الطموح و العمل والمثابرة والالتزام وقليل من المشاغبة تكون الحياة ناجحة

Friday, June 02, 2006




الحوار الاول
الليبرالى وانا


كنت ضمن رحلاتى المتواصلة بين الكويت والبحرين تم تغير وجهة الطائرة الى دبي وخلال الرحلة كان هناك شخص اسمعه يتحدث عن الديمقراطية بالكويت ممتدحا ولان الطيارة كانت شبه فاضية وانا حضرتى ملقوف نوعا ما ( بمعنى اتدخل بالحديث حتى لو كان شخص لا اعرفه اذا كان الحديث مشوقا بالنسبة لى )
واثناء فترة الانتظار فى مطار دبى دار حديث بينى وبينه فشرعت فالبدأ بشرح مزايا انتخابتانا ولكن فى نفس الوقت وجود العديد من السلبيات فيها ولكن لاحظت ان هذا الشخص لا توجد لديه منهجية واضحة يعنى الشخص لا توجد لديه منهجية دينية او ليبرالية او علمانية حتى استغربت اول مرة اناقش شخص بهالطريقة
ولكن اتجه الحديث عن الانتخابات الى ان وصلنا الى التوجهات السياسية حتى سألته انت شنو توجهك الصراحة مو قادر اوصل انت شنو توجهك رد على انا ليبرالى ورديت عليه شنو مفهوم لليبرالية بالنسبة لك واسترسل بالشرح حتى وصل الى موضوع شائك جدا وهو التشكيك بالخلق والألوهية قتله انت مسلم
ضحك قال افضل انى ما ارد سألتنى تنتمى لديانة معينة قالى لا انا شخص لا دينى قتله يطلق على اللادينى شخص ملحد سألته شنو تفسر قوى الطبيعة وما يحدث من امور خارقة للعادة رد على هى امور طبيعية بناء على قوى الطبيعة
السفرة كانت بالشتاء وكان غيم ورعد وبرق فجأة اهتزت الطيارة بشكل مخيف جدا انا مشكلتى بهالمواقف اضحك وايد حتى لو كنت خايف يبين شكلى متماسك بس يمكن على الطل لكن الحبيب اللى صارله ساعة ينشف ريجى فجأة قام يتشهد ويذكر الله واطلق الشهادة مت من الضحك لان الضعف الفكرى اللى يعيش فيه الليبرالين بالخليج العربى هو مقتبس من افكار خارجية ولا يعرفون لها اساس فقط اريد ان اكون ضد الدين بدون وعى

الحوار الثانى
الحريم بالانتخابات

زوجتى: يوم الاثنين الياى لا تقولى وينج بروح حق مقار انتخابية
انا : حلو ممتاز بس حق منو بتروحين
زوجتى : بروح حق فلانة
انا: هذى مو بدائرتكم شكو رايحتلها؟
زوجتى : لا فشلة متصلة علينا وموصية ما يصير
انا : اى ماشى بعدين امرج ونروح حق مرشيحن دائرتنا لازم اوديج علشان تختارين منو تبين
زوجتى : لا مالى خلق شكو انا فيهم
انا : على اساس بالتصويت
زوجتى : ما ادرى انت قولي وابوى راح يقولى بعد
انا : يا يبه ما يصير اذا انتى ما تعرفين نروح انا معاج وشوفى منو اللى تحسين ان فعلا يناسب توجهاتج
زوجتى : مالى خلق اصلا احس ان الحريم مو كفو عطوهم التصويت
انا : ليش
زوجتى : لان اغلب الحريم اللى ادخل لهم الحين كلهم يا يبون يبيعون اصواتهم أو انهم يعطون حق اللى نازل من اهلهم يعنى ماكو توجه

تعليقى: مع الاسف هذا حال مجتمعنا انا قلت من زمان احنا الرجال عندنا توجهاتهم ضعيفة لضعف ثقافة مجتمعنا فما بالك بالحريم طبعا هذا ما ينصب على كافة الناخبات ولكن مشكلة تواجه مجتمعنا حيث هذه الانتخابات ستفرز باحساسى ما لا يحمد عقباه وهذا كله يرجع لضعف الوعى السياسى فى مجتمعنا والله يستر من الجاى

