الطموح و العمل والمثابرة والالتزام وقليل من المشاغبة تكون الحياة ناجحة

Friday, September 21, 2007

**تحديث**

من أجمل مواقع القران الكريم

القران علي شكل فلاش Click

موضوع طويل شوي تحملوني

وصلني هالتعليق من

Anonyms

وفعلا خلاني أفكر على التفاؤل اللى انا عايش فيه زيادة عن اللزوم وان الدنيا لى الحين نفس ما اهي بس تحتاج شوية تضبيطات بسيطة ( اقروا التعليق على موضوع سابق)

أخوي مشاري



بقول شغلة بس لحد يزعل وأتمنى أنك ما تزعل مني

شوف حبيبي

أحنا بالكويت عندنا مناطق محافظة ومناطق فيها ناس زبالة حشاك

أنا مو صغير علشان أقول هالكلام يا مشاري وأنا عمري 40 سنة وماكو منطقة ما دخلتها وسكنت في مناطق وايد

والي أبي أوصله بكلامي هذا أن المناطق الداخلية زفت زفت زفت

بعطيك جم منطقة وأنته أكيد تعرف قصدي

1-
السالمية
2-
حولي
3-
الجابرية
4-
وبعض من المناطق الداخلية
شرايك بالبشر الي فيها والي يروحون لها وعلى قولتهم قز ..؟؟

أغلب شقق الدعارة فيها وحتى أشكال الشباب الي فيها والي يجونها مو من الشباب الكويتي المحترم
ناس مادري منين ...!!!

ونفس الكلام هذا ينطبق على البنات بعد ومو بس الشباب

خلنا نكون صادقين ونقول الكويت يا مشاري مو نفس قبل

الكويت يا مشاري تغيرت ومو مثل قبل

البنت الي قبل نفس البنت الي الحين ..؟؟

الرياييل الي قبل نفس الي الحين ..؟؟
أنا أقولك لا لا لا وألف لا

والله يستر علينا وعليهم والله يهديهم

ـــــــــــــــــــــــــ

انتهي التعليق

كلام الاخ الكريم صحيح ومؤلم لي متى احنا بهالسوء وما نتغير ليش صرنا بهالصورة السيئة

لا أخلاق ولا ادب ولا تعامل حسن الكل يعتقد انه اهو الافضل والارفع واهو صاحب الحق باقرار أي شئ يبيه

فعلا شئ مؤلم واذا تكلمت وقلت خل نتغير طلع لك الف واحد وواحد يطلعون عيوب الدنيا كلها فيك

مو يا جماعة ندري كلنا فينا عيوب بس كلنا نبي نتخلص منها خلونا نتساعد ونتكاتف بدل ان كل واحد يطلع عيوب الثاني

ولكن نحاول بالتغيير لكي نرد بعض الجميل لهذه الارض

،،،،،،،،،،،،،،،،،،،

خضير شفيه ؟ ؟

أنا سامع عن القضية اللى صارت بس ما اعرف تفاصيلها يا ريت أحد يقولي التفصيل الممل ومع المصدر اذا امكن


بس الصراحة والله فزعة يعنى لو أنا انمسك ما يمكن أحد يطل بويهي الا واحد من الربع ويمكن بعد اوصيه على خبز ايراني وكيري ورهش

ــــــــــــــــــــــــــــــــــــــــــــــــــــــــــ

تغييرة جو

ـــــــــــــ

راجع من الدوام وقاعد اسمع البي بي سى

والا مستضفين اخصائى تغذيه

الاخ شيقول؟؟؟

يقول على الفطور

اكل كم تمرة

وصحن سلطة

وقليل من الصحن الرئيسي؟

الاخ نسي التشريب والهريس واليريش والسمبوسة ؟

يا حبيبى يا اخصائي التغذية قول حق أمي لا تسوي البلاوي اللى على السفرة وانا ما أكل

بس كل هذا اللى تسويه وبعدين تقولي لا تاكل- اغسل ايدك

شقوله

سكرت الراديو قلت لان هذا قاعد يسوي ارهاب فكري لي

صيام مقبول وادعوا حق اخوكم

الا اهو انا

66 comments:

Q8DOLL said...

صبحك الله بالخير
اممممم
التقسيمه عدله
ومعاه حق
ماشري الحين غير عن قبل
وشنووو الحل بالله ؟؟
ترى صعبه
الشعب رايح بالانفتاح المظهرجي والسترتشي
واخر شي يفكرون فيه الانفتاح الثقافي وترك زباله الطرف الآخر من العالم
الظاهر وايد سهله انك تتشبه بناس وتلبس مثلهم
لكن المخ يظل مصدي
ومحلي
وأكل عليه الدهر

بس هم اقولك شلون نتكاتف
؟؟
يعني صعبه لو تلاقي واحد مادري شلون لابس تروح تنصحه بيطنز عليك وبتطلع انته غلطان وحشري
ونفس الشي بنت لابسه من غير هدووم يادوب جوتيها تكرم اللي لابسته بضمير
يعني تخيل بس جوتيها تقدر تقول عنه لبس محترم
فتروح انته ياظريف وتحاول تتكاتف وتعدل وتنصح
شيصير فيك ؟
ماني قايله انته تدري شنو راح يصير

تبي تنصح وتتكاتف وتبدي من عائلتك ؟؟
تقدر تروح للأخت مثلا والا الأخو وتقوله عن لبس بنته والا مياعة ولده ؟؟
وهل راح يسمع لك؟

