الطموح و العمل والمثابرة والالتزام وقليل من المشاغبة تكون الحياة ناجحة

Sunday, June 03, 2007



مرينا اف ام تعقب و أقول مرة ثانية مذيعنكم يا مرينا

فى موضوع كتبته بتاريخ 14-5-2007 ( ايا الفهرة) اثار حفيظة الاخوان فى مارينا مول وكان هذا الايميل منهم ولكم المشاركة

طبعا اقدر منهم الرد علي الموضوع واشكرهم وهذا دليل تطور المحطة


مساء الخير مشاري

لفت انتباهي كلامكم وأرائكم حول برنامج الديوانيه اللي يبث على محطه مارينا اف ام، وبصراحه بالرغم من انه كان نقد إلا اني حسيت الاهتمام منكم. احنا كلنا نهتم ونحب نقدم برامج تعليميه وتثقيفيه للمستمع وهذا شي احنا درسناه اكاديمياً. لكن ما يمنع لما نقدم شي بسيط ومسلي بنفس الوقت، واذا كان على بعض الاراء او التصريحات من المستمعين فهذا شي راجع للمتصل نفسه لاننا ما نقدر نوجه المستمع او نخليه يقول اللي احنا نبيه، هذي آراء وكل راي يختلف من واحد للثاني.

تحياتي لكم ويعطيكم العافيه

شعله القرشي

ـــــــــــــــــــــــــــــــــــــــــــــــــــــــــــــــــــــــــــــــ

ما سبق كان ايميل من الاخت شعلة معد برنامج الديوانية الذي يبث فى محطة المرينا اف ام ولكن ما غاب عن ذهن الاخت الكريمة بأن هناك فعلا مشكلة فى طريقة تعامل المذيعين التى تقول عنهم (( اكاديمين )) ولا اعتقد ان الاكاديمية فعلا تحمل صفة الاستهزاء بسيدة كبيرة فى السن
او اطلاق نكات تحمل فى طياتها معانى قليلة ادب او ذكر بلد كتايلاند بطريقة (( عبيطة)) والكل الذي سمع الحلقة يعرف ما اقصد
يعنى استغرب من ناس (( اكاديمين ويحاولون يقدمون الترفيه)) للجمهور يستخدمون هذه الالفاظ او كمية الاستهزاء بنساء كبيرات فى السن
قد اتفق معك اخت شعلة بأن لا يمكنكم تقييد حرية المتصل ولكن حرية المذيع بعدم اطلاق ما هو مخل ممكنه
فرحنا كثيرا لان مارينا اف ام حملت راية الاعلام الخاص بطريقة مبتكرة وفعالة وجميلة ولكن الكم الهائل من العبط الاجتماعي الذي يحمله المذيعين فى الاستهزاء انكر هذه الرسالة
ومعلش اخت شعلة وين الشغلات التعليمية ؟ انا اشوف المحطة بس اهداءات ونواح مراهقات؟ وين الثقافة ؟ الا وللامانة من بعض الفواصل بهل تعلم ؟ يا ريت تنورينا

الاخوة المعلقين الباب مفتوح لكم بالتواصل من خلال المدونة مع المارينا لانهم مشكورين تفضلوا بالتواصل معانا من خلال المدونة

63 comments:

عثماني said...

مساك الله بالخير اخوي مشاري

شكلي مبلط عندك في المدونة و الدليل ان ما صار لك ثواني من نزلت البوست و على طول عطيتك التعليق

انا اقول مشاري ان احنا في عصر الانحطاط .. عصر فية المؤدب يكون عبيط ... و المنحط ..حبيب الملايين


دمت مبدعا

Purplecious said...

