الطموح و العمل والمثابرة والالتزام وقليل من المشاغبة تكون الحياة ناجحة

Sunday, February 26, 2006

حب الالكتروني

هل ممكن ان الواحد يحب الكترونيا ما ادرى سؤال صعب ؟ بس اسمع قصص وروايات تصير عن طريج النت كل واحد يسأل نفسه جم ساعة يقعد بالمسانجر او الجات عموما وكل واحد جم شخص عنده مفضل او ان ينطره او ما يرضى يزعله ويكون عنده غير عن الباجى
انا بنظرى ان هذى شغله يديدة ومشاعرمكبوتة من الطرفين والكل بالاصح يدور عن الحب يمكن عندنا مشكلة جكر من صوب الشباب ومن صوب البنات وعدم حب الظهور من البعض يمكن ؟
ويمكن يكون عندنا عواطف مكبوته من الصوبين وكل واحد يخاف يتكلم بمشاعره بالعلن وتكون عنده شخصيتين؟ يمكن؟
فى ناس يقعدون مع بالساعات مع بعض ويسولفون ويحسون ان كانهم جد يحبون بعض ويحسون ان فى مشاعر متبادلة عن طريج الجات بس شنو اللى صاير عندنا هم ما ادرى
وايد اشياء مانى لاقى لها اجوبة وعلى هالطارى يسولفلى واحد يقول تعرفت على وحدة من النت باخر التسعينات وكلمتها يقول انا ادرى انى مو حلو ومقتنع بس اهيا كل تقولى دزلى صورتك باشوف منو احلى يقول بعد شهر دزلها الصورة وقامت تتشمت وحاطته بزاوية وضغاط ويقولها انا قتلج انا مو حلو المهم قلها انزين خل اشوفج ردت عليه ام السعف لا ما انصحك لان راح تتعلق فينى
الولد بقلبه قال هذى واثقة من نفسها وايد خل اهوس واشوف حاول فيها منى مناك لى ما واعدها ؟؟؟
وكان الموعد والاخ حاط تاخرتى (شخبارى ) المهم صفطت واهو يدور وين البنت ؟ اتصلت فيه قالتله وينك قالها انا صافط انتى وينج قالتله انزل من سيارتك تلقانى صافطه بالمكان الفلانى
الولد نزل شنو شاف بالضبط بالضبط بالضبط زكية زكريا بس على اللون الخاكى وقال الحين لازم اطلع الحرة
نزلى الدريشة ونزلتها قالها الحين شهر وانتى ملوعة جبدى والحين طلعت بهالشكل يا بنت ابليس
انتهت القصة
النت مكان حلو وشيق والكلام فيه مو طبيعى وناس تنطر ناس وناس تدز ايملات حق ناس اذا فقدتهم بس هل المشاعر حقيقية ام مجرد تفريغ شحن عاطفى موجود
اللى كاتبه مجرد تساؤولات وما ادرى شنو حقيقة هالشى
وسلموملى على يهوهو ولا يتحرك يسوى شى

10 comments:

lawyer said...

موضوعك واقعي
بسسسسس اكيد الجواب عندك انت من النااااس الي تدخل شات و تسولف و تعرف ناس
فلازم انت تجاوب على سؤالك اول..

غريبه هي مواضيعك دايما تتكلم عن مشاكل عند شبابنا و هالمشاكل او ما تكون عندك انت
..
فانت جاوب على سؤالك ...

وعلى طاري الجكر في النت
صصصصصج مساكين البنات ....
الي تنصدم في واحد جيكر او يصدمها جيكر
انا اعتقد اهي بدت قلعتها..
اهم شي الواحد ما يجرح الثاني ..

Яeema said...

أول ما عرفت النت كان من 95
طريقة آمنة للتعارف و الكلام
وكنت أحب الأجانب إنني أتكلم معاهم
لأنهم يقدرون و يعرفون معني صداقة النت

لما تعرفت علي ربعنا الكويتيين
تغير المفهوم عندي فصار النت وسيلة للترقيم
و أيضا محصور للتعارف بين العزباوات و لعزوبية

بما إنني متزوجة فأنا غير مرغوب فيها
فلجأت للكذب و إخفاء حقيقة أمري لمدة 9 سنين

إدعاء المثالية بالنت شيء مضحك
لأن تصغيير الذنب لا يعطيك الحق لعملة
المشاعر واحدة في الانسان
من ترتاح له بالنت سوف ترتاح له بالصج

