الطموح و العمل والمثابرة والالتزام وقليل من المشاغبة تكون الحياة ناجحة

Sunday, July 27, 2008

ليش ؟



الموضوع اللى فات اثار تساؤل عند البعض

ليش الغزو ؟

وهل الغزو صار شماعة ؟


اوكى

خلونا نتفق على هالحقيقة

تاريخ الكويت
او بالاصح التاريخ العربي ارتبط باحداث بسنوات

يعني

سنة الهدامة وهي سنة هطلت فيها الامطار سببت فيها هدم البيوت

سنة الهيلق ( وهي عربيا من الهلاك والهلك يعني هلك الناس واضطرهم لذلك بالسفر والهرب من الجوع حتي اضطروا الي شرب دماء البهائم وكان من عام 1868 الى عام 1871 )
المصدر



سنة الطاعون
وكانت عام 1831 وفيها مات الالاف البشر وتغير حال الكويت وكان حين ذاك عدد الكويت قبل الطاعون 10000 الالاف نسمة وبعده كان 4000 شخص اى أكثر من 50%

المصدر
سنة الغزو
غيرت ملامح الكويت الاجتماعية وهذا واقع
فأصبحت الامور المستهجنة قبل الغزو لها قبول كبير وذلك لوجود عادات وأمور أنفتح عليها الناس فجأة دون سابق انذار
الغزو ليس شماعة لأمور التنمية والاقتصاد فهذا تعديناه
وأمور كانت عادية أصبحت غير مسموح فيها وغير صحيح العمل فيها حسب ما تغير بعد هذه الفترة المشئومة

ولكن الغزو كان وصمة عار وانتقال البشر من حال الي حال

اللى كانوا عايشين بالكويت في الغزو يعرفون شنو كانوا الكويتيين مع بعض ويعرفون اللى اشتغل بايده وشنو تعلموا
اليوم مع الاسف الناس نست كل هذا واختلطت الامور في بعض واعتقد أن صدام زرع بينا أمور بدت تطلع ثمارها الحين
الحياة بدت تصير مختلطة بمثال يعني ما كنا نسمع موضوع سني وشيعي
اليوم المراهقين يتكلمون بهالامور السطحية والسخيفة على اساس انها موضوع ما يطلع من الثوب الكويتي
الغزو غير من طريقة التفكير وهذا واقع ومع الاسف بدل من أن نتعلم تراجعنا فكريا
مو قلنا العقل غاب ؟؟
نشوفكم علي خير

30 comments:

Mohammad Al-Yousifi said...

شي طبيعي

كل حرب تترك وراها آثار نفسية كبيرة ما تبين الا بعد فترة

الله يستر من الجاي , منطقتنا كلها حروب

Q80 Blogger said...

انا اشوف المنطقة كلها تمر بنفس الظروف
الغزو نعم قام بالتغيير .. لكن هناك امور كثيره اخرى محيطه بنا أثرت في ما نحن فيه اليوم
هناك دول حولنا حالها أسوء بكثير !!

Faisal said...

كلامك صحيح اخوي

بس هم بعض الامور والطبايع والتصرفات كانت موجوده واندثرت وردت مره ثانيه
بعض هذي الامور الانحلال من الدين والعادات والتقاليد في السبعينات

ووردت الحين في وايد منها

كويــتي لايــعه كبــده said...

هناك من يتحجج بالغزو لتغطية قصوره وهنا أقصد الحكومة "الرشيدة" لكن لا اقتصر الكلام عليها

لكن الغزو بالفعل نقطة محورية لأمور كثيرة منها النفسية والاجتماعية والعملية وغيرها وهذا طبيعي

وارجوا عدم تهميش حجم الغزو من قبل أي شخص بكلمة "خلاص شيء وانتهى..." احتراما لمن دفعوا الغالي والرخيص بتلك الفترة

ناس تسمع عنه سمع وناس عايشته الى اليوم!1

Anonymous said...

الأحداث المهمة والفاصلة كالغزو تكون مثل التاريخ لكثير من المجريات التي تأتي بعدها او قبلها

molok said...

مشكور مشاري ..

انا اشارك كويتي بلوقر في الراي اعتقد ان ظروف المنطقة اثرت فينا اكثر من الغزو ..

المهم منو قاعد يحاول يسكت هالفتنه ؟؟

تحياتي

kuwaitawy said...

والله صاج



فعلا الغزو غير ملامح الكويت

بـنـت بـطنـهـا said...

