الطموح و العمل والمثابرة والالتزام وقليل من المشاغبة تكون الحياة ناجحة

Friday, July 04, 2008


علشان نوخر شوي عن السياسة كان حوار مفتعل مع أمريكي ونشوف شلون يتعامولون مع حريمهم


بو خالد : شلونك جون
لامريكي : تمام بو خالد انت شلونك
بوخالد : انا تمام بس ابي اسألك جم سؤال عنكم لان يقولون انتوا عندكم الحرية ومساواة المرأة مع الرجل فا ودي اسوي مقارنة بينكم وبينا

الامريكي : اوكى اوكى اسأل خوش موضوع

بو خالد: تودي تبدل دهن سيارة مرتك ؟

الامريكي : وااات ليش ؟

بو خالد : يعني انت ما تودي سيارة مرتك؟

الامريكي : اكيد لا اهيا توديها واهيا تصب بنزين فيها بعد

بو خالد : انزين انت تدفع مصروف الجمعية والبيت ؟

ا حبيبي شنو هاللعب؟ اهيا نص وانا نص واغراضي الشخصية انا اشتريها واغراضها الشخصية اهيا تشتريها

بو خالد: انزين بيني وبينك جون تحط بيدها جذي جنة مو لك ما 300 او 500 دينار بين فترة وفترة كهدية بسيطة

جون : ار يووو كريزي بو خالد انت تتكلم عن الف دولار او الف وخمسمائة دولار ؟ مينوون لا يا حبيبي هدية ممكن انا اسويلها شى بايدي بسيط وخلاص
أو أي شى بسيط


الامريكي :الحين كل اللى سألتني عنه أنتوا تسونه تسونه

بوخالد: اي جون يمكن السالفة الاخيرة مالت الهدية اخليها على الظروف


الامريكي : وبعد كل هذا تبي الحريم يطلبون أكثر ؟


بوخالد : مشكور علشان افتك من الحنة واعرف ارد على النسرة

أخر خبر


سعودية تحرق سيارة زوجها بعد زواجه بأخرى


حرقت امرأة سعودية سيارة زوجها بعد أن اقترن بأخرى، فرد عليها بتطليقها، بحسب ما ذكر تقرير إخباري الأربعاء.وقالت صحيفة عكاظ إن الزوجة الغاضبة اعترفت بفعلتها واستدعت ذويها الذين حاولوا إصلاح الأمر غير أن الزوج رفض كافة عروض الصلح ، ومن بينها شراء سيارة جديدة، وقرر تطليق زوجته ردا على حرقها لسيارته.وأوضحت الصحيفة أن الزوجة أصيبت بانهيار عصبي عندما علمت باقتران زوجها بأخرى وطلبت من ذويها الحضور لاصطحابها من منزل الزوجية وقبل وصولهم تسللت خفية إلى حيث تقف سيارة زوجها (45 عاما) الجديدة، التي زف بها عروسه الثانية لتسكب عليها جالونا من الوقود وتضرم النار فيها.واستعان الزوج بالجيران لإخماد الحريق، ثم أبلغ الشرطة بالحادث.


ومن الحب ما حرق باي باي سوبر فولكن




20 comments:

حياتي هدف مو عبث said...

لو حارقته اهوا أحسن

:p
















أتغشمر

Shaima'a Alkandari said...

@@

يمه شهالحرمه

الثانيه شعليها خل تحرق ريلها


وخوش مقارنه ياخوي عاد تدرى ترى الامريكان فيهم شي حلو اللى اهو البساطه بكل شي
مو احنا
لازم تخب عمرك وتفنتك وتيييي وتحط وتسوي عشان تكون خوش ريال


يبه ترى بنظرى الحياه الزوجيه لازم يكون فيها تعاون من الاثنين

someone_q8 said...

