الطموح و العمل والمثابرة والالتزام وقليل من المشاغبة تكون الحياة ناجحة

Monday, August 14, 2006

انا والشيعة

بطبيعتى وبيئتى اللى تربيت فيها بين فلاح وولد عباس اللى كانوا يشاركونى حياة النادي لم كنت العب بنادى القادسية من سنة 86 لى تقريبا سنة 2000 كنت ما اعرف شى اسمه سنى وشيعى وبدوى كنا كلنا بمركب واحد نسافر معسكرات ويا بعض ونسهر مع بعض وكانت حياتنا وردة

لكن اللى صار معاى اليومين اللى طافوا يخلينى اعيد حسباتى وايد

اتصل فينى مستشار البنك وقالى مشارى نبيك تختار موظفين اثنين عندك من الموظفين الجدد علشان يكونون عندك بالادارة ويتدربون لما يكملون قتله اوكى شفتهم كلهم ولقيت ان فى اثنين منهم ممتازين واحد فيهم شيعى

بس انا مالى شغل عاد شيعى سنة خضر حمر مانى مناسبه

والا يتصل فينى واحد من كبارية المكان اللى اشتغل فيه

مشارى شلونك

هلا والله بوفلان

صج قاعد تختارون موظفين عندكم

اى عندك احد زين تبي توصى عليه

اى اخذ فلان

اى فلان خوش ولد وجامعى محترم انا حاط اسمه ضمن اللى بقابلهم

جان يرد على صج انت مختار ( فلان ) هذا واحد ثانى

قتله اى ليش شفيه

قالى شيعى الله يهداك يا مشارى وادراتكم زينة خله محذوف اهناك

قتله وانا شكو شيعى الولد مانى مناسبه وبينى وبينكم ما حبيت اشد لان فيها لويه ان دشيت وياه قلت خل اخذه بالمسايس

رحتله مكتبه وقلت هذى فرصة اخلص شغلى

قتله اوراقى عند فلان

جان يرد على يقولى روح يبه روح انت شغلك خالص

انا طقتنى البوهة الله الحين صار شغلى خالص

قلت حلو خل امشى من الصوبين اييب الولد اللى ابيه واخلص شغلى

الزبدة الكويت ليش صارت جذى والله ياجماعة الناس صارت بموضوع الطائفية تلوع الجبد

كلنا نصلى على مكة ترى وكلنا نقول لا اله الا الله

يا جماعة احترموا مذاهب بعض وهذى مو نصيحة لان الناس تكره النصيحة وانا ادرى بهالشى

بس اذا ما تعايشنا مع بعض راح نوصل مرحلة نذبح بعض واحنا كلنا 4 انفار وكل واحد صاب احولة على الثانى

لا يطوفكم

وسلمولى على اللى يهوهو ولا يتحرك يسوى شى

35 comments:

الطير الحر said...

لا حول ولا قوة إلا بالله !! الله يبعد عنا شر الفتنة ... اللهم آمين

3ateeja said...

تدري احنا نصنا شيعه نصنا سنه ..بس تعال اظحك ..جد جد وكنت ابي اكتب موضوع عن هالسالفه ..
يعني حتى نقاشاتنا تظحك
عتيجه: اليوم شاريه قباقب
س:لا احنا ما ناكله
عتيجه : احسن وفرتوا علينا
س: والله عقب ما شبعت منه دريت انه حرام
هههههههههه
م:زين ليش عندكم حرام قولي يمكن اقتنع
س:لا ما راح تقتنع لأن ما نص عليه لا مسلم ولا بخاري ..فتوى
عتيجه:اهم شي انت شبعت
س: ايييييييييي وترست بطني بعد هههههههه
وهلم جرا

bo9ali7 said...

"
بس انا مالى شغل عاد شيعى سنة خضر حمر مانى مناسبه
"
مو قاعد اتصيد عليك الحجي..بس ترى الطائفية موجوده من زمان ومزروعة فينا بس توناالحين نجني ثمارها..هذا الواقع المر

NewMe said...
This comment has been removed by a blog administrator.
NewMe said...

عندما يصبح الدين بين الانسان وربه
ويعم الحب للآخرين بين كل الناس
ولا نحكم على الناس من دينهم او مظهرهم
وانما بما يسهمون من
رفعة المجتمع وتقدمه ونمائه
عندها فقط
ستنتهي الطائفية
وسنعيش بسلام
لنحب بعضنا
وندع الحكم للخالق

موضوع متميز كالعادة
دمت بصدقك وإنسانيتك
أطيب الأماني

Anonymous said...