النت يولد نوع من أنواع الإدمان
وهو أنك تستطيع أن تحدد الشخصية اللي ودك إنك إتكون فيها بالصج

فلما تخرج من هذا العالم و تواجه المجتمع الحقيقى الذي يكشف حقيقة من أنت فإنك ترفضة و تفضل العالم الذي نسجته بنفسك

أما نحن البنات لما نجلس هنا
لأننا لا نستطيع التصريح بأفكارنا بدون رفض هذة الأفكاة من الذكور الموجودين لدينا سواء من أخ أو والد أو زوج

تحكمنا عادات و تقاليد يجب إحترامها

النت وسيلة تنفيس
للكلام و العواطف و التمرد

Unknown said...

اول شى لوير انا ما اعانى من مشكلة الجكر مع البنات لانى قبل لا اتزوج فى تكنيك استخدمه علشان انحاش من الجكر وبعدين صح كلامج الجكر من الصوبين مشكلة بس المشكلة وين تكون ان الولد لا طلع جيكر تنحل بس المشكلة ان البنت لاطلعت جيكرة وهولة يصير الموضوع يضحك
وبعدين من قالج انا ما طحت بجياكر بس ايام العزوبية مو الحين لان طحت واقف

ريما تقول : إدعاء المثالية بالنت شيء مضحك
لأن تصغيير الذنب لا يعطيك الحق لعملة
المشاعر واحدة في الانسان
من ترتاح له بالنت سوف ترتاح له بالصج
ماكو شى اسمه مثالية بنظرى كل انسان يسعى للافضل بس فيه فرق بين الشيطانة والقذارة يعنى ما يصير اقول اللى يزنى نفس اللى يكلم بنت وما يصير اقول اللى يبوق نفس اللى يغازل كلها اخطاء وحرام بس مثل ما اكو عقوبة حق شى اكو عقوبة حق شى ثانى
وادعاء المثالية والمحاولة فى عدم الوقوع باخطاء افضل من المجاهرة بمعصية والتفاخر فيها
لان الله يقول يا عبدى استر عليك بالليل وتجاهر بمعصيتك بالنهار بمعناه
وفى ناس الله يستر عليهم بالليل وايى يتكلم عن معاصيه واهو كله شاق الحلج واهو من داخل محروق

lawyer said...

الحمدلله ما طحت في جياكر بس اكيد انت من الناس الي تتكلم عنهم في بوستك من الي ضعيون وقتها في التعارف و لهم في الحب الاكتروني
و الا جان شمقعدك و اشعرفك في كل هذاااااااااااااااا
عرفت اشلون

Unknown said...

ما شاء الله فطيييييييييييييييينة بس ودى اقولج شى جان زين تحطين تعليق عن الموضوع احسن ويفيد اى احد يبى يقراه واذا ما عندج تعليق ماله داعى تكتبين اشياء ما تتعلق بالموجود وتعبين نفسج
والا بس تبين تكتبين اى شى والسلام

Яeema said...

eshfekom ettahaweshon el7emdilla welshekeer :/

Unknown said...

خوش تعليق نادية الصراحة وصج فى بنات ورياييل وايد يحاولون يطلعون الشخصية الثانية بالنت يمكن يبى يفرغ اللى فيه من احباط من المجتمع الواقعى وتكوين الصداقة بين الرجل والمرأة بهدف الكلام وتبادل المعلومات والكل يستفيد سواء الرجل او المرأة وصدقينى على قولة ولد الديرة كلجن حلوات بس يظل الويه اخر شئ يفكر فيه اى انسان عاقل سواء المرأة او الريال
وشكرا مرة ثانية

lawyer said...

تعليقي الظاهر ياك في الصميم
لان مو معقوله واحد اديب مثلم يتكلم عن مشكله في المجتمع و اهي فيه
اي و المثل يقول
الي على راسه البطحه

Unknown said...

:) مشكلة اللى ما يعرفون يسكتون اى صميم انتى وحدة من ثنتين يا حولة يا ما تعرفين تقرين والثالثة لج من عندى الظاهر لما تكتبين ايدج اللى تكتب مو مخج
وقلنا تعليقات شخصية مالها داعى

Яeema said...

hahahahahahahaha
إنتو لما ألحين تتهاوشون