السلام عليكم
اخوي مشاري , صدقني لو اتسوي الف حوار ومقارنه بين حرية المرأة في امريكا و اورربا وبين الدول الاسلامية بشكل عام , راح تلقى ان المرأة المسلكة بشكل عام اتصير ملكة على المرأة في الدول الاخرى
لان الدين الاسلامي عز المرأة و حط لها مكانه اجتماعية وصان حقوقها اكثر من اي مكان في العالم , لكن وين اللي يحاول ان يقرأ حقوق المرأة في هذا الدين العظيم ؟؟
خلها على الله اخوي المشري

وبالنسبة للي احرقت سيارة زوجها , انا ما الومها وهالشيء من حرتها والنار اللي شب بقلبها فحولت هالنار الى حقيقة :)))
لكن عاد الزوج ما عنده سالفة يبون يشترون له سيارة يديدة وما يبي بعد ؟ عن الدلع :)
قول اهيه زلقه بطيحه :))
حبيب يالمشري قواك الله على هالمواضيع الطيبة

Sn3a said...

ويه ماعندها سالفه
تطلع من بيتها عشان وحده غريبه
انا لو منها اقعد
واسوي اللي ابيه وبالوقت اللي ابيه هذا اللي ناقص بعد اهد بيتي عشان وحده تاخذ البيت والريل بارده مبرده


بس تدري
احنا نتكلم
بس وقت الصجيه مايندرا شيصير

why me said...

لو انا من هالسعوديه




احرقه



حدي مجرمه انا

:)

Super Woman said...

شوف اخوي مشاري


حريمنا احسن حريم بالعالم
ورياييلنا احسن رياييل بالعالم

:)


واحنا احسن ناس بالعالم لوول


استانست ؟؟

لوول

Anonymous said...

لوووول

الحمدلله على العافية
والله حياة الأجانب كلش
الحمدلله ياربي

و الله يخلي ريايلنا و حريمنا لبعضهم يارب

و صج مثل ما قالت شيماء، الحياة تعاون بين الاثنين و يا حلاته من تعاون

الي حرقت سيارة زوجها عورت قلبي، شكلها صج محترقة :((

ButterFlier said...

قوي جون

الزين said...

شوف مشاري

انت تحتاج تعيد الأسئلة مرة ثانية بس صج هالمرة مو بالخيال

وشوف اجاباتهم

وحمدوا ربكم على النعمة

ترى النعمة زواله

Kuw_Son said...

إخص على هيك حريم !!
يبه كيفه الريال .. ان شاء الله يتزوج 10 .. انتي شكو ؟

هههههههه

mellow said...

300 ،500،1000 دينار
عليها بألف و ستمية عافية الكويتية تستاهل :)

أما سالفة إلي حرقت سيارة ريلها فآنا رايي من راي سنعة

Lonsome said...

بس جون لي شاف مرته اول ما يدش البيت يعطيها ذيج الابتسامه اللي من هالشق لي هالشق
و بوخالد من يدش فريج البيت يعقد النونه

جون لي تضايق و الا استانس راح قعد ويا مرته و سولف لها اهيه و لي سولفت جابلها و سمعها

بوخالد لي تضايق صرخ عليها صرخه تقعد الميت من نومته
و لي استانس راح حق ربعه

جون لي مرضت مرته قعد يمها طول الليل

بو خالد لي مرضت يتأفف 24 ساعه من كحتها و اهمالها نفسها

جون لي يابوا ياهل تناوبوا على رعايته

بو خالد قالها ذلفي انتي وولدج برا خلوني انام وراي دوام هذا و اهوه ساري الساعه 1 من دوانيته

وييييه ما نخلص لو نعدد ما نخلص

في وايد اشياء اكبر و اهم من بانزين سيارة الهندي يروح يبدله
و الا فلوس لا تسمن و لا تغني

فتى الجبل said...

والله لو حارقته اهوا وياها احسن
وتاخذ السيارة تبيعها

لؤلؤة said...

بوست حلو يا مشاري ..يعطيك العافية
:)

ام الحفيز said...

ويـــــه احرقت سيارته!! هالخبله صج انها سنعلس ودرايهلس بالريايل ؟؟الحين انتي حرقتي سيارته...وشيبي يسوي هو؟ اكيد بيعوض حرمته اليديده بسياره ثانيه اثمن واحلى واغلى من الي حرقتيها...وهو في ذلك حرق قلبج وافاااادج وفقع مرارتج ورفع ضغطج والسكري ويابلج القلب وخلاج تصفقين كف بكف..انا بعرف شنو استفدتي الحين؟لا من ريل والعيال كسفتي مستقبلهم وحتى لو الله ياخذ امانته مالج شي بالورث ليش انج مطلقه يعني بالعربي الفصيح وعوووووووووووووو على تدبيرج...وطلعتي من المولد بليا حمص او نخي
صج الي قالوا اهل العقل براااااااااااااحه

Eng_Q8 said...