الحوار الثالث
انا وبو طلال مرة ثانية
بوطلال عبر التليفون : ها مشارى شلونك
انا : هلا بو طلال
بو طلال: مشارى طلبتك نبيك ويانا بحملة مرزوق
انا :بو طلال انا مو من ساكنين منطقة الضاحية ولا مسجل اهناك اصلا ولا معارفى ذاك الزود بالضاحية يعنى اعرفلى جم بيت من الاهل وجم واحد من الربع
بو طلال : انت شفيك فقر ما تبى فلوس ما تبى شغلك يخلص
انا : ابتسمت قتله تبي الصج بوطلال لو ما ادرى ان دمك شربات وعسل واعزك
جان قلت شى ثانى لكن مرزوق مالك امل ولو يطامر ما اشتغله واعتقد الشباب اللى يشتغلون معاه فيهم الخير والبركة وانا ما راح اضيف شئ
فمان الله

وسلمولى على اللى يهوهو ولا يتحرك يسوى شى




37 comments:

layal said...

الليبراليه في نظري هي الشيوعيه -لكن مع تغير الزمن تغيرت المسميات
وبقى حاملوها علي ما هم
رفيجك اللي في الطياره -يعرف الحق لكن يتجاهله

بالنسبة للانتخابات : المرأه ما تفكر ترشح مرأه الا القليل والفئه الواعيه-
بتلاحظ هذا الشي في الانتخابات ومعظم النسوان يتبعون ازواجهم يعني نفس ما قلت
جفنها عندنا

bo9ali7 said...

الحوار الاول
ههههه...الله يبعد عنا وعنكم الالحاد

الحوار الثاني
الحريم مو كقو..وايد سمعت هالكلمه من الحريم

الحوار الثالث
NO COMMENTS

لمياء الحالمة said...

مشاري

هل سمعت عن مصطلح "الليبرالية الكويتية" ؟

هي ليبرالية تحتوي على هذه المقادير

1- خالف تُعرَف

2- شوية إستهزاء بالدين

3- ملعقة صغيرة من الفلسفة وكلام غير مفهوم للعامة

تضع هذه المقادير على نار هادئة إلى ان تنضج

:)

Anonymous said...

اووووووووووووووووف هذا كله

توقعت ان الكويت تعتبر من أقوى الدول بالانتخابات والوعي السياسي وفرض الديمقراطية ..

اممممممم بعد في أشياء تعجبني لين احين بالديمقراطية الكويتية وليت مطبقين نصها عندنا .. لكن مشكلتنا هني الكل يقول نفسي نفسي واهم شي اعيش ولا يبون يفهون ان هذا لصالح تطور البلد:(

يوم سعيد ^_^

esTeKaNa said...

الحوار الاول:
سبحان الله ،حزة الخوف وتجرد الانسان من كبريائه لازم يرد على الفطرة
لازم يرجع حق الله
وسبحان الله الاخو ما ثناها على طول صار شي يثبت له عكس تفكيره سبحان الله:)


الحوار الثاني:
عسى ربي يتممم عليكم
وتراها صاجة،اصلا امس تقولي واحدة الصيف موسم:عروس وسفر وتعال دور بدل ومكياج وسفر وكله يبيله فلوس
:PpP~

الحوار الثالث:
شنو مسوي مرزوق الغانم؟
كل الناس تشتغل له؟

neelaah said...

مشارى
الحوار الاول:اللة لايبلينا ونجاهر بمعاصينا

الثانى : انا وصديقتى كنا انسولف عن هالسالفة الصبح ومحنا شايفين احد من مرشحات الحريم يسوى

NewMe said...

الحوار الأول
http://www.metransparent.com/texts/magdi_khalil/magdi_khalil_new_arab_liberalism.htm

الحوار الثاني
الجماعة يحتاجون إلى دورات مكثفة لرفع مستوى الثقافة والوعي السياسي والديني
هذا ينطبق على الجميع رجال ونساء صغار وكبار
من أجل رفعة الوطن

أجمل تحية

3ateeja said...