و الله يا مشاري أنا برنامج الديوانية سمعت عنه وايد بس ما سمعته الا ثلاث مرات او أربع لان وقته حزة دوام و ماني هاده شغلي عشان أسمعه

أول شي استانست عليه و ضحك و غشمره بس بعدين حسيت جنهم مصخوها

ذكرني ببرنامج كانوا يحطونا قبل في
super station "Bug & Baldy"

نفس الطقه بس هذاك كان عادي يسكرون الخط بويه المتصل و يبهذلونه

أكو برنامج حلو يحطونه الساعة 5 العصر مرات اسمعه اذا كنت طالعه مال اكوافينا مواضيعهم دايما عن الصحة و الرياضة و اللياقة و هالامور

بس كلامك صح بالنسبة للمذيعين
احترام المذيع حق نفسه يفرض احترام المستمعين له

مشاري ممكن طلب
مافي مجال بوكس التعليقات يكون أرهى شوي؟
يا ليت لو تكبره شوي أكون شاكره لك

White Wings said...

زعلانة أنا منك أساسا
اقرأ تعليقي على البوست السابق
:)
لما نتصالح نتفاهم
:)

أبو إسحق said...

عداك العيب اخوي مشاري .... و البرنامج علاقته بالجمهور مثله مثل العلاقه بين الناس ... اللي يعامل الناس باحترام يلاقي الاحترام و العكس ... يعني مثل الياهل اللي مدرسه اذا خلى الحصه سبهلله راح تتم سبهلله و من الصعب بعدين التحكم في الطالب اللي تعود على هذا السلوك من المدرس ... و الاذاعات مهمتها الارتقاء لا الانحطاط

شكرا لك

AseeL said...

غصب يستخفون دمهم بهالبرنامج
احاول اضحك بس ما اقدر
وكله ملاقة واسفاف وثقل دم وفهارة

Q8DOLL said...

منو المذيع الأكاديمي ؟؟
طلال الياقوت أكاديمي ماقلنا شي
بس الأخ خالد الانصاري ؟؟ اللي اعرفه عنده دبلوم وأظن بالحاسب الآلي صج درس بأمريكا عشر تعش سنه لكن رد بدون شهاده ولا شي
انا بالعكس ماني ضد برنامج الديوانيه لانه فعلا فيه ترفيه للناس وضحك وايد
لكن في شغلات فعلا يتعدونها
مثل نقزات الياقوت على خالد بسالفت المغرب وتايلند خوو ندري ان مطيح هناك بس النقزات كلش مو بريئه
ومادري شنو الهدف منها
ترى البرنامج حلوو بس يبيله شوية تهذيب هذا رايي مشاري

What Will Be , Will Be .. said...

مذيعين الديوانيه

سمع اذوني

تطنز واستخفاف

واستهزاء بالناس

ومحاوله يائسه لثقيلين الطينه ان يكونوا خفاف الظل

لكن املهم

3ateeja said...

رغم اني مو من المتابعين لا لمرينا اف ام ولا لبرنامج الديوانيه الا ان له شريحة متابعين وبالاخص اللي رادين من المدرسه الظهاري ومنهم الكثيرين من الاكاديميين و الشباب اللي يدورون النكته والسالفه ... اي استخفاف غير مقبول اي استهزاء كذلك ..ولكن بالمناسبه مرينا محطه غنائيه بالدرجه الاولى اي ترفيهيه ويجب ان تكون اغلب البرامج اللي فيها ترفيهيه فبعض الاحيان تتخطى الغير مسموح وتطرح برامج حواريه ويأتيها مقص الرقيب مما يجعلها تتراجع وهذا ليس بأيد المرينا ولا بغير المرينا هذا من ضمن المسموع الذي لم يوضع له قانون حتى الآن
نطاااااااااااالب بقانون للمسموع و المرئي
ترى فعلا انا ما اتابع مرينا مو اتغشمر :)

SAJA.S said...

الناس تبي جذي
يبون اكثر نسبة مستمعين فلازم يسوون
جذي

charisma said...

احبها مرينا اف ام
سوت تجديد
اتابع نغم الصباح الصبح
والدوانيه لما اطلع من الدوام

مشارى كلامك صح اوكى بس صدقنى الناس تبى جذى
الى يتصل يعرف شبواجه
طريقت البرنامج هزليه
فلا تتصل اذا ما تبى
بس ماكو واحد ولا وحده اتصلوا كانو جد ولا حسيت انهم ازعلوا!!

