الطموح و العمل والمثابرة والالتزام وقليل من المشاغبة تكون الحياة ناجحة

Monday, October 02, 2006

لى متى هالسوالف

دخل على المكتب وهو بطبيعته شخص مسالم وطيب جدا وقالى

تؤمن بالمستحيل

قتله لا

تؤمين بالحب

قتله اى ولا

قالى شوف شنو صارلى امس وبدأ يتكلم

يقول فى البداية كنت اخذ اختى من مكان دراستها وشفتها معاها

بنت دينة واخلاق وقمة فى الاحترام

يقول سألت اختى عنها قالتلى رفيجتى والبنت خلوقة ومحترمة وايد

يقول ابى ادش البيوت من الباب

على طول خليت اختى تسألها وقالتلها البنت وافقت

المهم اتصلت الام على الام ومع الكلام

جان تقول بس انتوا من مذهب واحنا من مذهب

وصار الموضوع على هالصورة

هذى السالفة باختصار

لى متى احنا بهالتخلف يعنى كلنا مسلمين يا ناس

انا واحد ملتزم واخاف الله واصلى لكن اذا حبيت شيعيه وحبتنى راح اتفق معاها واتزوجها

الحين عادى يتزوجون مسيحية ومسلمة لا ؟

What Man Need ?

twaity بعد كلام زميلتى وعزيزتى الاخت العزيزة

اثارت حفيظتى للكتابة واعجابى باللى كتبته الاخت العزيزة

soul voice

فى مقارنة مشاعر المرأة بالرجل

انا بس ابى اقول شى واحد

المرة لما يكون عندها الرومانسية الكلام الحلو والتميز عن باقى الحريم

الرجل يشترك مع المرأة بأن يبى يكون متميز عن باقى الرجال عن زوجته وما يكون محل مقارنة

وفى شئ وايد مهم ووصفة يمكن تكون حل

الرجل يبى زوجته باكثر من شخصية نفس الشى لازم يكون الرجل عند المرأة فيه

واهيا انها تكون زميلة الصبح

العصر صديقة

بالليل حبيبة

بعد منتصف الليل عشيقة

شوفوا كل هذا ما بينهم شئ اسمه زوجة لان العديد من الازواج والزوجات يعتقدون ان هالكلمة قيد

وسلمولى على اللى يهوهو ولا يتحرك يسوى شى

28 comments:

MuLaN said...

ako wayd nas chethy 5a9tan elkbar mt39ben 7g mth'habhom 0 hathy 38lyat'hom..7ta ely 5a6b tlga a7sn mnhom mn na7yat eldeen.
0 lel'asf ham fe banat chethy maby hatha lana she3y/sny.

etha elzwaj ebkobra y3tbrona elba3th sjn akeed bekon klmat zoj aw zoja 8yod mo 8ed, bss halshay beed elathnen ena ykon '3er halkalam, 0 kl rayal 0 mara lhom 6re8a wesloob belt3amol t5tlf be5tlaf sha59yat'hom 0 tarbyt'hom, bss etha kl wa7d 3rf 0 fahm el6rf elthany 3dl ra7 ysawon kl shay ys3dhom 0 ytjnbon ay shay yz3jhom..

0 b3l8 3la elzwaj mn akthr mn w7da, oho 9j lah 7kma bas mthl ma elryal y7b ykon mtmlk ham elmara nfs elshay ma trtha a7d thany ysharkha taby ykon laha bro7ha 0 ma3t8d fee shraych 3ayshen 3la glb wa7d, el3aks 4 sure.

Anonymous said...

مشكوور مشاري خجلتني حلات اسمي واهو مزركش




اتفطر ولي عودة مع عقدتنا الازلية بالزواج

bo9ali7 said...

اي والله..مسموح الزواج من مسيحية..بس من مذهب ثاني.لأ..شي يضحك وبنفس الوقت مؤشر خطير..

Anonymous said...