خلني ساكته توه بادي الصيام ومش عاوزه أثقل عليك
"الكلام المصري بسبت الملك فاروق معليش اتحملني بس رمضان"

___________
قضية العنزي مادري شفته اليوم بالجريده
وبصراحه
بصراحه
مالي خلق قرا غير العنوان
اللي اعرفه ان رفض يدفع كفاله بقيمة 500 دينار
ليش في كفاله الله اعلم
اكيد احد الأخوان أو الأخوات راح يفيدك
واذا عليك السالفه وصارت فيك الله لا يقوله يبا لا تحاتي عيش وحلاوه وبقصم وورد مجفف بعد اشتبي مو طبيعي لأنه اكيد بيروح فيها من عفونه النظاره
______________

اما الارهابي المذكور
الله يسامحه
عيل ماشاف امي وطبخها
وانا شاده الحزام
وشكله بينقطع
وبرفع رايتي البيضه
والكيلو اللي نزلته
بيرجع دبلات
كل شي يزيد
الا المعاش
خصوصا لما زادوا نسبه الخصم من الراتب عشان يروح ويتمخطر للتأمينات

Q8DOLL said...

رجاءا اذا في بدليات عند حق التعديل في ردي عادي
حتى لو اضطريت الى حذفه من كثر ما بدل

esTeKaNa said...

صبحك الله بالخير والسرور

تعليق الاخ المجهول واقعي
قاسي
نغمض عينا
بس يبقى هالواقع موجود
!!
لو خليت خربت
عسى الرحمن يهديهم ويثبتنا يارب


ثانيا:
الله يحفظ لك الوالده يا مشاري
قول حق الاخصائي يستريح بس
وانته اسمع من احيتك استكانه:
تميرة وشوربه وقوم صل
تالي لك 3 مقالي
و8 قفاش يا هريس
يا عيش
يا يريش
يا تنوع
المهم مو اكثر من 8 قفاش
:))
وسلطة وعصير
بس مشالله يشبع
بس 8 قفاش حجمهم طبيعي
مو ملاس شكبره
pP~
ثالثا:
الله يحفظك يا مشاري
يشرح صدرك ويسعدك
ويرزقك كل ما تتمنى
الله يريحك دوم قول آمين
:)

kuwaitya_7saweya said...

عدل كلام الريال
مو شرط نتساعد ونتكاتف عشان نتغير
كل واحد بينه وبين نفسه يتغير
ترى سمعة الديره وصلت للحضيض
واذا حاجيته يقولك حريه شخصيه
الحريه الشخصيه ترفع اسم الديره بافكار بمواهب
مو بشكل ولبس وخرابيط
والله انه شباب بعض الدول المجاوره اييون بالويك اند عشان يقزون
بالله عليك هذا شي زين

خلاص الواحد منهم ماعنده غيره على وطنه وديرته

وبعدين وانتوا بكرامه شقق الدعاره
اللي تارسين الديره مو غير امنع التأجير للشباب العزابي
او امنع التأجير اليومي
واللي يقهرني اكثر لو يطيحون على شقة دعاره خذوا اصحابها السجن صاحبها طلع فلان ولد فلان
ولايعرف فلان ويتوسط له وبنفس اليوم يطلع
الشباب مستهين بهالاشياء لانه شايف انه مافي عقوبه يقول اوكي طاحوا علي كلش كلش بقعد يوم واحد بالنظاره وبطلع
وعادي
يبا اللي حتى الجاليات الاسيويه والعربيه ما قاموا يخافون كل يومين يحطونهم بالجريده وبس وماتدري شصير بعدين

ترى هم ماكو وازع ديني
صلاة مايصلون

لو الله يفكنا من السبايكي وهاللو وست
وقوطي الروب احنا بخير
-------------------------------

كم تمره وسلطه وقليل من الصحن الرئيسي
اعجبتني
لالا هذا اخصائي فاشل
انزين واللي بتاكل حلو شلون

حمد said...

الله يخليلك اميمتك

AuThoress said...

مشاري يا صديق
عندي نظرية، ان كل واحد يبدأ/يركّز بنفســه، الحياة تكون أفضل، ع الاقل عندك "انت" و "انا" ، يعني نكيّف حياتنا "الخاصة" كيفما نحبها أن تكون، وحسب معتقدنا، لسبب بسيط، وهو صعوبة ان تجعل من "الآخر" شبيها بك لأن لكل واحد قناعته الخاصة وهذا الاختلاف هو الطبيعي في الحياة كلها

والله لو البشر يركزون في "أعمالهم" نكون بخير

بعدين الاخ ليش مركّز على المناطق الداخلية وو صفها /عفوا/ بالزباله؟


الانسان القبيح يا مشاري يتواجد في كل مكان، التعميم مجحف، ولا نستثني أي بقعة من أي مكان

تحية لكْ

Aldenya said...

كلامه صحيح
الناس تتغير من جيل إلى جيل
ويختلف التغيير سواءا كان أسوأومخزي أو أحسن وأفضل
وأحنا قاعدين نشوف من فئة همهم الاول هو تشويه صورة جيلهم بأفعال شينه
الله يهديهم بس
..
الله يخليلك الوالده ويحفظها
وبرمضان يكون كل ما لذ وطاب موجود بالسفره
لدرجة ان الواحد عقب الفطور تحوشه التخمه وعوار بالبطن
ويمكن لي طلبت من واحد اييبلك شي على الارض
تلقاه ما يقدر يجندس من كرشته المتفوخة :>

برنسيس إيكاروس said...