مشاري

وزير التجارة وحنا ماندري عنك ؟

وتقولة انا شكو جان تفلت بويهه بعد

لا بس قوي وايد


:)

Unknown said...

الطير الحر :امين

MuLaN : البحرين تختلف عن الكويت نهائيا بالكويت عمرنا ما تعودنا على هالامور


3ateeja: فكيتى نفسج عيل :) مدام فيج الصوبين :)

Unknown said...

bo9ali7 : افا عليك مو تصيد :) بس صدقنى انا اكثر واحد يهتم فيها من ناحية دينية وسألت فيها الشيخ الدكتور خالد المذكور وقال ان لو في نسب ما فيه شى وصحيح لكن صدقنى يمكن خانى التعبير بس عمرى ما فرقت :)


Princess: من ناحية سطحيين ساطحين لان هذيل اللى مرجعينا ورى


NewMe : نظرتك متفائلة لكن هالشى ما يمنع ان الواحد يتفائل
وشكرا على تواصلك :) عزيزتى


Anonymous : لا وانت الصاج رئيس وزراء :)
وصدقنى وايد اقوى مما تتصور بس انا احب اكون طيب :) مع الناس
تونى عرفتك زين تلعب على الحبلين :P

Anonymous said...

اي حبلين يرحم والديك

توني داش بلوقك وافتر في ارشيفك

لا تأخذ مقلب في نفسك

بتاع كل حاجة مشاري انت ماكو شئ ماتفهم فية

ماشاء الله :)

Chai-7aleeb said...

أخوى مشارى


موضوعك هذا يستاهل الواحد يبوسك على راسك عليه

الله لا يبارك فى الساعه اللى سوولنا فيها الأحزاب و هذا شيعى و هذا سنى

أنا أذكر أهلنا الكبار يسولفون لنا إنهم كانو يروحون الحسينيات و كانوا ينطرون كل سنه مناطر علشان يأكلون من أكل الحسينيه

كنا أهل فى مركب واحد ولا عندنا تفرقه

الحين؟؟؟

أسال الله العافيه و يستر علينا من هالتفرقه

أنا من الناس اللى ما يهمنى شيعى أو سنى

أنا يهمنى أولاً و آخراً إنه كويتى وراح أسوى المستحيل علشان أساعده

أما بالنسبه حق المعزب العود اللى عندك،الله يسامحه و يكبر عقله

Unknown said...

Anonymous : حاضرين ما ادرى شاللى عافس خبزتك :)
ويرحم والديك انشاء الله بس ما ادرى شفيك معصب ؟

حياك :)


Chai-7aleeb : لان مفهوم الوطنية يمكن اختلف وصار الواحد بس يفكر يرجع حق منو بدون تفكير
الله يستر علينا يا معود

BaNgBaNg2 said...

اهم شيء انه شخص محترم ويؤدي شغله بامانه عيل يستاهل واحسن شيء انك قيمت الشخص على شغله مو على مذهبه او اصله وفصله والله يعطيك العافيه على انك فتحت هالموضوع لان كان ودي اتكلم عنه
تحياتي لك
وسن

mishal said...

لولا تدخلات ايران في انتخابات مجلس الامه وتحركات السفاره والسفير الايراني في تكميم افواه الكتّاب الصحفيين ومحاولتهم فرض سيطره شيعيه في الكويت لما ظهرت هذه الامور ولما كان الاعتقاد بأن الشيعه ولائهم لايران

---
والا شكو يسوون فرعيات انتخابات مجلس الامه بوجود السفير الايراني

------
في النهائيه قرارك كان عين الصواب
ومانبي ندخّل الطائفيه بالشغل

tweety said...

لا أنت غلطان وغلطتك ما تغتفر
مايصير ترشح شيعي مو نفس الفصيل :p
المفروض مو بس بالترقيات حتى بالتوظيف والجوائز والمطاعم شيعة بروح وسنة بروح لا وكل واحد في بطاقته المدنية يكتبون أصله ومذهبة وعرجه وقبيلته عشان اذا وقفه شرطي يعرف تبعهم والا لأ يخالفه والا لأ جذي نصير دولة متقدمة
تضحك من جهلها الامم
اتصدق حلو اسم فيلم : مشاري وفلاح وعباس

ReLaaaX said...

هالشي موجود عند السنه وعند الشيعه:)


ولو كل واحد يفكر فينا بالمصلحة العامة بغض النظر عن التوجه جان كويتنا بخير ..!