يمكن لو قبل 10 سنين ولا 20 سنه الواحد يتخوف يرتبط من غير مذهبه بس الوضع الحاصل هالايام شنووو؟؟


الولد متى يحتاج لاهله؟؟ وقت الخطبة وقص المهر


عقبها يستقر بحياته الزوجيه وينقفل عليه باب واحد ويه الانسانة اللي اختارها بعقله وقلبه

وين اهله؟؟

وين اهلها؟؟

كل واحد قاعد في بيته لاهي بمسؤولياته والتزاماته ماغير اللهم هالغدا ولا العشا اللي يجمعهم مرة ومرتين بالاسبوع



الحين اعفس حياتي كلهاعشان زوارة اهل؟؟

اتمنى ان لايفهم من كلامي ان راي الاهل مو مهم لاااا مهم وحلاته الزواج يتم برضاهم وقبووولهم ولكن الاهل مايفكرون بجوانب التوافق والانسجام بين الطرفين

يحاتون الاصل -المذهب-الحالة المادية هذي حدود اهتماماتهم اما الامور الاهم والاعمق مثل الراحه النفسية والقبول بين الريال والمرة والتوافق الفكري امخلينها للظروف ويلا ماعليه باجر يتعودون على بعض والحجي الطفولي هذا


بيقولون العيال بيتشتتون؟؟؟

العيال تابعين للابو وكلنااااا شفنا حالات حق ابو وام من نفس المذهب تالي العيال اقلبووو

ف كلش المسألة هذي مو مقياااس نمشي عليه


الواحد يعيبه خلقه ودينه اما المذهب لا



مشكلة البلاوي لما الاخ مايدل طريج المسيد ويتشرط بالمذهب!!!!



انا نظرتي للمذهب انه اختلاف عادي حاله حال اختلاف لون البشرة لون عيونا اطوالنا اوزانا ,,اي فروقات اتميز واحد عن الثاني ولكن في نقطة احب اضيفها الزواج من مذهب ثاني يتطلب شخصين مافيهم درجة تدين كبيرة اهني ممكن جدا تنجح العلاقه بينهم وبالتأكيد قبل كل هذاااا لازم يكون في احترام وعدم تعدي على مذهب الآخر

احترم عشان تحترم"
بضم التاء"


بظل هالعصر والانفتاح هذا المفروض نبدي نطهر من هالرواسب اللي سلبياتها اكثر من ايجابياتها واللي البعض الله يسامحهم يورثون ابناءهم هالتحيز ويربونهم على بغض الاخرين



للعلم انا ماشوف هالتعنت بالزواج والتدقيق بالمذهب الا بالخليج ولا باجي الدول العربية لبنان وربعها العايلة مكس من المذاهب والاديان وعايشين احلى عيشة



اسفةةةةة عالطوالة

NewMe said...

هالسوالف بتستمر
طول ما هالعقول
كبر حبة البازيلا
بلا شيعة بلا سنة
ديرة وحدة وودهم يفضخون ببعض
هذيل شلون يتزوجون!
مجتمع مريض بسرطان يستشري كل يوم أكثر
على طاري المسلسل السعودي طاش ماطاش
خل يجتمعون ويسون مذهب واحد
شيعة + سنة = شنة
وخل اتفرغ انحل مشاكل
صج مو خبال

المشكلة اني اعرف ٢ ايحبون بعض من سنين
اثنينهم شيعه بس اصولهم من مناطق مختلفة من ايران
لاحظ معاي اصولهم يعني هم مالهم شغل
لين هاللحظة ميتين يبون يتزوجون والابو مو راضي
قلت لهم تزوجوا عند شيخ سني وافتكوا دام مذهبكم مايسمح ان
البنت تزوج نفسها او يكون لها وكيل ثاني غير ابوها طول ما
اهو حي
بس عقول نخي مع بازيلا ما يبون الا شيخ شيعي
قلت له تمسحوا واتزوجوا مدني
بعد ما في فايده
قلت خلكم رنوو

بيه تحجييت وايد نشف ريجي
بالنسبة لمشاعر المراأة والرجل اكتفي
ان اقول
الازواج يجب ان يكونوا شركاء في كل شي
يكملون نواقص بعض ويشوفون الدنيا بعيون بعض
الله لا يغير على المحبين
ويزيدهم سعادة وهنا
دمت بود
تحياتي

tweety said...