يا أخي الطيب يا مشاري
كلامك كله صح وينقط عسل
الكويت كبرت واتسعت وضاقت
وفيها غير أهلها 170 جنسية
يعني جاكليت ماكونتش
وتريدها أن تظل على حالها هذا مستحيل
ومع هذا هناك الناس الطيبين مثلك ومثل ابنتي الحبوبة
q8doll
وهي اليوم ما قصرت رسمت لك صورة واضحة وبالفعل هذا ما يحدث هالأيام عندنا
لكن لا حياة مع اليأس
وكثر المحاولة شيء طيب
أقول أيضا
مثل أغلب شباب وشابات المدونات الطيبين الغيورين على الديرة وأهلها
يا مشاري الكلمة أقوى من السلاح
لذلك الكتّاب يحاربون الفساد والاعوجاج بالكلمة
وهذا ما نستطيعه أنا وأنت وهو وهي
والنصيحة واجبة أيضا
وان شاء الله يتحسن الوضع
****
باختصار شديد للحالةإن الوعي بالأخلاق والتقيد بالمثل والسلوكيات الايجابية والابتعاد عن السلبيات وخاصة الدخيلة والمستوردة يجب أن ينبع و يبدأ من البيت والأسرة أولا ثم المدرسة ثم وسائل الاعلام المسموعة والمقروءة والمرئية
وكل مؤسسات المجتمع المدني
فإذا تكاتف الجميع
سوف على الأقل تتحسن الصورة التي تشوهت واهتزت في ديرتنا الحبيبة
يا مشاري لنحاول كل من موقعه حسب طاقاته وامكاناته أن يحارب الفساد ويسعى الى الاصلاح
ولنتفاءل خيرا إن شاء الله
*****
عن سفرة شهر رمضان الكريم
والله يا أخي ما نقدر مهما قللنا من الأطباق والطبخات إلا أنها تظل كثيرة ومتنوعة تملأ الطاولة لأن رمضان شهر الخير
نبي الهريس واليريش والتشريبة و السلطات والمقليات وأطباق العيش و و و و ووووو وأنواع الحلو
لكن الشاطر والذي يريد أن يحافظ على صحته
يجب أن لا يندفع ويأكل بشراهة طول الليل ليكتفي
يتناولو جبةالافطار ويأكل من أطباقه المفضلة بالمعقول
وكل يوم صنفين حاروصنف بارد وصنف حلو
وعليك بالعافية
*****
أما قضية النائب خضير العنزي كما جاء في القبس
أنه رفض قرارا سابقاللنيابة بإطلاق سبيله بكفالة 500 دينار في الدعوى المقدمة ضده بتهمة الاساءة لرجال القضاء
تستطيع أن تقرأ التفاصيل في ص 45في القبس اليوم
****
شكرا على مرورك اليوم على مدونتي ولقد أجبتك على سؤالك الذي طرحته علي
أتمنى أن تقرأه
مودتي
منى

حد القلم said...

و الله كلام الريال صح بعض الشيء

بس نظرته سوداوية

و لازم ما يعمم بس يحدد الغلط وين و ينطم

انا ما احب اناقش هالمواضيع لكن هذي جروح و يجب ان تفتح ليتم تنظيفها باليود و الكحول

بعدين الشعب الكويتي مو باغلبيته بهالشكل الي يصوره و الصوره فيها خير وايد

و لا تضيقون خلوقنا بهالشهر الفضيل

Anonymous said...

بس مهما كان تظل الكويت ديرة الناس

الطيبين المتواضعين اهل الكرم .. واحب

اقول ان في كل بلد في العالم نلقى فيها

الطيب و السيء..

eShamiYa_RockS said...

من خلال الردود لاحظت ان الكل فهم من تعليق الأخ انه يتكلم عن اللبس..بس انا اللي فهمته انه يتكلم عن تصرفات الشباب و الشقق اللي هناك.و هذا أعظم و أشد من شوية قماش على الجسد
تعليقا على الأخ
anonymous
فأقوله ان العيب بالتربية ثم التربية ..و الا الشباب المحترم من الجنسين المتربي عدل مايرضى على نفسه..تلاقي البنت من جامعتها لي البيت لي السوق مع الأهل و الأصدقاء و نفس الشي مع الشباب زيد على الأماكن الديوانية
و ترى حتى الصحبة السيئة ماتؤثر بالانسان اذا كان اساسه قوي
هذا أول شي ثاني شي..اتمنى اننا مانحكم على الانسان من مظهره..يا ما سمعنا عن قصص بطلاتها مايبين منهم الا ايدينهم
طبعا ما نعمم..و كلك العكس صحيح بالنسبة لغير المحجبات

مرة سمعت سالفة من شخص بالعائلة يقول انه راح السوق شاف وحدة متحجبة متغطية
from head to toe
لكن تصرفاتها و مشيتها و نظراتها غير محترمة ابدا..والشباب طوابير وراها
و وحدة العكس تماما..يقول لابسة قصير و ماخذه راحتها باللبس لكن بشكل مرتب..يقول انا احترمتها اكثر بسبب تصرفاتها يقول ماشية سيدا لا تلفت و لا تطالع ياية تخلص غرضها و تمشي ..يقول حتى الشباب ما قربوا صوبها

محـــــارة said...

الله يعينك .. وعليك بالعافيه

......

بالنسبة لخضير ماعندي أي فكره شنو صاير

......

