الطموح و العمل والمثابرة والالتزام وقليل من المشاغبة تكون الحياة ناجحة

Wednesday, May 23, 2007

* تحديث*

عين ما صلت على النبي كنسلت السفرة

أفكار يجب ان تحارب

هناك أفكار مجنونة تسود مجتمعنا بل وهي سخيفة وتدل على سخافتنا وهي خليط من أفكار اجتماعية وتقاليد خاطئة

على بابا حرامي

لما سمعت قصة على بابا المنطق يقول ان على بابا اخذ الذهب من الحرامي بدون علمه يعنى أخذ شئ مو له يعنى هم على بابا حرامي مو شخص طيب ونظيف؟ صح؟ انزين بالكويت جم واحد صار الحين على بابا يبوق ويبوق يبوق وتطلع المناقصات باسم شركاته ويبلع من هالفلوس بطريقة خطأ قانونا وشرعا واخيرا يطلع الشخص نفسه ويدافع عن المال العام ( يا حلوك والله ويا زينك) فحرامى يهاجم حرامي والشريف ساكت والقهر الحرامي ينحسب على الناس النظيفة


الزواج القبلي

لغاية الان هناك من يفرض الزواج على الرجل من بنت عمه (( فرضا)) يروى لى احد الاصدقاء بأن صديقه تزوج ولم يري عروسه الا بالبطاقة المدنية اثناء تسجيل العقد بالمحكمة (( وين قاعدين )) شوية عقل يا ناس يخرب بيت الافكار البالية والتعيسة اللى تهمش حق الرجل من مشاهدة من سيتزوج او العكس البنت لها حق شنو ذنبها اذا كانت حلوة وتطيح بواحد اخلاقه تعبانة وفوق هذا جيكر؟

الطبقة المخملية

استغرب من بعض الاشخاص فى مجتمعنا لاعتقادهم انهم فوق الناس ويعتقد ان الدنيا او لنصحح الكلمة الكويت فقط وجدت له لوحده هو وعائلته وانسبائه ولو كان المقصد طيب لقلنا خير وبركة ولكن المقصد سئ وهو الهمة والعزم على السرقة ( والبوق ) والصور تنتشر بالصحف يعنى شوية حياء يخلى البنى ادم يحس بقيمة الارض اللى نولد فيها يا بشر وفوق هذا شوفة نفس ورفعة خشم على الفاضي وتلقى البيت الله يستر عليه

التعصب العوي

جميل ان يعتنق الشخص فكرا ويناضل من أجله ولكن على حساب وطنه يكون سخيف فلا السنة استفادوا من الشد الطائفي ولا الشيعة ازدادوا قوة بعد التعصب لافكار نصرالله

تدرون شلون انا مسافر وبارجع السبت اخليكم مع

ضرورى تسمعونها

اهواك click


55 comments:

Abdullah said...

ازيدك افكار غريبه بدت تنتشر لازم نقضي عليها :

على طاري الطبقة المخمليه .. في طبقة ثانية ما ادري شنو نطلق عليها .. بس هم باختصار ذيول الطبقة المخمليه .. اللي تلقاه يمشي مع صاحبة من سنه وعمره ويناديه "طال عمرك" .. ومن ابرز صفاتهم .. دمه خفيف .. صاحب نكته .. مستعد لان ينقلب الى اراجوز اذا استدعى الامر "تونيس" طويل العمر المعزب .. ومن صفاتهم انهم يحبون الأكل "بطينيـين" الى اقصى درجة .. ممكن تحبل لهم بـ عزيمة قوزي على العشى .. أما لباسهم فهو أكشخ من لبس طوبل عمرهم .. اذا لبس واحد منهم الدشداشه ما تلقى فيها كسره وحده والغتره فيها كيلو نشا والسبعة من كبرها واصله لي الخشم .. طبعا بزمات وقميص تحت الدشداشة الصيفية وجيبة طبعا فاضي .. من أطباعم الكلام الكثير والسوالف اللي من شرق الأرض وغربها .. يأتي بأحاديث وحكايات عجيبة وغريبة لم تسمع بها الى درجة تتشكك بينك وبين نفسك "هل انا عايش بالكويت؟" .. ومن طباعه ايضا الأنانية .. الا مع معزبة تلقاه خدوم الى اقصى الحدود ولا تتجاوز خطواته خطوات معزبه اللي يسفره ويدفعله اقساط سيارته ويسددله فواتير موبايله وممكن يشغله بعد الظهر في احدى شركاته بوظيفة صورية مالها داعي غير انه يخلص معاملات في بعض الوزارات .. نادرا ما تجده يحمل بوكه .. وقت دفع الحساب بالمطعم تجده يتعذر كثيرا بأن بوكي بالسيارة ناسيه .. هنالك من قام تسميتهم بـ "بوبي" كنايةً عن الكلب شلون يلحق ويـجلجس عند معزبه

Kuw_Son said...