عيل وحده يحليلها اقعدت بمكان عام وولدها راح عند وحده شيعيه تسولف وياه ومقعدته يمها يوم اسئلته شسمك قال معاوية .. والله العظيم الام تسولف تقول شالت ولدي ودزته عنها looool


بالله هذي عقول؟


صراحه اعترف ان التفرقه موجوده عند الكل .. عندنا وعندهم


بس الشاطر اللي يقدر يغير هالنظره


مشكلتنا مانقدر نتحكم بعواطفنا .. وهالشي اللي سبب الطائفية او الاحزاب اللي تتكلمون عنها


رسولنا اللهم صلي وسلم عليه خير مثال في المعاملة .. مع اليهود والنصارى !!!


مو من باب اولى نعاملهم عدل ؟ ومن يدري يمكن تكون هالمعاملة سبب في مراجعتهم لأنفسهم ويصلحون الاغلاط اللي موجوده عندهم .. وخصوصاً ان اغلب الشيعة اللي موجودين عوااااام الشيعه يعني زين يصنفون روحهم انهم شيعه مو سنه :)


لازم نفصل بين معاملتنا لهم وبين امنيتنا لهم بالهداية وهذا من واجبنا كمسلمين نحب الخير حق غيرنا مثل مانحبه حق غيرنا


نأسف على الاطاله

Unknown said...

BaNgBaNg2:بالاخير الواحد وذمته
:) مشكورة على الزيارة ونورتى عالم البلوقات يا اختنا :)

mishal : اذا انا طالعت اهم شسوون ما راح اخلص لكن انا اسوى باللى انا مقتنع فيه

3afoor : اول شى اهلا وسهلا :)
thane shey yes you have valid point but do u want me to deal with ppl or think like there way or my way idid what i blive dear
business is business and i think you know what i mean ;)

Unknown said...

tweety : انا اقول انتى بس تبين تعاندينى وبس الله يهداج عمار يا كويت :) بس الواحد يقول يسوى اللى بذمته

ReLaaaX : ماله داعى الاسف على الاطالة اول شى :)
بعدين ذكرتينى بواحد مسمى عياله واحد على والثانى عمر يقولى عناد علشان محد يغلبهم
والهداية من الله والله يهدينا اجمعين :)

tweety said...

هو !!! ليش بعاند وبس أنا قاعدة أقول رايي بشكل معاكس من باب التهكم بس واضح أني ضد التفرقة الطائفية والعنصرية والمذهبية ومع التقييم حسب الكفاءة و..برافو عليك وشنو بعد
عمار ياكويتنا
ياام الثلاث أسوار
أحب هالاغنية
وكلك عدل وسنع
أوكي جذي !؟
:p

Unknown said...

tweety :ام لسانين :)))
انتى يبيلج شاورما من مطعم الرميح اللى بالصاج وطول ما مشارى بدى يتكلم عن الاكل يعنى انا يوعان :)

3ateeja said...

اي فكيت نفسي ..احاجيك عن الدوام مو البيت :)
تبي تظحك ..اكثر ترى سوالفنا وايد

3ateeja said...

تبي اونسك اكثر
الرئيس شيعي حساوي
النائب حضرتي
اللي تحتي شيعي بحراني
اللي تحته سني
اللي تحته سني
بعدين كوكتيل شيعه وسنه ..وحتى اللجان والبطيخ كلا شيعه وسنه ..شوف اذا الرئيس ..تمام
الباجي يصيرون تمام

لمياء الحالمة said...

مشاري


زيارة ودية للمدونة للسلام وللإطمئنان على احوالك وأحوال الرعية

بخصوص الإختلافات المذهبية, فهي ليست من المواضيع التي أحب التحدث بها لأنها لا ولن تنتهي إلى يوم الدين, لذلك أعتذر عن المشاركة

بالنسبة لي أنا فليست لدي اية مشكلة أو حساسية من هذا الامر كوني من المذهب السني وزوجي العزيز من المذهب الشيعي

الرب واحد, والدين واحد

وإذا كانت هناك إختلافات, فهي كما يقولون بالافلام: أهي بين البايع والشاري, ومتدأأش

:)


تحياتي

SAJA.S said...

وهذه اللي الحين اللي صاير في الكويت .. صرنا نصين .. والكل حسباله هو الصح سواءشيعي او سنس ,, واللي يبط الجبد في بعض الناس تكفر بعض .. استغفر الله
منو احنا علشان نقول ها كافر والا لا مو كلنا نقول لا اله الا الله محمد رسول الله

الله يهديهم ان شاء الله

Mohammad Al-Yousifi said...