بالنسبة لكلام الأخ صدق فيه وتصدق أنك تقرأ أفكاري صار لي جم يوم حابه أكتب موضوع أن نبحث عن أخطائنا ونعدل عليها محتاجين فعلا نربي روحنا بدل مانظر بالحجي ونفتش على أخطاء غيرنا

عسى ربي يهدينا ويقوينا ويصلح بالنا

تسلم على هالبوست .. وصيام مقبول بعون الله

Anonymous said...

للأسف احنا بزمن يا مشاري صارت فيه البساطة
هلاقة و قلة ذوق و نقصان

و صارت فيه الأخلاق و الأصالة تتورث مع الجين


احنا بزمن لا حبتك عيني
و بجيبك مليون تسوى مليون
و بجيبك دينار أطلع بره أحسن
!!


:
:

استكانة

و اللي يغلط بعدد القفشات
في مجال يبدا من أول و يديد
:p


مساؤكم رحمة
و مغفرة

someone_q8 said...

السلام عليكم

بصراحه ما ادري شنو اقول لان الكلام اللي قاله مجهول صحيح لكن انا لا احب ان افرق بين المناطق لان الخراب والدعارة وسوء الاخلاق ليس لها علاقة بالمناطق , واذا اخذنا برأيه فان منطقة فحيحيل و المنقف و الفنطاس فيها شقق وبلاوي اسأل الله ان يستر علينا أجميعن فهل نقول ان هذه المناطق هي بؤرة فساد ؟؟؟؟
الفساد موجود بكل الازمنه سواء قديما او حديثا حتى الكويت قديما فيها فساد وفيها مناطق معروفه بالفساد ليش انقول ان الحين بهالزمن بس اللي فيه فساد ؟؟؟؟؟
الفرق بين كويت اليوم والماضي من ناحية الفساد الاخلاقي ان قديما كان الفساد مستور لا احد يعرفه وكان قليل , اما الفساد اليوم فهو معروف ومكشوف وللأسف تراه جهرا .
***********************************

بالنسبة للأكل اخوي مشاري مثل ما قلت لك اكل اللي تبي لا تحرم نفسك من شيء لكن باعتدال يعني لا اتهبس واااايد تره وراك صلاة العشا والتراويح :)))

PearL said...

اتوقع ان الخراب و الزبالة مو محصورين بمناطق معينة يامشاري

اذا كان الاخ حدد بعض المناطق انها مناطق زبالة

فليش ما ذكرنا لنا على سبيل المثال المناطق المو زبالة


الدنيا صح تغيرت وتغيرت وايد
وقاعدين نسمع بلاوي وصج ننصدم

صح لا البنات مثل ما كانوا قبل
ولا الرياييل نفس قبل

والوضع موجود بين كل الاعمار بصراحة

بس مثل مافي ناس زبالة في ناس للحين زينين
ولو خليت خربت

===
اما عن اخصائي التغذية انا اعطيه الحق انه يتكلم بكل اشهر السنة
ماعدا رمضان

بصراحة حيل صعب
خصوصا اذا كانت يمعه

enter-q8 said...

مشاري تدري اني انصدمت فعلا
انك ما تدري عن شي
معقوله

يعني تبي تفهمني انك ما تطلع من البيت
ما تقرى اخر صفحة بالراي او الوطن او القبس بعد وياهم

لا مشارى
كده انا حزعل منك قوي قوي

مشاري راح ادزلك
ايميل

اخاف عليك منه
انك يمكن تهاجر

و لمعاينة ما اكتبه انطر ورا رمضان
علشان بدون مبالغة
بتشق هدومك

والله العظيم
اذا تشوف ان هالشي كبير
اجل اللي راح تقراه
بيخرعك




شغل نحاسه ماني دازه لك اليوم اخلى الفضول يذبحك اشوي

Sowhat said...

بعد غياب عن الكويت لفترة طويلة من الزمن تقريبا 8 سنين
كنت ازور فيها الكويت ايام قليلة يالله تكفي اسلم على الأهل و اعزي لأهل الي ماتوا في الفترة السابقة و ابارك للي تزوج و يالة يهال

بعد روحوعي و بدت الطلعات في المجمعات و شوفة الناس الناس
والله انصدمت
حسيت اني مخلوق فضائي .. كل شي صار غير التفصخ زاد الناس صارت وقحة اللبس صار مدري شلون قايل

انصدمت فترة ... وتمنيت يرجع الماضي ... وطبعا هذا شي مستحيل

اصلاح الذات اول الخطوات فالله يوفقنا و يوفقكم

وندعو لك بكل خير

تحياتي

Unknown said...

Q8DOLL : اولا معذورة لو في بدليات
ثاني شي هم طاف سالفة الملك فاروق وتأثيرها:)

بس فعلا احنا بمجتمع بدء فيه الانفتاح يكون باللبس
والسفر
والشكل
والمخ الله يعزج والقارئ زبالة وردي

اتمنى من رب العالمين ان يصلحنا ويهدينا لان فعلا محتاجين التغيير للافضل لان فعلا تعب الواحد من هالاخطاء اللى تدل على سطحيتنا

Unknown said...

esTeKaNa : جربت اليوم وصفتج ام الثمان كفشات واقل
بس الظاهر انا فيني بله لازم اشوف نفسى ما ادري شخربط او اكل بدون ما احس

وتعليق الاخ فعلا واقعي ومؤلم ويدل على ان احنا ناس عايشين باحلامنا

Unknown said...

kuwaitya_7saweya : ان الانسان يبدي بنفسه هذا شئ رئيسى ولكن اللى صاير بمجرد تغير النفس يكون التعليق ان ينافق او مضيع
هذا حال مجتمعنا رادع وليس بدافع

والاخصائى يقول ممكن قطعة حلوي وحدة

انا ارد استريح :)

Unknown said...