انا اعتقد ماكوا نظرية تعمم على الناس يعني اذا الشخص نفسه عادي عنده والبنت بعد تحس الاختلافات ماراح تشكل لهم خلافات المفروض خلاص يتزوجون
بس المشكلة ان الزواج بالكويت مو بين اثنين بين عايلتين وقبيلتين وكل من مدخل روحه بينهم

أعجبتني ادوار الزوجه :p
والزوج بعد نفس الشي أتوقع لازم يكون صديق وحبيب وزميل ومحفز وغيرها
شوف اشحلوك لما اتقول كلام منطقي
:p

Engineeroo said...

غالبا الزواج من مسيحية ما يأثر على الأولاد خاصة إذا كانوا عايشين في الكويت... بس زواج بين المذاهب... هذا سوف يؤثر على العيال بالمستقبل... و الإختلاف العقائدي مو هين و يفرق بين الإخوان و الخوات...

Яeema said...

الموضوع الأول
حلات الثوب رقعته منه وفي

و من قال الزواج من مسيحية زين؟
و من قال الزواج من غير كويتيه زين؟

تدري منو إللي ينضر ، الأولاد بالدرجة الأولي
و إنت أثرت هالموضوع من قبل و أتوقع خالصين منه من زمان

والمشاكل إذا ما إطلعت الحين بتطلع بعدين



ليييش مو مقتنعين بالطبقية بمجتمعنا؟



_________________________________________




الزوج والزوجة

تدري المشكلة الأساسية بمجتمعنا شنو؟



الزوجة عامود البيت إذا إهيا زينه ، قام البيت
و إذا إهيا أي كلام إنخرب البيت



الحياة مشاركة والزوج له دور أساسي غير تيمع لفلوس




جم واحد يقعد ويا عيالة و يدرس؟
جم واحد يراعي نفسية مرته؟
جم واحد يفهم مرته و شنو حدود عقليتها



و نسيت تصنيف مهم للزوجة بعد

نديمه

مدرسة

طباخة ماهرة

مدبرة منزل

عارضة أزياء ( جسم حلو )

مخططة للمستقبل

معاونة للزوج و إيده اليسار

مثقفة عشان إتعرف إتدرس
و إتناقش الزوج إذا بقي يناقشها



ما إتحس إنكم مدلعين؟





ممكن هلشي إللي بقوله جرئ إشوي



الزوج إذا أشبع غريزته و الله العظيم ما يلتفت حق كل هذا

يشوف مرته أحلا وحدة
أسنع وحدة

لأن هالشي يأثر علي نفسيته 100 %؛
فإذا إرتاح و إستانس شاف كل شي حلو



حتي طريقة الزوج للتعبير عن الحب من وجهة نظره الرجوليه البحته تكون بهالشي


هذي الزبدة

kitty said...

شوف يا عزيزى انت

الزواج مشارى مو بس ارتباط زوجين لالالالا
هذا نسب حتى العوايل ترتبط ببعض
يجمعهم مناسبات عديده
واذا انت وزروجتك الى من مذهب ثانى متفقين ما تقدر اتوفق عايلتين من مذهبين مع بعض ترى وااااايد صعبه وايد
شرايك انت ؟؟
تخيل الدواووين واهل الزوجه بالله شلون بتطبقهم ؟
مناسبات الحريم وقعداتنه ويمعاتنه ؟؟
صعبه وايد

الالالالالالالا اذا كانت العايله صغيره والريال مو وايد اجتماعى ولا له شغل باهله
حده بيته وامه وابوى هذا شى ثانى
بس انا شخصيا اشوفها صعبه

وحده قريبه منى حيل خذت شيعى واينن خوش ولد وايد وايد احبه
بس اهلها ما يبون الا اهوه يدش عليهم ما يبون اهله
والعكس صحيح اهله اهوه ما يبون الا البنت ما يبون احد من اهل الزوجه !!
:)
فمصخره الوضع
هذول باجر لى يابوى عيال شبصير

قالت ريمه
حلات الثوب رقعته منه وفيه

tweety said...

ريما
انطلاقتج اعجبتني سجلتي هدف :)
صاجة والله مدلعين الرياييل استغفر الله لو صايرين رياييل أحسن جان حاطين ريل على ريل ونتشرط

وبهذي المناسبة يسعدني اني امارس هوايتي المحببة : اليباب لووول
لا مالت على ريما ولا على اهلها ولا على عيالها ولا على حبايبها والسااااااااامع يقول آآآآآآآآآآآآمين
قولولولولولولولولولولولولولولش

3ateeja said...