اذا ييت عند الانتخابات ومفهوم النائب الحالي راح نشوف لا المره ولا الذكر
وهذا السواد الاعظم ما يفهم بالعمليه الانتخابيه ..وحتى النائب نفسه وحتى وحتى وحتى يمكن
بتقولي عتيجه شفيها اللهجه تغيرت
سألوني سؤال انتي مقتنعه بدخول المرا للمجلس
قلت لهم خلوني اقتنع باللي كان بالمجلس من الستينات اول
مع احترامي للقادة الرأي والمفكرين وغيرهم لكني الى الآآآآن ما شفت برنامج انتخابي بمعنى الكلمه اقدر احاسب الناخب او الناخبه عليه
اذا شفت على رااااااااسي من فوق
لكن لي الحين ما شفت
من عرفت شي اسمه انتخابات ما شفت
هالمره راح اصوت
لأن واجب اني اصوت
وبصوت للأفضل في نظري مو للي مشى معاملات مادري منهو ..وطلع فلان من النظاره والله شي يفشل وعيب
بالدول المتقدمه اذا نائب راح توسط صورته الصحافه ونزل بالصفحه الأولى
واحنا اذا ما توسط صار جليل حيا ومايستحي
ولكنا محتاجين وعي سياسي
وهالكلام للذكر قبل المره
لأن للأسف الذكور عندنا بلكويت والغالبيه منهم شالسالفه شالطبخه مايدرون؟؟
..من طق طبله قال انا قبله حتى بالدوائر التي تعتبر واعيه ومافيها شراء اصوت ايضا هناك قلت وعي سياسي
طبعا هالحجي مو يعني انا عتيجه اللي ماكو مني
لا والله ابدا
حتى انا احتاج تثقيف سياسي
لكن حلفت حلف
انتخب عزرائيل ولا انتخب نائب خدمات
@@ << ابوي ويهه صار جذي
ههههههه

3ateeja said...

ولا تنسى مشاري
يوم الاثنين افتتاح مقر لحفيتي
يبييييييييييله

Яeema said...

الحوار الأول:
كان عمي من هالنوع و متعصب حدة
بس بعد ما يالة المرض قلب مسلم و دين بعد ، كان سياسي و قومية عربية علي ليبرالي علي شيوعي
و كان يقول ليش الناس إتدور دار مدار صنم من طابوق يعني الكعبة

بس هذا كل تلاشى مع المرض
فا الزبدة

طالما أهو بصحتة إبيقعد يطنطن علي هالسالفة و بعدين يكتشف إنهم مو داشين قبرة إلا صالح أعمالة

و بيني و بينك كان عمي متمرس بالدين الإسلامي عشان يحاجج بس


الحوار الثاني:
ما أعتقد إن الندوات يتكلم عن شي جديد مطروح ، كلها شعارات مستهلكة ، خصوصا إللي متابع المرشحين القدامي

الوعد عند الفارس يوم الأحد بروح عشان أشوف بس إشبقول

الحوار الثالث:
لا تعليق
كل واحد و إللي يحب يسويه
يا محبة ، يا مصلحة ، يا تلزق
وإلا حركات عاد أنا إهناك

هاهاهاهاها

إنت خلك وياي إنتابع كأس العالم

ركبت
ART???

في ستار بكس جدول مباريات و إتعبي النتايج ، إيميلك بيصير مزحوم من حنيتي

سولي أب- ديييت علي التصنيف

Яeema said...

3ateeja : baroo7 weyach momkin??

hahahahaha

DanDash said...

