من القصائد الجميلة التي سمعتها من الشاعر مبارك بن شافي وبما أني قاطع فحبيت أهديكم هالابيات الجميلة

ياجاهل أسرار نفسي فسر أبياتي

وتشوف بين الحروف أسرار تكويني

شف لمحة الحزن شف لوعة معاناتي

شف هزة الوجد رجت مركب سنيني

تاخذني الذكريات لبعض وقفاتي

وأعيش حلم على الماضي يبكيني

حلم الطفوله وحلم أيام فرحاتي

يوم اني اليا طلبت الوقت يعطيني

يوم العصافير كانت كل غاياتي

كنها على غصنها المايل تناجيني

والشمس كانت رفيقة صبح جولاتي

ماغيرها في ملذاتي يخاويني

أسير وأرسم على الجدران لوحاتي

باق على بعضها رسمي وتلويني

وان ظلم الليل قمت أروي حكاياتي

للنجم وأسمع صدى صوته يحاكيني

كنت أملك الأرض وأملاها بضحكاتي

وأكبر والأيام للمجهول ترميني

لين الثلاثين دقت باب لحظاتي

طويت الأيام واثر العمر يطويني

جيت الثلاثين وازدادت طموحاتي

وتغيرت نظرتي عن كل مافيني

خليت مع كبر سني بعض عاداتي

الا جموح الصبا عيا يخليني

والطفل في داخلي متمرد عاتي

ماهو براض معي يوصل ثلاثيني

يامركب العمر لاتخلف محطاتي

متى على الموقف البين ترسيني

عجزت أسافر على موجة خيالاتي

أبغي وطن والليالي ضد توطيني

ماخفت لاالشيب يرعى من زهر ذاتي

صيور شيب وطى الباقين واطيني

والموت ماخفت لايهدم ملذاتي

لابد الأيام مهما عشت تفنيني

أخاف لاموت ماحققت رغباتي

والا يموت الطموح اللي يغذيني

وتضيع في زحمة الدنيا سجلاتي

والمجد ماتسعفه ذكرى عناويني

راحت ثلاثين واللي راح ماياتي

ياالله على الجاي من عمري تقويني

من أجمل ألابيات اللى سمعتها للشاعر مبارك بن شافي