انا ضد هذا الزواج ..لأني وبكل صراحه قعدت مع ناس تزوجوا عن حب وبينهم اختلاف مذهبي وما لقيت واحد مو متحسف
ولعيال يضيعيون بين المذهبين من الصغر لي مرحلة الزواج
اذا خطبوا سنيه قالوله ابوك شيعي واذا خطبوا شيعيه قالوله امك سنيه..الخ
اما بالنسبع لتسميات الزوجه
فمجموع كل المسميات التاليه =زوجه وهي ارقى واجمل اسم ومن بعده بالطبع صديقه :)
اتمنى من كل زوجه انها تكون صديقه لزوجها

Krakatoa said...

من المفترض اين يكون الزواج عبارة عن دمج بين شركتين لتأسيسي شركة واحده..ولكن قبل هذا هناك بنود في العقد توضح الواجبات والمسؤوليات المناطه بكل رئيس مجلس ادارة كل شركة..وتكون واضحة وضوح الشمس حتى لايحدث ما لايحمد عقباه في المستقبل..ونتاج هذه الشركة من البضائع( الاولاد) يجب ان يكون من غير شوائب حتى يتقبل المستهلك ( المجتمع) ولا يؤثر على جودته ايا كانت الظروف..!!

عموما الزواج من غير المذهب او القبيله او ..الخ من هذه الامور ترجع الى جذور الكويتيين والاصل في الموضوع الزواج من المتكافىء من ناحية المذهب الاصل الطبقة..الخ والشذوذ ما تفضلت به اخي الكريم

Q8ya said...

يبطون الجبد والله !!

اصلا ماله شغل ومحد راح ينضر لا الزوج ولا الزوجه ولا الاولاد لان ببساطه اذا كانوا الزوجين متفاهمين راح يعرفون اشلون يربون عيالهم ويتفقون من البدايه !! الاتفاق اساس كل شيء ماله شغل مذاهب والا مسيحي والا مسلم !!!


ياما مسلمين تزوجوا من اجانب مسيح واعيالهم احسن تربيه وانا اشهد على هالشيء لاني اعرف ناس وايد تزوجوا من مسيحيات ...التربيه مهمه واايد والتفاهم بيناتهم مهم .... صحيح ان الدين اساس كل شيء لكن يمكن يكسب اجر فيها هالمسيحيه وتسلم على ايده ..!!


وياما شيعي تزوج سنيه ومع العشرة المراه قررت تكون شيعيه وربوا عيالهم على هالمذهب مافيها شيء غلط كل واحد حر و بالنهايه مسلم ويشتهد ان الله تعالى واحد وان محمد عليه الصلاة والسلام رسول الله هذا المهم....والباجي كله على الله ...


======


الوصفة عجيبه وهذا الصح اللي لازم الازواج تمشي عليه ....يا حلات لالمراة لما تحس بانها زميلة وصديقة لزوجها تفضفض له ويشكون لبعض وينصحون بعض وياحلات الحب بيناتهم لي صار بليل والجو دافيء والمشاعر الحلوه تبتدي تكبر بالرومانسية والاحلى لما تصير عشيقة زوجها في آخر الليل...انا هالشيء اعتبره اساسي لحياة حلوه بين الطرفين لو نتمعن في معانيهم ما راح نخسر شيء بالعكس راح نكسب القوة في العلاقة..:)


يعطيك العافيه مشاري...:)

PearL said...

المشكلة الازلية بالمجتمع الكويتي
سني شيعي
شيعي سني

المشكلة اتوقع تعتمد هالشخصين المعنيين
واذا ما كانوا وايد متدينين السالفة راح تصير اسهل
بس المشكلة اذا مع الوقت كل واحد تدين على مذهبه

ترى لو تقرا عدل وتفهم عدل ما في فرق بين الاثنين الا باشياء بسيطة
لكن في ناس تفهم ان اذا انا بتدين لازم اغلط المذهب الثاني
ماكو احسن من التفكير المعتدل
بس المشكلة الناس اللي تفكيرهم نظيف ومثقفين شوي

ما راح اتكلم بهالموضوع لان الكل كفى و وفى

بتكلم عن الموضوع الثاني
الزوجة شنو مطلوب منها
شكرا لانك عطيتني الفكرة حق الموضوع الياي بالبوست :)
بس ليش الريال وايد يتطلب
يبيها زوجة وصديقة و عشيقة وخدامة وطباخة و عارضة ازياء و تفهم كل شي وبنفس الوقت على نياتها


بس الغلط من الاثنين بهالسالفة
وايد من الحريم يهتمون بنفسهم قبل الزواج
وبس يتزوجون جنهم ضمنوا الزوج خلاص
طاف كل شي

والريال مايوضح لزوجته باسلوب سنع
كله تحلطم بتحلطم

sologa-bologa said...

