الطموح و العمل والمثابرة والالتزام وقليل من المشاغبة تكون الحياة ناجحة

Thursday, July 24, 2008

موضوع غير محتشم



تحديث

مبروك للزميل العزيز الاخ براك على الديوان الشعري له فهو متميز في رقيه الشعري فكل التوفيق لشخص عزيز نفس براك




أتذكر جيدا بل وأتذكر بالتفصيل لما كنا صغار وكان هالكلام أعتقد في بداية الثمانينات ومنتصفها

كنا لما نطلع السوق مع أهلنا

المباركية
السالمية
مجمع النقرة

هالاماكن يعني كنت أتذكر أن الحريم تقعد على الدجة وبحضنها ولدها وترضعها جدام الاوادم ؟


أي أي يعني المرة تقعد وتطلع صدرها وترضع الياهل بالشارع ومحد قال يقولها شى ؟؟؟

ما أبي يزعل ويتنرفز لكن ليش محد كان يقولها شي؟ والا يقولها عيب ؟

ما ادري الصراحة شرعيا شنو حكمها
بس ياهل وامه قعدت ترضعه ؟
يعني اتوقع الحين لو مرة تسويها يمكن 6 اشهر سجن والا بنغالي يغتصبها؟


انزين الشى الثاني

قبل الغزو كنت اتذكر وحدة من شغلتين يا وحدة متحجبة او وحدة تلبس برقع او بوشيه نفس الحريم الكبار

صار الغزو

جك بوم والا فجأة الكويت كلها نقاب؟؟؟

عسي ما شر ؟

المشكلة مو بالنقاب ولكن ليش هالتغير؟ وهل اهو بس تقليد للاخوات السعوديات والا ليش شافوه سترج ؟ وقالو موضة؟

شوية عقل ما يخرب من الموضوع شي

32 comments:

secret said...

انت قلتها

شوية عقل
:)

kila ma6goog said...

خل يتنقبون بس لا يلفون علينا بالشارع

chatterbox said...

وانا اقولك شي بعد
اول البنات تنانيرهم ميني جوب يعني ماتقدر ترفع ايدها الا و بين الاكو والماكو مع احترامي لك :) ومع هذا محد يطالعها ولاحد يتحرش فيها
لو هالايام جان علووووووم

اول الناس كانوا غير كان الوقت احلى

Salah said...

بس عجبني العنوان

الصراحة انا ما اشوف فيها مشكلة ان الوحدة ترضع ولدها بالسوق، طبعا تكون مغطية... المفروض تتوفر كل الظروف لتشجيع الرضاعة الطبيعية

تحياتي

Organic Kuwait said...

i think its very interesting that u posted about breastfeeding in public in kuwait.. yes i remmeber these scenes, i see them now as beautiful and natural.. there is nothing more cruel to me that seeing amother ( or a maid) bottle feeding a child. i got lotttssss of feedback from people after i posted my article breastfeeding in public in kuwait.
http://organickuwait.blogspot.com/2008/03/breastfeeding-in-public-in-kuwait.html

بـنـت بـطنـهـا said...

تصدق مشاري انا ملاحظة نفسي بعد كل ما صارت ظاهرة ما كانت موجودة قلت قبل الغزو كان وكان وكان
الحين انا خليت الموضوع على جنب وكلامك عدل والله العظيم بس وقفت عند كلمة قبل الغزو تعودنا نقولها .. هل صج الغزو اثر علينا لي هالدرجة ولا الغزو كان مجرد توقيت نوقت عنده؟؟ بخاطري اعرف
خلني اقولك شي
قبل الغزو كنت ما تفرق بين بدويه وحضرية وشيعيه وسنية بس ملامحنا كانت واضحة ولبسنا وتزهلقنا ان كنا كويتيات
والكللللللللللل كان يحاول يقلدنا
الحين قمنا نقلد الكلللللل ونسينا نفسنا
كل الشكر مشاري

كويــتي لايــعه كبــده said...

الشيء الأول

كانت الناس أبسط من الحين ومرأه ترضع عيالها محد له شغل فيها

انا اليوم الدنيا غير ونوايا الناس غير ومحد عنده نظره بريئه

الشيء الثاني

النقاب از ذ نيو برقع
بنات البدو ما يبون يتشبهون بأمهاتهم فلقوا لنفسهم النقاب مخرج

ما طاح الا انبطح

Faisal said...