بعلق بس للنقطة الثانية بالنسبة للحضور الندوات و التصويت .. للاسف الشديد اقولها ماعندنا وعي سياسي نسبة ضئيلة جدا الي عندها هل الوعي و هذا وقتهم الحين بس شتقول كل يوم ينبح صوتي و انا نجرة ويا زميلاتي ( العزيزات) رغم انه ولا وحدة منهم بدائرتي بس ابيهم يتلحلحون يشوفون يسمعون الي تقولي افكر الي تقولي ويييه و انا شكو و هذا موال كل يوم و قبلها ايام ماطلع القرار بخصوص مشاركتنا كلمتهم وحدة وييه المرة مو كفو انا اهني شيصير فيني اقول لهم عييب يا جماعة عيل معناتها انتي مو كفو !!!
شحجي شقووول ترى وين المشكلة المشكلة منكم انتم ايها الازواج الاعزاء البعض منكم يترس اذون زوجاتهم و يردون الاخوات يقولونه لدرجة اني اناقشها و ابين لها ترد و تزيد على نفس المنوال
شنقول بس بس بصراحة احنا بجد في نسبة كبيرة من الكويتيات بحاجة الي ثقافة سياسية

لاابي اعلق بعد على مرشح الدائرة الثانية مرزوق الغانم ... امم انا مالي شغل بدائرتهم بس بصراحة السالفة واضحة انه اهو يشتري الاصوات و هم مو مقتنعة بسالفة لنعيدها كما كانت ما ادري في شك و ابناء الدائرة ابخص

و بس يمكن لي رجعة فيما بعد

الحجيه said...

السلام عليكم جميعا

الحٍوار الأول : أتصدق أخ مشاري أسمع الليبرالية مو عيب الواحد إذا ما يعرف يقول ما أعرف ما أفهم شنو أهي الليبرالية ولا شنو توجهم بس ألي اعرفه أنهم منفتحين زيادة عن اللزوم

أما عن الموقف ألي صار بالطائرة سبحان الله كل واحد لابد بمثل هل موقف لازم أن يرجع إلى فطرته سبحان الله الله يهدينه ويهديهم أجمعين

الحوار الثاني : المفروض الواحد أو الوحده يحسون أن الصوت أمانه والصوت على أساسه بتشكل المجلس المفروض يفيد البلد ولكن شوفت عينكم المجلس من صار الى آخر مجلس احد يقولي شنو سوى للكويت الشكوة لله الكل أو الأغلبية يركضون وراء المصالح الشخصية ساعات اشك أنهم كويتيين الله يهدينا ويهديهم لما يحبه ويرضاه


الحوار الثالث : المشكلة أهي المشكلة نفسه أستنفع وأنفع ربعي حلال حرام ما يهم قانوني غير قانوني المهم ما يزعل المعرب العفو على هال كلمه
يا جماعة دينا فيه أحلا قيم وأعظم المبادئ والعدل أساس دينا ياريت أغلب العالم تترك القشور وتتمسك بأساس الدين العظيم ؛ مالنا غير الدٌُُعاء أن ربي يصلح الحال


ففـي التـرمـذي عـن أبي هـريـرة ـ رضي الله عنه ـ مـرفـوعـاً:
( ‏مَـا مِـنْ رَجُـلٍ يَـدْعُـو اللَّهَ بِـدُعَـاءٍ إِلَّا اسْتُجِيـبَ لَهُ فَـإِمَّـا أَنْ يُعَجَّـلَ لَهُ فِي الـدُّنْيَـا وَإِمَّـا أَنْ يُدَّخَـرَ لَهُ فِـي الْآخِـرَةِ وَإِمَّـا أَنْ يُكَفَّـرَ عَنْـهُ مِـنْ ذُنُـوبِـهِ بِقَـدْرِ مَـا دَعَـا مَـا لَـمْ يَـدْعُ بِإِثْـمٍ أَوْ قَطِيعَـةِ رَحِـمٍ أَوْ يَسْتَعْجِـلْ ... ) الحـديـث.

وعنده أيضاً عن عبادة بن الصامت ـ رضي الله عنه ـ مرفوعاً: ( ‏‏مَـا عَلَـى الْأَرْضِ مُسْلِـمٌ يَـدْعُـو اللَّهَ بِـدَعْـوَةٍ إِلَّا آتَـاهُ اللَّهُ إِيَّـاهَـا أَوْ ‏ ‏صَـرَفَ ‏ ‏عَنْـهُ مِـنْ السُّـوءِ مِثْلَهَـا مَـا لَـمْ يَـدْعُ بِـإِثْـمٍ أَوْ قَطِيعَـةِ ‏ ‏رَحِـمٍ ‏ ‏فَقَـالَ رَجُـلٌ مِـنْ الْقَـوْمِ إِذًا نُكْثِـرُ قَـالَ اللَّهُ أَكْثَـرُ )

