الطموح و العمل والمثابرة والالتزام وقليل من المشاغبة تكون الحياة ناجحة

Friday, February 23, 2007

حب سنة 70

الجزء الاخير

من أول لقاء نقدر نسميه عاطفي بين بدر ولولوة

بالرغم من الاختلاف بالشخصيات الا انهم لقوا قوة تجاذب كبيرة بينهم

وكأن نظرية الاضداد تتجاذب تكون حتى بين البشر صحيحة

كان اول لقاء المفروض بعد المحاضرة لمدة خمس الى عشر دقائق لاسباب غير مفهومة فقط استلطاف غريب

لولوة سألت بدر انت ليش جذى

بدر : شفينى

لولوة : لاتزعل بس شوى دفش وتضحك خايفة منه

بدر : الله يسامحج بس شسوى بيتنا كله رياييل شسوى

لولوة: وامك وينها؟

بدر: عطتج عمرها

تضايقت لولوة وحست بغباء شديد واهيا تسمع الاجابة

وترحمت عليها

توالت اللقاءات لايام وكانت العطلة الصيفية الاولي لهم كأنها نار مشتعلة ما يطفيها الا التليفونات اللى كانت تستمر لى ساعات

مرت سنين الجامعة وقال بدر حق لولوة

يا بنت الحلال انا شاريج وما عندى هالخرابيط

واللى ابيه بابكم

ردت عليه ما ادرى كيفك

قالها الحين كيفك يكون مستحية انتى تدرين فيني وتعرفينى

ضحكت ومن حرج الموقف سكرت التليفون بويه بدر

رد اتصل قالها انتى مينونة

واهيا تضحك تقوله والله مو قصدي بس لا ارادية والله اسفة بدور

اخ الحين صرت بدور كل هالسنين ما سمعتها لا انتى موافقة رسمى

تخرج بدر ولولوة تخرجت

وراح بدر يخطبها وابوه مستانس ان ولده تغير حس ان يعتمد عليه لان فعلا لولوة كان لها اثر كبير بحياة بدر

عمة بدر بدت الخطوة الاولى وراحت اتصلت فى بيت لولوة وردت الام ورحبت وكل شئ مشى على ما يرام

سألتها الام من وين تعرفون البنت ردت العمة والله نشدنا وانعتوا بنتكم بكل خير

الام سكتت وفهمت وقالت اللى يوفقهم مدام الولد دش من الباب

ابوا لولوة كان بداية المعضلة ورفض واصر على الرفض لان رافض مبدأ العلاقة بين الزوجين قبل الزواج

وتغيرت معاملته حق لولوة وقالها تربيتى كلها طلعت زفت فيج هذى اللى امنتها تروح وترد على كيفها صج مو كفو وحتى اخوان لولوة بدوا يتغيرون عليها بسبب الموضوع ويمكن هذا كان يعكس التناقض اللى كان يعيشه الواقع فى ذيك الفترة بين ايمان الناس بالحريات العامة وعدم تأثرها بالامور الشخصية وهذا اللى جعل اداء تطبيقها ضعف وخله مصيرها للفشل

طلع الاب فجأة بمعرس حق لولوة ولد رفيجه وغصب لولوة انها تتزوج ودارت الدنيا فى بدر وحس ان اختنق

الام الحبيبة الصديقة العشيقة راحت ؟

شلون امسكوها اخوانه

حاولوا يغيرون حياته سافر سنة بره يشتغل ورجع

كانت نفسيته تغيرت وشوى صار اهدى

زوجة اخو بدر قالت : بدر الحين ما شاء الله انت جامعي وخريج ووظيفة محترمة عندك ليش ناطر

تزوج بعد ضغط وحنة من اخوانه وابوه

تزوج بدر اخر السبعينيات تقريبا واستمرت زوجته معاه وحبها حب الزوجة الصالحة اللى ما ضرته بشئ

لكن ظلت لولوة مدفونة باعماق القلب

بدر صار ابو لبنت وحدة وسماها لولوة

وكانت من مواليد اخر الثمانينيات وذلك لتأخر زوجته بالحمل وعند الولادة توفت زوجة بدر