ما راح اقول الا كلمتين

الاولى
وخلقناكم من ذكر وانثى وجعلناكم شعوبا وقبائل
لتعارفوا
ان اكرمكم عند الله اتقاكم


والكلمة الثانية

ولا فرق بين عربي واعجمي الا بالتقوى


وبس

a7La eNG said...

لا تعليق لا تعليق لا تعليق

و سجل يا تاريخ
;Pp

مجتمعنا خليط و نحترم هالتنوع

لكن .. لا تغيب الحقائق يا مشاري
في أمور اذا قبلت بها تأثر على دينك انت
i cant say more :)))


الجزء الثاني .. قتلناااه بحث
و تعددت الاراء و كلها صحيحة
يقعد الزوج مع زوجته و يطلع اللي بقلبه
مشكلة اذا ساكت و مطلوب منها تنجم

غير ان النزعة الملكية اللي بالريال
تتعارض مع الضغط اللي على المرأة

و الباجي كله مع ريمااااااااااااا

و قلولولووووووووووووووش
;D

lawyer said...

اقووووووووول اخوي مشاري

ياختخ رمضان وصياااام مو مال مواضيع رومانسيه

عاااااااد هذا و انت الدين من دش رمضان و طايحله حب و رومانسيه

والي يعافييييييك حطلنا شي نستفيد شوي منه



و الي بيي يتزوج بكيفيه و الي ما يبي يزوج بكيفه
عمره ما سطورنا هذي حلت المشكله
او غيررررررررررت


يعني السني اذا رافض يزوج شيعي
عمره ما يقرا كلامك و يغير فكرته


كل من بعقله اضي يا مشاري
و انت عشان تحل المشكله هذي
انشاء الله بنتك اذا كبرت و الله بلغك فيها قوم زوجها شيعي

و الله يستر على من بغى الستر


و عن الزوجه
والله محد مقروووووووود غيرها
كثر ما تعطي و الريال يقول هل من مزيد

يا رياييل كبروا
عقلوا
صدو عن الحريم

عيل رياييل ما غير 24 ساعه بس يتكلمون و يتقرطمون عن الحريم
في اولويات وايد في حيات الرجل
غير حب المرأه

لان الحب و هالخرابيط من اولويات المراهق

lawyer said...

تويتي
مشكوووووووووووره على اليباب هههههههههههه


لانج قلتي لا مالت على ريما و اهلها و حيايبها

و اهي كلا تقولي انتي بنتي الصغيره

و انا حبايبها
:)

واي يابختي

Enter-Q8 said...

مشاري
واحد من الربع ملتزم
قاعد يقولي اللي مخرب عيالنا و يكثرون من سفراتهم
اهو الشيئ اللي انت ذكرته بالفعل
و يمكن السبب ترى مو من المرأه بل من الرجل ايضا

اللي يبي يعيش شخصية سي السيد و بس

يعني المداعبة الوناسه
تغيير الروتين بالكلمات على الاقل
تبهج النفس
عادي جدا سوي دقه بمرتك شنو المشكله
غيروا حياتكم يا جماعه

انتي وانت

كسروا الروتين مو شرط كسرت الروتين بخروج الى عشا

او هديه

في امور بسيطه جدا جدا

وماهي مكلفه

الكلمة بس الكلمةمثل ما تقلب الدنيا هم تأسر الانسان

وايد صرت رومانسي انا اشفيني

كأني الدكتور مروان المطوع

بالنسبة للموضوع الاول مشاري
وايد حساس و وايد عميق

وصدقني مشاكله وايد

و للعلم

انا عندي من الطرفين

يعني عندي واحد من الربع سني ماخذ شيعية

و واحد من الربع شيعي ماخذ سنية

المشكله مو فيهم ابد الله لايغيير عليهم

لكن في اهاليهم

فوق ما تتصور

والله يعينهم

اي و هالاثنين

كل واحد طالع ساكن بروحه

مع ان بيوتهم

تشيل عيال عيالهم

moklet-choka said...