حمد : ويطول بعمرك

Unknown said...

AuThoress : صديقتى العزيزة
انا لا اختلف عن البدء من النفس ضمن معتقدتنا ولكن
هناك اشياء مشتركة
لا يرضى فيها العقل وهي امور اخلاقية يتفق الجميع عليها انها خاطئة
وهذا الامر المرفوض

Unknown said...

Aldenya : مو هذا الخطأ التغيير الى الاسوأ ممكن يكون ولكن بشكل فكري ممكن مناقشته واصلاحه
وليس بشئ اخلاقي مهين لكل مبادئ المجتمع

Unknown said...

برنسيس إيكاروس : اولا اشكرج على موضوع الجريدة لقيته
ثاني شئ انا انسان متفائل بطبعي وشفت اكثر من مرة شغلات عديدة وتزعلني وملموسة وانا لست ملاك ولكن ما يحدث الان بدأ يخرج عن امور الوقاحة وتعداها باشواط حتى اصبح الصح غلط والغلط صح
وهنا تكمن الصدمة
فعلا انا شخص انادي بالتغيير واريد ان الناس تتغير واستخدم الكلمة من اجل التغيير لان لا استطيع التغيير بالقوة ولكن مشكلة البشر غيبوا العقل وركضوا وراء الحسيات فى اختيار امورهم

Unknown said...

ابن زيدون : انا اتفق معاك ان النظرة نوعا ما سوداوية ولكن فعلا بدأت تطغي وتصير بشكل واضح للاسف وهذا ما يؤلم يا عزيزى فالواحد قام يحس نفسه غريب

Unknown said...

محمد بن سالم : اخي الكريم بن سالم
اشكرك اولا على المرور وفعلا الكويت لا زال فيها ولكن نريد هذا الخير يكون غالب على جميع الامور

Unknown said...

ShamiYa_RockS : هذا اللى اقدر اسميه خلط المفاهيم
الشكل بالعقل
والمشكلة ان لازم الاثنين يتطابقون
يعنى من الممكن ان شكلى يكون بسيط بلبسى وعقلي كبير
بس مو معقولة هم اكون لابس لو وست و شكلي مزري واقول عقلي ناضج
حتى بالغرب ما تصير

Mohammad Al-Yousifi said...

يعجبني اللي يسوي روحه هيلثي برمضان

قوله اذلف اذلف


لوول:)

Unknown said...

محـــــارة : اشكرج محارة وننتظر البوست اللى بتكتبينه انشاء الله
:)

Unknown said...

Anonymous : شيئ مؤسف عندما يقاس الانسان بالدينار
لوحدها تعنى ان الانسان بعقله مهمش جدا
وهذا العيب

Unknown said...

someone_q8 : والله يا خوي صاج الفساد موجود من قديم الازل ولكن مستور
وهذا لاخلاف عليه
ولكن الان تفسد وتفضح وتبتسم فهذه هي فعلا تحتاج لوقفه

و نصيحة الاكل مأخوذ فيها بدون ما توصي حريص:)

Unknown said...

PearL : المنطقة مو معيار نهائيا ولنأخذ الرجل على حسن نية بضرب الامثلة

ام رمضان والاتزان بالاكل
مرفوض مرفوض مرفوض

بعد رمضان اذا الله سهل
نادي وترجع الحياة بدون صب القفشة

Unknown said...

Enter-Q8 : لا ادري يا عزيزى
واعرف كل خبايا الامور وماني من اللى مغمضين
ولكن كنت دائما اقول ان فى مجال للتغير للافضل
ولكن بعد قراءة التعليق احسست باليأس لفترة

والله يستر من اللى تدزه يا بو وليد:)

Unknown said...

Sowhat : صدقينى يا دكتور
بدون ما تسافر بمجرد ما تتمسك باخلاقك تحس نفسك
اليانز

ما يؤلم فعلا اننا بزمن العكس

Unknown said...

الحبيب بو سلمي kila ma6goog

بدون ما توصي

اذلف وسكرت الراديو وسكرت السيارة بكبرها ونزلت
:)

Anonymous said...

لماذا التركيز على المدارات الفاسدة
في النواة الجيدة

نواة المجتمع الكويتي لازالت بخير
لكن القشرة فاسدة
وهي مانراه واضح
بتصرفات فردية



بالنسبة لي أحس كأننا منقسمين
الى فئتين
فئة متدينة تشووف كل شي فسـاد وحرام وإنحلال خلقي
وفئة متحررة جدا وإهي اللي رايحه فيها
وإثنينهم فئات مريضة.


للأمانة الناس المعتدلة
اللي يعيشون بالوسط
قمت أشوفهم قلة
قـــــــــــلة
قــــلة

في أشياء..لا عفوا مو أشياء
أساسيات أخلاقية بشكل عام مو شرط مرتبطة فينا كمسلمين بس.. وحدوووووود لله تعالى
صارت مثل شرب الماي

الله يرحم الحال بس

وكما يقال :
إذا أراد الله بقوم شرا حبب اليهم المال وبسط منهم الآمال وشغلهم بدنياهم ووكلهم إلى هواهم فركبو الفساد وظلمو العباد


تخيل جم قاعد ينطبق عندنا
ماذُكر أعلاه

:)




خضير ؟؟
والله ضحكت يوم شفت الصورة بالجريدة
حتى ماكلفت نفسي وقريت شالسبب





والخبير الغذااائي
يستريح شوي
إتلاقي سفرته
ايلين اخر العاير
آل تمرة وسلطة آل

فتى الجبل said...

