الطموح و العمل والمثابرة والالتزام وقليل من المشاغبة تكون الحياة ناجحة

Thursday, April 17, 2008

قريحة الحجية



تقول الحجية

يا وليدي ما يهم من يفوز

انا تعبت ربيت وعطيت

وخيرهم به غيري ينول

كل اللى ابي من ربي

يهدي هالبلد

ما همني السعدون والا بو رمية والا حتي عنتروس ينجحون

هذي حالة

جمعية تصلخنا

وعيال يلبحون

وين أولي وين أروح

أهم بالملايين يسبحون

وانا علي الله ثم علي معاش الشئوون

أشكي حق وزير والا وكيل ما يلتفتون

كلهم لاهين ما بين حسابات

وكلام تحت الطاولة يدور

أوقف بهالشموس ساعات

لما يطق ميخي وادور

ما اعرف شمالي من جنوبي

وكل بهوي داره ينود

أبي السلامة يا عيالي

أبي أموت مرتاح بالي

ليش يا ديرتي عيالج بج يفتنون ؟

البدو يلبحون والتجار ينهبون والشيعة يصيحون

كل اليوم صار لنا مظلوم!

وين العدل وين الرضي وين كلام اللى يسمعون

كل طاق راسه وماشى وعن العقل يقرقعون

لكن مسيركم توصلون بهالعمر

حزتها بتعرفون

كل ما سويته في بلدكم

شر ومصايب تدمع لها عيون

19 comments:

حياتي هدف مو عبث said...

هالحجية تسوى ألف واحد

من اللي يدعون حب الكويت وأهلها

:)

ام الحفيز said...

كلام وكلام وكلام.........بس منو الي يسمع......لافظا فوووووك وجعل ينجعم حاسدوك يا مشاري يا ولد ام مشاري جبتها بالصميم يا خلف يداني صج انك ولد بطنها
وما اقول الا اوفييييييييييييييه عليج يا ديرتي اوفييييييييه ويفكج من شر الفتن وعوير و زوير والمنتخبين الي مافيهم خير

JuVeNTiNa said...

عسى الله لا يوفقك كل شخص يفكر بنفسه قبل الكويت .. و الله والله بتضيع الكويت و السبه المصالح .. الله يستر

Najmah said...

الله
صح لساااانها

ليت لها يسمعوون

Peace said...

ان شاء الله يسمعون كلام الحجيه
و الله يهدي الاوضاع

قلب طفله said...

صح لسانك و لسان حال الحجيه

اللي يعور القلب

وين من يسمع و يفهم يا اخوي

دمت بود

بوتشخيص said...

تسلم الحجية وتسلم إنت :)

J Daily said...

صح لسان الحجيه ((:

charisma said...

اى والله صاجه
الله يرحم الحال
منها الكثير

وصباحك فل
:)

Eng_Q8 said...

عسى الله يطول بعمر هالحجيه

Shaima'a Alkandari said...

ايه ايه دست عالوتر ياخوي

العيون تبجي على اللى قاعد يصير

الله كريم الله كريم


الكويت بتبقى وبتبقى وبتنظف ان شاءالله

SAJA.S said...

الله يهد الجميع .. وان شاء الله خير

فتى الجبل said...

الاهم ان احنا نختار اللي يخدم الكويت وبس

فريج سعود said...

الا نشفت العيون

فراوله said...

مساالخير والكرامه
عزيزي
اللي يعيش ياما يشوف
صح لسانك
يا
صاحب
القلم
الشريف
:)

loco said...

3ashat el 7ajyah :P

Aldenya said...

يسلم راسها ويسلم راسك
ويسلم راس كل مواطن شريف يحب هالأرض الطيبة

The Voice Within said...

وين العدل وين الرضي وين كلام اللى يسمعون


كل طاق راسه وماشى وعن العقل يقرقعون





أول شي صح لسانك


وبعدين صج .. شنو تعني كلمة "العدل" هاليومين ؟

اللي تعلمناه ان العدل مقياس ثابت بس اللي صاير ان قام يتغير بتغير الاشخاص والمواقف



يسلموووو

3ateeja said...

البدو يلبحون والتجار ينهبون والشيعة يصيحون


كل اليوم صار لنا مظلوم!


زين يعني احنا طلعنا من الحسبه
الحمد الله

والله قلت برجع على انتخابات الجو عند مش مش حامي

لا بس زين طلعت ريلاكس