أنا مو قاهرني إلا الزواج القبلي !!

الله يكون في عون الزوجات !!

و تروح و ترد بالسلامة

SHAHAD said...

اي والله يا كثر علي بابا عندنا !!
أما الزواج القبلي
انا أعرف وحده مالج عليها ولد عمها
مع السوالف سألتها عن شكله
جاوبتني بحسرة على ضحكة : ما شفت منه إلا ظله !!
ووحده ثانية امها كنسلت الملجة قبلها بيوم ليش انه الولد طلب صورة للبنت .. فـ طلع انه واحد ما يستحي !!
الله يعينهم في ما بلاهم من تخلف !
وترو حوترد بالسلامة خيوو
واي عاد هالاغنية نغمتي .. اموت بعبدالحليم : )

7osen said...

شكرا لك على . اهواك

عجيييييبه


وبالسلامة انشالله ياميشو


تحياتي

Smile said...

اول شي تروح وترجع بالسلامه
وثاني شي
تدري ان في وتحد من موليد 1990 تزوج بنت عمه من مواليد 1991
ليش علشان البيت الحكومه
وطبعا هو لا يشوفها ولا شي
انزيم مو هذا الزواج باطل
لان تخيل خمس سنين ما يشوفها ولا يكلمها ولا يدري عنها ولا شي
الحمد الله والشكر

shakshaka said...
This comment has been removed by the author.
shakshaka said...

kint abe a3aleq 3al post ele 6af bes legait post yideeed .. ilmuhem ana etsadeg 3ad elrayal 3indi lazem eseer fawthawy laken el mara laa:P y3nee chenek sabniii lo geltlee mara fawthaweya elrayal 7alata shakhseta etkooon chethee sara7a .. agoolik 3ugob magarait el 5 things mishariii elooglik enta banka wo wezar wo ga3da 3al artth mal awal 7adek hehehe

wo kint nawya a3aliq 3la hal post loma el last part 7araitni chan a7tarrrr enek betsaferr we7na ga3den eb hal 7ar... latkhaf 3aini moo 7ara hehe itroo7 wo tirja3 besalama inshalla, wo havefun

حسام بن ضرار said...

استعينوا على حوائجكم بالكتمان يا مشاري

:)

الله يحفظ الجميع من العين



يمكن التكنسل خيره

nachla said...

كلامك حلو يا مشاري
ودي انام واصحى الاقي الكويت نظيفة
نظيفة من كل هالاشياء الدخيلة اللي خربت علينا

يعطيك العافية

expired said...

مشاري
مادري ليش الكويت فيها لويه
مرات احس انا احنا وايد مبتكرين
ومختلفين

بس احيانا ثانية احس انا
متكبرين
ومتخلفين
والا انت شرايك؟

بنت الكويت said...

كل شي صووب وسالفه الزواج
القبلي
يعني شنو هدف من ان كل طرف ما يشوف
الثاني

واهم شي ان احنا مو تبع هالسوالف بس نسمع عنهم
والله يكون بعونهم

بـركـــــان said...

بعد التحية

اتفق معك بجميع ما ذكرت .. و قد يكون بركان مخملي من خامه نادره :)


ثائر دائما

فراوله said...

مساالخير والكرامه...يعطيك العافيه على طرح مواضيع مهمه مثل هذى..بصراحه ودنا بيوم وليله تتصلح بعض الأمور والله مو كلها بس بعضها

وتصدق لوتصلح بعضها جان صارت الكويت غيييييييييييييير بكل ماتعنيه الكلمه

تروح وترجع بالسلامه
وراح توحشنا كتاباتك الجميله

:)

om-bukhnag-zare said...