وانصدم بدر شلون يفقد الزوجة الحنونة الطيبة اللى عوضته عن كل شئ

ومع احداث الحرب الايرانية العراقية وانتهاءها

اغسطس 90 والا بالغزو الصدامى على الكويت

كان والد بدر يملك شقة فى لندن فسافروا الى لندن

واثناء احد التجمعات بالسفارة يلمح بدر وحدة فى اواخر الثلانينات شكلها نهائيا مو غريب

ويندفع ناحيتها مباشرة

ويسلم عليها لولوة شلونج

التفت وكأن البرق خطف قلبها

بدر

وسكتت بس تطالع عيونه

قالها: كبرت ؟

لولوة : لا تخاف طول عمرك بعيونى بدر اللى دعمنى اول مرة

والا ولد صغير معاها قالها بدر ولدج؟

ردت اى هذا بدر ولدى

بدر: وين زوجج

لولوة : ما تدرى ؟

بدر : لا

لولوة : توفى قبل لا تصير هالبلوة اللى احنا فيها

بدر: زوجتى توفت يوم ولدت لولوة

لولوة: بنتك سميتها لولوة؟

بدر : اى

لولوة : انا دريت ان زوجتك توفت الله يرحمها

بدر بدون تردد والمفاجئة المعهودة له

لولوة تتزوجينى ؟

لولوة : ماكو تليفون اسكره بويهك هالمرة وتضحك تخلص المشكلة اللى العالم فيها ونتفق انشاء الله

بدر : لا ما ابى انطر

لولوة : انزين مو مكان نتكلم فيه بموضوع جذى

نتفاهم بعدين

طلعوا والاتفاق كان على الزواج

بدر الحين خمسينى العمر نجح بكل مجالات الحياة ولولوة كرست كل عمرها علشان بدر الحبيب الاول وربت بنته لولوة احسن تربية وكانت لها الام والصديقة

انتهت

اشوفكم على خير مسافر لاسترخاء التام

عندى موعد مع ابو الهول

41 comments:

2 u ALL said...

جميله ورائعه النهايه ..!! تمتع مع ابو الهول ولا تنسى "منقرع" و"حب قرع" بعد تزورهم ..هههههه !! موفق.. وترد لنا بالسلامه أنشاء الله ..!!؟

حسام بن ضرار said...

حلوه

خاتمه متوبكه

اهوه ارمل و حبيبته ارمله وتتصادف شوفتهم بالغزو بلندن و يملج عليها

اعتقد هالتسلسل بالاحداث نادر جداً ان يوجد بالحياة

بس مثل ما قلت
مجرد قصه

محاولة طيبه و الى الامام

وتروح وترجع بالسلامه و سلم لنا على
Sphinx

magnoonah said...

تروح وترد بالسلامه


تسلم ايدك على هالحبكه بصراحه القصه وايد حلوه ما توقعتك راح تبدع وايد بس خاب ظني

اسلوبك سلس والحلو انك ما استعملت الخيال بالعكس اعتمدت على الواقع

تجربه ناجحه اتمنى انها تخليك تحاول مره ثانيه

بالتوفيق

Purplecious said...

وااااااااااااااي
خنقتني العبره
ما أصدق النهايه سعيده

بالجزء اللي طاف لما سألت وين راح تنتهي الاحداث حسيت انها بمصر
بس طلعت انت اللي بتروح هناك
ههههه


انزين ليش ما زوجت بدر جونير بلولوه الصغيره بعد مره واحده
ههههههههه
هههههه

تروح و ترد بالسلامه
وسلملنا على أبو الهول
:)

Qano3a said...

وااااي القصه حدهااا عجييبه ولهنا على هالقصص الصراحه غورقت عيني ... ياحلو الحب .. اتمنى لك اجازه ممتعه جدا جدا جدا لتأتينا بقصص نيليه رومانسيه

Nescafé said...

ترى حدها موطبيعيه النهايه
صح اهيا مجرد قصه.. بس حدي حبيت احداثها وحبيت الاشخاص اللي فيها

بالسلامه ان شالله

حسام بن ضرار said...

مشاري

نسيت اقول لك مقدماً


نورت مصر يا بيه

:):):):):)

PearL said...

تروح وترد بالسلامة

النهاية وايد حلوة
بس ياربي انقثيت من ابو لولوة

يا كره الاهل اللي جذي

خلاص البنت كانت على علاقة وغلطت
بس الصبي ماقص عليها

طق الباب يعني وافق


بس النهاية تشوق

المعلمة عهود المسيلم said...