أول شي السلام عليكم ورحمة الله وبركاته

أشكرك اخوي مشاري على الرد على التساؤل اللي كان في بالي .. وانا قلت ان حتى انا اقول قبل الغزو .. ولو تلاحظ مدوناتي القديمة تثبت هالشي .. ولا كان قصدي ان اهمش من آثار الغزو مثل ما قال اخوي لايعه جبده

كل اللي كنت ارمي له إن ليش دايما نقول قبل الغزو قبل الغزو قبل الغزو هل هو مجرد توقيت أم اهو بالفعل السبب اللي احنا فيه .. اذا كانت الاجابه الثانية معناته راح نفضل على حالنا ولا راح نتقدم خطوة جدام وخلاص هذي نهاية الدنيا بالنسبة لنا

هذا كل اللي كنت اقصده

واعتذر لازعاجكم

حياتي هدف مو عبث said...

شكراً مشاري على التوضيح

JooJ o MaJooJ said...

اي والله صدقت..
تصدق وايد افكر في هالموضوع وشلون صرنا جذي!!
والله مرات اتمنى اينا غزو ثاني عشان الناس تنتبه حق الي قاعد اتسويه..
بس بالاخير اكتشفت ان شعبنا مع الاسف جاهل
و مايفكر إلا بمصلحته...
اول كانت الام لما تربي عيالها
كانت تعلمهم على روح التعاون والاخوه ماكو فرق بين سني و شيعي و اصيل و مو اصيل.. اتعلمهم على الكرم والي بيدك مو لك..
لكن شوف هالوقت وشوف الامهات شلون تربي عيالها..والله جدام عيني اسمعهم..
اتعلمهم على النحاسه والتفرقه!!!
ليش صارت الدنيا جذي؟؟
حتى شبابنا الحين مو مثل اول مافيه الغاريه على اخته الكويتيه
وايد امور تغيرت
اتمنى كل يوم من الصبح احطولنا صور تذكرنا بالغزو وشلون كنا عايشين وكنا على قلب واحد عشان نحمد ربنا على النعمه الي احنا فيهاالحين و مانكابر على كويتي من نفس جنسنا

اللهم احمينا من شر الفتن


ماجووووج

JooJ o MaJooJ said...

اي بعد نسيت شى... البساطه
اول غير الناس كلها بسيطه والكل عايش تقريبا في نفس الطبقه.. الغني و الفقير
في كل المناسبات ما تلقى الغني يبذر في فلوسه... كان مقتنع بالي عنده و مرتاح في عيشته البسطه و الحلوه
بس شوف الحين وشوف الفسق الي قاعد يصير
قام يصير مزامط بين العوايل الغنيه
وزادت الغيره والحسد الله يكفينه شرها
تغيرت النفوس...

الصراحه موضوعك يعور القلب وفعلا يحتاج وقفه..

وسامحني على الهذره

ماجوووووج

someone_q8 said...

السلام عليكم

اغلب الدول اللي خاضت حروب , بعدها على طول شكلت لجان وأنشأت مراكز لمعاجلة مواطنينها من آثار الحروب , احنا شنو سوينا ؟؟؟؟
لهاط وبوق
من تعثر الى تعثر في السياسة والاقتصاد
خلينا البلد وقعدنا نتصارع ويه بعض كأننا اعداء
ماكو خطط مستفبلية واذا فيه كلها خياااالية وما تطبق

العيب فينا احنا ولا الغزو عبارة عن قرصة كبيرة وللأسف ما اسستفدنا منها

bu-saad said...

صدقت....
وانا اخوك
الله يا ريحة الماضي

Peace said...

مثل ما كنا نقول
ما قبل النفط
وما بعد النفط

صرنا نقول
قبل الغزو
و بعد الغزو

لانها فتره انتقاليه

Anonymous said...

a5 mishari a3tethr radi kelsh mala she'3l blmawthoo3 bs ana adri enk men motab3een ilcinema f 6alabtk ur next post taktb 3an film batman the dark knight etha 9aratlk for9a o shfta leana ilfilm 9j men rayee 5ayali o bla5a9 the joker role eli mathla il3abgari heath ledger yareet takteb lna rayk bl film:D thnx

ولد الديرة said...

ترى مو بس الغزو غير مجتمعنا

سلايدات نهير الشمري الدايخة يابت لنا كئابة

براطم شيماء علي لوعت جبودنا

مغثة داودوه كل رمضان دبلت جبدنا

وايد اشياء بصراحة يبيلها تغيير











ليش ما نعطي لميس جنسية

مثلا يعني

|:| DUBAI |:| said...

مشاري

خذوا الجانب الايجابي من محطة الغزو

و انسوا السلبيات

ترى السلبيات أحيانا تحزن و تهبط الهمم

الايجابيات وايد

و أولها

أنكم تعمرون البلاد

و تصورون للخلق ..ان الكويت ما يهزها شيء

: )

!!

Anonymous said...