يامعود قبل الواحد يامن بناته على شباب الفريج
الحين تخاف على (ولدك) من (بنت) بيت الييران

Enter-Q8 said...

عمي هذا النقاب الجديد لزوم السكس بانص
لأن مو نقاب و لان مو حجاب و لان يثير اكثر ما يستر

ياعمي يالمشري انت ليش تبنا نتكلم خلنا ساكتين

قبل بذمتك تقدر تطالع وحده حتى لو طالعه مع رفيجها
يعني رفيجها مو زوجها و لا اخوها

و هم ما تطالعها

اللحين زين ما يقولك و انت طالع مع مرتك

وخر اشوي خلني اكلمها اشفيك صاك عليها

في هوشة عوده صارت بجمعية مشرف
اللي يدري عنها ترى انا

راح اكتبها ببوست

بس خلنا نخلص من سالفة
سماحة السيد ناصر الله الخرافي

حسام بن ضرار said...

ما اشوف اي عيب في النقاب المشري

و اتمنى ان ما نخلط بين المنقبات حشمه و المتلثمات للبلاوي

كل وحده حره بطريقة احتشامها مثل ما الفصعات احرار بطريقة لبسهم

احب اوضح شي للأخت بنت بطنها لأنها الظاهر كانت صغيره في السن و ما تذكر مرحلة قبل الغزو

قبل الغزو النقاب و الحجاب و البوشيه و البرقع كلهم كانوا موجودين اخواتنا البدو كانوا يتميزون بالبرقع اللي قل الحين و دش مكانه النقاب و البوشيه و كل هالامور ستر و حشمه و فيها خير

و الاخوات من اهل الشيعه كانوا يتميزون بالملفع الاسود و الحجاب الفاطمي على الحنك

اللي انتشر عقب التحرير بين الحريم اهو الملفع الاسود لأن قبل الغزو كان مميز لنساء اهل الشيعه فقط

************

بالنسبه للي ترضع ولدها جدام الناس

هذي وحده من ثنتين: يا مينونه و فاقدة عقل

يا فاصخه الحيا مره وحده

|:| DUBAI |:| said...

سوالف بنات

; )

محـــــارة said...

بموضوع الحكم الشرعي ماعندي خبر ولا خلفية للفتوى وصج شغلات ساعات تشوفها غريبه عجيبه لكن الله يهدي الجميع

بموضوع قبل الغزو ماكو نقاب وعقبه نقاب أنا ماني فاهمه شنو قصدت وشنو وجهة نظرك بالموضوع بشكل أكثر صراحه

مثل ما كان مافيه هالسفور الفاضح والتفصخ بالمجمعات ولبس المايوهات على البحر هما فيه طرف ثاني اعتدل أو خل نقول زاد إلتزامه

مع احترامي للمنقبات من نوعية النقاب عرف لهم هذولي ودي يفصخونه اريح لهم وللجدامهم ولنقاب لأن مبتلش فيهم

بلأخر بعد الغزو أمور وايد تغيرت وماصار عندنا إلا ياتفصخ ولا حجاب اسم الحجاب ولا نقاب بعضهم معتدل والأخر اسم تبع عرف القبيلة لا اكثر

تسمحلي أقولك أخوي مشاري موضوعك مافهمت المبتغى منه واااايد وهالشغله من القلاليل الي تصير لي ويا ماتكتبه

ومرسي كثير أخوي

The Voice Within said...

awwal kanat linfos '3eir .. i guess .. aw il a'3labiya tafkirhom MOSTAGIM .. al7in lawadim tafkirhom 9ar mari'6


o salfat il nigab a3tigid ilsalfa yabilha taf9il fi anwa3 :

nas talbisa min bab il diyana o ham halsalfa fiha taf9il .. nas tshofa 3ala ina shai ta6awo3 o nas tshofa far'6 o kil group 3inda il dalil ilshar3i illi yistinid 3alih


nas talbisa min baab tagaalid oo a3raaf mawrotha


naas ti3tibra mithil il li7ya shai azida bshakli oo o9al 7g a'3raa'6 thanya .. zawaj ... laft na'6ar oo heik sha'3laat ..



yislamo . enjoyed the topic:P

مُحَسّدْ said...