المسألة أولاً و أخيراً تعتمد على الأشخاص المعني بهم وهم الزوج و الزوجة


لكن هل هذا يعني إن أنا من مؤيدي هالشي؟

لأ
ما أيده و لو شفت أحد مر بهالموقف بقول له يفكر مليون مرة و يستشير أهل الخبرة و اللي مرو قبله بهالتجربة و كل شي ممكن يخليه يتراجع عن قراره بشكل غير مباشر


بالنسبة للزواج من شخص من مذهب ثاني
أنا أأيد ريما بكلمتها
حلات الثوب رقعته منه و فيه
و أييد عتيجة إن الناس ما راح ترحمهم لما يكبرون
و أأيد أحلى أنج
إن في أمور لو قبلنا فيها بتغير من دينا

لأن الاختلافات مو اختلافات ممكن غض البصر عنها

الاختلافات جذرية
حتى العيد ماراح يعيدون مع بعض

و بعدين البنات و الشباب متروسين من كلا المذهبين
و كل واحد فيهم يقول الزين عندي
ليش تعقيد الحياة على إعجاب مظهري
؟

Fuzzy said...

باجيلك 3 حريم
توكل على الله وسوها
:)

العين الساهرة said...

الموضوع جداً حساس، إختلاف المذاهب له تأثير كبير في موضوع الزواج خصوصاً للرجل لأنه صاحب الكلمة الأقوى، ولكن ممكن الأولاد يغيرون مذهبهم عن قناعة شخصية وليس بالضرورة إتباع مذهب الأب، ولكن على من يريد الزواج من شيعية - ولا أقصد الإهانة- ولكن الدين الإسلامى الذى نزل على رسولنا محمد صلى الله عليه وسلم هو ما يجب أن يتبع وليس ما نراه هذه الأيام في المذهب الشيعى، فأقول للأخ الذى يريد الزواج من شيعية، فكر في أبنائك أولاً قبل أن تفكر في قلبك ، وتعرف على المذهب الشيعى وكيف يطبقون الإسلام؟ ثم قرر إن كنت تريد الإرتباط بها. فهناك الكثير من الحالات التى فشلت عندما رزوا بأبناء وأصبح الخلاف بين الزوجين على أى مذهب سيتم تربية الأبناء ؟ سنى أم شيعى؟ أنا أقول حلاة الثوب رقعته منه وفيه

بالنسبة للرجل فهو بجانب الصفات التى ذكرتها، يريد المرأة الخارقة، التى لا تتعب ولا تأن ولا تطلب

Яeema said...

tweety !!!!
يا حلوج حبيبة قلبي

يببي كلنا وياااااج

قلللوووووووووووووششش


تدرين يووووم شفت تعليقج مت مت من الضحك ، صووووت اليبباب طلعلي من الشاشة





lawyer

حياتي و روحي إنتي والله
بنتي و بنتي بعد

صح كبرتيني بس يالله إتمونين

هاهاهاهاهاها








a7la eng

حبيبة قلبي إنتي والله
كلامج علي راسي

and dont say more !
واصل واصل







moklet-choka

أشكر تأييدج لكلامي


و كلامج صحيح
و إللي ما ما يصير لازن إنسوي عشان إنتمرد علي المجتمع

الحجيه said...

السلام عليكم جميعا

بالنسبة للموضوع الأول أنا مع ريم حلات الثوب رقعته منا وفيه

__________________________
الموضوع الثاني
سبب مشاكله أن اغلبنا ما يعرف حقوقه وواجباته اتجاه الطرف الثاني بالنسبة لدينا الإسلامي
رعاية حق الزوجين :