أخوي مشاري ... تستطيع ان تقول امراض يجب ان تعالج أو أشخاص يجب ان تحارب

المشكلة عندما نقول أفكار

فالفكر أو الفكرة تعني: أعمل الفكر في شي ورتب بعض ما يعلم حتى يصل الى نتيجة
بالله عليك .. كل ما نراه من سلبيات وسرقات وأمراض احتماعية نطلق عليها قسرا عادات وتقاليد وتعصب طائفي أعمى
هل أعمل العقل فيه ؟؟!!ا

أشك في ذلك !!ا

وعلى طاري سفرتك
مثل ما قال أخونا حسام إستعينواعلى حوائجكم بالكتمان
ما عليه لعله خير وعشان إتعلم مره ثانية ما اتعلم الفريج كله :)ا

Aldenya said...

المشكلة باللى يطبلون لهم

الله يفكنا منهم

والمشكلة ان كلنا ندري بشلة على بابا وتوائمه اللى كل مالهم ويزودون وفوق هذا يسرحون ويمرحون وبمال الكويت يلعبون

..

شكرا على " أهواك "

:)

Breeze said...

كل نقطة ذكرتها ورائها هدف توعوي واعظ ..

الدنيا ماشية على قولتهم .. :\ و كل مالنا و بالنااازل ..

:(

عسى الله يحفظ ديرتنا ..

Almas said...

معقول ليلحين في هالنوعية من الزواج

أمبيه .. شلون بتعيش معاه وإهي ماشافته ولا تناقشت معاه

مو المفروض يكون فيه قبول بين الطرفين

لأ .. وايد حرام

لأن هذي حياة وطريج طويل

حرام الأهل يسوون جذيه

تروح وترجع بالسلامة

a7La eNG said...

وييييييي تكنسلت مرة وحدة
!
انزين اصفط سيارتك بالمطار
و احد يوصلك و انخش لي يوم السبت

و رد اخذها من المطار .. قول لهم يوعان والله يا شين اكل الطيارة

;Pp



الحرامية .. ما شفناهم يبقون
شفنهاهم يتهاوشون
:/

الطبقة المخملية في منهم ناس مو مستوعبة لي الحين ان الرووس تساوت

غير ان بعضهم ماله منها الا الاسم
لازم يجيل بيزااااات عشان يصير طقم
;D

الضحك بالزواج القبلي
لانه غير ملتزم بالعرف الاسلامي

بقول سالفة يصير ؟

الوالد عنده بالشغل واحد طيب و ولد حلال .. خطب

فااا ابوي يسأله هااا عسى قعدت معاها و انشرح قلبك و من هالحجي ؟

رد: جان زين بو حمد ما نشوفها الا ليلة العرس

يعني حتى مو الملجة ابييييييه

قام ابوي و شيش الولد ههههه ما يصير و شنو هذا لا شرع لا دين يقول جذي
هذي مرتك خل اختك تتفق معاها


مرت الأيااااااااام

سأله ابوي شصار ؟

والله بو حمد دقيت جم مرة يشيله ابوها او واحد من من اخوانها

و
اسكره
!!!!!!!!
مستحي يقول حق اخته بعد عمري

هذي حاله بالله .. يا حليله صار مغازل شرعي ههههههههه


----
التعصب مرض لا يسمع فيه الشخص الا صوت عقله .. و طبيعي نتيجة زحمة الأصوات الفردية .. الجنووون


:)


خوش سوووووووونج كلك ذوق

2 u ALL said...

أحنا ما عندنا علي بابا أحنا عندنا "علي الخليفه" تروح وترجع بالسلامه ...!!؟

Krakatoa said...

بالسلامه يامشاري...ودير بالك..من الدرب
===
التشدد الديني والتعصب المشكله حاليا يأتي من طرفين ويكون المعتدلون بالنصف..ومرات ينحسبون على السنه ومرات ينحسبون على الشيعه وماكلين تبن

Anonymous said...

سلام مشاري

انا للاسف ما عندي يوزر بس حبيت اشارك
صراحة انا من المتابعين حق مدونتك و معجب بافكارك الحلو
صراحة النقاط الي تطرقتلها وايد مهم ان الواحد يوقف عندها و يمنع تفشيها بالمجتمع ... و خصوصا التعصب الديني
بس انا عندي سؤال اذا ممكن
شنو العلاقة بين قوة الشيعة و التعصب لافكار نصر الله مثل ما ذكرت

انا اعتقد ان نصرالله زعيم مو بس حق الشيعه نصرالله زعيم لكل العرب و المسلمين ..مثل الشهيد احمد ياسين و الشهيد الرنتيسي هؤلاء زعماء لكل العرب و المسلمين و قضيتهم قضية كل العرب و المسلمين

و شكرا

FatmaQatar said...