الكل يتصل يضحك ويسكره يضحك
فى فئه بالمجتمع يعجبها جذى

يمكن انا وانت ما نتقبل على سبيل المثال
بس ترى كل متابعين الدوانيه والمشاركين فيه يبوون جذى صدقنى

Anonymous said...

بما إنك تطرقت لموضوع هالبرنامج أنا حابه أقول شغله وايد حزت بخاطري

آنا مو من المتابعين لهالبرنامج بس مره بالصدفه سمعته و اللي صدمني إنه عندهم واحد يقلد أصوات و شخصيات و قام هالأخ و تكلم مع تأتأه مصطنعه مما جعل المذيعين يضحكون بطريقه هستيريه

آنا إنسانه فيني
speech disorder (stammer)
و موضوع مثل هذا حساس بالنسبه لي خصوصا إن لا حكم لي عليه. شي مخلوق فيني لما سمعته يقلد تأثرت حيل و تأثرت أكثر من طريقة ضحكهم عليه

برنامج مثل هذا و مذيعين مثل هذول ما يستاهلون هالمساحه من البث

بوغازي said...

ملاحظة متعلقة بكل البرامج الإذاعية إلي على الهوا.. أنا اعتقد بأن المذيعين والمذيعات عليهم مسؤلية كبيرة في التعامل مع ما يطرحه الجمهور (وخاصة مذيعين ومذيعات المحطات الغنائية بسبب نوعية الجمهور الي يتصل على الهوى)
..
لازم يكون فيه توجيه تربوي واجتماعي... يعني بطلولنا من سالفة إهداء حق (حبيبي).. ولا (حبيبي) زعلان علي... ولا (حبيبي) خاين... ولا ... ولا... ولا...ترا هالسوالف ماسخة... ومالها طعم... وتخدش بحياء العائلة إلي قاعد تسمع... ومو من عاداتنا ولا تقاليدنا ولا تعودنا عليها ولا نبي إنتعود عليها
.
أما في موضوع برنامج الديوانية... فالشباب المقدمين مجتهدين والله يعطيهم العافية.. بس ودي أقول بالإضافة للملاحظات السابقة، يريت يبطلون من سالفة المغرب وتايلند (والله يعطيك العافية) لأنها مصخت وباخت... وإلي من الجمهور المتصلين ما يعرف حدودة وشنو المفروض إلي يقولة وإلي ما يقولة على الهوا خل يسكتونة ويقطعون عنة الخط، علشان غيرة ما يتجرأ
.
وشكرا

زهر الخُزامى said...

ما اقول الا طلال الياقوت في هالبرنامج ضيم وظلايم

اسفاف ما بعده اسفاف هالبرنامج مع احترامي.. سماعه مضيعة للوقت ما اشوف ان فيه اي متعة واستمتاع

ام الحفيز said...

مشاري

اقول لو يفكووووووونا من البدليات جان احنا بخير.....ما خلصنااا من مسلسلات رمضان وبدلياتهم حتى انجابل ونسمع بدليات عوير وزوير والمنكسر والي مافيه خير في الاذاعه خلووووووووووووه ويستخفون دمهم بعد اشوووواه انها دقمه نفقصها ونروح البرنامج الاول لاذاعة الكويت الي فيها السنع والمنع والثقافه والعلم وخصوصا اخبار جهينه ونافذه على التاريخ
ولا مارينا اف ام يادافع البلى لا تجهيز ولا اعداد وكل شغلهم ارتجالي و على الهبني وحيث ان الاذاعه مسئوليه ورساله موجهه مو جااااي ضحى وكلام وحجي بربس ماله طعم...تقول يهااال قااضبين مايكرفون بمخيم قطيعه لجووووووووونه لجت العالمين
ودوهم دوره ولا قبره يتعلمون اشلون الاسلوب الاعلامي في الالقاء والمحاوره
مو خذووووووووووه فقلوووووووووه

محـــــارة said...