لا فرق الان بين السافرة والمتحجبة والمتنقبة

حياتي هدف مو عبث said...

ليش دايماً نربط كل شي بكلمتين

قبل الغزو

بعد الغزو

!

Anonymous said...

اللي تعيش بهالوقت وتشوف ان التحرش والخز صار جزء لا يتجزأ من مجتمعنا يتكون عندها شعور غير طبيعي تجاه المحترمين اول!! الكويتيين قبل اتوقع كاملين والكامل الله
الله يردنا مثل قبل انشالله يا حلوهم! ـ


**

الرضاعة
اسمع ان الرضاعة امر صعب ويستمر لفترة طويلة (توصل سنتين!) فأعتقد اننا لو فرضنا على الام ان تكون بالبيت كل ما بغت ترضع نخلي حياتها صعبة جدا جدا - وبيزيد استهلاك النيدو ـ
من سبل التشجيع على الرضاعة الطبيعية عدم استنكار الترضيع واعتباره امر فاضح. اكيد مستحيل ان ارضى بتطمش اللي يسوى واللي مايسوى ههههه بس اذا متستره محد له حق يقول ولا كلمة والناس لازم تتعود ماتخز اذا شافت هالشي

أبــو بنــــدر said...

بسنة 82 كانت بياعه مصريه بالشارع الى ورانا كانت تسوي هالحركه وترضع ولدها بالحوش جدام الشباب مرتادي البياعه وكل شوي الربع واحد يروح يشتري والشباب كلهم يرافقونه ومقزرينها مره علك مره كندادراي لين تعبت صحتنا . يعني أصبح رضاعة ولدها نوع من انواع الدعايه .

:)

----

جهل والناس الأن تعلمت

والموت يعشق فجأه مثلي..والموت مثلي لايحب الإنتظار said...

السلالم عليكم

اولا انا بسلم وبقول عسى ماشر ملشفتك بمدونتي من فترة عسى المانع خير..

ثانيا بالنسبة للموضوع انا صراحة ان علقت ماراح يكفي واللي كتبتة في مدونتي عن ظواهر وموضات غريبة بين بنات جيلي اظن تكفي..

وعلى فكرة مشاري وايد ناس إستاءت من كتاباتي

وفي ناس ظنوا اني متدينة على الرغم بأني لست كذلك بل بالبعكس انا أتمنى ربي يهديني أكثر:)

شوف انا اوقول من وجهة نظري ان الكويت سابقا كانت في حالة تخلف يعني الحرام عندهم عادي حلال مثال

أمهاتنا سابقاً كانوا يلبسون وايد قصير والحريم قبل يلبسون العباية ام الراس بس لانها من التقاليد وعرف تعودو عليه ماهو دين وخوف من الله ليش لانة في نقص في الدين ومافي ثقافة
..

بس سبحانك ربي الدنيا مع الانفتاح والوسائل الاعلامية من تلفزيون وافلام واذاعات المفروض انة الادمي يتشبع لكن بالعكس صار الواحد الحين عينة قوية وماتزل عن البنت ولا المرأة
اللي معاها عيالها


ربي يهدينا ويهديهم

ودمتم بخير وسلام

الديوانية said...

التغيير سنة البشر في هذا العالم ولا نخلي الغزو شماعتنا :)

مشكور:)

ولد الديرة said...

بصراحة القانون لازم يكون صارم مع اي مقاس اكبر من 38
DD

Sn3a said...

على قوله امي
تقول
النوايا غير

قبل تقول كنا نطلع مع كل عيال الفريج ونروح فيلجا او نروح البر
الحين كل شي غير

عثماني said...

عدل كلامك اخوي مشاري

الناس تبدلت .. التفكير اختلف

القيم كذلك اختلفت

الله الحافظ

charisma said...

مشارى عمرى ما شفت مره ترضع ولدها بالشارع هذا وين !