لوووووووولز افا عليك خيرها بغيره ان شاء الله ;p

قفشات حلوه ولد عمي..
على طاري الزواج القبلي,,
لأن امي وابوي مايصيرون لبعض كلش !
أنا من مؤيدينه XP
بس مو هذا الي ما يشوفها الا بالعرس
@@ وين قاعدين

ReLaaaX said...

مواضيع السياسه مالناش دعوه فيها :)


--

والزواج القبلي


المشكله اللي اكبر منه لما يصير الاحتكار للبنت بس انها تاخذ ولد عمها وولد عمها لو ان شالله شياخذ مايهمهم !؟



موضوع متخلف .. ويبيله وقت عشان ينمحي موليه من شبه الجزيرة العربيه ---> صرت شاعره :)



--


وتروحون وترجعون بالسلامة

قماشة said...

مادري متى بتنظف الكويت من هالأمراض الاجتماعية

الله يحمي ديرتنا من كل شر

محـــــارة said...

للأسف مسؤولينا غالبيتهم علي بابا والله يعين الكويت على حراميتها

الزواج القبلي بصراحه توقعته اندثر وانصدمت أن بعده موجود نبي حل وسط مانبي يتزوج وبعد شهور أهله يدرون عنه ولا عاد يتزوج باسم الدم .. أهوه بيتزوج دمها ولا روحها !!! وهي كذلك

الطبقة المخمليه أصلا من كثر ماهي حاسه أنها المالكه والمسؤوله عن البد تلقاها أطالع البشر بنصف عين مو عاجبينها وتعتبرهم متطفلين على خصوصياتها

بالنسبة للتعصب العوي ساعات أتمنى أني أكون متعصبه لفكره معينه بس الي فيني طبيعي وهوه أني أسمع حتى الي يختلف معاي وماعندي مشكله أقتنع بكلامه لو كان منطقي .. ذكرتني ابوست كنت كاتبته عن الشيخ بن باز رحمة الله عليه .. فعلا أحنا ضايعين بالتبعيه الي قاعد كل جماعه تمارسها والمشكله بدون منطق وبدون حب لهالبد

وتسلم .. مدونتك راائعه بمضمونها واصل محتاجين نقرأ أفكار ناضجه وواعيه أخوي الكريم

layal said...

الالوليين قالوا
لا تبوق لا تخاف
الحين يقولون
بوق ولا تخاف
النائب اللي يملك الفندق ومأجره عشان يخش فضيحته
يوقف في مجلس النواب ضد قرار البارات في الفنادق 3 نجوم
نسى روحه لكن الناس ما نسته

charisma said...

مره ثانيه لا تقول انك مسافر
لما ترجع قول
:))

ما عليه خيره يا مشارى

على طارى الزواج القبلى وحده معانا بالدوام
مالجه سنه
ملجه هااا
تخيل ما تشوفه ولا يشوفها واهو ريلها خلالاص
بس ممنوع لماااا الزواج
عرس يعنى ياااالله يقدر يشوفها

المراد النهايه تزوجت شهر جان تطلق!!!

طلع ولد العم يحشش!!!

لا تعليق

MANAF said...

اي والله يا فرحه ما تمّت

حياك عندي بالمنتزه

:)

وماله داعي تشقح

ولا ادخلك بالدبّه

واحط فوقك شرشف

ندخلك زياره

خل نتشمّس نغير لونّه

نعمل برونزااج

:)

نحط عصير جزر وحنّه مع شوية بيره

والعياذو بالله

:)

تماااااااااااام



يالحبيب

الناس طايحين له زواج المثلييين



اي قبائل

واي بنت العم لولد العم

قدييييييييييييييييم

:)

Mishari said...

Abdullah :اى هذى الطبقة تشوف صورهم بالجرايد وين الشخصية المهمة تشوفه لازق بقفاه والمشكلة انهم يشكون وخيطون ومقيولة قبل با عبدالله

عبد الشيخ شيخ


وخلها على ربك

Mishari said...

Kuw_Son : تصدق اللى يقهر انهم ما يشوفون اخلاق
دين
شهادة

يعنى ولد عمج غصبن عليج تاخذينه

Mishari said...

SHAHAD : عيل انا اطلع قليل اللى عزمت مرتى قبل الملجة
لوووووووووول

Mishari said...

7osen : من اروع الاغاني اللى مروا بحياتى اذا مو افضلها

Mishari said...