أهي على برنامج الدوانية اسمحلي أقولك القناة أنا أشوفها للمراهقين بس .. استخفاف وكركرة وبذائه .. كلش ماتعجبني

حسام بن ضرار said...

والله غير البي بي سي العربية ما قمت اسمع

Almas said...

أول شي قوة شلونك

وثاني شي الله يبرد جبدك على هالموضوع

المارينا أف أم أحب أسمعها وخصوصا برنامج الديوانية .. خفيف ومواضيعه اجتماعية جدية لكنها بطريقة خفيفة الدم لأن لا تنسى هالوقت المستمع يكون تحت ضغط الزحمة والحر .. فأجواء هالبرنامج تخفف شوي .. عالأقل حتى لو الواحد يبتسم .. ترى شي حلو لما انسان يخلي انسان ثاني يبتسم ويضحك

الشغلة الثانية
وااااايد معورة قلبي

هالشغلة
برنامج نغم الصباح
عفية تكفون يا مارينا أف ام .. المذيع أسامة غيروا وقته
بصراحة .. يتكلم وايد وتعليقاته مالها معنى واستظراف دم ماله داعي.. وأحيانا أحس المذيعة نوف تتضايق من اسلوبه وكثرة كلامه وواضح جدا للمستمع

والمخرج شكثر يجعمه عالهوى أمبيه احراج بس ماكو فايدة
هالمذيع مايصلح لهالبرنامج

بطلت أسمع هالبرنامج والسبة تعليقاته الزايدة

وبرأيي الشخصي نوف جدا ممتازة تراعي الحدود والذوق وكلامها متواصل ومترابط

أفضل يرجع خالد الأنصاري الصبح مع نوف .. راح يكون برنامج يفتح النفس
وآنا وحدة من الناس إلي أبي أسمع كلام كويتي من الصبح .. يرد الروح

امبراطـــورة اشعاري said...

مساء الخير مشاري..

شوف انا برنامج الديوانيه اسمع عنه.. البعض يقول فكاهي وحلو ويقولون لي سوالف صارت والاقيه صج حلو وتلاقيني انا بعد اضحك لما اسمع عن سوالفهم..

وبنفس الوقت اللي يضحكوني يقولون ترى عادي عندهم يفشلونج !!!

عادي؟؟!!! ليش؟؟ انا داقه اتمصخر ولا اشارك بوضوع؟؟

اعتقد مذيعين برنامج الديوانيه على نياتهم ويقولون اي شي في سبيل اضحاك المستمع..
بس سبل الفرح كثيره يختارون غير الدرب اللي ماشين فيه ..

وتحياتي لك :)

Mohammad Al-Yousifi said...

انا مو من ربع المارينا بس يستاهلون تحية على الرد و التفاعل

7osen said...

والله يا ميشو البرنامج فكرته حلوه وانا دائما اسمعه

لكن فيه مثل ما قالو الاخوان بعض التجاوزات الواضحه في بعض الكلمات

وخصوصا من طلال الياقوت

مع انه مذيع عجييب الصراحه ودمه وااايد خفيف

لكن للأمانه احيان كثيره يقول كلمات شوي مو المفروض تنقال بالاذاعه

بس بالعموم محطة المرينا انا برايي

محطه ناجحه وممتعه

Chai-7aleeb said...

من بعد أمينه الشراح

ماكو مذيعين متمكنين بهالبلد

esTeKaNa said...

يعطيكالعافيه مشاري
حبيت اطل واسلم عليك بس
:)
وصراحة زين منهم متابعين عدل
الجانب الايجابي من الموضوع :الظاراء اللي تنطرح في المدونات لها من يتابعها ويهتم في كتابها وهذا شي حلو
:)

QiYaDiYa said...

انا مو من متابعين هالمحطة ..

لكن عن تجربة ..

هالمحطة مو هدفها تربوي او اجتماعي ..
هدفها المال و الشهرة !

و برنامج مثل الديوانية استغلوا وقت الناس لما تطلع من الدوامات عشان يكسبون اكبر شريحة ممكنه تبي بس تسولف تضيع وقت بالزحمة !!

