الطموح و العمل والمثابرة والالتزام وقليل من المشاغبة تكون الحياة ناجحة

Saturday, April 22, 2006

اه من بطنى واه من ظهرى


نمر بهالايام باحداث داخلية وخارجية سياسية جدا حرجة فى الوقت اللى فيه ايران فى مواجهة حاده مع امريكا نقف احنا كالشخص المسطول اللى فى النص لا طايل سمى ولا ارض ولا نعرف نرضى منو
ايران دولة كبيرة وعظمى ولا يقول خلاف هالشى لا يفقه ربع السياسى شئ لانها دولة قائمة على ايدولوجية دينية من الصعب تفكيكها بالاضافة الى وجود عناصر علميه مميزة لا يمكن الاستهانة فيها ومن الجانب الاخر الولايات المتحدة اكبر دولة فى العالم عسكريا واقتصاديا ولا يمكن مجابهتها واحنا كدول خليجية واقفين بالنص شنو الحل اذا كان موقفنا نفس موقفنا مع العراق قبل الغزو راح نتأثر جدا باللى يصير من قبل امريكا لان بكل بساطة راح تتخلى عنا واحنا بحاجة لها كدولة تمر بمنعطف سياسى سخيف جدا ولا يحسد عليه
واذا وقفنا مع امريكا ضد ايران راح تكون علينا اللعنة بس هالمرة مو نفس المرة اللى طافت شوية تفجيرات وخلاص
لايزعلون منى الاخوان الشيعة بس مثل ما في ناس متعصبين من السنة وما عندهم وطنية للكويت نفس الشى فى شيعة ما عندهم ولاء حق الكويت وولائهم يرجع حق ايران والدليل وجود نواب مجلس امة فى فترة سابقة قريبة كانوا يعقدون اجتماعتهم فى السفارة الايرانية والله يستر

الوضع الداخلى سئ والسبب بسيط لعدم وجود اشخاص يمكنهم ادارة الكويت وعدم اهلية الموجود من مستوى سياسى او خبرة بالامور السياسية واعتقادهم ان الوضع الداخلى بس يمشى باللف والدواران والتزوير ورش الفلوس على نواب ذممهم وسيعة
رأس الحكم هو اخر شيخ من الشيوخ اللى الناس فتحت عينها عليهم وشنو ذنب المجتمع بعد خمس سنوات ان يعيش موت سياسى واجتماعى وانقلاب حق الوضع بدون محاولة للاصلاح لان اللى الحين نعيشه هو ترهل حاد فى وضعنا
الناس ملت من ضعف اجتماعى وضعف اقتصادى وضعف سياسى والاسباب عند الناس مجهولة وكل طرف يرمى على الطرف الاخر
الكويت عطت الكثير خلونا نتعب علشانها وخلونا نضحى لو شوى علشان باجر عيالنا ما يلعنون اليوم اللى انولدوا فيه فى بلد اسمه الكويت
وسلمولى على اللى يهوهو ولا يتحرك يسوى شى

8 comments:

Яeema said...

والله يا أخ مشاري من بدت الأحزاب تحارب بالكويت و الوضع صار متردي

أتوقع اللي عندنا عطو اللي عندهم

البلد محتاجة أفكار جديدة

وصاحب قرار

neelaah said...

شوف يا مشاري
انا اعتقد انه اذا وقفنا مع امريكا
راح نخسر كثير لسبب واحد انه ضربتنا ماراح تكون فقط من الناس اللي داخل

بل ايضا ايران اعلنت بصراحة انها راح تضرب المتعاونين ، بمعنى راح نكون جزء من ارض المعركة، يعني لازم نرجع انسوي غرفة السلامة و كل شوي تصفر الصفارة و انتدابج بالغرفة

بس هالمرة ما راح تكون تهويشه من تهويشات صدام وصاروخ يطيح يم سوق شرق
الايرانيين بهالامور ما عندهم يمه رحميني


بالمقابل لو نوقف مع امريكا في سؤال مهم يطلع بالصورة ، امريكا ان ارادت ان تضرب ايران فأكيد راح تضرب المفاعل كهدف استراتيجي ، منو اللي يضمن عدم حدوث تسرب اشعاعي او نووي مثل اللي حصل في تشرنوبل مثلا
هذا طبعا خلاف السؤال اللي انت اثرته و هو انه امريكا را تتخلى عنا خصوصا و ان الامريكان الان يتبعون سياسه

If you'r not with us , you are against us


انا جدا متوترة و ما ادري شنو ممكن يكون التصرف الحكيم و الموزون اللي
لازم تنتهجه حكومة الكويت

اسفه علىلا الهذره

Qano3a said...