من أمن العقوبة أساء الأدب
بالكويت ماكو قانون فهذي اهيا النتائج

Anonymous said...

kalam il akh Anonyms sa7 o lil'asaf inna mawjood ib shakel mal7ooth, i7na ka sha3b, malna ella ildo3a' lihhum bil hedaya, oo atmana min elli 3inda sul6a .. yesawwy shay 3al aqal, lakin lil'asaf ga3deeen yetfarejoon, ana agol law kan 3indehom 7ub 7ag il Kuwait chan sawwaw shay, bs 7ubhom 7ag masla7at'hom khalat'hom yetDoodehoooN chenom imsaBeheeen :/

bs absa6 shay absa6 shay, Jam3at il Kuwait + il Jam3at il khassa, lazim "talzzem" qawaneen o t7e6 3oqobat 7ag illi ykhalefha, (il-libs, il ekyaaj, ilsha3ar... etc..)

+ il mojamma3at, lazim ye7e6on Shur6at adab ;D many gayla jama3at il amr bil ma3rof wil nahhy 3an il Munkar 3ashaan ba3ath ilnas laygolon "Il-islameyyeen" sawwaw ili yabonah, enkhaleeha te6la3 min wezarat il dakheleyya o ena hatha qanon o lazim ye7tarmon il dawla o ye7tarmon 3adat'ha o taqaleed'ha .. li'anna ham aghlab il ashkal ili nshoofha, aghlabhom mo Kuwaiteyyeeen

o bs :P ya36ek il3afya

الحجـــيّه said...

أسلام عليكم جميعا
الموضوع الأول : كلامكم صحيح السؤال ليش وصلنا لهذي المواصيل
ببساطه الأهل هم السبب الأساسي أهملوا تربيت الأبناء وتركوا
الخدم يقومون بهذه المهمة بدلهم فشلون بتعلم الأبناء دينهم وقيمهم
والعادات والتقاليد من الهنود أو الفلبينيات وغيرهم من جنسيات دخيلة علينا
الكل لاهي بهل الدنيا وناسين أهم وأغلى استثمار بالدنيا هو الأبناء في قصه قرأتها وأحب أن اعرضها عليكم هي توضح كيف يكون تأثير الأهل على الأبناء
قام أبو زيد البسطاني يتهجد الليل، فرأى طفله الصغير يقوم بجواره فأشفق عليه لصغر سنه و لبرد الليل و مشقة السهر .
فقال له: ارقد يا بني فأمامك ليل طويل
فقال له الولد: فما بالك أنت قد قمت؟
فقال: يا بني قد طلب مني أن أقوم له
قال الغلام: لقد حفظت فيما انزل الله في كتابه: " إن ربك يعلم أنك تقوم أدنى من ثلثي الليل ونصفه و ثلثه و طائفة من الذين معك" فمن هؤلاء الذين قاموا مع النبي صلى الله عليه وسلم؟
فقال الأب:إنهم أصحابه
فقال الغلام :فلا تحرمني من شرف صحبتك في طاعة الله، فقال أبوه وقد تملكته الدهشة، يا بني أنت طفل
فقال الغلام: يا أبت إني أرى أمي و هي توقد النار تبدأ بصغار قطع الحطب لتشعل كبارها فأخشى أن يبدأ الله بنا يوم القيامة قبل الرجال إن أهملنا في طاعته
فانتفض أبوه من خشية الله و قال: قم يا بنى فأنت أولى بالله من أبيك
فسبحان الله مغير الاحوال اليوم أطفالنا في بعد عن الله بسبب الآباء المهملين الذين يعتذرون لهم دائما بأنهم صغار، من شب على شيء شاب عليه
فأنشئوا أطفالكم وشبابكم على طاعة الله فهو أصلح لهم ولكم وحاسبوا أنفسكم قبل أن تحاسبوا أحفظوا أنفسكم ومن تعولون يرحمكم الله ويدخلكم جناته ونعيمه الدائم
-------------
الخضير : كان متكلم عن القضاة بطريقه غير ظريفة .
---------------
ربي يخلياك أميميتك ألي تسوي الخير كله لكم ويعطيها الصحة والعافية
---------

الحجـــيّه said...
This comment has been removed by the author.
qesat_5ayal said...

الراديو ينفع يغير المود
:)




ينكت الاخ بالراديو
ططيور مو أوادم

ButterFlier said...

إكل ياحلو يا مااال العافيه

ReLaaaX said...

مع احترامي لوجهة نظر الأخ
وآنه معاه في نقطة ان الوضع تغير والوقت تغير

بس الأصاله تظل مثل مااهيا بعد اخاف احد يفهم كلمة اصالة يعني اصيل وبيسيري أقصد بالاصالة العادات والتقاليد .. يظل فيه ناس متمسكه بعاداتها الأصيله لا اليوم الكي بورد معلق على االاصيل

ارجع حق موضوع الاخ .. حز بخاطري كلمة شباب الحين مو مثل شباب اول عموما سواء بنات او صبيان !