بالنسبة للمذيعين الاكاديمين ..
الاكاديمية مهما كانت ما تعلا على الاخلاق ..
الاخلاق و الحوار الراقي و المحترم مطلوب من الناس ..


لكن الاذاعة ما تبيه ..

و لتنغاضى عن المذيعين ..
بالنسبة للاتصالات يقدرون يقطعونها مثل ما يبون (لو ) كانوا ما يبونها !!


و عن تجربة..
اعددت برامج في محطة الغناء العربي لوضع الاناشيد بدل عن الاغاني ( برنامج نقطة نظام , صوت و معنى , هاي وي ) وتم وضع محاور مفيدة للحلقات ترتقي بعقلية المستمع , كان في تجاوب كبير من الناس ..
و الاتصالات تكون فل !

انت الي تحدد شنو وضع البرنامج الي تبيه !
و الجمهور عايز كده المفروض ما تكون موجودة في قاموس الاعلامي الي يبي يأثر و يغير بالناس التأثير الايجابي و السليم ..


لكن مشكلة الاعلام ..
الناس الي خايفة على كراسيها !!

ما يهمهم مجتمعم ..
تهمهم فقط مصالحهم الشخصية ..

malak said...

السلام عليكم ورحمة الله وبركاته


نادر مااسمع مرينا
fm

Anonymous said...

هاهاهاهاهاها
أكاديمي ؟ منو اللي أكاديمي ؟
أنا أقول خيصفطون مكرفوناتهم و يشيلون مكسراتهم و يقلبونها حفلة تنكر بالشاليه..آل أكاديمية و درسنا
ترى كلنا دارسين و السنع ليس بشهادة أو درجة اكاديمية عندما يكون
الحوار في البرنامج إستهزائي و غير مهذب
بصراحة ما يبث على الهواء في قناتهم
كأنه أحد غرف المحادثة ذي المستويات الواطية في النت


محطة الجيش الأمريكي وإقطع
وغير جذي لاتدور إلا القناة الأولى و الموسيقى العربية القديمة
مرينا ولا سوا و بطيخ هذيله
حق زلمات و تخب عليهم بعد

Common_Sense said...

شتقدر تقووول ياخوي مشاري .بس هذي طريقة المحاطات الاذاعية والتلفزيون بهذي الايام .. وبالنهاية هذي محاطة غنائية! والله مادري ودي ارقعلهم بس ماكو :D

Nora said...

صراحة
فيهم
خفة طينة مو طبيعية
و
البرنامج فكرته واضحة

من اسمه دوانية يعني سوالف

و لا عمري سمعت اتصالات بايخة

في هالبرنامج بالذات لان مذيعينه يجعمووووووووون و جنه الزري بعد من يمصخها احد

هذا اسلوب اذاعي فكاهي و اشوفه انهم اتقنوووه جدا





بس .. برامج ثانية ما عندي فكرة
سمعت مرة مذيع جنه بنوووووتة يلوووع
ضاق خلقي .. زادوا عليه اهداءات اليهاااااال فاااا سكرته
:)





شكرا شعلة

راعيها said...

المقياس الاساسي لدى الاعلام الخاص هو اقبال الجمهور .. سواء رضينا أم لا .. هذا اللي صاير

Aldenya said...

ما أتابع البرامج الإذاعية عادة

لكن

أي برنامج معروض بشكل مباشر له هفوات

أخطاء من متصلين
وسوء تصرف من المذيع

,,

ارسال رسالة من القائمين على القناة بادرة ايجابية برأيي واهتمام

tweety said...

اشفيك عافس الدنيا !!!