Smile : اصدق وسمعت بهالسالفة وسمعت انهم ياخذون معاشات من الشؤون 300 دينار عفية نفس عليهم شلون راضيين على نفسهم

Mishari said...

shakshaka : من عينج تكنسلت السفرة قل اعوذ برب الفلق
:))

بس الفوضى بالنسبة لى جزء من الابداع :D

Mishari said...

حسام بن ضرار : صدقت يا بوضرار
عاد والله قايلها بسلامة نية

Mishari said...

nachla : الامور الدخيلة لو داخلة من ناس غريبة قلنا ميخالف ولكن داخلة من اهل البلد يعنى اهم يابوا العيب

Mishari said...

expired : الثانية وايد ادق احنا حملة رايات التخلف والعقد بعد

Mishari said...

بنت الكويت : الظاهر يسوون للطرفين اغراء

Mishari said...

بـركـــــان : لو كان بركان مخملى لكان تحرك وعمل شئ لوطنه ولكنه خامل ومكرش وخايس وبس يتكلم ويلعلع بلسانه

Mishari said...

فراوله : ما كو شى يصير بيوم وليلة بس لما نتخذ قرار ونقول نبى ونكون ايد وحدة ذيك الساع كل شى يتغير

Mishari said...

om-bukhnag-zare\

اى والله الفريج كله درى

،،،،

العقل مهمش فى واقعنا وحالنا مزرى بسبب ان اللى يقودنا هم اهل الذمم الواسعة مع الاسف

Mishari said...

Aldenya : العفو
ولكن فى انا اشوف ان فى امل ان يردون بجحورهم بالانتخابات الياية والله يستر

Mishari said...

Breeze : الله يحفظها بس دعاء من غير عمل

شالفايدة
رب العالمين يقول اسع يا عبد وانا اسعى معاك

Mishari said...

Almas : معقول ونص شوفى اذا تعرفين احد من القبايل وسأليه وشوفى شردون عليج

Mishari said...

a7La eNG : والله انا اقول زين سوى الوالد

بس الظاهر عينج :P

ومانى صافط سيارتى انا اعرف اواجه الاحرجات بصدر رحب وابتسامة شقاقية

:)))

Mishari said...

2 u ALL : عندنا على الخليفة

ومحمد الصقر
واحمد السعدون
وجمال العمر
ووليد العصيمى
والقائمة تطول

والله لا يؤاخذنا ان اخطئت

Mishari said...

Krakatoa : المعتدلين مو بس ما كلين تبن
الا متقندرين

Mishari said...

Anonymous : لو ترجع بالارشيف عندى تلقى اثناء الحرب كنت امتدح نصرالله ولكن مع الاسف فى الاحداث الاخيرة فى لبنان والحالية كأنه هو شخصيا لا يريد للبنان ان تهدأ فهو ليس بالقدوة التى يجب ان تجعل الامور على هدوئها وسيرها
اتذكر احد المراجع الشيعية المعتدلة
وهو السيد الوائلى كان مثالا للاعتدال والتبادل الفكرى السمح
اليس هناك فرق؟

Mishari said...

FatmaQatar : الزواج القبلى لحفظ القبيلة وما اعرف ايش هم هذا انا ضده
ولكن الفكرة شنو ما يشووووفها وين قاعدين

Mishari said...

ReLaaaX : خلج من السياسة :)

المشكلة هذى صارت ازلية ومخلية الناس بحوسة ونسبة الطلاق ترتفع وهذا احد اسبابها بسبب عدم التكافئ

Mishari said...

قماشة : ما نقدر وكلما له والشق يكبر

وعلى الله

Mishari said...

محـــــارة : شكرا ومواصلتى بدعمكم لى

والنظرة النص عين هذى من الناس المخلمين صدقينى دليل نقص وليس كمال منهم
والواثق ينظر بعين مستقيمة

Mishari said...

layal : هذا يسمونه فنجرى

بالمصرى

يعنى فوق شينه قوات عينه

Mishari said...

charisma : استغفر الله الله لايبلينا باهلنا يا معودة
وعلى قولتج انا نازك :p

الزواج اهنىىىىىىىى الواحد يدور النزاكة :))

Mishari said...

MANAF : يعنى اشوة انك تعرفنى عدددل

بيت
دوام
قهوة
نادى
وكرة بالسكة

منتزه وين ؟؟؟؟
بعدين ليش بالدبة منوووف
الله يسامحك هذي اخرت العشرة

بعدين الله يقرفك زواج مثليين
يخرب بيت قرفهم