صح فيه فئة وماهي قليلة تغيرت .. بس السبب الأساسي احتكاكنا مع اعراف ثانية سببت مثل هالعادات الدخيلة مثل مايقولون على مجتمعنا !!!!؟
يعني السبب والتغييير مو من المجتمع نفسه الا من كثرة مخالطة هالاشيا اللي مو في عرفنا

--

نقطة ثانية هم تتعلق بالعادات والتقاليد والأشيا اللي تربينا عليها

هالجيل الللي محافظ على هالاشيا اهوا اللي بيطلع الاجيال الياية وبيربيهم على الشي اللي تربى عليه

ليش ماتكون نظرتنا محايدة ؟ ليش دايماً نشوف من جانب وااااااحد ؟
ليش هالسلبية ليش ؟

معقوله يعني مجتمع كااااااااامل بيصير رايح فيها ومولي ؟ او نتنبأ بمجتمع عليه السلام ! وماكو مجال باصلاحه ؟

جان الرسول قبلنا يوم شاف من الاقوام الثانية الاعراض قال خلاص هذول مامنهم فايده ولو اسألوه الملائكة يقول لهم اخذوهم هذول مامنهم رجا

قال لعل الله يخرج من اصلابهم رجل يشهد ان لا إله الا الله !!!!!!؟ او كما قال مو حافظه النص بس هاذا المعنى


هذا مثال وكان في جانب الدعوة .. وحسن التعامل مع الآخرين !؟ مع ان كان يقدر على قولتهم بمرت ملك ياخذهم وياخذ عيالهم .. بإمكانه يدعو عليهم !؟ وبإمكانه يمحيهم محي طبعاً بأمر من الله عز وجل .. لكن رحمته بأمته وصبره عليهم

هذا مثال يمكن تقول ان وقت الرسول صلى الله عليه وسلم غير عن وقتنا .. بس اهوا قدوتنا واهوا اللي المفروض نرجع فيه حتى بمعاملاتنا ..


المختصر المفيد :
1
الموضوع يحتاج صبر وطولة بال
2
نحسن الظن بأنفسنا اولاً وبالأجيال القادمة اللي بتتربى على ايدنا ان شالله
3
نبذل السبب في تغيير المحيط .. شالفايدة من كلامنا اذا ماغير في غيرنا ؟

أحس اني قرقت وايد واحس بعد ان كلامي مو مرتب ... بس الموضوع حز بخاطري خصوصاً ان تصنيفنا من الشباب والأجيال القادمة

--

مالناش بالسياسه + مااحب اقرا جرايد برمضان احسها بايته ;p

--

نصيحتي احسن من دكتور التغذيه .. عقب ماتقدع قوم صل المغرب وعين من الله خير ..واشرب لك شوربه وانطر التراويح عقب التراويح هبس عاد على كيفك ;p

لأنها بتكون وجبه وحده مو وجبتين ولو كليت الـ 1500 كالوري كلهم بهالوقت مايضر ان شالله :))

فريج سعود said...

الخراب موجود عندنا وعند غيرنا من عمر باشكال مختلفة وعلى الخفيف
مو هذي المشكلة المشكلة انها يجي يوم وتصير جزء من ثقافتنا وتصير عادية ومستساغة ذيك الساعة شيعدلنا الاغلبية راح تشوف الي قاعد يصير عادي واذا اعترضت يودونك مستشفى الميانين

Anonymous said...

تقبل الله طاعتك ,,, حبيبي بو شروة
أمانتك بوس لي رأس الوالدة ,,, بصراحه الأمهات لما يطبخون تحس أن أكلهم فيه نكهة مميزة ممزوجه بالحب والحنان والدفأ ... علشان جذي الواحد ما يقدر يقاوم أكلهم
بعدين سلم على اخصائي التغذية
وقوله تعال جرب الأكل من يد الوالدة
وأنا أظمن أنه راح يحول تخصصه من اخصائي تغذية الى شيف
اما موضوع الاخ صاحب الايميل
بصراحه جابها على الجرح
وما اكثر جراحات هذا الوطن
الواحد صار يخاف يودي عياله للمجمعات من هالسوالف والخوف اكثر من القنوات الفضائية اللي تروج الى هالامور
امر محزن هذه الموجه التغريبية اللي تعصف بمجتمعنا .. امرها مؤلم ومحتاجين معها الى فزعة ووقفه جادة
والى ترى الحال من ردي الى اردى

والله يصلح العباد والبلاد

Shaima'a Alkandari said...

دعواتنا لك ياخوي وين ماتكون عساك سالم ودربك خضر ودرب السلامه يارب

مومشكله مبلشه من الاخير بس ماعليه قاعده ارجع قري بلي قريته

المهم

الله يحفظلك الوالده وتسلم ايدها اللى تعمل حقات وحقات لذيذه

كل سفره لازم فيها اللى ذكرته وزود الحمدلله على هالنعمه وعساها ماتزول يارب

الحين هالاخصائي نسى ان في ناس تحب تاكل هالاكلات الطيبه بهالشهر شلون يحرمهم منها
خلاص خلنا نتفق واللى اوله شرط اخره نور شرايك الله لايقول لى صرت خلف القضبان ماراح اطلعك بس راح اطرشلك خبز ايراني ورهش وجبن افا عليك بس ياخوي انت وراك ستات بس مش اي ستات قدها وقدود
والله ياخوى يامشاري احنا اللى قاعدين نغير بنفسنا
وبنظرنا ان الدنيا تغيرت بس اهي نفس مااهى احنا للاسف قمنا نخرب ونعفس الاولى والتالى

لو كل واحد فينا يحاول يصلح بنفسه علشان تصلح الديره جان احنا بخير

magnoonah said...