الاعلام دورة في التغيير اكثر بوايد من الغزو الحين الكل يقدر يعبر عن رايه وصوته ينسمع. مثلا في مودنة كويتية اسمها مثلية وافتخر. وفي مدونة شيبت راسي اظن اسمها علمانيون كلامها وايد عنيف على الدين انا استغرب من ناس يتجرأون هالكثر على الدين. صاحبها مرة كتب مقالة ان كل الاخلاق السيئة في البلاد العربية ياية من الدين!!! ويقول الاجانب عندهم اخلاق والسبب هو ان عندهم فن؟؟؟ اوكي انا ماراح اقوله مارلين مونرو وغيرها اللي انتحروا لان اخاف يقولي هذا مو فن بس موزارت اذا مو فن ماادري شنو قصده. انزين موزارت انا ودي الاخ الحبيب يقرا تاريخ حياة هالرجل.

Sn3a said...

المفروض الغزو بعد هالفتره الطويله
يكون فرصه لنا
نتعلم ان نشيل ديرتنا وماننطر احد لا جامعه دول عربيه ولا بطيخ

الغزو المفروض يعلمنا نحط ايدنا بيد دول الخليج اللي شالونا

الغزو كان المفروض يعلمنا نحافظ على ثروات ديرتنا وان اللي غزاها مو ارحم من اللي باقها


الغزو كان المفروض يعلمنا شلون نسويلنا مصدر دخل ثاني نعتمد عليه


الغزو كان المفروض يعلمنا
نصير كويتيين اكثر

qesat_5ayal said...

لا أختلف بتسمية الفترات

بقبل الغزو
وبعد الغزو


حقائق موجودة

قلب طفله said...

للاسف البلا بنفوس الاوادم

الغزو فتره انقرصنا و تأذينا منها

وايد بس المفروض من نتايجها انها

تخلينا على قلب واحد و مو

اي شي يفرقنا :(

الله المستعان

-mate said...

يعني كل الأمثلة اللي ذكرتها والأحداث اللي غيرت تاريخ الكويت من سنة الهدامة والهيلق والطاعون أعتقد برأيي المتواضع أن الشعب أصبح أكثر تماسكاً بعد الحدث

ولكن الغزو، بعد الحدث طبعاً مو وقته. عكس ذلك تماماً من الأحداث السابقة. للأسوأ للأسف

الحارث بن همّام said...

ياليت تكون وحدتنا الوطنية في السلم مثل ما كانت في الغزو

the.thinker said...

بالنسبه أنه الحرب أثرت على الناس هذا شي لا شك فيه ،، حتى لو بعد 18 سنه "بس" الجيل اليدييد أو اللي كان صغير في الغزو ماكان في تأثير كبير عليه (الاالبعض)

والله يحفظنا من الياي

يعطيك العافية :)

mowa6en said...

نا عندي قناعة متعلقة في المجتمعات الشرق أوسطية وخاصة العربية بشكل خاص .

تقول القناعة بأنه في الغالب الأعم لا يحدث التغيير في المجتعات النامية إلا بعد الأزمات الكبيره لأننا كمجتمعات تعودنا بأن مصدر حركتنا هي ردة الفعل وهي التي تساوي الفعل وتعاكسه بالاتجاه ، فإذا ما استثمرنا ردة الفعل (أضعف الإيمان ) فلن تتطور مجتمعاتنا

تحياتي

Super Woman said...

مو قلنا العقل غاب ؟؟



اي والله

بس ترا مو بس الكويت والكويتيين
كل مكان !!؟

الدنيا كلها في تراجع

Shaima'a Alkandari said...

اؤيد اللى قالوا انها فتره انتقاليه
لكن هل معنى الانتقاليه ان ننسى كل ماسبق ونتغير ونغير كل مابداخلنا وكل اللى يحيط فينا وفكرنا بعد
مادرى بس بنظري الانتقاليه انتقال من حال الى حال افضل مع اخذ الخصال الطيبه اللى كانت بالمرحله او الفتره السابقه




يعني نتعدل ونتقدم ونواصل مو نرجع قري

ولد الديرة said...

عليك غياب
!

eShamiYa_RockS said...

this is the circle of life ..

المجتمعات في تغير دائم .. سواء للأفضل أوالأسوأ ..ماكو شي يظل على حاله ..والتغيير يكون من عوامل عديدة لا حصر لها تؤثر ببعضها في أوقات وأماكن معينة ..منها الظروف السياسية المحيطة بنا و تصرف غير مسؤول من مواطن و مسؤول باسم فئته

نتمنى ان تكون هناك عوامل ومؤثرات ايجابية تنقلنا الى مستويات أفضل في جميع النواحي
ومنها الأخلاقية التي تناقشها في موضوعك

Organic Kuwait said...

el ghazo athar feenee shakhseyyan .. it made me a better person.. i see the world clearly now.. im stronger .. i appreciate good relationships.. i appreciate people around me.. i care for all.. if anything .. i truelly believe the invasion should have brought us closer as kuwaitis..
why r we where we r now? i have few theories..