الملاقيــــــف

الملقوف : هو شخص يتدخل فى مواضيع لا تعنيه بصلة مما يرجع عليه بالاحراج

السالفة الاولى ( بوطلال بالمستوصف)1

انا كنت قاعد بمكتبى والا يتصل فينى صديقى بوطلال وهو شخص نكتة يقولى صار معاى هالموقف التالى قتله قول
يقول دشيت مستوصف منطقتنا وخذيت دور وقعدت يقول صارت عشر دقايق ربع ساعة لاعت جبدى يقول التفت على اللى يمى والا شكله شاب عمره ما بين الستة عشر والثمانية عشر وشكله مو كويتى ويقول منطقتنا لا يمكن يكون فيها واحد غير كويتى الا اذا ولد فلوس لغلاء اجارتها العالى جدا
يقول قتله تراهن اللى عند الدكتور مرة رد الولد باستغراب شدراك ؟ قاله يعنى انت شرايك دكتور مستوصف يقعد مع مريض فوق الربع ساعة تلقى استانس عليها وسوالف وضحك وعلى ابو ان حاطة السماعة وروح
الولد كان رده مؤدب قالها لا انت تدرى الحريم يعنى يشروحون بالتفصيل الممل وبوطلال يقاطعه لالا يبه اى تفصيل ممل تلقى سايح الدكتور داخل والولد يرقع
خمس دقايق وتطلع وحدة شمحوطة من غرفة الدكتور باول الاربعينيات وتلتفت على الولد اللى يم بوطلال وتقوله يالله ماما خلصنا
بوطلال طقته البوهه

والا طلعت ام الولد اللى قاعد يم بوطلال
وانا لما قالى السالفة صرت بنص هدومى


السالفة الثانية ( لقافة نبيها خمسة)2

محد يشكك بوطنية احد ولكن لما يكون عندنا ناس من شباب المجتمع طول عمره ما بين الشيشة ومباراة برشولة والا ارسنال وفجأة يصير محلل سياسى بالشؤون الداخلية
صارت السالفة كالتالى قاعدين نتاقش بقضية تنقيح الدستور والا واحد يقول لالالا الدستور ما ينجاس
قتله ليش قران؟ اللى حطوه بشر ولازم يواكب التطور اللى حاصل
وزبد الولد وحالته حالة وما يصير وعبدالله السالم وهلم جرة
قتله ابى اسألك انت تدرى اى مادة اللى طالبين تنقحيها؟ رد بكل برود لا
قتله عيل شكو اهلك انت ياى تقول ما ينجاس
بالمقابل من الجنس الناعم وحدة من حريمنا الكبار انا خابرها بين لندن وفينا بالمصح مع المتان كل سنة لان خايفة على عمرها ولبنان لا خبو الاوادم ومرت جان تقول نبيها خمسة وماكو غيرها قتلها صح انا بعد ابيها مو بس خمسة ابيها وحدة جان تقول لالا خمسة وبس قتلها الحين انتى تدرين شنو الخمسة جان ترد تحسبنى ما افهم اى الدواير قتلها اى الدواير قتلها عمتى مو جنه تظلين على مخططات السفر بالصيف وموديلات الهدوم وطلعات المرينا مع العيايز احسن لج


السالفة الثالثة ( لقافة عاطفية )3

بكل اختصار تقدم واثق الخطوة ومعتقد ان الوحيد اللى ما ينرد من قبل اى بنت ليش؟ لان مزيون وكشخة وسيارته تنعد على الاصابع بالكويت ؟ حلو الكلام تقدم لى سيارتها بمواقف الجامعة وقالها نزل الدريشة ابى اكلمج نزلت البنت الدريشة جان تقوله نعم قالها عرفتينى ؟ ردت عليه امر شتبى ؟ جان يقولها بغيتج بموضوع خاص جان تقوله تدرى انك خوش ولد وولد ناس بس تدري شنو عيبك وليش ما اشتهى اطل بويهك قالها افا ليش؟
ما تستحى علي ويهك هذا اولا وبعدين وايد مغرور والاهم من هذا كله وايد وايد ملقوف وهدت ومشت عنه

الحبيب فى شهر ديسمبر صار جنة بنص شهر اغسطس


وسلمولى على اللى يهوهو ولا يتحرك يسوى شى