مبارك عليك ما بقى من الشهر

اتمنى تسامحني ادري متاخره وانت اخوي الكبير ان جان ما تسامحني منو يسامحني
:(
:(

ادري سامحتني:)
كلي ثقه قلبك كبير

بالنسبه للقرآن عجبني من اول ما دريت عنه ونزلته على جهازي

اما تعليق الاخ معاه حق لا تلومه كلنا شايفين الي هو شايفه بس مو كلنا نحاول نتغير للاحسن
للاسف
الي تطلبه مو مستحيل يامشاري الي تطلبه صعب وحيل صعب

الله يعينا ويهدينا

ونسيت اقولك تذكر يوم قلت لك نظام جفس الغتره وشمر الذراع قلت لا انا نظامي رياضي والبس برمودا؟؟؟


اشوفك قالب المدونه مطبخ جنك الشيف رمزي وطايحله تشجيع بالشباب
طبخوا واكلوا واذا ما حصلتوا روحوا المكان الفلاني

مشاري ابوي انت وين الرشاقه وين الجسم الممشوق وين الرياضه

تركت اسبوع والكرش جدامك وواصل الوزن 100

اخر الشهر شبتصير؟؟

خل عنك كيك القنابل وجابل الشوربه والسلطه والتشريب الاكل الموجود على السفره للنظر مو للمس بالنسبه لك

:)
ادري طفرت فيك شسوي اقرا سوالفك وانصدم منت الاولاني

يا مال العافيه
:)

mowa6en said...

عزيزي مشاري

أكبر أخطاء التفكير المنطقي هو استخدام
التجريد ثم التعميم

شكرا على المصحف
وشكرا لدفاعك عن التشريبه

Anonymous said...

عزيزي مشاري

أكبر أخطاء التفكير المنطقي هو استخدام
التجريد ثم التعميم

شكرا على المصحف
وشكرا لدفاعك عن التشريبه

بـركـــــان said...

بعد التحيه ...

الله يرحم حال الكويت .. كتبت موضوع اسمه عندما يفسد الشعب يبين وجهة نظر المعقب المجهول ... خ ض ي ر اللي بيجنس كل بادية الشام على ظهورنا مكانه السجن .. اتمنى يقعد زياده و يسفرونه .. الشرهه على حدس اللي داعمينه

بركان ثائر

White Wings said...

يا مشاري
انا من شفت أول التعليق وفيه كلمة "زبالة" وغسلت ايدي، يعني هذا اسلوب بذمتك؟ كلامه فيه تعميم غير منطقي وطبعاً مافيه اي احترام للآخرين
وخضير قلعته
:)
والى أن ينتهي رمضان لازم الحجي مال التغذية يستريح، نقول تشريب يقول تمر؟؟

Shather said...

مابي اعلق الا على الجزء الاخير ..

ضححححححححححححححكتني ..
اي والله اللي يقعد عالصفره و يشوف ما لذّ و طاب يقدر يمسك نفسه ؟ :P


لا و برمضان بعاااااااااد

Unknown said...

الحاسة السادسة قد يكون الكلام صحيح بأن التركيز على الفساد والنواة سليمة هو أمر خاطئ
وأنا بعد أقول لازم ما نسمع كلام الاخصائى
:)

Unknown said...

فتي الجبل
الكويت فيها قانون
بس نايم

Unknown said...

Very.Q8ya : اقتراحاتج قوية يا كويتية ويبيلها سنين وقناعات علشان تصير
بس تشكرين عليها
:)

Unknown said...

الحجـــيّه القصة فعلا ذات معنى كبير واتمنى من رب العالمين ان يجعلنا اجيالنا القادمة اجيال خير وصلاح

وشكرا للدعاء يالحجية
:)

Unknown said...

qesat_5ayal يسلم تمك

احنا برمضان :)) لا يمكن نكون طيوور

Unknown said...

ButterFlier: اشكرك حبيب ئلبي

Unknown said...

reLaaaX : للاسف ما في نظرة محايدة
لان نفتقد الوسطية هذا كل اللى اقدر اقوله

Unknown said...

فريج سعود عليك نور لما يصير الغير الغلط جزء من ثقافتنا ويستساغ هذا الامر الغير مقبول فعلا

Unknown said...

الدائرة الخامسة اللهم امين واشكرك يا عزيزى واخوي الكريم
:)
بس صدقينى الظاهر الاخصائى كان متأثر بصيام رمضان

Unknown said...

Shaima'a Alkandari : اختي شيماء مشكوووووورة :) كلامج ما اقدر اعلق عليه لان سلسبيل على قولتهم
:)

Unknown said...

magnoonah : ههههه ضحكتينى الصراحة ما شاء الله ذاكرة :))

بس انا هم مرات الحين دشداشة ومجفس بس بدون غترة
:))

Unknown said...

moowa6en : اتفق معك التعميم خاطئ
وبنفس الوقت

اشكر مشاركتك لى بالدفاع عن التشريبة
:)

Unknown said...

White Wings : طلعتي من ربع التشريب :)
صحتين

ويستريح

Unknown said...

Shather : قوليلي شرد عليه؟
ما ينرفز؟؟؟؟؟