه الانتخابي يصب في مصلحةالكويت..حاله كحال جميع المرشحين
نقول ليش القبائل يساندون بعض .. حتى العوائل تقول لأ هذا ولدنا
!
!كويتيين..

White Wings said...

يا سلام لو حدس يسقطون كلهم
يكون أعظم انجاز للدوائر الخمس
:)
أحلام يقظة؟؟
:)

The Voice Within said...

بو عقال >> بوطبيع ماكو فايدة

ما أشره عليه أشره على هالأوادم اللي بتصوتله عيل هذي أشكال توصل المجلس سوالف فزعات و حاله شهالعقلية و شهلمستوى الحواري الراقي

Enter-Q8 said...

كله مطقوق
دير بالك الاسبوع الياي
ترى بينرفزونك عدل
و يستفزونك عدل
ههههههههههه
الله يعينك

ام الحفيز said...

دكتور برتقاله

من صجك؟؟؟ الي الحين غاسلين مخك؟
اطلع من الدائره الي انت فيها وتعرف منو الي قام بحملة فري كويت بلندن
سؤال بسيط حملة فري كويت منو دفع مصاريفها؟ الاحزاب الي قلبك يحبها؟؟
لاعيوني اذا هم ياكلون التمر ترى احنا نعد الطعااااااااااام
والطار ماينطق مقلوب اعيوني
يالبرتقاله

فريج سعود said...

ابي جمال الكندري ليش محد معبره ؟
ولا هو حدسي درجة ثانية

someone_q8 said...

السلام عليكم
اتمنى من الله عز وجل ان يفوز الاصلح من بين كل المرشحين بدون استثناء ويكون خايف ربه اولا و من ثم يحط الكويت بين عينه
تكفون ادعو للكويت لان اهيه اللي باقية ونحن الزائلون
آخرتها عملك ولسانك اهوه اللي ينجيك ويحفظك
لك مني كل تحية واحترام اخوي مشاري

tweety said...

اشسالفة هالعقال اللي ماعاد هيبة ما ظل مقابلة ولا حفلة بهلا فبراير ما رفعوا فيها العقال !؟

أنت يا بو 500 أشوفك غاط ما تسأل أثريك مستفيد عدل هالايام وأنا أقول من وين له كل يومين يروح الأفنيوز يتسوق
:ppppppppppppppp

حياتي هدف مو عبث said...

جمعان الحربش :)

الطارق said...

الطارق ما يزعل منك يا أخوي وبركه إن طلعنا منك باثنين في ناس مطلعين محمد الصقر ومطوفين ربعنا ويقولون قائمة الكويت :)

بس صراحة ما أدري شسالفة ( سقطوهم )هذي ؟! يعني يكفي إن الواحد يذكر منو الي وده ينجحون وإذا ذكر أسبابه خير على خير ، أما سقطوهم شحقه هالعداوة ؟!

تحياتي ، وترى محتاجين مسجاتك هاليومين :)

Free Spirit said...

I already made up my mind to vote for Mhmd Al-jasem (althu i dont agree on everything he believes in) but I do on the basics and I know he is honest and strong and has a history of free will and honest word. Now i may vote for Ahmd Al-Dyeen only if he will support Al-Jasem in the parliman. I still have 2 votes 2 go! i wanted to choose a woman but in our circle we dont have good names. So i thought of Haytham only cuz he is young and motivated (& handsome :P) so honestly i do like your approach, its sincere and clear of any bias: i dont know the man (haytham), how strongly do you recommend him ?? do u beleive he is not driven by any family desires ??

Mishari said...

اوى مرحبا فيكم جميعا واعذروني لانشغالي الحاد ما قدرت ارد من زمان على التعليقات
ولكن

فتي الجبل
لا نأخذ الافكار انها تأسلم ولا ندخل بالنوايا
ولكن برأيي الشخصي السلف لا يستحقون لقب تأسلم لأن مبادئهم واضحة جدا


ButterFlier : جمعان بنظري يظل أفضل العناصر اللى كسبتهم الحركة الدستورية

ام الحفيز : حاضر وانا معاكم واول واحد خلونا نتفق على لستة فيها مرشحين نعتقد أنهم أكفاء ونعطيهم الاولوية في المدونات شرايج ؟

Mishari said...