تروح وترجع لنا بالسلامه
:)
قصه جميله واحداث قريبه من الواقع
ونهايه تكللت بالنجاح

بدايه موفقه في عالم القصص

الله بعطيك العافيه
:) لاتطول علينا

بنت الشاميه said...

توصل بالسلامه وسلم علي اهل النيل

القصة عجبية انا احب النهايات السعيدة وخصوصا اذا انتصر الحب
الله لا يفرق الاحبه في كل مكان

Anonymous said...

تجنن القصه وأحداثها تنع مسلسل
بس ياليت لو كان في تفاصيل

شكلك كنت مخطط مسلسل بعدين تمثيليه
وبعدين رست على فيلم

صدق نحن عندنا نقص في الرومانسيه

ياريت تتحفنا بين فتره والثانيه بشي جميل جذيه ينعشنا

ReLaaaX said...

اشوه ان النهاية سعيدة والا جان سويتها اليوم مناحه صجية موعشان القصة لا بس مود اليوم مش ولا بد



يحليلهم إذا بالسبعينات كانو 20 + 30 وفوقهم 7 سنين -->2007

=

57



وختي سلم قلوبهم والله !؟



انزين سؤال غبي .. الحين لولوة الصغيره وبدر الصغير يصيرون اخوان والا لأ ؟


--> ناوية تزوجهم بعد ;p

ReLaaaX said...

اشوه ان النهاية سعيدة والا جان سويتها اليوم مناحه صجية موعشان القصة لا بس مود اليوم مش ولا بد



يحليلهم إذا بالسبعينات كانو 20 + 30 وفوقهم 7 سنين -->2007

=

57



وختي سلم قلوبهم والله !؟



انزين سؤال غبي .. الحين لولوة الصغيره وبدر الصغير يصيرون اخوان والا لأ ؟


--> ناوية تزوجهم بعد ;p

ReLaaaX said...

امبيه صج ان مخي مقفل .. مايصيرون حق بعض !





اي صج .. تروحون وتردون بالسلامة ..





وان شالله عقب ماتردون بالسلامة ،، واجبك ينطرك

3ateeja said...

يا اخي تناقض عجيب ذكرتني بأبوي اول يقولنا انا وخواتي ..انا جاهلي اللي يقصد ببنتي ما ازوجه...رغم ان ايام ماكان بدر بالجامعه ابوي كان مدرس اد الدنيا وعنده ثلاث سيايير ....وكان عطلة الصيف يحجز فيلا بلبنان وينادي الحب والحبايب ...متخيل الوضع وشلون الفكر... شلون كان ....بس اشوه ابوي بالغزو ماراح لا لندن ولا بيروت ;p
وكنا بالديره ما تحركنا حتى سراديب ما رحنا ...اشوه لول....وتروح و ترد بالسلامه ان شا الله ويخلي لك بنياتك وبريئاتك ;)

Q8LoVeR said...

تروح وترد بالسلامه حجي

كثر من هالقصص الجميله والخفيفه

وماوصيك على البسبوسه
والفرغلي الطيب

بنت الديــــره said...

قصه حلوووووه ونهايتها المفروض تكون بنيودلهي هههههههه احس فيلم هندي

بس اكيد من نسج الخيال !!! او احد مار فيها بس مغير التواريخ < نيتها شينه :)

ماعلينا القصه حييييييييييل حلووه

ابدعت يامشمش

وتروح وترجع بالسلامه

ها لاتنسى صووغتي

ابي سحلب من الحسين :)

May said...

ثانكس عالقصة

أشوى نهايتها سعيدة

ماني فاضية للضيقة :)

* * *

وإجازة ممتعة

بس انتبه من لعنة الفراعنة :)

NewMe said...

اجازة سعيدة
وقصة إن دلت على شيء
فهي ترسم قلب مليء بالنبض
ليرى الدنيا وردية هكذا
دمت بحب
تحياتي

AseeL said...

وانا اقول وينك ما اشوفك
تروح وترد بالسلامة
وسلملي على ابو الهول والرغوة حبايبنا المصريين

قصة وايد وردية الله يهداك على قولة العزيزة newme :p

have fun

afyaa2 said...

قصه .. مؤثره ونهايه والحمدلله سعيده
وتروح وترد بالسلامه

Amal said...

نهاية جميلة,,,
الحمدلله
:)

sologa-bologa said...