*حق الزوج على زوجته أن تطيعه فيما أمر ما لم يكن في أمره معصية لله جل جلاله ، ,وأن تلزم ما يرضيه ، وتعظم شأنه ، وتحفظه في بيته وماله وعرضه وولده ، قال تعالى : { الرجال قوامون على النساء بما فضل الله بعضهم على بعض وبما أنفقوا من أموالهم } النساء / 34 ، وقال الرسول (ص) : { لو كنت آمراً أحداً أن يسجد لأحد لأمرت المرأة أن تسجد لزوجها } رواه الترمذي ، والمقصود هو توقير المرأة لزوجها أشد التوقير ، لا أن تسجد سجود العبودية وذلك لما له من الفضل عليها فهو القائم على أمرها ، المهتم بشؤونها ، المسئول عن حمايتها ورعايتها ، وتقويمها ، الآمر لها بالمعروف والناهي عن المنكر ، فإذا ما أدت المرأة هذا الحق ، واعتنت بهذا الجانب كانت النتيجة دخول الجنة فعن أم سلمه رضي الله عنها قالت ، قال الرسول )ص) : { أيما امرأة ماتت وزوجها راضٍ عنها دخلت الجنة } رواه الترمذي ، والرضا الوارد في الحديث هو المعتد به شرعاً من جهة قيامها بواجباتها وامتثالها أمر زوجها وابتعادها عما يغضبه ، ومسارعتها إلى إرضائه عند وقوع ما يغضبه منها ، والاعتذار إليه دون مكابرة حتى تسود المحبة والسكينة والطمأنينة فلو لم يراعي الإسلام هذا الجانب الإنساني فبلا شك لن تكون هناك طمأنينة ولا أنس ، ولا محبة ، وهذا يؤثر سلبياً على المجتمع ككل .

* أما حق الزوجة على زوجها : فلم يهمله الإسلام بل لقد نزلت سورة من طوال السور هي سورة النساء يوصي الله فيها بالنساء خيراً بداية من قوله :{ وآتوا النساء صدقاتهن نحلة ...}آية /4

وقال (ص) :{ استوصوا بالنساء خيراً فإنهن عوان عندكم } رواه البخاري في الأنبياء ، أي أسيرات ، فالأولى بالرجل الإحسان إليها والرفق بها ، سأل رجل الرسول )ص) ما حق الزوجة على زوجها قال : { أن تطعمها إذا طعمت ، وتكسوها إذا اكتسيت ، ولا تضرب الوجه ولا تقبح ولا تهجر إلا في البيت } رواه أبو داود ، فقد اهتم الإسلام بإطعامها وكسوتها وعدم جرح مشاعرها وكسر قلبها بالضرب على الوجه ؛ لأنه أشرف الأعضاء ومشتمل على أجزاء لطيفة قد لا تبرأ بالإيذاء ، كل ذلك مراعاة لإنسانيتها ، وتكريماً لها ، بل أمر بالعدل بينها وبين ضرتها إن كان لها ضرة ، قال تعالى :{ فإن خفتم أن لا تعدلوا فواحدة } النساء / 3 ، وقال الرسول (ص) :{ خيركم خيركم لأهله وأنا خيركم لأهله } رواه الطبراني بإسناد حسن.

ووجه الرسول (ص) الرجل الذي يكره من زوجته خلقاً أن ينظر إلى الجوانب الأخرى المشرقة مراعاة لإنسانية هذه الزوجة وتكريماً لها فقال : { لا يفرك مؤمن مؤمنة إن كره منها خلقاً رضي منها آخر } رواه مسلم .

ولما شرع الله عز وجل الطلاق والخلع عند استحالة الحياة بين الزوجين إنما مراعاة لإنسانية وكرامة المرأة لئلا يقع عليها ضرر وإيذاء من استمرار الحياة الزوجية مع عدم التوافق بين الزوجين , كما شرع الرجعة عند إرادة التراجع وبناء الحياة الزوجية كل ذلك مراعاة للجانب الإنساني لكل من الزوجين .

mishari said...