مساكم الله ب جميعا ...
وصلني ايميل قبل جم يوم يحكي عن تشابه الامور مع مسلسل كارتوني اسمه عدنان ولينا .. الايميل مسحته بس ودي تقرونه واللي عنده الايميل يحطه في بلوق او يطرشه حق مشاي .. شنو القصه ان بداية المسلسل يقول في عام 2008 يحل الدمار الشامل بالكون وووووو قصه طويله تتشابه تشابه واضح مع احداثنا هالايام ... هالمسلسل ايام الثمانينات .. ودي تشوف هالمفارقه اللي صج تقمت تتكلم عن الحرب النوويه والناس الميؤؤس من حالتهم .. والله يستر علينا وعلى كويتنا

Qano3a said...
This comment has been removed by a blog administrator.
ii said...

لهالدرجه ايران لها تأثير على الخليج والسعوديه!!
ما اتوقع

Unknown said...

sarah :الرجل بلا سياسة كالمرأة بدون تسوق:)
غشمرة بس انا من صغرى وانا احب السياسة ويمكن فترة الغزو عسى الله يعيدها علينا خلتنى احب اطلع اكثر واكثر على امو التاريخ السياسى فى الخليج

NOUF :المشكلة هذا المعلن الله يستر من الغير معلن
Яeema: الكويت لى الحين ما فيها احزاب معلنة وهذى مشكلة

neelah: والله يا اختى شقولج بس كلامج 100% وانتى ونيله يبلكم الظاهر قعدة نقاشية بس صج ايران لطقت عورت مو نفس صاحبنا صدام الجيش كان يبوق مكيفات
sugarfree :والله احنا يا شوكر حتى غرانددايزر ما راح يفجنا لا صارت الصجية

se3lwah :لو ايران تفكر بس بصاروخين واحد على الكويت والثانى على السعودية عز الله نص اهل الديريتين تلقينهم بمصر والوعد بسميراميس :))

Nora said...

الخطر ان ايران .. بايعتها

يعني علي و على اعدائي

قاعده تصعد القضية و تتحدى و حالتها حالة .. قوة فارغة بوقت ضايع


الوضع الداخلي .. نتحلطم و بس

هذا احنا .. و اخر شي " الهون ابرك ما يكون " و الحكومة ابخص


ترى .. الطيبة اللي فينا تحولت و تحورت الى كسل من ابداء رأي .. او رد فعل بسيط و سلمي

قرارات بايخة يمين و يسار ..اثنين ثلاثة بالدوانية يفتحون الموضوع

اربعة خمسة ستة .. يسخفون السالفة كلها لين يسكتون الي محترقة قلوبهم

الحريم .. يقطعونه نقاش .. غالبا اذا في فلوس بالموضوع .. بدلات علاوات

و بس .. كلام


نوابنا .. الله بالخير .. نفسي يا نفسي

او الانشغال بقضايا رأي عام مالها تأثير الا وقتي محدود بانتهاء الهالة الاعلامية


الله يسامحك انطلقت الحين انا شلون اسكت

اللي ابيه .. نشاط من الشباب الكويتي

ينسمع رأيهم و توجهاتهم

اي يمكن محد يسمع الا انا و انت

لكن على الاقل تحرك فعلي عملي .. ليش ماكو مظاهرات سلمية بالكويت ؟

البحرين من يصير شي عندهم .. تلاقي الشعب كله محدد موقفه .. بوسترز و واقفين

ما أدعو الى شغب .. او ثورات او انقلابات

لكن .. نخلي السلبية شوية .. و نعبر

هالميزة اظنتي موجودة بالكويت .. نتكلم محد يحاسبنا .. بس شوية يمكن

;)

ليش ما تتنظم العملية .. مجلس الامة ماله شغل اداة تشريعية

نبي هالخبراااااااا اللي بكل قضية فاهمين

نبي عيال الديرة اللي مثلك و شرواك

يسوووون شي

عيل .. 10 ملايين .. حق مراقد الائمة

ادري من شهوور بس لي الحين محترة

جان سووا بيت القرين مثلا

لا والحين اسقاط ديون العراق

انا اول ما فتحوا باب العلاقات بينا و بينهم

طرشت ايميل طوييييييييييييل

حق الشيخ صباح .. قلت له رأيي

ههههههههههههههههههههههههههههههه

رد علي مدير مكتبه .. رد جاهز

كلش ما طولت صح ؟

:)

من حلات الموضوع و اهميته اكيد

يسلم راعيه

Unknown said...

a7la eng:مشكورة على المشاركة واعتقد ان فى مظاهرات سلمية دايما تكون عند مجلس الامة ولكن انا ما اؤيدها لعدة اسباب ابسطها حرية الصحافة الموجودة عندنا