فأكثـر أيهـا الأخ المسلـم فـإنَّ الله أكثـر عطـاءً وأكثـر نعمـاء، فلعلـك بكثـرة دعـائـك تصـادف سـاعـة مـن السـاعـات لا تسـأل الله فيهـا شيئـاً إلاً أعطـاكـه، فمـن أعطـي الـدعـاء والـرغبـة فيـه أعطـي الإجـابـة، فـإنـه لـو لـم يُـرِدْ إجـابتـه مـا ألهمـه الـدعـاء

أخ مشاري ما نشف ريجه ألي يهوهو ولا يتحرك يسوي شيء الله المستعان أكيد بيجي يوم وهرول

nadeyah said...

الحوار الاول .. حلو يكون عندى توجه معين وفكر بس هالشى ما ينفى ايمانى وعقيدتى بتاتا .. الدين والالتزام ما يعنى الانغلاق للاسف المفهوم ضايع عند البعض وساعه الشده يذكر الله .. سبحان الله والله يثبتنا على قوله الثابت .. اللهم امين .
الحوار الثانى .. وايد وايد وايد حريم جذى .. ليش مادرى وشى يحر .. اممم معاى بنات بالدوام جذى واشكره يتكلمون عن الصوت وبكم يعنى جنه ودهم .. لما اقول لهم ترى حرام والله حرام وصوتج امانه وهذا حقج وشلون ترضين تاخذين فلوس حرام .. يسكتون والله يستر واللى ما تبى من اصلا تروح ولا تدرى وين هوا دارها .. جهل جهل للاسف

وبالنسبه حق الحوار الثالث .. يحليله بو على مو مقصر شغال على ودنه .. والله يستر من الى جاى

arabic man said...

والله عن جد دائما كتاباتك مميزة وتستاهل
الله يعطيك العافية

PearL said...

مشاري
بوست حلو

بالنسبة للحوار الاول
للاسف عندنا كثير من الناس يجهلون امعنى الكلمات
و مع الخيل يا شقرا
سمع ان واحد عاجبه علماني صار علماني
سمع واحد ليبرالي صار اهوه ليبرالي

ولا يدري شنو يعني علماني ولا يدري شنو يعني ليبرالي



اما بالنسبة للحوار الثاني
ففي جهل فضيع
الناس تمتبع المظهر وتنسى المخبر

في جهل فظيع عند الرياييل فما بالك عند الحريم
هذا غير القمع اللي يمارس على المرأة
عشان جذي المرأة ما عندها وعي و ادراك ان هذا من حقها واهيه اللي لازم تختار
والمشكلة لما يستغل هالشي

عاد الحين انت شوف الفتاوي
طب واختار
كل واحد على مزاجه قام يفتي



اما عن الحوار الثالث
اتوقع ان مرزوق الغانم راح يفوز

الكويتي الحر said...

مشاري

الحوار الاول: ليتك موجه الاسئلة المحرجة له وهي
1) من خلقنا ؟
2) لماذا خلقنا ؟
3) ماذا بعد الموت ؟
4) الن يقتص المظلوم من الظالم في وقت ما ؟

الحوار الثاني: اكتشاف متأخر لقلة الوعي السياسي وعدم القراءة والاطلاع وعليك المهمة الشاقة بتعويض ام العيال للفترة السابقة

الحوار الثالث: صحيح مرزوق حدد مواقفه متأخر بس ان تأتي متأخر خير من ان لا تأتي ابدا

وتحياتي لك على مقالاتك

Unknown said...

layal: مع الاسف الناس مو عارفة تفرق لى الحين بين ما يجوز مناقشته وما لايجوز المساس به
حيث لا يوجد ايمان بالمسلمات

bo9ali7 : والله يا بو صلوح ان مثلك
No comment بس الواحد شيقول نتمنى ان الحياة تتطور والسياسة مو كل شى علشان نعيش ولكن للاسف اصبحت اساس