ردى راح يكون للجميع

فعلا مجتمعنا فيه طبقات مختلفة وكثيرة وعند كل تفصيل يوجد تفصيل
ولكن قناعتى الشخصية بهالموضوع لعدة اسباب المشكلة ان المثل حلاة الثوب رقعته منه وفيه مو بس على المذاهب ينقال على كل شى
انا استغرب من تفكير الانسان
قد يكون الكلام لما يطلع من شخص غير ملتزم وغير متبحر فى الدين نوعا ما ولو بشئ بسيط
اقول صح لانه الدنيا ماخذته والامور الاجتماعية غالبة على الوعي الدينى اللى عنده
لكن لما يطلع من شخص ملتزم يكون هالشى غريب بالنسبة لى

البعض قالوا ان رمضان والمواضيع الرومانسية ما يكونون راكبين مع بعض
بس انا اللى اقوله الدين تكلم بالرومانسية وبمعاملة النساء
وهذا شهر خير لازم الواحد يتذكر فيه كل امور الدين
وابسط شى حديث الرسول عليه الصلاة والسلام
((رفقا بالقوارير )) لكن الظاهر فى لبس عند البعض بنيتى بالكتابة

ولو كان الزواج من المذاهب المختلفة مشكلة
فمااعتقد ان انتوا احسن من علماء الدين بالكويت
لان انا باذنى سامع الدكتور خالد المذكور يتكلم بجواز الزواج من المذهبين وعندم وجود اى شبهه دينية فيه
ولكن المشاكل فيه اجتماعية بس
ومثل ما ذكر ان الاولاد لى كبروا يقدرون يحددون اى مذهب يختارون بعد اتفاق الوالد والوالدة
واللى يقول ازوج بنتى شيعى مثلا
انا اضمن نفسى شلون افكر وشلون احترم المذاهب الاخرى

الطبقية فعلا موجودة فى مجتمعنا
بس موجودة بشكل سخيف البدو بينهم بين بعض
وفخذ غير عن فخذ بالقبيلة الوحدة
والحضر غير
والعيم والحساوية غير
يعنى مجتمع الكويتين فيه يشكلون اقلية وتقولولى طبقية


(الموضوع الثاني)

رفاهية الحياة الحين بالضبط كالتالي
المرة كل همها ماركة ؟
محلات
مارينا
طلعة
وتفاخر بانها حلوة وسنعه

طبخ ؟ جذابة اللى تقول تطبخ الا ما ندر كل بيت فيه فوق الخدامة
وكل بيت فيه مدرسين من يدشون اليهال المتوسطة

والحب من اساسيات الحياة واولوياته ولا يعتمد على سن او عمر

والحريم الحين لو بمقارنة بسيطة مع حريم قبل تلقى وايد امو انحذفت من الاجندة عندها
ماكو طباخ
حتى الطبخ شئ اشرافى
واااااااااايد حريم زغللت عينهم الفلوس حق الريال علشان بس يغيرون حياتهم
ويكونون سنعين جدام الناس لان السنع عندهم فلوس
وطول ماانها حققت هدفها اكيد تقول بس كافى جذى

من واجب المرة تكون كل اللى قلته
ومن واجب الريال يكون طيب وحنون وعاشق لزوجته
ساعته لا زوجة ثانية ولا ثالثة ولا رابعه

tasty_as_berry said...

الموضوع متشابك لأن في حالة الحب .. راح يتأزم الشخص والحب اعمى فراح يفكر بقلبه بس ..

انا شخصيا تفكيري لبعيد مو ليوم ويومين وحتى سنة وسنتين .. أحب من كل قلبي لكن عقلي يظل المسيطر ..

وأحسب حساب اشياء لو ما تصير وصعبه الإحتمال أدري على حظي تصير ..

والزواج بروحه مشاكله متفرعة .. فليش ادخل نفسي في متاهات وعيالي ضايعين بالطوشه ..
-------------------

واتفق معاك ان الريال يتمنى يشوف مرته بجميع الاشكال .. وأنا أئيد هاذي الشغله :)

تحياتي ،،،

Om Jaber said...

مسكين يا قلبي أنا باع الهنا و شرا العنا0 متى راح نكبر على هالأمور بس خلاص حرام انفرق بين قلوب اختارت الحلال عشان يجمعها0

mishari said...

tasty_as_berry

اقولج شى مو مجاملة يمكن الوحيدة اللى خلتنى اعيد التفكير بكلامى
خصوصا بسالفة ان الزواج مشكلة متفرعة وفعلا العقل يخلى الواحد يعيد حسابته وايد

Om Jaber
القيود بمجتمعنا يا ام جابر مشكلة
ومختلفة حتى بين اصحاب المذهب الواحد ويبيلها قرون يمكن علشان تتغير