الطموح و العمل والمثابرة والالتزام وقليل من المشاغبة تكون الحياة ناجحة

Sunday, November 09, 2008

الله يرحمك يا عبدالله السالم


في القبس عدد اليوم 9/11/2008
نشرت هذه الصورة
وكنت قد رأيتها في أحد المدونات في فترة سابقة
ولكن لم أشاهد جانبي التمثال
اليوم في القبس وأنا أشاهد هذه الصورة وهي في صفحة 22
شدتني الزخرفة الموجودة على جنب
وكبرتها وقعدت اشوف شنو موجود ؟
لقيت
عسكري
عامل
طبيب
طالب
طالبة
النقوش في أي حضارة تعبر عن اهتمامات المجتمع
يعني لما نشوف الحضارة المصرية مثلا نلقي كتاباتهم الهيروغليفية تتكلم عن حياة طبيب
وصفة تحنيط
كيفية صناعة مادة معينة
الكويت لم يكن لها هذا النصيب من التاريخ الطويل
ولكن في فترة الحداثة كان هذا اهتمامها
التعليم
الصناعة
الحياة العلمية
لذلك كان المجتمع نظيف
تخيلت أن لو نفس الكرسي اليوم يصنع ؟
شنو راح تكون الرسوم اللي على جنب؟
وأترك الخيال لكم




34 comments:

Mohammad Al-Yousifi said...

رائع رائع

الله يرحمه

Barrak said...

اللحين

راح يرسمون صورة ديوانيه وواحد رافع عقاله

White Wings said...

هذا التمثال ملقى باهمال في احدى ساحات الجرائد، صح؟
أتذكر اني رأيته هناك

لن تكون هناك نقوش ولا تماثيل في وقتنا هذا، كله حرام
:)

Zaydoun said...

أصلاً بيقولون لك التماثيل حرام وينتهي الموضوع... وهالمرة تمثال حق عبدالله السالم؟ اغسل ايدك

Funny Q8i said...

الحين ممكن تشوف واحد سبايكي وماسك الموبايل

ووحده ام حجاب منتفخ والرقبه طالعه وجينز ضيج

وواحد عقاله مفتوح ورافع ايدينه، إيد فيها اوراق، وإيد فيها خمطه فلوس

وواحد جيكر قاعد عالانترنت يكتب هالحجي ;p

Tوتحيّا

ملاحظة: اي انا الجيكر :D

Manal said...

فعلا

الله يرحمه

كويــتي لايــعه كبــده said...

الله يرحم شيخ الشيوخ ألف مرة

اما الصور على الكرسي اليوم...

شعارات البنوك
لوجو الخرافي
والخلفية علامات الدولار
$$$$$$$$$$$$$

bo bader said...

لو الحين تلاقي فداوي !!

وواحد من منظمي مسابقة مزاين الإبل !!

ورياضي يشبه البيدان أو خالد سريع !!

ووكيل مساعد بوزارة مجلس الأمة - وعمره ما داوم !!

وانت رايح ...

تحياتي

Hamad Alderbas said...

اتفق مع بو بدر

ام الحفيز said...

هذا التمثال موجود في مقر جريدة الراي العام المساعيد الله يرحمه
وامس شفت مقاله تهبل في مجلة ذوق عن النحات الكويتي اللي مسويه سامي محمد
يالله من فضلك ...صج اللي قالوا مواهب مدفونه....احنا لو الله يفكنا من امهات الالحا جان احنا بخير
ما نقول الا يعييييييين اللله

MakintoshQ8 said...

يحطون صوره عضو راكب سيكل بمزرعه
او عضو ماسك صقر ويقول ابي صوري بعدين

الله يرحمه

Yang said...

الله يرحمه

Faisal said...

الله يرحمك ياعبدالله السالم

لو حاطين تراث ونقوش سنعه

على الاقل رسمة بوم ولا وحده تودع ولدها بالدشه
لو حاطين رسمة فريج

يمكن قصده في عهده بدت النهضه ومسيرة التعليم والعمل ؟

تشكر الغالي

honey said...

رحمة الله عليه

لة ألحين إسوونه ينقشون كرسي ثاني و اتناجرون منو يقعد فيه


بالمطعم نبي كرسي قصب بالزحمة

يالصيف نبي كرسي قصب بالطيارة اللي كل واحد حاجز الف حجز
بالمدرسة نبي كرسي كلهم مكسرين
بالمجلس اتذابحون يبون كرسي

احنا طموحنا الكرسي و ننقش كرشي يمثل اهم شي في حضارتنا هذا غذا تسمى بحضارة

الحارث بن همّام said...