موهبة يديدة
كتابة القصص

تروح وترجع بالسلامة

وكل عام وانت بخير

Mohammad Al-Yousifi said...

ادري لقافة , بس القصة خيال و الا صجية؟

ترد بالسلامة

Kuw_Son said...

حلوة حلوة حلوة القصة .. والله أحداثها تشد .. خصوصا ان القصة طابعا محافظ و نهايتها سعيدة جدا ..

الله يعطيك العافية

و ترد بالسلامة

tweety said...

هو هو شطاري عليك تكتب قصص !؟
والا دشيت البلوق عبالي داشه عند لوير

بس خوش قصة والله أهم شي أن اثنينهم أرامل ! جان خليت واحد منهم مطلق , أعزب :p

تروح وترد بالسلامة سلم على ابو الهول والتهول سلام جثير ..ولا تنسى اتييب لي وياك خوفو عشان أخوف فيه اللي يخاف ولا يختشيش ترى عيزت وانا أوصي كل من يروح ولحد يابلي اياه ليلحين عاد قلت ماكو الا أخوي ميشو
عاد كلش ولا وصية الاخوة الاعداء
:p
لقافة : رايح بروحك والا مع الاهل؟

3ateeja said...

tweety:
لقافه:رايح بروحه ماتشوفينه منشكح

the tooth.fairy said...

الله يغربل ابليسك بجيتني اخر شي

يا اني صايرة ام دميعة و على اطريف

يا ان القصة مؤثرة

Thanks Mishari ;p

ReD Lady™ said...

niiiiiiiiiiiiiiiiice

yslmoooo 9g 9g rw3aaaaaa

have fun & see u soon ;)

Mamloo7a Q8ia said...

يا سلام على هالقصة الرومانسية والنهاية السعيدة
قصة خفيفة لطيفة مثل صاحبها
تروح وتسترخي وترجع بالسلامة

Anonymous said...

نهاية جدا جميلة لهذا الحب الجنون

sOulvOice said...

عبدالحليم كويتي!!!



احتج ج ج ج وبشدة

لاتحاول ماكو ماجو ماجو




المهم كانت النهاية سعيدة هذا احلى مافي القصة

يعطيك العافية

White Wings said...

نهاية جميلة، بس رومانسية جداً
ونتمنى انك قضيت وقت جميل مع ابو الهول
كيف أحواله؟
:)

Anonymous said...

sooooooo romantic :)

but unrealistic :(

shakshaka said...

elqissa etyanennnnn ;)



mishariii ana ams raj3a mn ma9er:P kint 7adeee emkayfa malee khubor feeha mn 7-8 sneeen wo hathahma mataghayeraw:P

Ra-1 said...

عجيبة النهاية :)
جان زين كل القصص نهايتها سعيدة جذي :p

Nora said...

تعلمت من القصة شي واحد
ألا و هوا
.
..
...

انا اللي اسمي البنات و اهوا يسمي الصبيان

و لا فيها نقاااش البتة

بعد هذا اللي ناقص
;Pp

ترجع بالسلامة

العين الساهرة said...

يغربل إبليسك يا مشارى ، خليتنى أشاهق من البجى ، حسبى الله عليك حاطة فيلم روكى خمسة ما أدرى سته ( من كثرهم) بشوفه إندمجت مع القصة وقريت الأجزاء الثلاثة كلهم وكشت بالفيلم

قصة جميلة جداً جداً، يعطيك ألف عافية ، وإلى مزيد

على فكرة علقت على كلامك عند أم الحفيز ، مر إقراه

san3a_wa_laken said...

عجيبه ؟؟؟ وبس جنه خيال
انا ما ادري ليش بس وصلت لمرحله انى ما اؤمن ان في حب صادق ؟؟ لووول لا احد يفهمنى خطا بس ما احس ان الريايل يحبون من قلب ؟؟ يعنى لو حتى حب المراه بس ما يكون في نفس مقدار حب المراه له ؟؟
ماادري انا جذي افكر

AuThoress said...

محلاك يا مشاري، يبدو انك بدأت بمنافستي بالكتابة القصصية؟، موهبتك جميلة في "الحكي" والسرد...كما كنت/انت منذ سنوات،استمتع عند أبوالهول

براعم 1/6 said...

موضوعك معبر وله ذكريات جميله في نفسي .. الله يعطيك العافيه