ايي بعينهم عاد

فريج سعود said...

غلطانه فجري نفسج فيهم احسن
الحمدلله والشكر

tweety said...

زين سوت فيه حرقت سيارته بعد عين قوية مرة يديدة وسيارة مايصير !

عاد الحين خليت الامريكي كلش تراه يعرف ويحترم مسئوليات الزواج أكثر من العربي والمسلم
ماعنده مشكلة يجابل اليهال ويسهر عليهم ويغير حفاظاتهم بعد
يساعد بشغل البيت من غسل اماعين وطباخ وخمام بدون تحلطم
في وقت فراغه يجابل الحديقة ويقص الزرع
اهو يودي وييب اليهال من المدارس
مايتنقع بالدواوين ويحترم مرته ويسمعها كلام حلو
لا تاخذون اللي تبيه من الاجانب واتخلي الباجي خلك موضوعي بالمقارنة
عاد انتوا رياييل الكويت تحمدون ربكم على حريم الكويت ما تحصلون احد يتحملكم كثرهم

ذات عقل خشبيّ said...

لووووووول


ضحّكني الحوار " المفتعل "



تدري عـااد والله لو إنّك يايلي قبل سنة وقايلي هالحجي ، جان عصّبت من قمّة راسي ...

بس حضرت في شهر مارس اللي طاف مؤتمر في دبي

للمرأة حول العالم ...

وكان الحضور فيه 70% أجانب وغالباً أمريكيات ...

واعتماداً على ذلك بالطبع كان أغلب الشخصيات المهمّة الحاظرة أمريكية ...

وتحدّثت صحفيّة أمريكيّة مخضرمة ...


عن حريّة المرأة الأمريكيّة والهوايل اللي واجهتها عشـان تُثبت جدارتها ...

شي والله العظيم ما يخطر ببال أي إنسان لما يتكلّم عن أمريكا ...

وطبعاً حوارها خلانا نفتح أحاديث جانبيّة عن حياة المرأة العربيّة والمشاكل الي تواجهها وفي المقابل المرأة الأمريكية والمشاكل اللي تواجهها !

وأهم شي تعلمته من هالمؤتمر

إن أفلام هوليود جذب×جذب !

وبتاتاً ما تعكس الحال في أمريكا !

واللي دافعوا عن جون ...

لو يسمعو كلام الدكتورة المتخصصة في علم الاجتماع ما قالوا ربع اللي قالوه ....!

أما عن المجتمع الكويتي ...

فأنا أشـوف إن لا كل الحريم خوش حريم ولا كل الرياييل خوش رياييل !


في كل مجتمع بالعالم في الشين وفيه الزين ...

ومدامنا ما نقرا دراسات موثّقة عن مجتمع ما ، بالطبع لازم ما نتحجى فيه ...

لأن عمرها فكرة الإعلام ما تكون كافية !


-=-=-

أما عن السعوديّة ، فلا تعليق ..


أعتذر جداً جداً على الإطالة ...

شكراً على البوست الجميل ...

lawyer said...

وين القوامه
وين الصرف
وين الشررررع

هذا الشرع يقول انك تصرف عليها و تصرف على بيتك و تحط خدم و تدلل

رفقا بالقوارير
خيركم خيركم لأهله

الي يحط مو شين
وال يعطي اهل بيييته مو شييييييين

بس لا يتمنووووووووون الرياااااايل لان التمنن عيب

الامريكي يغسل الهدوم
يوديهم اللوندري
الامريكي يطبخ

الامريكي يغسل الحمام

الامريكي ماكو اهلي و زواره اهلي

الامريكي مجابلها ليل و نهار ماكو دوانيه و عمات عين




اما على هالي حرقت السياره

كلش ما تبررررررد القلب

احرقه اهو بكبره
هههههههههههههههه