سياسة

ندخل الحين بشهر مارس بعد ما انتهى شهر الجنون شهر فبراير وانا اعتبره شهر جنون لان تصير فيه اشياء وايد بالكويت مبالغ فيها او تصير فيه اشياء تطبق بصورة مختلفه عن المطلوب عنها من بداية الشهر فى الاعوام السابقة من هلا فبراير وما يصحبه من غباء فى التنظيم وسوء فى توزيع الانشطة وبعدين يدخل علينا عيد الحب وتختب محلات الورد على غير معنى وتعال تطمش على المراهقين ويا ريت يسوى شى برومانسية لا تلقاهم ركضة والاخت تبجى لان ما مدها تشترى حق الصاحب وبعدين يقفل علينا الشهر بالعيد الوطنى والتحرير وتعال اقبض عقد على البحر ويوم تطور شوى صار القز فى بنيدر لا ويقولك هم اخترب لان ما خلوا الالمان شى

هذى اغلبها امور اجتماعية لكن الشى الجديد اللى صار هالسنة خطاب الامير فى انتهاء اربعين وفاة والعيد الوطنى اللى الناس كانت تنطر كلمة نشوف فيها تعديل حق الاوضاع القائمة

الوزارة اللى موجودة ينطبق عليها المثل (مشتهية ومستحية ) لانهم بين البينين ناس زينة وناس تضحك او بالاصح نقدر نقول عنها وزارة تقزورة

عدد الكويتين حسب ما ورد فى الهيئة للمعلومات المدنية تقريبا بقى عليهم خمسة وعشرين الف ويوصلون مليون هذا اذا ما يتنتا انفلونزا الطيور وطبرت لها جم واحد و 90% منهم او اكثر مقترضين من شيوخ ونواب ومواطنين عاديين والناس طارت يوم قالوا بطيحون القروض والنتيجة صفر

اللى قاعد اشوفه ان الناس العاقلة ما تبى كاش تبى اصلاح تبى البلد تتطور يكون عندنا مستشفى مثل الاوادم شارع مثل الاوادم تدش مناطق نفس قرطبة والسرة وبالاخص الاولى تقول داش حظرة تتقلص وتحلف وراس امك ان اللى ياى جدامك لازم اهم يرد شى الصراحة يضحك

وانا قاعد اكتب هالبوست قاعد اطالع البورصة الكويتية الصراحة نفشل السوق نازل والاداء الاقتصادى ضعيف والناس متعلقة تبى بس تتنفس ناس باعت سياراتها ودشت البورصة وناس تدينت انا اللى اشوفه هذا اكبر عيب بدولة تعتبر من اغنى الدول النفطية وصاحبة اعلى عوائد مالية

بالسعودية لما توفى الملك فهد الله يرحمه نزلت البورصة عندهم لمدة 45 دقيقة فقط ومن بعدها لى اليوم ظلت صاعدة حتى حققت 4000 نقطة باقل من جم شهر لو ما الاحداث اللى صارت من جم يوم

الاقتصاد يتهزهز والعوامل الاجتماعية السلبية كثيرة والشباب المنحل يزيد والتعليم منخفض جدا جدا والاشياء اللى تضحك فى المجتمع صارت وايد واللى زاد الطين بله ظهور الطائفية والقبلية وامور اسخف واسخف كل هذا ويقولون تفائلوا

اذا ما حسينا بخطورة الوضع وبطلنا نكتب عن تفاهات الامور ويصير عندنا على الاقل لو 1% من المساهمة فى نشر كلمة او ابداء راى ممكن يساعد صدقونى بعد عشر سنوات اذا الله معطينا عمر راح نختفى من الخريطة الاجتماعية كمجتمع ونظل مجرد اجسام فارغة من العقل وتحمل اوراق مكتوب عليها الجنسية كويتى

وسلمولى على اللى يهوهو ولا يتحرك يسوى شى