لمياء الحالمة : هذى مقادير المرشحين المينن انا قتلج من قبل (ان كيدهن عظيم ) الله يستر :)

FatmaQatar: فعلا احنا اقوى دولة بالانتخابات والديمقراطية عربيا ومن غير منازع فى النزاهة بالاقتراع وحرية التصويت لكن اكيد فى سلبيات من شراء اصوات وتاثيرات قبليه وطائفية

EsTeKaNa : اول انشاء الله امتحاناتج اوكى :)
ثانى شى مشكلة هالنوعية من الناس انها ما تثبت على موقف وهذا دليل على الضعف
والحوار الثانى احنا شعافسنا غير هالسوالف
الحوار الثالث انا الصراحة لانى من اهل المنطقة ولا اعرف فيها ناس ذاك الزود لكن ما احب هالانسان لله فالله
بس ما احبه سياسيا مو شخصيا ما بينى وبينه شى
ولكن احب الجميع

kitty : اهوا مو تقليد اعمى ولكن تاثير التفكك والمشاكل السياسية اللى عندهم
وبعدين مالج الا الشلة وانيت وحوسو :)

Unknown said...

balah : مشكلة الحريم مو راضين يصدقون
وحدة من المرشحات الاخت كانت تيبب باكسفورد بالصيف اذا شافت صديقتها بالله هذى كفو مرشحة ؟؟؟؟

NewMe : دخلت على اللينك وما لقيت الا تاريخ حياة مؤسس الليبرالية فى مصر والاتجاه لليبرالية الحديثة ؟
المجتمع العربى الان مجتمع هيفياء وهبى ونانسى الاساس الضعيف الدورات لن تحل اى مشكلة

3ateeja: انا قاعد اقرى اقول هذى عتوج والا منو بس الحفيتى الصراحة طماشة بعدين جنا طلعنا بدائرة وحدة ؟
:))
بس الحفيتى تدرين ان الانتخابات اللى طافت محقق 220 صوت وفوق تقريبا وللامانة هالشخص مدعوم اشكره بس علشان يخرب دائرة المثقفين

Unknown said...

Яeema : ان صوتى حق الفارس يا ويلج عندكم السمى وتصوتين حق الفارس
مشمش وبس :))
وبعدين ماكو روحات منى مناك ريلج اخليه يحلف عليج

DanDash: مو الوعى السياسى ضعف بسبة منو؟
منو اللى ما رضى ان المجتمع يتثقف ويكون همنا كل بالصيف ان نطير حوالين العالم

الحجية : المعنى اللغوى لها هو حرية ولكن بمفهومها العربى هو جلب الفكر الغربى وتطبيقه على الدولة وذلك بفصل الدين عن الدولة ولكن التخلف الاعمى بالعرب ما قاموا يشوفون ان الغرب نفسهم قاموا يرجعون للدين بعد المشاكل الاجتماعية التى قامت تصير عندهم
والصراحة كلامج لا يعلق عليه لانج اخت تعرفين من اين تاتى الحكمة عسى الله يخليج لنا :)

nadeyah : فى ناس تؤمن باللاعقيدة يعنى حياتنا تسيرها الظروف ولاقع فى الخطأ ولكن استفيد منه دون وجود اساس ايمانى

لازم الناس تعى مدى امانة الصوت

ayhm jzzan: شكرا اخى العزيز والله يعافيك ايضا :)

Unknown said...

PearL : اول شى انشاء الله ما يفوز مروزق
ثانى شى احنا بالكويت عندنا ناس تقول شنو يعنى تروح تطوف على صخر
تعرفين هالعلقية وين وصلت من التطرف
الله يرحمنا برحمته بس يا بنت الحلال
الجهل او الوعى السياسى مو مشكلة الحريم لان همشوهم طول هالسنين وفجأة تعالوا رشحوا وصوتوا


cargo: اول شى حياك الله لانك اول مرة تدش
ثانى شى الله يعين الجميع انشاء لان مجاهدة النفس من اعظم انواع الجهاد :)
تحياتى واتمنى اشوفك مرة ثانية
صج قبل لا انسى انا لا معروف ولا هم يحزنون انا انسان جدا بسيط لكن علمتنى الحياة شلون اعيش انشاء الله صح