والله شي يحسب لهم حرصهم على الرد على مدونة نادرا ما انشوف هالشي


تعليق بسيط على الموضوع السابق لأني مالحقت عليه : اشلون راح يطبقون القانون على البويات والجنوس ؟
وهل راح يشمل القانون الكل والا على ناس وناس مثل العادة ؟
أنا ما ادافع عنهم بس مع فكرة أنهم ناس يحتاجون تأهيل وإعداد نفسي وتغيير إتجاه الاهتمامات وإعداد مراكز للشباب يعني باختصار يبيلها خطة لإستغلال نشاط الشباب بشكل مفيد لهم وللمجتمع
اما منطق خيازرين وعصي ومادري شنو هذا حجي فاضي كان يمشي قبل الحين الوضع تغير مايجوز انحل امورنا بطريقة يدي ويدتي اشفايدة تعليمنا عيل

Unknown said...

عثماني : منور عثماني وبلط اخوى والحين افرشلك وايبلك جاى وحب بعد اذا تبى

بس فعلا احنا بعصر والله صج يطالعون المؤدب بانه شخص عبيط

الدنيا انقلبت

Unknown said...

Purplecious : حاضر بس شلون اكبره ؟

ولو كان الاحترام موجود ما شفتى طريقة التعامل بهالمستوى يعنى احس مرات عيب
شنو هالعبط ما يندرى

Unknown said...

White Wings : افا ليش؟ عاد يعنى احنا اخوان وعلى الرغم من الاختلاف الفكري الا ان المسار واحد
:)

Unknown said...

أبو إسحق : تصدق المشكلة ان يخلون الناس تفهم ان الجمهور يبى هالشى مع ان العكس الاعلام هو اللى يحرك الناس

بس الواحد يقول انشاء الله يتسنعون

Unknown said...

AseeL : احلى شى انج اختصرتى كل شى بثلاثة اسطر :)

Unknown said...

Q8DOLL : احترم رأيج وصح احد اهداف الاعلام هو الترفيه ولكن المهذب وبدون اسفاف ونقزات خارجة عن الادب

Unknown said...

What Will Be , Will Be .. : صح كلامج وخفة الدم مو شئ يفتعل لكن تكون بالانسان نفسه وهالشى مو عند كل واحد

Unknown said...

3ateeja : زين تسوين لانها محطة سخيفة
والترفيه مطلوب من قناة نفسها ولكن بعقل وبادب مو بمصخرة وبطريقة سمجة

Unknown said...

Smile : الاعلام يوجه ولا يٌوجه بضم الياء

Unknown said...

charisma : والله يا كاريزما مرة بالصدفة قاعد اسمع والا وحدة متصلة عن ذوى الاحتياجات الخاصة كلوها بقشورها مسكينة

خليها على الله ترى صدقينى الاعلام شئ حساس واهو اللى يقود فكر البلد والمجتمع

Unknown said...

true faith : اتوقع قروا تعليقج والصراحة مو شئ حضاري نهائيا ولا دليل على ان شخص متطور اللى يتطنز على شئ عادى بهالصورة

Unknown said...

بوغازي: اتفق مع رأيك لان فعلا الناس مو عبيطة على سالفة المغرب وتايلند

المشكلة جان زين يفكونا من مشاكل الجياكر اللى كل وحدة حبيبها زعلان ما تدري ان يبى الفكة منها

Unknown said...

مجرّد... أنثى : قولى المتعة والاستمتاع موجودة عند البعض ولكن الفائدة وينها
مرات في كوميديا هادفة
ابتسامة ذات معنى مو عبط المفتعل

Unknown said...

ام الحفيز : الله يقطع ابليسج يا ام الحفيز
مكيرفون قاطينه بمخيم :))))

والله انا اشك فيج

الزبدة انا معاج وانا من مفضلين البرنامج الثاني و احب برنامج نافذة على التاريخ

Unknown said...

محـــــارة :
مراهقين
وسطحين
وواحد ما عنده شغل
انا معاج
لو يعنى مخصصين ساعة باليوم حق الفن القديم
او شئ معين يفيد
ما حرنى الا كلمة اكاديمى
خليها على الله

Unknown said...

حسام بن ضرار : البي بى سى والمونتيكارلو
والكويت البرنامج الثاني زينين

وحتى صوت امريكا

Unknown said...