Enter-Q8 : الله يسمع منك وفعلا جمعان افضلهم
ولكن الدويلة يا معود صدام مو الدويلة
يخوف هذا مهاوجي وخر عنه :))

ش kila ma6goog : الله يهداك يا بوسلمي يا وحش الشاشة
اولا ويع
ثاني شي مليق
ثالث شى مواقفه اهو وناصر الصانع خصووصا سخيفة واهم اللى عافسين الدنيا

Dr. Orange : هالشى ما ادخل فيه ولكن اتفق معاك الديرة فيها شرفاء وايد ولكن للاسف الاعلام مسلط على الدمبكجية

Mishari said...

فريج سعود : جمال الكندري بالاولي وضعه حوووووووووووووسة خل يفج نفسه من اللى اهو فيه

ShamiYa_RockS الله يسامحج :) بس صدقيني انا ما ادعم هيثم ولكن انا قصدت انه لفت النظر فقط ولكن طرحه متواضع بالنسبة حق الباجي وخصوصا دائرته اللى فيها ناس بلايا
انا ادعم احمد المليفي
والباجي ما اقولهم سر :)

White Wings : لا أبدا يا صديقتي العزيزة مو احلام يقظة ولكن ارقامهم في تناقص حاد

Mishari said...

The Voice Within شلون ما يصوتون له وكلهم عيال عمه وراح يضبطهم اذا وصل ؟؟ ؟؟؟؟؟؟؟؟؟؟؟؟؟


tweety : انتي اللى ويا راسج ماكو مواضيع يديدة كلش لى الحين موضوعج القديم :) منو بتصوتين له ؟
اقصد صوتج الانتخابي مو تصرخين كالعادة :p

حياتي هدف مو عبث : يس :)

Mishari said...

الطارق : اولا انت حبيب وصدقني علشانك ما احب اكتب عن حدس ولكن اضطريت هالمرة :)
ثاني شي ميخالف يا اخي نبي تغيير اهو 15 سنة وقاعدين
خل ايي غيرهم :))

Free Spirit : اول اثنين ما عليهم خلاف وما اختلفنا اوكي؟
بس هيثم ما قدر يسوي
Presentation صح حق نفسه
اعتمد بشكل كبير على اهله واستخدم الصراخ
ولما قلت لفت الانظار كنت اقصد الحضور الاعلامي القوي اتمناله التوفيق ولكن مع تغيير الصراخ
recommandation لا :) ما افضله

سدرة العشـــاق said...

الله يوفق الأصلح و اللي حاط مصلحة الكويت جدام عيونه

ام الحفيز said...

مشاري

خلونا نتفق على لستة فيها مرشحين نعتقد أنهم أكفاء ونعطيهم الاولوية في المدونات شرايج ؟

الصراحه خوووووش رأي ....وانت اسمالله عليك تطلع طلعات عجيبه الله لا يحرمنا

بس على شرط بسم الله وبامان الله يكون التنقيح لمصلحت الغاليه الكويت مو ارصدت المنقحين ولا احزابهم

وانا معاك قلباً وقالباً وان شاء الله كل الخييييييريين من اهل هالارض الطيبه

عتيج الصوف said...

هيثم الشايع...و نواب قيقزستان وايد راح يقدمون المفيد و الجديد لعملية الديمقراطية في الكويت و خاصة بعد تناولهم قواطي النخي و الباجيلا في الديوانية


و صالح الملا لمن لا يعرفه من قريب يجهل روح الشباب الموقدة فيه و إصراره على التحدي دون المجاملة او التزييف


اما سالفة اعضاء حدس يا عزيزي اتفق معك إلى حد ما في تمنياتك

و الله يكتب لنا الخير في هذه الإنتخابات

على طاري الإعلان ب500 دينار...خوش مشروع اذا فعلا حصل قولي عشان نتفق على الأسعار و ما ناكل رزق بعض :P

PearL said...

بصراحة يا مشاري
انا ودي كل اللي كانوا بالمجلس اللي قبل
يسقطون

ما ودي ولا أحد يفوووز


نبي دماء جديدة بالمجلس
نبي ناس تفهم


وبصراحة انا من المؤيدين وبشده للمرشح هيثم الشايع

واتمنى له الفوز

Anonymous said...

بالنسبة لهيثم الشايع كنت رايحة ندوته الافتتاحية وكلي أمل (كونه من عايلة تشارك بالاقتصاد الكويتي بقوة)إنه يكون شريك و داعم قوي للتنمية لكن بس سمعته هونت...يبيله إعداد قوي بعده مو مهيأ إنه يكون في موقع التشريع (النية في الاصلاح بروحها ما تكفي)ياما نواب دخلوا بنية التغير و آخر شي أهمه ويا الكرسي واحد وبعدين طريقته ذكرتني بأيام الجامعة ...بالقوائم الطلابية و صراخهم ، بصراحة كلش كلش ما أقنعني