الكويتي الحر :

راح اجاوب اسألتك
خلقنا من تزاوج بين رجل وامرأة
خلقنا لنعيش
بعد الموت فناء
هذى اجابة هذا النوع من الناس لهم مشكلة ولوثة غير طبيعية فى التعامل مع الحوار الفكرى

مشكلة مرزوق ان انسان تحيطه علامات استفهام كثيرة والله يوفق الله فيه الخير حق هالبلد

شكرا اخوى

NewMe said...

NewMe : دخلت على اللينك وما لقيت الا تاريخ حياة مؤسس الليبرالية فى مصر والاتجاه لليبرالية الحديثة ؟
المجتمع العربى الان مجتمع هيفياء وهبى ونانسى الاساس الضعيف الدورات لن تحل اى مشكلة

ادري اللينك يتكلم عن الليبرالية في الوطن العربي والمفاهيم المزدوجة تبادل معلومات لا أكثر
وإن كنا مجتمع هيفاء ونانسي
هل نقف مكتوفي الايدي امام هذا الزحف نحو التهميش؟
التوعية مهمة وضرورية على كل المقاييس واذا تقدمنا خطوة مقابل المشي الى الوراء
يبقى الأمل في خطوة

دمت سالماً

3ateeja said...

اعلن عن اصطحابي لريما في يوم الاثنين لحضور افتتاح مقر الحفيتي واللي يبي ايي حياه الله ترى الباص لي الحين ما انترس

اما بالنسبه للهجتي اللي تغيرت يا اخوي فالواقع يفرض علينا نكون جذي وكل انسان في جانب جد يشخصيته ...ولا ترى انا عتيجه ماغيرها بللوق مذكرات ام مضحي :)
ويمكن نطلع بنفس الدائر ليش لأ خو كلنا عيال قريه وكلن يعرف اخيه

الحجيه said...

السلام عليكم جميعا

كل الشكر اخ مشاري على التوضيح :)

Unknown said...

new me : اللينك اللى فيه تاريخ حياة شخصية ما فيه اى مبادئ الليبرالية وماهو مفهومها واهدافها ؟

3ateeja: الحفيتى لما يروحله ياخذون معاهم جيس بنك حق الطماشة والضحك وبعدين شنو يعنى تروحون بروحكم ولا تقولولى والا ما تبون اختلاط ؟

الحجية: افا عليج بدون شكر :)
تحياتى

3ateeja said...

حياك نقعدك جدام عند لدريول ولا بلمره نخيليك انت لدريول بعد اذنك طبعا واذا ماعندك اي مانع
لأن راسي يعورني ومالي خلق اسوق واما من ناحيه جيس بنك لا افا عليك جيس بنك وعنجكك وسينالكو بعد
بس فيه عيب شرعي لحفيتي
ما يحط عشا
ترى قلت لكم
مره واحد يسأله يقوله الحفيتي ليش حاط بخيام الحريم مكيفات واحنا مخلينا هنيه عرقاتنا تهطل بالحر
جان يقوله وانت شمدششك بين الحريم
هههههههههههه

مره سأله واحد ثاني قاله ..ليش ما نلاقي بمقرك الانتخابي شخصيات مهمه ...جان يرد عليه يقوله لالالا من قالك ما ايووني اييوني بس يطقونها لثمه ويلتفت على اثنينه على يمينه طاقينها لثمه هههههههههههههه
لحفيتي طماشه بس سوى اللي محد سواه
من عمر الدنيا وهو يحط خيام للحريم ....:)
دعوه للطماشه يوم الاثنين بعد صلاة العشاء

DanDash said...

DanDash: مو الوعى السياسى ضعف بسبة منو؟
منو اللى ما رضى ان المجتمع يتثقف ويكون همنا كل بالصيف ان نطير حوالين العالم

عفوا بس مو جنه هذا هجوم قوي علينا لانه لا تنسى هم في نسبة من الرجال ما يهتمون بالانتخابات بالعكس يشوفونها فرصة لزيادة الدخل

Unknown said...