Almas : انشاء الله يسمعون كلامج وانا انصحج تسمعين اذاعة القران الكريم الصبح من الساعة 7 لى 7:30 كل يوم مع شيخ دين معين وفيه فايدة
ويوم الاربعاء معلومات علمية جميلة مع الدكتور مصطفى الدمرادشى

Unknown said...

امبراطـــورة اشعاري : انا ما عندى مشكلة خل يتغشمرون
ويضحكون وينكتون بس لما تتصل مرة كبيرة لا يضحكون عليها
خل يحترمونها
ليش ما يدرون انهم لما يكونون ورى المايكروفون ناس وايد ماخذتهم قدوة؟

Unknown said...

kila ma6goog : صحيح هو تصرف حضاري وانا معاك

Unknown said...

7osen : والله يا بوعلى لو في رقابة وفى خطوط حمراء مو مخليها خرى مرى جان ما تصير جذى

Unknown said...

Chai-7aleeb : لا تقلب المواجع الله يرحم ذيج الايام

Unknown said...

esTeKaNa : زارتنا البركة ونورتى
وفعلا هالشئ كان لفتة طيبة منهم

Unknown said...

QiYaDiYa : بدون مبالغة افضل تعليق لان فعلا يحمل فكر شخص يعرف الاعلام
ويحمل مفاهيم جيدة

يعنى صح الاعلام اللى ورى المايك اهو اللى يحدد مو الجمهور اللى يحدد

يعطيج العافية ومشكورة على التعليق القيُم

Unknown said...

malak : وعليكم السلام ورحمة الله وبركاته

زين تسوين

Unknown said...

عتيج الصوف : ترى فعلا الدراسة ترتقى بالشخص مو تخلى الواحد بهالطريقة والاسفاف

Unknown said...

Common_Sense : الطريقة خطأ والصحيح ان الاعلام يوجه والا يتوجه

Unknown said...

a7La eNG : اول رأيج نحترمه ولكن فى حدود حمرة الواحد لازم ما يتعداها
يعنى انا شكو هذا راح المغرب وشارع بتايلاند
يعنى شوفى التعليقات وتعرفين هالمعلومات
اشوى انى ما اسمعهم واكون حزتها بالدوام

Unknown said...

راعيها : اسمع برنامج مراحب الضحى وشوف اقبال الجمهور الراقى

Unknown said...

Aldenya : صحيح ولكن فى امور اخلاقية لا يجب حتى الترميز لها

وفعلا معاج انا بأن التواصل كان دليل رقى

Unknown said...

tweety : صحيح ان حرص يشكرون عليه

الرد على الموضوع السابق

يعنى توتو لو اشوف واحد لابس تنورة ويتمشى بجمعيتكم
تدرين شنو عقوبته الحين؟
ماكو عقوبة
يودونه المخفر وتعهد ومع السلامة
بس لما يكون على الاقل فى سجن راح يخاف شوي
فى شى رادع
وبعدين خلج من الكلام الانشائى تأهيل ومراكز
احنا شعوب تخاف ما تختشيش

Anonymous said...

انا بالاول كنت استمتع لمن اسمع مارينه اف ام على بالي محطه خاصه فيها فكر طلعت بوووش حالها من حال محطة كويت اف ام اغاني بأغاني لا وبعد اطنازه بالاوادم لكبير قبل لصغير

والبرامج صحيح انها ممتعه لكنها لاتهدف لشيء سوى للتسليه الفارغه

(كويتيه لازم اتحلطم)

Unknown said...

nony'nation : تحلطمى هالمكان محطوط للتحلطم

والمارينا فعلا اعلاميا اخذت الزخم المطلوب ولكن اكاديميا واعلاميا مع الاسف شئ محرج

JiBLa CiTY said...

كل يغني على ليلاه
:)

وهذي الكويت صل على النبي اهيا ديرتنا وفيها اللي نبي

كل شي موجود
ولك مطلق الحرية
بالاختيار

وماقول الا

ياحلو مسجل السيارة
ويا حلو السيدي

:)