موضوع جيد لكنه عادي يعني بكل مكان العنصرية موجودة

تبدي بالدين و الجنسية و المذهب ثم الأصل ثم القبيلة ثم العايلة ثم الأسرة ثم البيت ثم الغرفة

تعودنا عليها

اللي يضحك بالسالفة تلقى واحد عنصري حده و بالأخير ما يصلي

لوول

Unknown said...

BaLqEes:والله يااختى بلقيس بالاخير احنا اللى راح ناكل بعض

3ateeja :حاجينى وانا اخوج :P
اى هم زين متفاهمين مع انى كنت متوقعح عباية وتنظمين مهرجانات احياء التراث:))
يحليلج يا عتوج

Unknown said...

لمياء الحالمة : فيك الخير يا ست لمياء عندنا سكرتيرة كل ما اشوفها تذكرنى فيج تدرين ليش تشيل علبة كلينكس ديتول معاها وتمسح كرسيها وما تخلى احد من tea boys
يسون قهوتها اهيا لازم تسويها بايدها بس ليش تذكرنى فيج ما ادرى :))
ياا اهلا

Smile : هذا التعصب واللى يؤدى اليه والله يحفظنا شكرا سمايل :)

kila ma6goog :عزيزى المسألة مش بجودة الموضوع ولكن الفكرة اللى طغت علينا خلال العشر سنوات الاخيرة تقريبا او اكثر بشوية هالامور كانت مختفية وما بينت الا الحين واذا محد وقفها بنظرى راح تتفاقم ونصير حالنا حال العراق والعنصرية ماكانت موجودة من قبل الا الحين شركات تتأسس على المذهب الفلانى وبنك يتأسس على المذهب الفلانى والله كريم
شكرا لتعليقك

3ateeja said...

انظم مهرجانات بس لا مع جمعية التراث ولا احياء الاصلاح ولا مبرة آل البيت
مكانات ثانيه
:O

Unknown said...

3ateeja :عزمينا عاد :) الله يستر لا تكونين مع بن لادن ومتخفية :)
والله انج اخت عزيزة يا عتوج

Unknown said...

طالما هناك دول طائفية محيطة فلن نتخلص من هذه المشكلة لان الصغير يتاثر باجواء الكبار خصوصا وان فيهم شر
اللهم يا كافي

Sama Oman said...

حراااااااااااااااااام

الانسان بأخلاقة و التزامة و أدبة
و هو يظل مسلم
الطائفية هي التي تفرقنا
و تبعدنا عن التوحد
والوقوف تحت كلمة واحدة

مع أننا كلنا
تحت كلمة
لا اله الا الله
محمد رسول الله

:(

mahdy83 said...

والله اخي حتي هنا في مصر ظهرت الان جماعات تفرق الحكومه نفسها وأمن الدوله أنشيء مكتب اسمه مكتب مكافحه الشيعه !!1
غريب والله ان المسلم يبغض اخوه المسلم ومع ان ده الوقت اللي محتاجين لا واحد يقف معانا ضد الطغيان

Unknown said...

عاجل : حطيت النقطة الصح على الحرف المطلوب هذا السبب الرئيسى بنظرى التأثر بالجوار
اشكرك فعلا على النقطة الايجابية


>>Sama Oman<< : المفاهيم تختلف اختى العزيزة من شخص الى اخر وعسى الله يهدينا جميعا


المهدي: مصر حاجة تانية خالص وخصوصا مع المذاهب الاخرى
تحياتى لاهل النيل

layal said...

شاقولك يا مشاري هذي الموضوع يبيله قعدات مو كلمتين ببلوغ

جان علي التفرقه موجوده موجوده
الناس اللي كل واحد حاكر نفسه الا هذا شيعي وهذا سني

يعتمد علي البيئه اللي انت عشت فيها ان كان فيها اختلاط بين المذاهب ما راح تحس بذاك الفرق
روح النكته موجوده بيني وبين صديقاتي الشيعه فكل واحده فاهمه الثانيه عدل مهما عيبنا علي بعضنا بنقاط المذهبيه تضل القلوب صافيه
نقاشاتي ما تنتهي بهذا المجال مهما احاول ابتعد عنه

Unknown said...

layal: البيئة تغيرت وعنصر التفرقة قاعد يزيد والله يستر من الياى

بس الواحد يحط تفائل بالحسبان

KQ8 said...

اعتقد ان من يأجج نار الطائفية

بين السنة الحضر والشيعه من بعض الاخوه القبليين

فالحضر ومنذ قدم الكويت ليست لديهم مشكله مع الشيعه ولكن وبعد تنامي المد القبلي في الكويت اصبحت هناك اصواتا تنادي بهذا الطرح