3atejaa: سينالكو؟؟؟
انتى من اى مواليد ؟؟؟؟؟؟
ترى صج خليتنى اشك ؟


Dandash: هذا مو هجوم الا بحالة وحدة اذا كنتى انتى رئيس الحكومة ؟
لان انا اقصد ان اللى بايده يثقف الناس والشعب اهيا الحكومة اهيا اللى تدعيم تطوير المجتمع من هالناحية وما يخلون الناس تضيع ومرشحين فشلة يطلعون والناس تبيع ذمتها بهالطريقة المخزية

Nora said...

hehehehehe

ودي و بخاطري و منى عيني اصادف شخص ما يؤمن بالله سبحانه و تعالى

هذي الفطرة و الحجة من الله عليه جدامك عشان يسكت مرة وحدة


الوعي عند النساء .. مقارنة بالرجال

ممتاز .. توهم ماخذين حقوقهم و يايبين اليهدة .. غيرهم من عمر الدنيا و لا فكروا يمارسون حقهم بطريقة صح


امي مسوية حملة غير معلنة تدعو لعدم التصويت لأحد .. فقط ورقة بيضاء خالية تقول ماكو أحد كفووو
هههه و اقنعت واااايد حريم


بس .. بو طلال قصده فلوس بشنو ؟؟

غير جذي .. اخوي مشاري .. عليك الله .. بالحياة الطبيعية .. اذا كنت تعرف شخصية كبيرة .. ما راح تساعدك بشغل شي

!!

و الا انت ما تحب الواسطة أو خنقول الشفاعة يعني الواسطة المحمودة

;D

ترى بالكلية .. يعلمونه شغلة

صح . الطريق المستقيم اقصرها بين نقطتين لكن .. التفكير الهندسي يفكر بأفعل الطرق و افضلها مو ضرورة اقصرها


اذا عندك احد بالدائرة العاشرة نازل قوولي لاني اثق برأيك و لي الحين ماكو أحد

3ateeja said...

منو قال سينالكو
لا يكون انا @!@
سقط سهوا

Unknown said...

a7La eNG : الصراحة امج زين سوت
بس ناس بالعاشرة زينين ؟؟؟
تكا ذاك اليوم ماخذ منه سفرى زين عندج باسكن روبنز امووت عليه :) وتلقينى كل صافط بالمكان الصغير على ابو انى بخلص بسرعه :))

لابس اقولج منو زين الفضالة زين بس يا ويلج ان عطيتى العمر والا التويجرى باسل الراشد موقفه ما ادرى شلون
العمر جاسم مو نازل على الاقل ريال محافظ بس مو موجود
ولو اقولج ما تصدقين
عندج هند الشيخ انا شفت طريقة تربيتها لعيالها وتفكيرها نظيف
رولا دشتى ناشطة لكن توجهها متحرر احس وايد
فماكو الا الفضالة الا احس ان زين :))

تحياتى وشكرى العميق لثقتج

Unknown said...

3ateeja :طلعت الصجية :)))

NewMe said...

طول بالك يامشاري
تابع الموضوع ترى هذي الحلقة الأولى
ولو عندي الباقين كان دزيتهم لك

تحياتي

! said...

مشاري

الحوار الاول
الله لا يبلانا

الحوار الثاني
اكو وايد منهم وهذا بحد ذاته خطر والله يستر

الحوار الثالث
ثلثين الولد خاله من وين بيبه والله يستر

Unknown said...

NewMe : am waiting :)

bazoon : معاك بكل اللى تقوله كلمة كلمة لان جانبه كبير من الصحة

سنع ومنع : يبه ما بينا وبين الريال شى بس الشر مو من الناس الشر والا اقول بلاش الله يصلح الجميع انشاء الله

Unknown said...

balqees : thanx for being her
:)

Anonymous said...

الاخت dandash
ما عاش من يشتري صوت عيال الضاحيه كلنا شباعه و ماعلينا قاصر! بس شنقول الناس بتطلع على مرزوق اي كلام و اشاعات