التمثال هذا وين موجود؟

kuwaitawy said...

الله يرحمه

أبو لطيف said...

رحمه الله واحسن مثواه

كان ومازال وسيبقى عظيما هذا الرجل

JiBLa CiTY said...

لاتقولون اهل اللحى ما اهل اللحى

التماثيل محرمة شرعا ولا لا؟

.

الرجل رحمة الله عليه بنى تاريخ الدولة

وكل من يقدم الخير يلقى الجزاء من ربه ان شاء الله

هل من متعظ؟

حياتي هدف مو عبث said...

احس انه شي يفشل ومضحك

بس شنو بالضبط مادري


والله يرحمه

Fahad Al Askr said...

أظن أحمد الفهد وصورة الدينار

صلاح الأنصاري said...

أجمل لقب مسعته من كبار السن أطلق عليه يرحمه الله هو

عمر بن عبالعزيز الكويت


ارسلت على ايميلك اخوي مشاري صور للتمثال نقلا عن موقع الفنان سامي

شكرا على الملاحظة القيمة...يستاهل والله التنويه فيه دوم
الله يرحمه

Kuwait said...

بتلاقي على التمثال صورة أعضاء المجلس والوزرا كل واحد متمسك بكرسيه غصب :p

enter-q8 said...

صورة مزارع الوفرة و العبدلي
طبعا باللي قاعدين فيها

صبا said...

الف رحمه تنزل عليه

والله المفروض هالتمثال ينحط داخل قاعة المجلس المسمي باسمه

علشان يحترمون نفسهم هالاعضاء ويخدمون الكويت صح

صج هيبه الله يرحمه

. . . ساخر كويتي said...

انا اقولك شنو بيكون مرسوووم

هممم


حرامي ...استجواب ... واحد يصارخ بمجلس الامة ... دكاترة مهاجرة...تطفيش للصناعة.... ظاهرة سلبية خخخخ

اي صح وبتلاقي كل 4 اشخاص واقفين صوب ==> يعني طائفية هههه

اعذرني انااليوم فاصل من الصبح

تحياتي

JooJ o MaJooJ said...

مجلس الأمة او فلووس إتطير فوق المجلس
جووج

Dasman Palace Girl said...

رحمة الله عليه

شخصيه فريده من نوعها .. باقيه بالذاكره بلا شك



تسلم اخ مشاري ع الصوره :-)

molok said...

مااعتقد ان راح يكون عليه اي شي سوا اثنين مجابلين بعض وكل واحد رافع عقاله وقاعد يصارخ على الثاني ..

يبقى السؤال هالتمثال وين محطوط ؟

Shaima'a Alkandari said...

الله يرحمه ويغمد روحه الجنه ويرحم جميع موتى المسلمين والمسلمات

مادرى بس اتوقع انك بتلاقي ربطة فلوس وصورة الشخص اللى قاعد على الكرسي لانهم يحبون يلصقون بالكرسي ومايقومون

بنت أحمد said...

أصلاً بيقولون لك التماثيل حرام وينتهي الموضوع... وهالمرة تمثال حق عبدالله السالم؟ اغسل ايدك

<<<<< عجبني هالتعليق ضحكني

وأنا أوافقه الرأي

خطييييييييييييير الموضوع يامشاري

وإذا كلش تدخلت الواسطات ووافقوا بيسوون لك وردتين وفيهم خطين وبيقولون لك زخرفة

يعطيك العافية

ولد الديرة said...

الله يرحمه بدون تماثيل

لو ولا بد

ممكن على جنب التمثال نقشة لدميثير لو سمحت

Anonymous said...

هذا الرسام العالمي
سامي محمد الشباب
واحد من اهلي
http://www.sami-art.ae/
هذا موقعه
QU..

Bader Alhejailan said...

هذا التمثال من عمل الفنان الكويتي سامي محمد وهو من أوائل النحاتين المبدعين في الكويت

في عددها الأخير، مجلة ذوق تقدم الفنان سامي محمد في مقابلة حصرية وشاملة عن أعماله وبداياته

إمـرأة لا تُنسـى said...

الله يرحمك يا شيخنا
والله كنت اتمنى اني اكون في جيل لاحق عليه

اتوقع يرسمون على طرف الكرسي فلوس