وحتى لو صارت لازم تحرص على المكان المناسب مو جدام الله وخلقه
://

وموضوع الظواهر الى دشت علينا بعد الغزو كثيره حتى نفوس البشر تغيرت بعد الغزو

وموضوع النقاب الى اعرفه ان المنقبه واصله لى مرحله كبيره من الالتزام والتدين

الحين المنقبه الله يستر عليها

اخترب مفهوم النقاب مع الاسف
اختلط الحابل بالنابل

Q8 Whiteboard said...

الملاحظ أن بعد العزو صار فيه توجه قوي نحو التدين

النقاب حكم شرعي .. يرى بوجوبه بعض علماء الدين

بالنسبة لي كثير من أهلي منقبات .. لا تقليد ولا موضة ( منو هذي اللي بتتبع موضة متعبة مثل لبس النقاب ! ) .. لكنهم يستشعرون انه فرض ديني عليهم اتباعه .. لا أكثر ولا أقل

someone_q8 said...

السلام عليكم
النقاب والحجاب المعروف وليس حجاب هالايام
موجودين من قبل اخوي مشاري
الكويتيات قبل الستينات كانوا يغطون ويهم بالبوشية ماتشوف منها شيء واستمر هالشيء لغاية الغزو بس طبعا مو نفس قبل لان الحضارة والتمدن طغوا على المجتمع ,
وما اعتقد ان النقاب فيه مشكلة خصوصا اذا كانت البنت في غاية الجمال و جمالها يفتن المرء , لا انخلي مواضيع النقاب والحجاب واللي مولابسه عدل اهي المواضيع الرئيسية
كل واحد يعرف دينه واللي جاهل بالدين ما يعيبه انه يسأل



لما قلت عن اللي اترضع , تذكرت ايام الغزو في بسطة بيان في وحدة عراقية قاعدة اترضع ولدها والناس رايحه وياية ولا كأن فيه شيء لا ويمها كلاشكنكوف اطلعت الاخت من الجيش الشعبي :)))

حسام بن ضرار said...

نسيت اضيف شي اخوي مشاري
الاخوات في المملكه اكثر ما يلبسون "الغطوه" اللي اهي مثل البوشيه عندنا بالضبط

يعني الموضوع ماهو هبه و تقليد للسعودية بعد التحرير

:)

Shaima'a Alkandari said...

الاول تحول
والحين الكل ينولد مفتح عينه
للاسف النظره صارت وصخه عند الاغلبيه

فتى الجبل said...

بالاول يا مشاري الناس كانت عايشة على الفطرة
اليوم عايشين على التطرف والتشدد بكل شي
يا انك معاي والا ضدي

Eng_Q8 said...

مافي عقل

ذات عقل خشبيّ said...

عن نفسي أعتقد


إن الغزو ماله شغل بالموضوع


النّاس بكل مكان تغيّرت ...


أول النّاس على الفطرة

وألحين كل شيّ يخليهم بعاد عن فطرتهم !



شكراً ...

تحيّاتي ...

ام الحفيز said...

مشاري

هااااااااااووو ما حلة الرضاعه الا بالهواء الطلق وشهالعبوا؟؟ خلوووه جنهم النواار في لبنان قطيعه...انت اشلون تطيح على هالنماين مادري؟؟

اما موضوع الحجابات لو بنحجي من اليوم الى سنين جايه الي فوق راسهم وإلي براسهم ما رح يغيرونه...ياربي كل شي ينشرى وينباع فيه الا السنع والذوق يا بالوراثه او بالفطره او من معاش قوم الذرابه....ولا بالله عليكم وحده تمشي بالمجمعات حاطه فوق راسها بقشه وتقول موديل وموضاا!!وش هالعبواا المشوطر....بس اتصدق عاد طماشه
اما من ناحيه ديانه ولا عفه فانا ما احط بذمتي بس ما اظن ان الحجاب الي تقول عنه له علاقه بهالناحيتين
العمليه كلها للفت الانظار ولتعزيز الثقه بالنفس...ولاحظ كلهم اهوووول وجياكر الحمدالله والشكر

Kuw_Son said...

شياب طاري السالفة الحين ههههههه ..
و لا متذكر الحبيب بالتفصيل
:P

شكلك مقحط